Azọ́nwiwa po Dẹ́didi Po

TO WEHIHIA daga whenu, be hiẹ nọ gbàfọ do hogbe tangan delẹ ji wẹ ya? Kavi eyin hiẹ wá tin to mẹplidopọ lẹ nukọn nado na hodidọ de, be hiẹ nọ mọ dọ emi nọ saba to avìdla nado mọ hogbe he sọgbe lẹ wẹ ya? Eyin mọwẹ, e sọgan yin nuhahun dẹ́didi tọn wẹ a tindo. Mẹhe didẹ́ nọ hiawe bo nọ dọho to aliho de mẹ bọ hogbe po linlẹn lẹ po nọ to tintọ́n linsinlinsin, po awubibọ he sọawuhia hezeheze po. Ehe ma zẹẹmẹdo dọ e nọ to hodọ plùlù, dọ e nọ dọho po awuyiya taun po, kavi dọ e nọ dọho matin nulẹnpọn gba. Hodidọ etọn nọ vivi bo nọ yọ́nsè. Dẹ́didi nọ yin nina ayidonugo vonọtaun to Wehọmẹ Lizọnyizọn Yẹwhehọluduta tọn mẹ.

Nususu wẹ sọgan hẹn dẹ́madi wá. Be hiẹ dona na ayidonugo vonọtaun hlan depope to nuhe bọdego helẹ mẹ wẹ ya? (1) To wehihia na mẹdevo lẹ whenu, akọmajẹ hẹ hogbe delẹ sọgan hẹn awuwhiwhle wá. (2) Otán mìmì vude to ofi susu sọgan dekọtọn do hodidọ he ma dídí mẹ. (3) Awumawle sọgan yidogọna nuhahun lọ. (4) To hodidọ to pipli de nukọn mẹ, nuhe nọ saba hẹn dẹ́madi wá wẹ awugbopo nado tò nudọnamẹ lẹ do whinnu-whinnu. (5) Gbèmasè ganji sọgan hẹn mẹde nado whleawu dile e to avìdla nado mọ hogbe he sọgbe lẹ. (6) Eyin hogbe susu hugan yin nùzindeji, dẹ́didi ma sọgan yọnbasi gba. (7) Awugbopo nado jẹakọ hẹ lehe hogbe lẹ nọ yin yiyizan ganji do sọgan yidogọna nuhahun lọ.

Eyin hiẹ ma didẹ́, mẹplidopọ lẹ to Plitẹnhọ Ahọluduta tọn mẹ ma na fọ́n jó we do to paa mẹ gba, ṣigba ayiha yetọn lẹ sọgan dánpe. Taidi kọdetọn de, suhugan nuhe hiẹ dọ tọn sọgan yin hinhẹnbú.

To alọ devo mẹ, mẹdehihọ́ dona yin yiyizan bọ hodidọ he tindo huhlọn bo dídí ma na lẹzun aṣẹ-glanglan panamẹ tọn, vlavo bo tlẹ hẹn ayimajai wá na mẹplidopọ lẹ. Eyin na vogbingbọn to aṣa lẹ mẹ wutu, gbẹtọ lẹ nọ pọ́n we hlan taidi hófúsadọtọ kavi taidi mẹhe ma kúdo nuhe dọ e te ji, enẹ na dù to lẹndai towe ji. E jẹ na ayidego dọ dile apọsteli Paulu tlẹ yin hodọtọ numimọnọ de sọ, e dọnsẹpọ Kọlintinu lẹ “to madogán mẹ, podọ to obu mẹ, podọ to sisọsisọ susu mẹ” na ewọ ma nado dọ̀n ayidonugo he ma jẹ wá ede ji wutu.—1 Kọl. 2:3.

Walọ He Dona Yin Didapana Lẹ. Mẹsusu wẹ tindo aṣa lọ nado nọ yí hogbe taidi “ẹn ẹn” lẹ zan to whenuena yé to hodọ. Mẹdevo lẹ nọ saba bẹ linlẹn de jẹeji po hogbe lọ po dọ “todin,” kavi yé nọ blá hodidọ taidi “yèdọ,” kavi “a mọ,” do nudepope he yé to didọ go. Vlavo hiẹ ma doayi lehe a nọ yawu yí hogbe mọnkọtọn lẹ zan whẹwhẹ do go. Hiẹ sọgan tẹ́n adà zepọn tọn de pọ́n to ehe mẹ mẹde na dotoai hlan we bosọ vọ́ hogbe ehelẹ dọ to whedepopenu he a dọ yé. E sọgan paṣa we.

Mẹdelẹ nọ hiawe bo nọ dọho to aliho lobọlobọ tọn mẹ. Enẹ wẹ yindọ, yé nọ bẹ hodidọ de jẹeji bọ to enẹgodo yé nọ donùte to dáglámẹ bo na wá vọ́ apadewhe nuhe yé ko dọ dai lọ tọn dọ.

Ṣogan mẹdevo lẹ nọ dọho po awuyiya he jẹ po, ṣigba yé nọ bẹjẹeji po linlẹn de po bọ, to ṣẹnṣẹn hodidọ lọ tọn, yé nọ diọ jẹ linlẹn devo ji. Dile etlẹ yindọ hogbe lẹ to tintọ́n linsinlinsin, linlẹn lẹ didiọ to ajijimẹ nọ dapàgona dẹ́didi.

Lehe Yè Sọgan Hẹn ẹn Pọnte Do. Eyin nuhahun towe wẹ yindọ hiẹ nọ saba to avìdla nado mọ hogbe he sọgbe, hiẹ dona dovivẹnu vẹkuvẹku nado plọn hogbe susu dogọ. Doayi hogbe he hiẹ ma jẹakọ hẹ lẹ go ganji to Atọ̀họ̀-Nuhihọ́ Lọ Tọn, Réveillez-vous!, po owe devo he hiẹ sọgan nọ hia lẹ po mẹ. Pọ́n ehelẹ to wezẹhomẹ de mẹ, pọ́n lehe yé yin kinkàn do po zẹẹmẹ yetọn po, bo yí delẹ to hogbe ehelẹ mẹ dogọ hogbe he a nọ yizan lẹ. Eyin wezẹhomẹ de ma tin-to-aimẹ, biọ alọgọ sọn mẹhe nọ dó ogbè lọ ganji de dè.

Hinhẹn ẹn zun aṣa nado nọ hiawe daga to gbesisọmẹ na yidogọna nukọnyiyi. Doayi hogbe he sinyẹn lẹ go, bo ylọ ehelẹ daga whlasusu.

Nado sọgan hiawe po dẹ́didi po, dandannu wẹ e yin nado mọnukunnujẹ kanṣiṣa he hogbe lẹ tindo to hodidọ blebu de mẹ. To paa mẹ hogbe lẹ dona yin hihia to pọmẹ nado sọgan de linlẹn he wekantọ lọ tindo tọ́n. Doayi pọninọ hogbe ehelẹ tọn go ganji. Eyin e na gọalọna we, dohiagona yé. Yanwle towe mayin nado ylọ hogbe lẹ ganji poun gba ṣigba nado de linlẹn lẹ tọ́n hezeheze ga. To kikeje hodidọ blebu de pọ́n godo, yì dehe bọdego ji kakajẹ whenuena hiẹ na plọn hukan lọ blebu. Jẹakọ hẹ lehe linlẹn lọ lẹ yin awuwlena debọdo-dego do. Enẹgodo plọn nado hia ẹ daga. Hia hukan lọ pludopludo kakajẹ whenuena hiẹ sọgan hia ẹ matin afọgbigbà kavi otán mìmì to fihe ma jẹ lẹ. Enẹgodo yì hukan devo lẹ ji.

Todin, hẹn awuyiya towe jideji. Eyin hiẹ ko wá mọnukunnujẹ kanṣiṣa he hogbe lọ lẹ tindo to hodidọ blebu de mẹ go, hiẹ na penugo nado mọ hugan hogbe dopo to ojlẹ dopo mẹ podọ nado lẹnnupọndo nuhe dona bọdego ji. Ehe na yidogọna kọdetọn dagbe wehihia towe tọn taun.

Hinhẹn owe he mayin awuwlena jẹnukọn lẹ hihia zun aṣa sọgan yin azọ́nplọnmẹ họakuẹ de. Di apajlẹ, matin awuwle jẹnukọn, nọ hia wefọ azán lọ gbè tọn po zẹẹmẹ etọn po daga; nọ wà ẹ to gbesisọmẹ. Hẹn ẹn zun aṣa towe nado nọ mọ hogbe susu he do linlẹn blebu lẹ hia kakati nado nọ mọ hogbe dopo poun to ojlẹ dopo mẹ.

To hodọdopọ mẹ, dẹ́didi nọ biọ dọ hiẹ ni lẹnnupọn whẹpo do dọho. Hẹn enẹ zun aṣa to nuwiwa egbesọegbesọ tọn towe mẹ. Basi dide linlẹn he hiẹ jlo na detọ́n lẹ tọn po aliho he mẹ hiẹ na dọ yé te po; enẹgodo jẹ hodọ ji. Ma nọ whlẹndo ji blo. Dovivẹnu nado dọ linlẹn blebu de matin teninọ kavi linlẹn lẹ didiọ to dáglámẹ. Hiẹ sọgan mọ ẹn taidi alọgọnamẹnu nado nọ yí hodidọ kleun, he bọawu lẹ zan.

Hogbe lẹ dona tọ́n to jọwamọ-liho eyin hiẹ yọ́n nuhe hiẹ jlo na dọ. Nado dọ ẹ to paa mẹ, e mayin dandannu nado ṣinyan hogbe he hiẹ na yizan lẹ gba. Na zepọn tọn wutu, e na yọ́n hugan nado hẹn ẹn diun poun dọ linlẹn lọ họnwun to ayiha towe mẹ podọ to enẹgodo lẹnnupọndo hogbe lẹ ji dile hiẹ to hodọ. Eyin hiẹ wàmọ bo hẹn ayiha towe do linlẹn lọ ji kakati nido yin do hogbe he hiẹ to didọtọ́n lẹ ji, hogbe lọ lẹ na nọ tọ́n poun to jọwamọ-liho, podọ hiẹ na dọho sọn ahun towe mẹ wá. Ṣigba tlolo he hiẹ jẹ nulẹnpọn do hogbe lẹ ji kakati nido yin do linlẹn lẹ ji, hiẹ na jẹ afọgbà ji to hodidọ towe mẹ. Po zepọn po, hiẹ sọgan tindo kọdetọn dagbe to awuwiwlena dẹ́didi mẹ, yèdọ jẹhẹnu titengbe de to hodidọ po wehihia kọdetọn dagbe tọn po mẹ.

To whenuena Mose yin azọ́ndena nado ze afọ Jehovah tọn dai na akọta Islaeli tọn podọ to Falo Egipti tọn nukọn, e lẹndọ emi ma pegan gba. Etẹwutu wẹ? Na e ma didẹ́ to hodidọ mẹ wutu; e sọgan ko tindo nuhahun hodidọ tọn de. (Eks. 4:10; 6:12) Mose dín whẹjijọ lẹ, ṣigba Jiwheyẹwhe ma kẹalọyi depope to whẹjijọ etọn lẹ mẹ gba. Jehovah do Aalọn hlan taidi hoyidọtọ de, ṣigba E sọ gọalọna Mose nado dọho ga. E mayin mẹdopodopo po pipli pẹvi lẹ po kẹdẹ wẹ Mose dọho na pludopludo po kọdetọn dagbe po gba ṣigba na akọta lọ blebu ga. (Deut. 1:1-3; 5:1; 29:2; 31:1, 2, 30; 33:1) Eyin hiẹ yí adà towe basi po sọwhiwhe po bo dejido Jehovah go, hiẹ lọsu sọgan yí hodidọ towe zan nado gbògbéna Jiwheyẹwhe.