Do Sisi Hia Mẹdevo Lẹ

BIBLU dọna mí nado ‘gbògbéna gbẹtọ wunmẹ lẹpo’ bo ma “dọho gbigble do mẹde go.” (1 Pita 2:17; Titu 3:2) Na nugbo tọn, mẹhe mí dukosọ hẹ lẹpo wẹ ‘yin didá to apajlẹ Jiwheyẹwhe tọn mẹ.’ (Jak. 3:9) Klisti kú na dopodopo mítọn. (Joh. 3:16) Podọ mẹlẹpo wẹ jẹ nado sè wẹndagbe lọ nado sọgan yinuwa do e ji bo yin whinwhlẹngán. (2 Pita 3:9) Mẹdelẹ tindo jẹhẹnu kavi aṣẹpipa he jẹ na gbégbò vonọtaun lẹ.

Naegbọn mẹdelẹ nọ tẹnpọn nado dín whẹwhinwhẹ́n ma nado do wunmẹ sisi he Biblu na tuli etọn lọ hia? Aṣa lẹdo tọn sọgan nọ do mẹhe jẹ na gbégbò hia sọgbe hẹ yindidi, sinmẹ agbasa tọn, agbasalilo, owhe, adọkun, kavi otẹn he mẹ ewọ sunnu kavi yọnnu tin te to ogbẹ́ gbẹtọvi lẹ tọn mẹ. Nuyiwa gblezọn ahọluzọnwatọ lẹ tọn he gbayipe ko zọ́n bọ osi ma nọ yin didohia aṣẹpatọ lẹ ba. To aigba delẹ ji, gbẹtọ lẹ ma nọ tindo pekọ po ninọmẹ gbẹzan yetọn tọn po gba, vlavo yé dona nọ wazọ́n na ganhiho susu nado sọgan mọ onú mananọmatindo egbesọ tọn lẹ poun, bọ gbẹtọ he ma nọ do sisi hia lẹ wẹ sọ lẹdo yé pé. Hagbẹ lẹ nọ gbidikọna jọja lẹ nado kọnawudopọ hẹ yé to atẹṣiṣi sọta mẹplọntọ he ma diyin lẹ po aṣẹpatọ devo lẹ po mẹ. Mẹsusu nọ yin nuyiwadeji gbọn yẹdide televiziọn tọn lẹ dali he to ovi he nọ hẹn mẹjitọ yetọn lẹ jẹflumẹ bo nọ paṣẹ na yé lẹ dohia. E nọ biọ vivẹnudido ma nado dike linlẹn aihọn tọn mọnkọtọn lẹ ni diọ nukun nujọnu tọn he mí nọ yí do pọ́n mẹdevo lẹ. Ṣigba, eyin mí na yẹyi gbẹtọ lẹ, ehe nọ hùn dotẹnmẹ dote nado dọ linlẹn yetọn tọ́n po awubibọ po.

Awusọhia He Tindo Sisi. Mẹhe to mahẹ tindo to azọ́n he gando sinsẹ̀n go de mẹ yin nukundo nado nọ do sisi hia gbọn aṣọdido po nuyiwa dagbe etọn po dali. Nuhe nọ yin pinpọnhlan taidi walọyizan dagbe gbọnvo sọn fide jẹ fidevo. Mẹdelẹ nọ mọ ẹn yin mẹmasi nado dọnsẹpọ mẹdevo po gbakun po to ota kavi po alọ dopo po to ṣokotopòmẹ. To fidevo lẹ, gbẹtọ lẹ sọgan kẹalọyi walọyizan mọnkọtọn. Nọ ze aṣa lẹdo lọ tọn lẹ do lẹnpọn mẹ ma nado hẹn homẹgblena gbẹtọ lẹ. Mọwiwà sọgan gọalọna we nado dapana nuhe sọgan hẹnalọdotena we lẹ nado ze wẹndagbe lọ donukọnnamẹ po kọdetọn dagbe po.

Nudopolọ gando lehe mí nọ dọho na mẹdevo lẹ do go, titengbe mẹhomẹ lẹ. To paa mẹ, e nọ yin pinpọnhlan taidi hábamẹ eyin jọja lẹ yí yinkọ do ylọ mẹhomẹ lẹ adavo yé yin dotẹnmẹ na nado wàmọ. To fidelẹ, mẹhomẹ lẹ lọsu nọ yin nukundo ma nado ylọ yinkọ jonọ lẹ tọn. Humọ, kakati nado dọ “hiẹ,” ogbè susu nọ yí “mì” zan kavi hogbe devo de nado do sisi hia na mẹhomẹ kavi aṣẹpatọ de.

Nudọdomẹ po Sisi Po. To gbétatò delẹ mẹ, e nọ yin nukundo dọ hiẹ ni dọnudo mẹhe a dukosọ hẹ de, vlavo to whenuena a to zọnlinzin to aliho ji kavi whenuena a biọ owhé de gbè. Ehe nọ yin wiwà gbọn nudọdomẹ kleun de, nukiko yẹsẹ, alọ zize namẹ, kavi ota yíyí do dọnudomẹ poun dali. Kọgbigbẹ́ mẹdevo go nọ yin pinpọnhlan taidi mẹmasi.

Nalete, mẹdelẹ sọgan tindo numọtolanmẹ lọ dọ a gbẹkọ yé go eyin a tlẹ dọnudo yé. Gbọnna? Na yé sọgan tunwun e go dọ a gboawupo nado kàndadotana yé wutu. Nuhe gbayipe wẹ e yin nado yí oblọ agbasa tọn delẹ do jlẹ gbẹtọ lẹ. Mẹhe tindo oblọ agbasa tọn po nuhahun agbasalilo tọn lẹ po nọ saba yin didapana. Etomọṣo, Ohó Jiwheyẹwhe tọn do lehe mí na yí owanyi po sisi po do yinuwa hẹ omẹ mọnkọtọn lẹ do hia mí. (Mat. 8:2, 3) Mímẹpo wẹ yin gingandego to aliho delẹ mẹ gbọn ogú ylando Adam tọn he mí dù dali. Be homẹ towe na hùn eyin oblọ agbasa tọn he a tindo lẹ wẹ mẹdevo lẹ nọ yí do jlẹ we to whepoponu ya? Be hiẹ ma na jlo hugan dọ yé ni nọ yí jẹhẹnu dagbe towe lẹ do jlẹ we ya?

Osi sọ bẹ tatọ́-yinyin yinyọnẹn hẹn ga. To fidelẹ, dandannu wẹ e yin nado dọho na tatọ́ owhé de tọn whẹpo do dekunnu na mẹdevo lẹ to whédo lọ mẹ. Dile etlẹ yindọ Jehovah wẹ degbena mí nado dọyẹwheho bo plọnmẹ, mí yọnẹn dọ mẹjitọ lẹ wẹ Jiwheyẹwhe na aṣẹpipa lọ nado plọn bo domẹplọnlọ ovi yetọn lẹ go, bosọ deanana yé. (Efe. 6:1-4) Enẹwutu, to whenuena mí dla owhé de pọ́n, nuhe sọgbe wẹ e yin to whepoponu nado dọho na mẹjitọ lẹ jẹnukọn whẹpo do bẹ hodọdopọ gaa depope jẹeji hẹ ovi lẹ.

Mí dona na sisi mẹhomẹ he tindo owhe to ota lẹ, na yé tindo numimọ wutu. (Job 32:6, 7) Ehe yinyọnẹn gọalọna mẹmẹyọnnu gbehosọnalitọ de he dla dawe mẹhomẹ de pọ́n to Sri Lanka. Jẹnukọn whẹ́, dawe lọ gbẹ́ ohó etọn gbidigbidi bo dọmọ: “Nawẹ hiẹ pẹvi ehe na plọn mi Biblu gbọn?” Ṣigba e gblọn dọmọ: “Nado dọhojọho, yẹn ma wá nado plọnnu mì gba, ṣigba nude wẹ yẹn plọn he hẹn homẹ ṣie hùn sọmọ bọ n’dona dọ ẹ na mẹdevo lẹ.” Gbeyiyi gbehosọnalitọ lọ tọn heyin didọ po sisi po fọ́n ojlo dawe lọ tọn dote. “Bọ etẹwẹ yin onú lọ he a plọn?” wẹ e kanse. Jọja lọ dọ dọ, “Yẹn ko plọn lehe n’sọgan wagbọn do nọgbẹ̀ kakadoi.” Taidi kọdetọn de, dawe mẹhomẹ lọ jẹ Biblu plọn ji hẹ Kunnudetọ Jehovah tọn lẹ. E mayin mẹhomẹ lẹpo wẹ na biọ sisi mọnkọtọn whẹpo do kẹalọyi owẹ̀n lọ gba, ṣigba suhugan yetọn na yọ́n pinpẹn etọn.

Nalete, e yọnbasi nado do gbégbò hia zẹjlẹgo. To Lopo Pacifique tọn lẹ ji podọ to fidevo lẹ, yíyí hogbe sisi tọn he nọ yin yiyizan to whenuena yè to hodọna kọmẹ-gán kavi akọ̀-gán lẹ zan sọgan gọalọna Kunnudetọ lẹ nado mọ todoaitọ susu. Humọ e sọgan hùn dotẹnmẹ lọ do nùvo na yé nado dọho na kọmẹ-gán lẹ po mẹhe tin to aṣẹpipa yetọn glọ lẹ po. Etomọṣo, mẹpipa zẹjlẹgo ma sọgbe bo dona yin didapana. (Howh. 29:5) Mọdopolọ, ogbè de sọgan tindo hogbe tẹnmẹ-yinkọ tọn lẹ, ṣigba osi didohia Klistiani tọn ma biọ dọ ehelẹ ni yin yiyizan zẹjlẹgo gba.

Hodidọ po Sisi Po. Biblu dotuhomẹna mí nado basi zẹẹmẹ whẹwhinwhẹ́n todido mítọn tọn ‘to walọmimiọn po osi sisosiso po’ mẹ. (1 Pita 3:15) Enẹwutu, dile etlẹ yindọ mí sọgan penugo nado yawu mọ fie pọndohlan mẹdevo tọn jẹagọ te, be nuyọnẹnnu wẹ e na yin nado do yé hia to aliho he sọgan dowinyan ẹn mẹ ya? Be e ma na pọnte hugan nado dotoai po sọwhiwhe po, vlavo bo kàn nuhe zọ́n bọ e do lẹnmọ sè, podọ to enẹgodo ze linlẹn etọn lẹ do lẹnpọn mẹ dile mí to hoyijlẹdohogo hẹ ẹ sọn Owe-wiwe mẹ ya?

Sisi he nkọ mí dohia mẹdopodopo to gbonu sọ dona sọawuhia to whenuena mí to hodọna mẹplidopọ lẹ sọn oplò ji. Hodọtọ he tindo sisi na mẹplidopọ etọn lẹ ma na gblewhẹdo yé po fifiẹ po gba kavi do walọyizan agọ̀ hia taidi: “Nude ma dù mi eyin a hodo ayinamẹ ehe kavi lala.” Hodidọ to aliho enẹ mẹ na hẹn mẹdevo lẹ gbọjọ. Lehe e na pọnte hugan nado pọ́n mẹplidopọ towe lẹ hlan taidi pipli mẹhe yiwanna Jehovah bo jlo nado sẹ̀n ẹn lẹ tọn do sọ! To apajlẹ Jesu tọn hihodo mẹ, mí dona do mẹtọnhopọn hia to whenuena mí to nuyiwa hẹ mẹhe sọgan yin madogánnọ to gbigbọ-liho lẹ, mẹhe ma tindo numimọ sọmọ lẹ, kavi mẹhe ma nọ yawu yí ayinamẹ Biblu tọn do yizan mẹ lẹ.

Mẹplidopọ lẹ na doayi osi he hodọtọ lọ tindo na yé go eyin e nọ yí ede dogọ taidi dopo to mẹhe dona yí Ohó Jiwheyẹwhe tọn do yizan mẹ lẹ. Enẹwutu, nuyọnẹnnu wẹ e yin nado dapana hogbe lọ “hiẹ” kavi “mì” yiyizan gbọzangbọzan to whenuena a to yizan wefọ lẹ tọn basi. Di apajlẹ, doayi vogbingbọn he tin to kanbiọ ehelẹ ṣẹnṣẹn go, “Be hiẹ to nuhe go a pé lẹpo wà ya?” po hodidọ lọ po dọ “Dopodopo mítọn dona kanse ede dọ: ‘Be yẹn to nuhe go yẹn pé lẹpo wà ya?’ ” Nuagokun kanbiọ lọ lẹ tọn yin nudopolọ, ṣigba tintan lọ de linlẹn lọ tọ́n dọ hodọtọ lọ ma ze ede do otẹn dopolọ mẹ hẹ mẹplidopọ etọn lẹ gba. Awetọ lọ na tuli mẹdopodopo, gọna hodọtọ lọ, nado gbeje ninọmẹ po mẹwhinwhàn etọn titi lẹ po pọ́n.

Nọavunte sọta whlepọn lọ nado nọ dọ ohó he whẹ́n kikò lẹ nado sọgan dó nukiko na mẹplidopọ lẹ poun. Ehe nọ fẹayihasẹnamẹ sọn yẹyi owẹ̀n Biblu tọn ji. Nugbo wẹ dọ mí dona hùnhomẹ to sinsẹ̀nzọn mítọn hlan Jiwheyẹwhe mẹ. Adà azọ́ndenamẹ mítọn tọn delẹ tlẹ sọgan tin he na whẹ́n kikò. Etomọṣo, osi matindo na mẹplidopọ lẹ po Jiwheyẹwhe po wẹ e na yin nado diọ whẹho nujọnu tọn lẹ zun nukiko tọn.

Mì gbọ awusọhia mítọn, walọyizan mítọn, po hodidọ mítọn po ni nọ dohia to whepoponu dọ mí nọ pọ́n mẹdevo lẹ hlan dile Jehovah ko plọn mí nado nọ wà do.