Apajlẹ sọn Ninọmẹ He Yè Jẹakọ Hẹ lẹ Mẹ

NA NUGBO tọn, onú titengbe wẹ e yin dọ apajlẹ depope he a yizan ni sọgbe hẹ nuhe ji a to hodọdo. Ṣigba, eyin yé na tindo kọdetọn dagbe, onú titengbe wẹ e yin ga dọ yé ni sọgbe hẹ mẹplidopọ towe lẹ.

To hodidọ na pipli de whenu, nawẹ mẹplidopọ lọ sọgan yinuwa do apajlẹ he a jlo na yizan ji gbọn? Etẹwẹ Jesu Klisti wà? Vlavo e to hodọna gbẹtọgun lẹ kavi devi etọn lẹ, apajlẹ he Jesu nọ yizan lẹ ma nọ wá sọn aṣa aigba he mayin Islaeli tọn lẹ mẹ gba. Mẹplidopọ etọn lẹ ma na jẹakọ hẹ apajlẹ mọnkọtọn lẹ gba. Di dohia, Jesu ma donù aliho gbẹzan họ̀nmẹ Egipti tọn kavi aṣa sinsẹ̀n Inde tọn lẹ go gba. Ṣogan, apajlẹ etọn lẹ dlẹnalọdo nuwiwa he gbẹtọ lẹ jẹakọ hẹ to aigba lẹpo ji. E dọho gando avọ̀ titọ̀, ajọwiwa, nuhọakuẹ de hinhẹnbú, po hùnwhẹ alọwle tọn lẹ yìyì po go. E yọ́n nuhe nọ yin nuyiwa gbẹtọ lẹ tọn to ninọmẹ voovo lẹ glọ, bo yí ehe zan. (Malku 2:21; Luku 14:7-11; 15:8, 9; 19:15-23) To whenuena e yindọ omẹ Islaeli tọn lẹ na taun tọn wẹ yẹwhehodidọ gbangba Jesu tọn tin na, apajlẹ etọn lẹ nọ saba dlẹnalọdo nuwiwa po nuhe yin apadewhe gbẹninọ egbesọegbesọ tọn yetọn lẹ po. Enẹwutu, e dlẹnalọdo onú taidi glelilẹ, aliho he mẹ lẹngbọ nọ yigbe na lẹngbọhọtọ yetọn te, podọ ovẹn kinkọndo ayú kanlin tọn lẹ mẹ. (Malku 2:22; 4:2-9; Joh. 10:1-5) E sọ dlẹnalọdo apajlẹ whenuho tọn heyin yinyọnẹn ganji lẹ taidi gbẹtọvi awe tintan lẹ didá, Osingigọ azán Noa gbè tọn, vasudo Sọdọmi po Gọmọla po tọn, okú asi Lọti tọn, po mọmọ po sọyi. (Mat. 10:15; 19:4-6; 24:37-39; Luku 17:32) Be hiẹ lọsu nọ yí sọwhiwhe do gbadopọnna nuwiwa he gbayipe to lẹdo mẹplidopọ towe lẹ tọn mẹ po aṣa otò yetọn tọn po to awuwiwlena apajlẹ towe lẹ whenu ya?

Etẹwẹ eyin a ma to hodọna pipli de, ṣigba na mẹdopo kavi omẹ vude poun? Dovivẹnu nado din apajlẹ he sọgbe na mẹplidopọ kleun enẹ. To whenuena Jesu to kunnudena yọnnu Samalianu lọ to dòtọ he sẹpọ Sikali lọ kọ̀n, e dọho gando “osin ogbẹ̀nọ,” ‘ovẹ́ ma na hú omẹ gbede ba,’ po ‘asisa osin tọn he to sisà hlan ogbẹ̀ madopodo’ po go—ehe popolẹpo yin hodidọ yẹhiadonu tọn lẹ he tindo kanṣiṣa pẹkipẹki hẹ nuhe wà yọnnu lọ te. (Joh. 4:7-15) Podọ to whenuena e dọho na sunnu he ko to odọ̀ yetọn lẹ klọ, hogbe yẹhiadonu tọn he e yizan bẹ azọ́n whèhuhu tọn hẹn. (Luku 5:2-11) To nujijọ awe lẹpo mẹ, e sọgan ko dlẹnalọdo oglelilẹ, to whenuena e yindọ oglezọ́n gbayipe to lẹdo he yé nọ nọ̀ mẹ, ṣigba lehe apajlẹ etọn tindo kọdetọn dagbe do sọ to whenuena e dlẹnalọdo azọ́n yetọn titi nado wleawuna yẹdide he họnwun de to ayiha yetọn mẹ! Be hiẹ nọ dovivẹnu nado wàmọ ya?

Dile etlẹ yindọ Jesu na ayidonugo hlan “lẹngbọ búbú owhé Islaeli gbè tọn lẹ,” apọsteli Paulu ma ze ayidonugo etọn do Islaeli kẹdẹ ji gba ṣigba do akọta Kosi tọn lẹ ji ga. (Mat. 15:24; Owalọ 9:15) Be ehe zọ́n bọ Paulu dọho to aliho he gbọnvo mẹ wẹ ya? Mọwẹ. To whenuena e to wekanhlan Klistiani lẹ to Kọlinti, e dlẹnalọdo wezunhinhọ̀n, bo donù aṣa lọ nado nọ dùnú to tẹmpli boṣiọ tọn mẹ go, bosọ donù sadidi awhàngba tọn go, yèdọ nuhe Kosi enẹlẹ na ko jẹakọ hẹ lẹ.—1 Kọl. 8:1-10; 9:24, 25; 2 Kọl. 2:14-16.

Mọdopolọ, be a nọ yí sọwhiwhe zan taidi Jesu po Paulu po nado de apajlẹ he a na yizan to mẹpinplọn towe mẹ lẹ ya? Be a nọ lẹnnupọndo fie hosetọ towe lẹ wá sọn po nuhe yé nọ wà egbesọegbesọ lẹ po ji ya? Na nugbo tọn, diọdo susu ko tin to aihọn mẹ sọn owhe kanweko tintan whenu gbọ́n. Todin, mẹsusu nọ dotoaina linlin aihọn tọn lẹ to televiziọn mẹ. Yé nọ saba jẹakọ hẹ ninọmẹ tògodo tọn lẹ. Eyin ninọmẹ lọ niyẹn to lẹdo towe mẹ, nuhe sọgbe wẹ e yin nado yí nujijọ heyin didọ to linlin mẹ enẹlẹ zan nado na apajlẹ lẹ. Etomọṣo, nuhe nọ yinuwado gbẹtọ lẹ ji hugan nọ saba gando gbẹzan yetọn titi lẹ go—yèdọ owhé, whẹndo, azọ́n, núdùdù po ninọmẹ aimẹ lẹdo yetọn tọn po.

Eyin apajlẹ towe biọ zẹẹmẹ susu, enẹ sọgan dohia dọ mẹplidopọ towe lẹ ma jẹakọ hẹ nuhe ji a to hodọdo. Apajlẹ mọnkọtọn sọgan hẹn nuagokun towe dózin po awubibọ po. Taidi kọdetọn de, mẹplidopọ lẹ sọgan flin apajlẹ lọ bo wọ̀n nudọnamẹ Owe-wiwe tọn he a to vivẹnudo nado dọ.

Kakati nado basi nuyijlẹdonugo he gẹdẹ lẹ, Jesu yí apajlẹ he bọawu, egbesọegbesọ tọn lẹ zan. E yí onú pẹvi lẹ do basi zẹẹmẹ onú daho lẹ tọn bosọ yí nuhe bọawu lẹ do hẹn nuhe gẹdẹ lẹ họnwun. Gbọn nujijọ egbesọ tọn lẹ yiyijlẹdo nugbo Owe-wiwe tọn lẹ go dali, Jesu gọalọna gbẹtọ lẹ nado mọnukunnujẹ nugbo Owe-wiwe tọn lẹ mẹ po awubibọ po, bosọ flin yé. Apajlẹ dagbe nankọtọn die nado hodo!