Tadona Tindo Kọdetọn Dagbe

HIẸ sọgan ko yí sọwhiwhe do basi dodinnanu bo tò nudọnamẹ lẹ ganji to hodidọ towe mẹ. A tlẹ sọgan ko wleawuna homẹbibiọ he fọnjlodotenamẹ de. Ṣogan, onú dopo gbẹsọ pò—yèdọ tadona kọdetọn dagbenọ de. Ma yí nukunpẹvi do pọ́n nujọnu-yinyin etọn blo. Nuhe a dọ gbọngodo wẹ nọ saba yin finflin hugan. Eyin tadonahó lọ ma hunzo, nuhe a ko dọ jẹnukọn lẹ sọgan lẹzun osin-bado-papa-nẹgbé.

Gbadopọnna nuhe bọdego helẹ: Sẹpọ vivọnu gbẹzan etọn tọn, Jọṣua na hodidọ ayidego tọn de hlan sunnu mẹho akọta Islaeli tọn lẹ. To whenuena e ko dọ lehe Jehovah yinuwa hẹ Islaeli sọn azán Ablaham tọn lẹ gbè gbọ́n do godo, be Jọṣua basi bladopọ nuagokun hodidọ etọn lẹ tọn poun wẹ ya? Lala. Kakatimọ, po numọtolanmẹ he siso de po, e dotuhomẹna gbẹtọ lẹ dọmọ: “[Mì] dibusi OKLUNỌ, bo nọ sẹ̀n ẹn to dodo mẹ podọ to nugbo mẹ.” Hia tadonahó Jọṣua tọn heyin kinkàndai to Jọṣua 24:14, 15 mẹ na dewe.

Hodidọ ayidego tọn devo yin mimọ to Owalọ lẹ 2:14-36 mẹ. E yin nina gbọn apọsteli Pita dali hlan gbẹtọgun de to Jelusalẹm to Hùnwhẹ Pẹntikọsti owhe 33 W.M. tẹnmẹ. Jẹnukọn whẹ́, e basi zẹẹmẹ dọ yé to hẹndi dọdai Joẹli tọn gando túntún jẹgbonu gbigbọ Jiwheyẹwhe tọn go mọ. Enẹgodo, e do kanṣiṣa he enẹ tindo hẹ dọdai Mẹssia tọn lẹ to Psalm mẹ hia, ehe dọ dọdai fọnsọnku Jesu Klisti tọn po zizedaga etọn hlan adusilọ Jiwheyẹwhe tọn mẹ po. To tadonahó etọn mẹ, Pita dọ whẹho he hosetọ etọn lẹpo dona pannukọn hezeheze. E dọmọ: “Enẹwutu na mẹhe to owhé Islaeli tọn gbè lẹpo ni yọnẹn hezeheze dọ, Jiwheyẹwhe ko yí Jesu dopolọ, mẹhe mì whè do [yatin, NW] go, do basi Oklunọ, Klisti.” Hosetọ etọn lẹ kanse dọmọ: “Mẹho, mẹmẹsunnu emi, etẹwẹ mí ni wà?” Pita gblọn dọmọ: “Mì lẹnvọjọ, na yè ni sọ baptizi dopodopo mìtọn to oyín Jesu Klisti tọn mẹ.” (Owalọ 2:37, 38) To gbenẹgbe, omẹ 3 000 to mẹplidopọ etọn lẹ mẹ kẹalọyi nugbo lọ dogbọn Jesu Klisti dali na yé yin whinwhàn sisosiso gbọn nuhe yé ko sè dali wutu.

Nuagokun He Dona Yin Hinhẹn do Ayiha mẹ Lẹ. Nuhe a dọ to tadonahó towe mẹ dona tindo kanṣiṣa tlọlọ hẹ hosọ hodidọ towe tọn. E dona yin tadona he sọgbe pẹpẹ hẹ nuagokun he ji a dọhodo lẹ. Dile etlẹ yindọ a sọgan jlo nado yí hogbe tangan delẹ zan sọn hosọ towe mẹ, e mayin dandan nado vọ́ ẹ dọ tlọlọ gba.

Lẹndai paa hodidọ towe tọn wẹ nado na tuli mẹdevo lẹ nado yinuwa do nudọnamẹ he a zedonukọnnamẹ ji. Dopo to lẹndai tadonahó tọn lẹ mẹ wẹ nado do nuhe dona yin wiwà hia. To whenuena a de hosọ towe po nuagokun tangan lẹ po, be a yí sọwhiwhe do lẹnnupọndo nuhewutu nudọnamẹ lọ yin nujọnu na mẹplidopọ towe lẹ po nuhe yin yanwle towe po ji ya? Eyin mọwẹ, a dona yọ́n afọdide he a jlo dọ yé ni ze. Todin, a dona basi zẹẹmẹ afọdide lọ tọn podọ vlavo lehe e na yin zize gbọn.

To yidogọmẹ na didohia mẹplidopọ towe lẹ nuhe yé na wà, tadonahó towe dona whàn yé nado wà ẹ. E dona bẹ whẹwhinwhẹ́n tangan he wutu yé dona yinuwa po ale he sọgan dekọtọn sọn mọwiwà mẹ po hẹn. Eyin tadonahó yin awuwlena po sọwhiwhe po, bo yin didọ ganji, e na yidogọna kọdetọn dagbenọ-yinyin hodidọ lọ blebu tọn.

Hẹn ẹn do ayiha mẹ dọ hodidọ lọ to tadona kọ̀n wá. Nuhe a dọ dona do enẹ hia. Awuyiya towe dona nọ jlẹkaji ga. Ma dọho plùlù sọn bẹjẹeji kakajẹ vivọnu podọ to enẹgodo donùte to ajijimẹ blo. To alọ devo mẹ, ma dike ogbè towe ni yìdo hugan blo. Ogbè towe dona pemẹnu ṣigba ma dona yiaga hugan gba. Nuhe a dọ gbọngodo lẹ dona tindo ohia tadona tọn. A dona yí ahundopo po nujikudo po do dọ yé. To whenuena a to awuwlena hodidọ towe, dovivẹnu nado basi zepọn na tadonahó towe.

Nawẹ tadonahó lọ dona dite sọ? Mí ma sọgan ze enẹ sinai do sọha ganmẹ de tọn ji gba. Tadonahó lọ ma dona dite zẹjlẹgo gba. Nugandomẹgo he e tindo do mẹplidopọ lẹ ji wẹ na do tedidi lọ hia taidi nuhe sọgbe. Tadonahó mẹjlọdote tọn he bọawu, bo yì tlọlọ wẹ nọ saba yọnhugan. E sọ sọgan tindo kọdetọn dagbe eyin e dite vude bo bẹ apajlẹ kleun heyin awuwlena po sọwhiwhe po de hẹn. Yí tadona kleun heyin bibasi na owe Yẹwhehodọtọ tọn blebu, to Yẹwhehodọtọ 12:13, 14 mẹ jlẹdo Yẹwhehodidọ Osó ji tọn, heyin kinkàndai to Matiu 7:24-27 mẹ go.

To Lizọnyizọn Kunnudegbe Tọn Mẹ. Hiẹ na nọ saba tindo nuhudo ohó tadona tọn to lizọnyizọn kunnudegbe tọn mẹ hugan fidevo depope. Eyin a wleawu ganji bo tindo ojlo nujọnu tọn to gbẹtọ lẹ mẹ, a na tindo kọdetọn dagbe susu. Ayinamẹ heyin nina to weda he wayi lẹ mẹ sọgan yin yiyizan po kọdetọn dagbe po to whenuena hodọdopọ lọ tlẹ yin to hiẹ po whétọ lọ po kẹdẹ ṣẹnṣẹn.

Hodọdopọ de sọgan whègli taun. Alọnu whétọ lọ tọn sọgan ján. A sọgan nọma yí hugan nukunwhiwhe dopo poun zan. Eyin e biọ domọ, a sọgan dọ nude taidi ehe: “Yẹn mọnukunnujẹ ninọmẹ towe mẹ. Ṣigba dike yẹn ni má linlẹn tulinamẹ tọn dopo hẹ we. Biblu dohia dọ Mẹdatọ mítọn tindo lẹndai jiawu de nado hẹn aigba ehe zun nọtẹn de, fie gbẹtọ lẹ sọgan duvivi ogbẹ̀ tọn te kakadoi. Mí sọgan biọ Paladisi enẹ mẹ, ṣigba mí dona plọn nubiọtomẹsi Jiwheyẹwhe tọn lẹ whẹ́.” Kavi hiẹ sọgan dọna ẹn poun dọ a na lẹkọwa to whedevonu.

Eyin dlapọn lọ yin sinsán do gli na whétọ lọ ma jọmẹ wutu, a sọgan gbẹsọ tindo kọdetọn dagbe susu. Hẹn ayinamẹ he tin to Matiu 10:12, 13 po Lomunu lẹ 12:17, 18 mẹ po do ayiha mẹ. Ogbè fifá towe sọgan diọ nukun he e nọ yí do pọ́n Kunnudetọ Jehovah tọn lẹ. Wadotana dagbe de wẹ enẹ na yin.

To alọ devo mẹ, a sọgan ko duvivi hodọdopọ dagbe de tọn hẹ whétọ lọ. Naegbọn a ma na vọ́ nuagokun tangan he a jlo dọ e ni flin lọ dọ? Dike hodidọ towe ni whàn ẹn nado yinuwa.

Eyin a mọ dọ e na yọnbasi nado zindonukọn to hodọdopọ lọ mẹ to whedevonu, gọalọna whétọ lọ nado donukun we. Kàn kanbiọ de sè—vlavo ode heyin hodọdeji to Comment raisonner mẹ kavi to owe he nọ yin yiyizan nado deanana plọnmẹ Biblu whégbè tọn lẹ de mẹ. Hẹn yanwle towe do ayiha mẹ, dile Jesu zinnudeji bọ e yin kinkàndai to Matiu 28:19, 20 mẹ do.

Be plọnmẹ Biblu whégbè tọn de wẹ a to tadona ya? Vivọ hosọ lọ dọ na gọalọna nuplọntọ lọ nado flin nuhe yin hodọdeji. Kanbiọ dogbapọn tọn lẹ yiyizan na gọalọ nado zín nuagokun tangan lẹ do ayiha mẹ na nuplọntọ lọ, titengbe eyin dogbapọn enẹ ma yin bibasi to whlẹndo ji. Kanbiọ de gando lehe nuhe yin pinplọn lọ sọgan hẹn ale wá na nuplọntọ lọ do kavi lehe e sọgan má ẹn hẹ mẹdevo lẹ do go sọgan gọalọna ẹn nado yí nuhe e ko plọn do yizan mẹ.—Howh. 4:7.

Flin dọ tadonahó towe nọ yinuwado kọdetọn dagbe hodidọ towe blebu tọn ji.