Hodidọ He Sọgbe

ETẸWẸ sọgan hẹn Klistiani de nado dọ nuhe ma yin nugbo? E sọgan yindọ nuhe e sè wẹ e to vivọdọ matin dodinnanu he pé nado yọ́n nugbo-yinyin etọn. Kavi e sọgan jlẹhó zẹjlẹgo na e mọnukunnujẹ nudọnamẹ lọ mẹ do agọ̀ wutu. Eyin mí na ayidonugo sọwhiwhe tọn hlan gbesisọ etlẹ yin to onú pẹvi lẹ mẹ, todoaitọ mítọn lẹ na mọ dọ yé sọgan dejido nugbo-yinyin adà titengbe hugan owẹ̀n mítọn tọn lẹ go.

To Lizọnyizọn Kunnudegbe Tọn Mẹ. Mẹsusu nọ whleawu nado jẹ kunnudegbe yì ji na yé mọ dọ nususu tin he yé gbẹsọ dona plọn. Ṣogan, omẹ ehelẹ ko penugo nado dekunnu po kọdetọn dagbe po dile etlẹ yindọ oyọnẹn dodonu nugbo lọ tọn kẹdẹ wẹ yé tindo. Etẹwẹ gọalọna yé? Họ̀nhungàn lọ wẹ awuwle.

Whẹpo do yì kunnudegbe, tẹnpọn bo jẹakọ hẹ hogo he ji a jlo na dọhodo. Dovivẹnu nado lẹnnupọn jẹnukọn do kanbiọ he hosetọ towe lẹ sọgan fọndote ji. Dín gblọndo pekọhẹnwanamẹ tọn he sinai do Biblu ji lẹ. Ehe na hẹn we tin to awuwle mẹ nado na gblọndo he sọgbe po awuvivo po. Be a jlo na deanana plọnmẹ Biblu de wẹ ya? Yí sọwhiwhe do gbadopọnna owe oplọn lọ tọn. Hẹn ẹn diun dọ a mọnukunnujẹ wefọ he ji gblọndo kanbiọ lọ lẹ tọn sinai do mẹ.

Eyin whétọ de kavi azọ́nwatọgbẹ́ de kàn kanbiọ he a ma wleawuna gblọndo etọn sè we lo? Eyin a ma kúdo nuhe a jlo na dọ lẹ ji, ma pàhodọ blo. ‘Ayiha dodonọ tọn nọ lẹnayihamẹpọn nado gblọn.’ (Howh. 15:28) A sọgan mọ alọgọ he hiẹ tindo nuhudo etọn to owe Comment raisonner kavi Hogo Biblu Tọn lẹ na Nujidọhodo Tọn mẹ. Eyin a ma hẹn depope to owe ehelẹ mẹ, dọna ẹn dọ a na yì basi dodinnanu bo lẹkọwa. Eyin mẹhe kàn ohó lọ sè yin ahundoponọ, e na nọtepọn gblọndo he sọgbe. Na nugbo tọn, whiwhẹ towe sọgan yinuwado e ji tlala.

Azọ́nwiwa hẹ wẹnlatọ numimọnọ lẹ to kunnudegbe sọgan gọalọna we nado wleawuna azọ́nyinyọnẹn to Ohó Jiwheyẹwhe tọn yiyizan dile e jẹ do kẹdẹ mẹ. Nọ doayi wefọ he yé yizan lẹ go podọ lehe yé yihojlẹdohogo do yé ji do. Nọ yí whiwhẹ do kẹalọyi ayinamẹ kavi anademẹ depope he yé na we. Devi zohunhunnọ lọ Apọlo mọaleyi sọn alọgọ he e mọyi sọn mẹdevo lẹ dè mẹ. Luku basi zẹẹmẹ Apọlo tọn taidi “omẹ he didẹ́,” “bo peve to Owe-wiwe mẹ,” “omẹ he hunzo to ayiha mẹ,” yèdọ dawe de he nọ ‘dọho bo nọ plọnmẹ dogbọn Jesu dali po gbesisọ po.’ Etomọṣo, nukunnumọjẹnumẹ etọn tindo dogbó. To whenuena Pliskila po Akuila po doayi ehe go, yé “dọ̀n ẹn dogo, yé sọ dọ [zẹẹmẹ] ali Jiwheyẹwhe tọn hlan ẹn hezeheze.”—Owalọ 18:24-28.

“Hẹn Ohó Nugbo Go Gligli.” Nuzedonukọnnamẹ mítọn lẹ to opli lẹ ji dona do sisi he yiaga hia na otẹn agun lọ tọn taidi “dòtin afọdotẹn nugbo tọn.” (1 Tim. 3:15) Nado sọgan nọgodona nugbo lọ, onú titengbe wẹ e yin dọ mí ni mọnukunnujẹ wefọ he mí jlo na yizan to hodidọ lẹ mẹ ganji. Lẹnnupọndo lẹdo po lẹndai wefọ lọ lẹ tọn po ji.

A sọgan vọ́ nuhe yin didọ to opli agun tọn ji dọ. Na nugbo tọn, ‘whlasusu wẹ mímẹpo nọ flándẹ́.’ (Jak. 3:2) Ṣigba hiẹ na mọaleyi gbọn awuwiwlena aṣa he nọ yidogọna hodidọ he sọgbe lẹ dali. Suhugan mẹmẹsunnu he ze yinkọ dai to Wehọmẹ Lizọnyizọn Yẹwhehọluduta tọn mẹ lẹ wẹ na wá lẹzun mẹho to nukọn mẹ. “Yè na kàn susu biọ” to mẹhe azọngban mọnkọtọn yin nina lẹ si. (Luku 12:48) Eyin mẹho de gbọn makiya dali na ayinamẹ agọ̀ he dekọtọn do nuhahun sinsinyẹn lẹ mẹ na hagbẹ agun lọ tọn lẹ, mẹho lọ sọgan hẹn nukundagbe Jiwheyẹwhe tọn bu. (Mat. 12:36, 37) Enẹwutu, mẹmẹsunnu he pegan taidi mẹho de dona yin yinyọnẹn taidi mẹhe nọ hẹn “ohó nugbo go gligli . . . gbọn oplọn he pegan dali.”—Titu 1:9.

Hẹn ẹn diun dọ hoyijlẹdohogo towe lẹ sọgbe hẹ “ohia ohó tọn he pegan” he nọ sọawuhia to nugbo Owe-wiwe tọn lẹpo mẹ. (2 Tim. 1:13) Ehe ma dona gbahundo na we. Vlavo a ma ko dotana Biblu blebu hihia. Zindonukọn nado jẹ yanwle enẹ kọ̀n. Ṣigba todin whẹ́, doayi lehe ayinamẹ he bọdego lẹ sọgan gọalọna we nado gbadopọnna nudọnamẹ he ji a to nulẹnpọndo nado yizan to mẹpinplọn towe mẹ do go.

Jẹnukọn whẹ́, kanse dewe dọ: ‘Be nudọnamẹ ehe sọgbe hẹ nuhe yẹn ko plọn sọn Biblu mẹ ya? Be e na dọ̀n hosetọ ṣie lẹ sẹpọ Jehovah, kavi be nuyọnẹn aihọn tọn nọgodona wẹ e te, bo to tulina gbẹtọ lẹ nado yin anadena gbọn e dali ya?’ Jesu dọmọ: “Ohó towe wẹ nugbo.” (Joh. 17:17; Deut. 13:1-5; 1 Kọl. 1:19-21) Enẹgodo, yí azọ́nwanu nupinplọn tọn he hagbẹ afanumẹ nugbonọ nuyọnẹntọ lọ wleawuna lẹ zan ganji. Ehelẹ na gọalọna we nado mọnukunnujẹ wefọ lẹ mẹ ganji bosọ yí jlẹkaji po lẹnpọn dagbe po do basi yizan yetọn. Eyin a ze hodidọ towe lẹ sinai do “ohia ohó tọn he pegan lọ” ji bo ganjẹ zinjẹgbonu he nọ wá sọn asisa he Jehovah to yiyizan lọ go dile a to zẹẹmẹ po yọn-na-yizan wefọ lẹ tọn po basi, hodidọ towe lẹ na sọgbe.

Gbadopọnna Nugbo-Yinyin Nudọnamẹ lẹ Tọn. Nujijọ agọe tọn lẹ, hoyidọ lẹ, po numimọ lẹ po sọgan gọalọ to whenuena a to apajlẹ kavi zẹẹmẹ nuagokun delẹ tọn basi. Nawẹ hiẹ na wagbọn bo tindo nujikudo dọ yé sọgbe? Aliho dopo wẹ nado yí nudọnamẹ mọnkọtọn lẹ sọn asisa dejidego lẹ mẹ. Flin nado gbadopọnna dọ nudọnamẹ lọ yin agọe pete tọn. Sọha nulinlẹn tọn lẹ nọ diọ; dodinnanu lẹnunnuyọnẹn tọn lẹ nọ yawu dohó; podọ dile nukunnumọjẹnumẹ gbẹtọ lẹ tọn to agayi to whenuho po ogbè dowhenu tọn lẹ po mẹ, tadona he kọ̀n yé wá dai lẹ dona yin didiọ. Enẹwutu, tin to aṣeji eyin a to nulẹnpọn nado yí nudọnamẹ lẹ zan sọn linlinwe, televiziọn, ladio, zomọ-nudọnamẹ sẹdo tọn, kavi Internet ji. Howhinwhẹn lẹ 14:15 na ayinamẹ dọmọ: “Wunvinọ yí ohó popo sè: ṣigba omẹ zìnzìn jlẹ aliho ede tọn pọ́n tlala.” Kanse dewe dọ: ‘Be asisa lọ yin yinyọnẹn na nugbodidọ etọn ya? Be asisa devo lẹ sọgan nọgodona nudọnamẹ lọ ya?’ Eyin a tindo ayihaawe gando nugbo-yinyin nudọnamẹ de tọn go, ma yí ì zan blo.

Gbọnvona dogbapọnna nugbo-yinyin asisa lẹ tọn, yí sọwhiwhe do lẹnnupọndo lehe a jlo na yí nudọnamẹ lọ zan gbọn ji. Hẹn ẹn diun dọ lehe a jlo na yí hoyidọ po sọha nulinlẹn tọn lẹ po zan do sọgbe hẹ lẹdo hodidọ tọn he mẹ yé yin didesọn. To vivẹnudido mẹ nado zinnudo nuagokun towe ji, payi ma nado diọ “mẹdelẹ” zun “suhugan gbẹtọ lẹ tọn,” bọ “mẹsusu” ma na lẹzun “mẹlẹpo,” podọ “to whẹho delẹ mẹ” ma na lẹzun “to whepoponu.” Hójijlẹ zẹjlẹgo gando sọha, kiklo, kavi nujọnu-yinyin nude tọn go nọ fọ́n ayihaawe dote do nugbo-yinyin hodidọ towe tọn ji.

Eyin hodidọ towe nọ sọgbe to whepoponu, a na wá yin yinyọnẹn taidi mẹhe yiwanna nugbodidọ. Ehe nọ do Kunnudetọ Jehovah tọn lẹ hia to aliho dagbe mẹ taidi pipli de. Dehe tlẹ sọ yin titengbe hugan, e nọ gbògbéna ‘Jehovah, Jiwheyẹwhe nugbo tọn.’—Ps. 31:5.