Weta Fọtọ̀n-nukun-dopo
‘Mì Tindo Owanyi He Siso Na Ode Awetọ’
1. Etẹwẹ nọ saba yinuwado mẹyọyọ lẹ ji to opli Kunnudetọ Jehovah tọn lẹ tọn ji?
WHLA tintan he gbẹtọ lẹ wá opli Kunnudetọ Jehovah tọn lẹ tọn, owanyi he yin didohia to finẹ nọ saba yinuwado yé ji. Yé nọ mọ ẹn to kuavọdonamẹ po gbẹdido zohunhun tọn he nọ yin didohia yé lẹ po mẹ. Mẹhe basi dlapọn wá plidopọ mítọn ji lẹ sọ nọ doayi owanyi ehe go ga. Linlin-kàntọ de wlan gando plidopọ agbegbe de go dọmọ: ‘Mẹdepope matin to nuyiwadomẹji amasin-adínọ kavi ahànsinsinyẹn tọn glọ gba. Awhágbe po jlẹdidọ depope po ma tin. Mẹde ma to awetọ etọn sisẹ. Zingidi depope ma tin. Hogbe kudiho kavi mẹzunzun tọn depope mayin sise. Aslan-agbàagba kavi hogbe gbigble depope ma wá aimẹ. Mẹdepope ma to azọ̀-nù. Ajojijẹ ma tin. Mẹdepope ma dlan ahàn-panu lẹ do aigba lọ ji gba. E paṣamẹ na taun tọn.’ Ehe lẹpo yin ohia owanyi tọn, yèdọ owanyi he “ma nọ hẹn ede wà onú jẹagọ, [bo] ma nọ dín onú etọn titi.”—1 Kọlintinu lẹ 13:4-8.
2. (a) Dile ojlẹ to yiyi, etẹwẹ dona sọawuhia gando aliho he mẹ mí nọ do owanyi hia te go? (b) Owanyi wunmẹ tẹwẹ mí dona wleawuna to apajlẹ Klisti tọn hihodo mẹ?
2 Owanyi mẹmẹsunnu tọn wẹ nọ do Klistiani nugbo lẹ hia. (Johanu 13:35) Dile mí to whinwhẹ́n to gbigbọ-liho, mí nọ plọn nado do owanyi hia to gigọ́mẹ. Apọsteli Paulu hodẹ̀ dọ owanyi Klistiani hatọ emitọn lẹ tọn ni “to susudeji.” (Filippinu lẹ 1:9) Apọsteli Johanu dohia dọ owanyi mítọn dona yin mẹde-yido-sanvọ́ tọn. E wlan dọmọ: “Ehe mẹ wẹ mí yọ́n owanyi Jiwheyẹwhe tọn te, na [Ovi Jiwheyẹwhe tọn] yí gbigbọ etọn bọdai na mí wutu: e jẹ dọ míwlẹ ni yí gbigbọ mítọn bọdai na mẹmẹsunnu lẹ ga.” (1 Johanu 3:16; Johanu 15:12, 13) Be mí dona ze ogbẹ̀ mítọn jo do ota mẹmẹsunnu mítọn lẹ tọn mẹ wẹ ya? Dile etlẹ yindọ ninọmẹ lẹpo ma nọ biọ do mọ, obá tẹmẹ wẹ mí nọ dovivẹnu nado gọalọna yé jẹ todin, etlẹ yin to ojlẹ he ma bọawu lẹ mẹ?
3. (a) Aliho tẹmẹ wẹ mí sọgan do owanyi mítọn hia to gigọ́mẹ te? (b) Naegbọn e yin onú titengbe nado tindo owanyi he siso na ode awetọ mítọn todin?
3 To pọmẹ hẹ nuyiwa mítọn he nọ do gbigbọ mẹde-yido-sanvọ́ tọn hia lẹ, mí dona sọ tindo owanyi he siso na mẹmẹsunnu mítọn lẹ. Ohó Jiwheyẹwhe tọn dotuhomẹna mí dọmọ: “Mì nọ yí homẹdagbe do yiwanna mìnọzo di mẹmẹsunnu.” (Lomunu lẹ 12:10) Mímẹpo wẹ nọ tindo numọtolanmẹ mọnkọtọn hlan mẹdelẹ. Ṣigba be mí sọgan plọn nado tindo numọtolanmẹ mọnkọtọn na mẹdevo lẹ dogọ ya? Dile opodo titonu ehe tọn to dindọnsẹpọ, onú titengbe wẹ eyin nado dọnsẹpọ Klistiani hatọ lẹ. Biblu dọmọ: “Opodo onú popo tọn to sisẹpọ; . . . Hú onú lẹpo, mì ni tindo owanyi he [siso] to mìde ṣẹnṣẹn; na owanyi nọ ṣinyọnnudo ylando susu.”—1 Pita 4:7, 8.
To Whenuena Nuhahun lẹ Fọndote
4. (a) Naegbọn nuhahun lẹ sọgan fọndote to mẹhe tin to agun mẹ lẹ ṣẹnṣẹn? (b) Dile etlẹ yindọ mí sọgan gọ̀n ma tindo ojlo nado yí ayinamẹ Biblu tọn lẹ do yizan mẹ to whepoponu, ale tẹlẹ wẹ e sọgan hẹnwa eyin mí yí yé do yizan mẹ?
4 Na nugbo tọn, dile e na dẹnsọ bọ mí na gbẹ́ pò to mapenọ yin, mí na nọ wà onú delẹ he na hẹn homẹgble mẹdevo lẹ to whedelẹnu. Mẹmẹsunnu mítọn lẹ lọsu sọgan nọ ṣinuwa do mí to aliho susu mẹ. (1 Johanu 1:8) Eyin hiẹ mọ dewe to ninọmẹ mọnkọtọn mẹ, etẹwẹ a dona wà? Owe-wiwe wleawuna anademẹ he sọgbe. Ṣigba nuhe e dọ sọgan gbọnvona nuhe nọ jlo mí taidi gbẹtọvi mapenọ lẹ. (Lomunu lẹ 7:21-23) Etomọṣo, ayinamẹ he Biblu bẹhẹn lẹ yiyido yizan mẹ po ahundopo po na dohia dọ mí tindo ojlo nujọnu tọn nado hẹn homẹhun Jehovah. Mọwiwà nasọ hẹn owanyi he mí tindo na mẹdevo lẹ lodo.
5. Etẹwutu mí ma dona yiahọsu eyin mẹde hẹnhomẹgble mí?
5 Eyin gbẹtọ lẹ yin homẹhẹngblena, to whedelẹnu yé nọ tẹnpọn nado yiahọsu. Ṣigba enẹ nọ hẹn ninọmẹ lọ ylan deji poun wẹ. Eyin e biọ ahọsuyíyí janwẹ, mí dona jo enẹ do alọmẹ na Jiwheyẹwhe. (Howhinwhẹn lẹ 24:29; Lomunu lẹ 12:17-21) Mẹdevo lẹ sọgan tẹnpọn nado doalọtena kanṣiṣa lẹpo hẹ whẹhutọ lọ. Ṣigba mí ma dona wà onú mọnkọtọn na sinsẹ̀n basitọ hatọ lẹ gba, na eyin sinsẹ̀n-bibasi mítọn na yin alọkẹyi, mí dona yiwanna mẹmẹsunnu mítọn lẹ whẹ́. (1 Johanu 4:20) Enẹwutu, Paulu wlanwe dọmọ: “Mì sọ nọ sinyẹnlin hẹ mìnọzo, mì nọ jona mìnọzo, eyin mẹde tindo wiwọ́ do mẹde go; yèdọ dile Klisti jona mì do, mọ ga wẹ mì ni nọ basi do.” (Kọlọsinu lẹ 3:13) Be hiẹ sọgan wà enẹ ya?
6. (a) Whla nẹmu wẹ mí dona jona mẹmẹsunnu mítọn lẹ? (b) Etẹ yinyọnẹn gando mídetiti go wẹ na gọalọna mí nado yọ́n lehe mí na yinuwa gbọn eyin mẹde waylando do mí?
6 Etẹwẹ dona yin wiwà eyin mẹde ṣinuwa do mí whlasusu ṣigba bo ma ko waylando sinsinyẹn he sọgan de e sẹ sọn agun mẹ? Gando ylando flinflin mọnkọtọn lẹ go, apọsteli Pita biọ nado jonamẹ “kakajẹ whla ṣinawe.” Ṣigba Jesu dọmọ: ‘E mayin kakajẹ whla ṣinawe gba, ṣigba kakajẹ whla kandegbàn-atọ́n-nukun-awe.’ E zinnudeji dọ ahọ́ he mí dù do Jiwheyẹwhe sù tlala eyin yè jlẹ ẹ do dehe gbẹtọ depope sọgan dù do mí go. (Matiu 18:21-35) Mí nọ waylando do Jiwheyẹwhe to aliho susu mẹ egbesọegbesọ—to whedelẹnu gbọn nuyiwa ṣejannabi tọn dali, gbọn nuhe mí dọ kavi lẹnpọn dali, kavi gbọn nuhe mí gboawupo nado wà de dali—bo ma tlẹ nọ yọnẹn dọ mí to ylando wà. (Lomunu lẹ 3:23) Ṣogan, Jiwheyẹwhe nọ to lẹblanu etọn dohia mí zọnmii. (Psalm 103:10-14; 130:3, 4) E nọ biọ to mí si nado nọ yinuwa hẹ ode awetọ to aliho dopolọ mẹ. (Matiu 6:14, 15; Efesunu lẹ 4:1-3) Whenẹnu wẹ mí na penugo nado to owanyi wunmẹ he ‘ma nọ hẹnmẹdohomẹ’ dohia.—1 Kọlintinu lẹ 13:4, 5; 1 Pita 3:8, 9.
7. Etẹwẹ mí dona wà eyin mẹmẹsunnu de hẹn mí do homẹ?
7 To whedelẹnu mí nọ doayi e go dọ dile etlẹ yindọ mí ma tindo linlẹn ylankan de sọta mẹmẹsunnu mítọn, e nọ hẹn mí do homẹ. Mí sọgan de nado ‘yí owanyi do ṣinyọnnudo e,’ dile 1 Pita 4:8 na ayinamẹ etọn do. Kavi mí sọgan de afọdide tintan nado dọho hẹ ẹ bo tẹnpọn nado vọ́ haṣinṣan jijọho tọn jlado.—Matiu 5:23, 24.
8. Etẹwẹ mí dona wà eyin yisenọ hatọ de hẹn homẹgble mí?
8 Yisenọ hatọ de sọgan to nuhe nọ hẹn homẹgble hiẹ po mẹdevo lẹ po wà. Be e ma yin nuyọnẹnnu wẹ nado dọho hẹ ẹ ya? Vlavo, eyin hiẹ lọsu titi basi zẹẹmẹ nuhahun lọ tọn na ẹn to aliho he jọmẹ de mẹ, ehe sọgan hẹn kọdetọn dagbe lẹ wá. Ṣigba jẹnukọn whẹ́ a dona kanse dewe dọmọ: ‘Be nuhe wà e te lọ gbà nunọwhinnusẹ́n Owe-wiwe tọn de nugbonugbo ya? Kavi be na fie yẹn tọ́nsọn po aliho he mẹ yẹn yin nukunpedego te po gbọnvona etọn wẹ yin adọ̀ nuhahun lọ tọn ya?’ Payi ma nado nọ dawhẹna mẹdevo lẹ sọgbehẹ nujinọtedo towe titi he a ze dai lẹ. (Jakobu 4:11, 12) Jehovah nọ gbọn mẹnukuntamahopọn dali kẹalọyi gbẹtọ wunmẹ lẹpo bo nọ hẹn yé dẹẹdẹ dile yé to whinwhẹ́n to gbigbọ-liho.
9. (a) Mẹnu lẹ wẹ nọ penukundo ylando sinsinyẹn lẹ go to agun mẹ? (b) Whetẹnu wẹ e yin azọngban mẹhe yè ṣinuwa do lọ tọn nado de afọdide tintan, podọ etẹwẹ na yin yanwle etọn?
9 Eyin mẹde to agun mẹ waylando sinsinyẹn, taidi fẹnnuwiwa, e dona yin nukunpedego matin gbàndindọn. Gbọn mẹnu lẹ dali? Gbọn mẹho lẹ dali. (Jakobu 5:14, 15) Ṣigba, eyin ylando de yin wiwà do mẹde go, vlavo to whẹho ajọwiwa tọn mẹ kavi hodidọ mẹhẹngble tọn, to whelọnu lo, mẹhe yè ṣinuwa do lọ dona de afọdide tintan nado dọnsẹpọ nuṣiwatọ lọ ewọ ṣokẹdẹ. (Matiu 18:15) Eyin enẹ ma didẹ whẹho lọ, afọdide heyin sislẹ to Matiu 18:16, 17 mẹ lẹ dona yin zize. Owanyina mẹmẹsunnu mítọn he ṣinuwa lọ po ojlo lọ po nado “duale” etọn na gọalọna mí nado wà ehe to aliho de mẹ he na yinuwado ahun etọn ji.—Howhinwhẹn lẹ 16:23.
10. To whenuena nuhahun de fọndote, etẹwẹ na gọalọna mí nado pọ́n whẹho lọ to aliho he sọgbe mẹ?
10 To whenuena nuhahun de fọndote, vlavo daho kavi pẹvi, eyin mí nọ tẹnpọn nado mọnukunnujẹ lehe Jehovah nọ pọ́n ẹn hlan do mẹ, enẹ na gọalọna mí. E ma nọ kẹalọyi ylando to aliho depope mẹ, podọ to ojlẹ sisọ etọn mẹ, ylando sinsinyẹnwatọ he ma lẹnvọjọ lẹ nọ yin didesẹ sọn titobasinanu etọn mẹ. Ṣigba, mí ma dona wọnji dọ mímẹpo wẹ nọ waylando flinflin lẹ bo tindo nuhudo linsinsinyẹn po lẹblanu etọn tọn po. Enẹwutu apajlẹ de wẹ Jehovah zedai na mí nado hodo to whenuena mẹdevo lẹ ṣinuwa do mí. Eyin mí tindo lẹblanu, mí to owanyi etọn dohia.—Efesunu lẹ 5:1, 2.
Dín Aliho lẹ Nado ‘Hùndonuvo’
11. Naegbọn Paulu na tuli Kọlintinu lẹ nado ‘hùndonuvo’?
11 Osun susu wẹ Paulu yizan nado to agun Kọlinti tọn hẹnlodo to Glẹki. E wazọ́n sinsinyẹn nado gọalọna mẹmẹsunnu he tin to finẹ lẹ, e sọ yiwanna yé. Ṣigba delẹ to yé mẹ ma yiwanna ẹn gba. Yé yin hẹngogonọ taun. E dotuhomẹna yé nado ‘hùndonuvo’ to owanyi sisosiso didohia mẹ. (2 Kọlintinu lẹ 6:11-13; 12:15) Mímẹpo na wà dagbe nado gbadopọnna obá he mẹ dopodopo mítọn nọ do owanyi hia mẹdevo lẹ bosọ nọ dín aliho lẹ nado hùndonuvo jẹ.—1 Johanu 3:14.
12. Nawẹ mí sọgan hẹn owanyi he mi tindo na mẹhe tin to agun mítọn mẹ lẹpo whẹ́n deji gbọn?
12 Be e nọ vẹawuna mí nado dọnsẹpọ mẹdelẹ to agun lọ mẹ wẹ ya? Eyin mí dovivẹnu nado nọ yí nukunpẹvi do pọ́n dẹ́sọ-dẹ́mẹ flinflin lẹ—dile mí na jlo dọ yelọsu ni nọ wà na mí do—ehe sọgan gọalọ nado hẹn haṣinṣan he to ṣẹnṣẹn mítọn lodo. Owanyi mítọn hlan yé na yin hinhẹn pọnte eyin mí nọ dín jẹhẹnu dagbe yetọn lẹ bo nọ ze ayidonugo do yé ji. Matin ayihaawe, ehe na hẹn owanyi he mí tindo na yé whẹ́n deji.—Luku 6:32, 33, 36.
13. Nawẹ mí sọgan hùndonuvo to owanyi didohia mẹhe tin to agun mítọn mẹ lẹ gbọn?
13 Nugbo wẹ dọ, nuhe mí sọgan wà na mẹdevo lẹ tindo dogbó. Mí sọgan nọ ma penugo nado dọnudo mẹlẹpo to opli dopodopo ji. E sọgan gọ̀n ma yọnbasi nado basi oylọna mẹlẹpo to whenuena mí ylọ họntọn lẹ na núdùdù pọmẹ tọn de. Ṣigba be mí sọgan hùndonuvo gbọn nukunwhiwhe kleun de yiyizan dali nado jẹakọhẹ mẹde to agun mítọn mẹ ya? Be mí sọgan dọna mẹhe mí ma ko jẹakọhẹ ganji de nado wazọ́n hẹ mí to lizọnyizọn kunnudegbe tọn mẹ ya?
14. Nawẹ mí sọgan do owanyi he siso hia to whenuena mí tin to Klistiani he mí ma jẹakọhẹ lẹ ṣẹnṣẹn gbọn?
14 Plidopọ Klistiani tọn lẹ nọ hùn dotẹnmẹ susu dote nado do owanyi mítọn hia mẹsusu dogọ. Gbẹtọ fọtọ́n susu sọgan wá plidopọ lọ. Mí ma sọgan dọho hẹ yemẹpo, ṣigba mí sọgan yinuwa to aliho de mẹ he na dohia dọ mí ze dagbemẹ-ninọ yetọn donukọnna dagbenu mítọn. To gbọjẹyíyí lẹ whenu, mí sọgan dohia dọ mí tindo ojlo to yé mẹ gbọn tintẹnpọn nado dọho hẹ mẹhe sinai do lẹdo mítọn mẹ lẹ dali. To gbèdopo mẹhe tin to aigba ji lẹpo na lẹzun mẹmẹsunnu po mẹmẹyọnnu lẹ po, bo na kọnawudopọ to sinsẹ̀n-bibasi hlan Jiwheyẹwhe nugbo lọ po Otọ́ mẹlẹpo tọn po mẹ. Ayajẹ nankọtọn die nado jẹakọhẹ ode awetọ! Owanyi he siso wẹ na whàn mí nado tindo ojlo lọ nado wàmọ. Naegbọn hiẹ ma na bẹjẹeji todin?
Hodọdopọ Dogbapọn Tọn
• To whenuena nuhahun lẹ fọndote to Klistiani lẹ ṣẹnṣẹn, nawẹ mí dona didẹ yé gbọn, podọ etẹwutu?
• Dile mí to whinwhẹ́n to gbigbọ-liho, aliho tẹlẹ mẹ wẹ owanyi mítọn dona whẹ́n te ga?
• Nawẹ e yọnbasi nado do owanyi he siso hia mẹhe mayin họntọn vivẹ lẹ lọsu ga gbọn?
Yẹdide to weda 148]
Owanyi Klistiani tọn nọ yin didohia to aliho susu mẹ, taidi to opli agun tọn lẹ ji