Weta Ko-nukun-dopo
Lẹndai Jehovah Tọn Mọ Hẹndi Gigonọ Yí
1, 2. (a) Etẹwẹ yin lẹndai Jehovah tọn gando nudida nuyọnẹntọ etọn lẹ go? (b) Mẹnu lẹ wẹ whẹndo he to sinsẹ̀n basi to pọmẹ hlan Jiwheyẹwhe lẹ bẹhẹn?
LẸNDAI owanyinọ Jehovah tọn wẹ yindọ, nudida nuyọnẹntọ lẹpo ni kọnawudopọ to sinsẹ̀n-bibasi hlan Jiwheyẹwhe nugbo dopokẹdẹ lọ mẹ bọ yemẹpo nasọ to vivi mẹdekannujẹ gigonọ tọn dù taidi ovi Jiwheyẹwhe tọn lẹ. Ehe sọ yin nuhe mẹhe yiwanna dodowiwa lẹ sọ tindo ojlona vẹkuvẹku ga.
2 Jehovah jẹ lẹndai daho ehe hẹndi ji to whenuena e bẹ azọ́n nudida tọn etọn jẹeji. Ovi etọn wẹ yin nudida etọn tintan mẹhe, sọn fọnsọnku etọn whenu gbọ́n yin “hinhọ́n gigo [Jiwheyẹwhe] tọn, podọ ojlẹmọ dodo dohia etọn tọn.” (Heblu lẹ 1:1-3) Ovi ehe yin vonọtaun, na Jiwheyẹwhe kẹdẹ wẹ dá ẹ wutu. Enẹgodo, gbọn Ovi ehe dali wẹ nudida devo lẹpo yin hinhẹnwa tintin mẹ: tintan angẹli he tin to olọn mẹ lẹ, enẹgodo gbẹtọvi lẹ to aigba ji. ( Job 38:7; Luku 3:38) Ehe lẹpo wleawuna whẹndo blebu dopo to wẹkẹ mẹ. Jehovah wẹ yin Jiwheyẹwhe, yèdọ Nupojipetọ Wẹkẹ tọn, po Otọ́ owanyinọ po na yemẹpo.
3. (a) Ogu etẹ tọn wẹ mímẹpo ko dù sọn mẹjitọ mítọn tintan lẹ dè? (b) Awuwledainanu owanyinọ tẹwẹ Jehovah basi na kúnkan Adam tọn?
3 To whenuena mẹjitọ mítọn tintan lẹ yin owhẹ̀ okú tọn dana na yé waylando sọn ojlomẹ wutu, yé yin yinyan sọn Edẹni bọ Jiwheyẹwhe sọ gbẹ́ yé dai. Yé masọ yin apadewhe whẹndo lẹdo aihọn pé etọn tọn ba. (Gẹnẹsisi 3:22-24; Deutelonomi 32:4, 5) Mímẹpo wẹ yin kúnkan yetọn, enẹwutu mí ko yin jiji po ayilinlẹn ylando tọn po. Ṣigba Jehovah yọnẹn dọ mẹdelẹ sọn kúnkan Adam po Evi po tọn mẹ na yiwanna dodowiwa. Enẹwutu gbọn owanyi dali, Ewọ basi awuwledainanu de ehe gblamẹ omẹ ehelẹ na tindo “mẹdekannujẹ he do gigo ovi Jiwheyẹwhe tọn lẹ tọn.” —Lomunu lẹ 8:20, 21.
Islaeli Hẹn Otẹn Nukundagbe Tọn Bu
4. Lẹblanulọkẹyi tẹwẹ Jehovah wleawu etọn na Islaeli hohowhenu tọn?
4 Nudi owhe 2 500 to Adam didá godo, Jehovah hùn dotẹnmẹ dote na gbẹtọ delẹ nado tindo haṣinṣan vonọtaun hẹ Ede. E dè Islaeli hohowhenu tọn nado yin omẹ etọn lẹ bo na yé Osẹ́n etọn. (Gẹnẹsisi 12:1, 2) E hẹn yé lẹzun akọta de bo yí yé zan to kọndopọmẹ hẹ lẹndai etọn. (Deutelonomi 14:1, 2; Isaia 43:1) Ṣigba, yé gbẹsọ tin to kanlinmọgbenu ylando po okú po tọn, enẹwutu yé ma duvivi mẹdekannujẹ gigonọ he Adam po Evi po tindo to dowhenu gba.
5. Nawẹ Islaelivi lẹ hẹn haṣinṣan vonọtaun yetọn hẹ Jiwheyẹwhe bú gbọn?
5 Etomọṣo, Islaelivi lẹ tindo haṣinṣan dagbe de hẹ Jiwheyẹwhe. Yé sọ tindo azọngban lọ nado setonuna Jehovah taidi Otọ́ yetọn podọ nado wazọ́n to kọndopọmẹ hẹ lẹndai etọn. Jesu zinnudo nujọnu-yinyin azọngban enẹ hinhẹndi tọn ji. (Matiu 5:43-48) Ṣigba, akọta Islaeli tọn gboawupo nado wà ehe. Dile etlẹ yindọ Ju enẹlẹ sọalọakọ́n dọ “mí tindo Otọ́ dopo, yèdọ Jiwheyẹwhe,” Jesu dọ dọ nuyiwa po gbigbọ he yé nọ dohia po ma sọgbehẹ nuhe yé dọ gba. (Johanu 8:41, 44, 47) Jiwheyẹwhe hẹn Osẹ́n lọ wá opodo to owhe 33 W.M., bọ haṣinṣan vonọtaun Islaeli tọn hẹ ẹ doalọte. Ṣigba be ehe dohia dọ gbẹtọ lẹ ma sọgan duvivi haṣinṣan dagbe de tọn hẹ Jiwheyẹwhe wẹ ya?
‘Nuhe Tin to Olọn mẹ lẹ’ Bibẹpli
6. Etẹwẹ yin lẹndai ‘tito anadenanu’ tọn he go Paulu donu to Efesunu lẹ 1:9, 10 mẹ?
6 Apọsteli Paulu dohia dọ gbẹtọvi delẹ sọgan duvivi haṣinṣan vonọtaun de tọn hẹ Jiwheyẹwhe. Di apajlẹ, gando tito zedai Jehovah tọn he dohia dọ mẹhe yí yise zan lẹ sọgan lẹzun hagbẹ whédo Etọn tọn go, Paulu wlan dọmọ: ‘Jiwheyẹwhe ko yí aṣli wiwe ojlo etọn tọn hia mí, kẹdẹdi homẹdagbe etọn he e ko lẹndai to ede homẹ: dọ, to ojlẹ gigọ́ tito anadenanu lọ tọn mẹ, ewọ nido hò onú lẹpo pli do dopo to Klisti mẹ, ehe tin to olọn mẹ lẹ, po ehe tin to aigba ji lẹ po.’ (Efesunu lẹ 1:9, 10) Jesu Klisti wẹ na penukundo ‘tito anadenanu’ tọn ehe go. Gbọn ewọ gblamẹ, gbẹtọvi lẹ yin hinhẹnwa ninọmẹ alọkẹyi tọn de mẹ to Jiwheyẹwhe nukọn. Gbẹtọ sọha delẹ tindo nukundido nado yì olọn mẹ. Podọ sọha susugege devo lẹ na nọ aigba ji kakadoi.
7. Mẹnu lẹ wẹ yin ‘nuhe tin to olọn mẹ lẹ’?
7 Tintan, bẹsọn Pẹntikọsti owhe 33 W.M., ayidonugo yin nina ‘nuhe tin to olọn mẹ lẹ,’ enẹ wẹ, mẹhe na yin whédutọgbẹ́ hẹ Klisti to Ahọluduta olọn tọn mẹ lẹ. To dodonu yise yetọn to avọ́sinsan Jesu tọn mẹ, Jiwheyẹwhe lá yé taidi dodonọ. (Lomunu lẹ 5:1, 2) To godo mẹ, Ju po Kosi lẹ po yin yiyidogọ, podọ sọha ‘nuhe tin to olọn mẹ lẹ’ tọn na yin 144 000. (Galatianu lẹ 3:26-29; Osọhia 14:1) Pipòtọ yetọn lẹ kẹdẹ wẹ gbẹ́ pò to aigba ji.
‘Nuhe Tin to Aigba Ji lẹ’ Bibẹpli
8. Mẹnu lẹ wẹ yin ‘nuhe tin to aigba ji lẹ,’ podọ haṣinṣan tẹwẹ yé tindo hẹ Jehovah?
8 Tito anadenanu tọn dopolọ wẹ sọ to ‘nuhe tin to aigba ji lẹ’ bẹpli. Gbẹtọ livi susu wẹ to yinyin bibẹpli todin po nukundido lọ po nado nọgbẹ̀ kakadoi to aigba ji. To kọndopọmẹ hẹ pipòtọ whédutọgbẹ́ Ahọluduta lọ tọn lẹ, yé nọ pagigona oyín Jehovah tọn bosọ nọ ze sinsẹ̀n bibasi etọn daga. (Isaia 2:2, 3; Zẹfania 3:9) Yé sọ nọ ylọ Jehovah dọ “Otọ́” na yé yọ́n ẹn taidi asisa ogbẹ̀ yetọn tọn. Podọ yé tindo haṣinṣan dagbe de hẹ ẹ to dodonu yise yetọn to hùnsọndai Jesu tọn mẹ. (Osọhia 7:9, 14) Ṣigba na yé gbẹsọ yin mapenọ wutu, nado yin pinpọnhlan taidi ovi Jiwheyẹwhe tọn to gigọ́mẹ na yin to sọgodo.
9. Opagbe tẹwẹ Lomunu lẹ 8:21 tindo na gbẹtọvi lẹ?
9 Mẹhe tindo todido aigba ji tọn ehelẹ to tenọpọn ojlẹ lọ whenuena nudida, yèdọ gbẹtọvi lẹ na yin ‘hinhẹn jẹ mẹdekannu sọn mẹglọnọ hẹngble tọn mẹ.’ (Lomunu lẹ 8:21) Mẹdekannujẹ enẹ na bẹjẹeji to whenuena Klisti po awhànpa olọn tọn lẹ po na hẹn nukunbibia daho lọ wá opodo gbọn Amagẹdọni gblamẹ. Ehe na zẹẹmẹdo vasudo na titonu ylankan Satani tọn pete, podọ dona he Gandudu Owhe Fọtọ́n Klisti tọn to huhlọn Ahọluduta tọn mẹ na hẹnwa lẹ na bọdego.—Osọhia 19:17-21; 20:6.
10. Ohàn pipà tọn tẹwẹ devizọnwatọ Jehovah tọn lẹ na ji?
10 Lehe e na yin homẹhunnu de do sọ to whenuena devizọnwatọ Jehovah tọn lẹ to aigba ji na kọnawudopọ nado to numọtolanmẹ devizọnwatọ etọn he tin to olọn mẹ lẹ tọn vọdọ, mẹhe yí aglinjijẹ do lá dọmọ: “Kiklo po nujawu po wẹ azọ́n towe, OKLUNỌ E Jiwheyẹwhe Ganhunupo; dodo po nugbo po wẹ ali towe, hiẹ Ahọlu [madopodo]. Mẹnu wẹ ma na dibusi we, [Jehovah] E, bo ma na pagigona oyín towe? Na hiẹ dopokẹdẹ wẹ wiwe; na akọta lẹpo wẹ na wá bo litai to nukọn towe; na yè ko do whẹdida towe lẹ hia.” (Osọhia 15:3, 4) Mọwẹ, devizọnwatọ Jehovah tọn lẹpo na kọnawudopọ to sinsẹ̀n-bibasi na Jiwheyẹwhe nugbo dopokẹdẹ lọ mẹ. Oṣiọ lẹ lọsu na yin finfọnsọnku bo na yin dotẹnmẹ na nado tindo mahẹ to ohàn pipà tọn jiji hlan Jehovah mẹ.—Owalọ lẹ 24:15.
Mẹdekannujẹ Jiawu de to Sọgodo
11. Mẹdekannujẹ jiawu tẹwẹ mẹhe lùn nukunbibia daho lọ tọ́n lẹ na duvivi etọn?
11 To whenuena nukunbibia daho lọ, he Amagẹdọni na hẹnwa vivọnu na ko klọ kanyinylan sẹ̀ sọn aigba ji godo, Satani Lẹgba ma nasọ yin “yẹwhe whenu he tọn” ba. Sinsẹ̀n-basitọ Jehovah tọn lẹ ma nasọ diahi hẹ nuyiwadomẹji ylankan Satani tọn lẹ ba. (2 Kọlintinu lẹ 4:4; Osọhia 20:1, 2) Sinsẹ̀n lalo ma nasọ do Jehovah hia to aliho agọ̀ mẹ bosọ hẹn kinklan wá gbẹtọvi lẹ ṣẹnṣẹn ba. Podọ devizọnwatọ Jiwheyẹwhe nugbo lọ tọn lẹ ma nasọ jiya mawadodo tọn kavi yin titafú gbọn ogán gbẹtọ tọn lẹ dali ba. Mẹdekannujẹ jiawu nankọtọn die he na yin vivi etọn dù!
12. Nawẹ gbẹtọ lẹpo sọgan yin hinhẹn jẹ mẹdekannu sọn ylando po nuyiwadomẹji etọn lẹ po si gbọn?
12 Taidi “Lẹngbọvu Jiwheyẹwhe tọn, he ze ylando aihọn tọn yì,” Jesu na yí nuhọakuẹ avọ́sinsan etọn tọn zan nado súnsún ylando gbẹtọvi lẹ tọn sẹ̀ mlẹnmlẹn. (Johanu 1:29) To whenuena Jesu tin to aigba ji, eyin e jo ylando mẹde tọn na ẹn, e nọ hẹn azọ̀ngbọna mẹlọ taidi kunnudenu de. (Matiu 9:1-7; 15:30, 31) To aliho mọnkọtọn mẹ, Klisti Jesu, taidi Ahọlu olọn mẹ tọn na Ahọluduta Jiwheyẹwhe tọn, na gbọn azọ́njiawu dali hẹnazọ̀ngbọna nukuntọ́nnọ lẹ, unbọpẹnnọ lẹ, tókunọ lẹ, sẹkunọ lẹ, ayimajainanọ lẹ, po mẹhe tindo azọ̀n devo lẹ po. (Osọhia 21:3, 4) “Osẹ́n ylando tọn” na yin hinhẹnzun ovọ́ na gbẹtọ tonusetọ lẹpo bọ linlẹn po nuyiwa yetọn lẹ po na yin homẹhunnu, na yelọsu podọ na Jiwheyẹwhe. (Lomunu lẹ 7:21-23) To vivọnu owhe fọtọ́n lọ tọn, gbẹtọ lẹ na ko yin hinhẹnwa pipé kọ̀n to ‘ojlẹmọ po apajlẹ Jiwheyẹwhe nugbo dopokẹdẹ lọ tọn po’ mẹ.—Gẹnẹsisi 1:26.
13. To vivọnu Gandudu Owhe Fọtọ́n lọ tọn, etẹwẹ Klisti na wà, podọ etẹwẹ na yin kọdetọn etọn?
13 To whenuena Klisti na ko hẹn gbẹtọvi lẹ jẹ pipé kọ̀n, enẹgodo ewọ na gọ̀ aṣẹpipa he yin nina ẹn nado hẹn azọngban enẹ di jo na Otọ́ etọn: “E na . . . jo ahọludu hlan Jiwheyẹwhe, yèdọ Otọ́; whenuena e na ko zín ogán lẹpo, po yẹyi lẹpo po, po huhlọn po do odò. Na e ma na nọ ma duahọlu, kaka [Jiwheyẹwhe] nado zín kẹntọ lẹpo dai to afọ etọn glọ.” (1 Kọlintinu lẹ 15:24, 25) Gandudu Owhe Fọtọ́n Ahọluduta lọ tọn na ko hẹn lẹndai etọn di to gigọ́mẹ; enẹwutu nuhudo depope matin na gandudu ehe nado gbọṣi aimẹ to Jehovah po gbẹtọvi lẹ po ṣẹnṣẹn ba. Podọ to whenuena ylando po okú po na ko yin didesẹ mlẹnmlẹn bọ gbẹtọvi lẹ na ko yin fifligọ, nuhudo nado tindo Jesu taidi Mẹfligọtọ de na wá opodo. Biblu basi zẹẹmẹ dọmọ: “Whenẹnu wẹ Ovi na ede na yin mẹmẹglọ ga hlan ewọ he yí onú lẹpo do oglọ etọn, na Jiwheyẹwhe nido yín popo to onú popo mẹ.”—1 Kọlintinu lẹ 15:28.
14. Etẹ mẹ wẹ gbẹtọvi heyin hinhẹnzun pipé lẹpo na jugbọn, podọ etẹwutu?
14 To enẹgodo, gbẹtọvi pipé lẹ na yin dotẹnmẹ na nado dohia dọ nudide yetọn wẹ nado sẹ̀n Jiwheyẹwhe nugbo dopokẹdẹ lọ kakadoi. Enẹwutu, whẹpo e nado kẹalọyi yé taidi ovi etọn lẹ to gigọ́mẹ, Jehovah na dike gbẹtọ heyin hinhẹnzun pipé lẹpo ni jugbọn whlepọn godo tọn de mẹ. Satani po aovi etọn lẹ po na yin tuntundote sọn odò mapote mẹ. Ehe na dekọtọn do awugble he ma na dẹn-to-aimẹ de mẹ na mẹhe yiwanna Jehovah nugbonugbo lẹ. Ṣigba mẹdepope he gbọn nugbonọ mayin dali dike bo yin hinhẹn vẹtoli na Jehovah na yin vivasudo kakadoi, gọna atẹṣitọ dowhenu tọn po aovi etọn lẹ po.—Osọhia 20:7-10.
15. Ninọmẹ tẹwẹ na tin to nudida nuyọnẹntọ Jehovah tọn lẹpo ṣẹnṣẹn whladopo dogọ?
15 To whelọnu lo, Jehovah na kẹalọyi gbẹtọvi he ze nupojipetọ-yinyin Jiwheyẹwhe tọn daga to whlepọn godo tọn enẹ whenu lẹpo taidi ovi etọn lẹ to gigọ́mẹ. Sọn ojlẹ enẹ mẹ sọyi, yé na duvivi mẹdekannujẹ ovi Jiwheyẹwhe tọn lẹ tọn to gigọ́mẹ taidi apadewhe whẹndo lẹdo aihọn pé Jiwheyẹwhe tọn. Nudida nuyọnẹntọ lẹpo to olọn mẹ podọ to aigba ji na yin kinkọndopọ whladopo dogọ nado to sinsẹ̀n ẹn taidi Jiwheyẹwhe nugbo dopokẹdẹ lọ. Lẹndai Jehovah tọn na ko mọ hẹndi gigonọ etọn to whenẹnu! Be hiẹ jlo nado yin apadewhe whẹndo lẹdo aihọn pé, ayajẹnọ, madopodo enẹ tọn ya? Eyin mọwẹ, mí to tuli na we nado kẹalọyi nuhe Biblu dọ to 1 Johanu 2:17 mẹ dọmọ: “Aihọn . . . to jujujei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.”
Hodọdopọ Dogbapọn Tọn
• Jẹnukọnna atẹṣiṣi to Edẹni mẹ, haṣinṣan tẹwẹ sinsẹ̀n-basitọ Jehovah tọn lẹpo tindo hẹ ẹ?
• Azọngban tẹwẹ mẹhe yin devizọnwatọ Jiwheyẹwhe tọn lẹ tindo?
• Mẹnu lẹ wẹ na wá yin ovi Jiwheyẹwhe tọn lẹ, podọ nawẹ ehe gando lẹndai Jehovah tọn heyin sinsẹ̀n-bibasi to kọndopọmẹ go gbọn?
Yẹdide to weda 190]
Gbẹtọvi tonusetọ lẹ na duvivi ogbẹ̀ tọn to paladisi lẹdo aihọn pé tọn de mẹ