Plọnnu Sọn Ohó Jiwheyẹwhe Tọn Mẹ

Naegbọn Hiẹ Dona Plọnnu sọn Jiwheyẹwhe Dè?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Naegbọn hiẹ dona plọnnu sọn Jiwheyẹwhe dè?

Jiwheyẹwhe tindo wẹndagbe onú dagbe tọn de na gbẹtọvi lẹ. E dọhona mí gandego to Biblu mẹ. Biblu taidi wekanhlanmẹ de sọn Otọ́ owanyinọ mítọn olọn mẹ tọn dè.—Hia Jelemia 29:11.

2. Etẹwẹ yin wẹndagbe lọ?

Gbẹtọvi lẹ tindo nuhudo gandudu dagbe de tọn. Gandudu gbẹtọvi tọn depope ma ko hẹn kọgbọ wá na gbẹtọvi lẹ sọn danuwiwa, whẹdida mawadodo, azọ̀n, po okú po si pọ́n. Ṣigba wẹndagbe de tin. Jiwheyẹwhe na do gandudu dagbe de ai na gbẹtọvi lẹ, ehe na hẹn mí jẹ mẹdekannu sọn nuhe nọ hẹn yajiji wá lẹpo si.—Hia Daniẹli 2:44.

3. Naegbọn e yin nujọnu nado plọnnu sọn Jiwheyẹwhe dè?

To madẹnmẹ, Jiwheyẹwhe na de mẹhe nọ hẹn yajiji wá lẹ sẹ̀ sọn aigba ji. Todin whẹ́, e to homẹmimiọnnọ livi susu plọn nado duvivi gbẹzan dagbe de tọn, he sinai do owanyi ji. Gbẹtọ lẹ to lehe yé na doakọnna nuhahun gbẹ̀mẹ tọn lẹ, mọ ayajẹ nujọnu tọn, bo hẹn homẹ Jiwheyẹwhe tọn hùn do plọn sọn Ohó Etọn mẹ.—Hia Zẹfania 2:3.

4. Mẹnu wẹ yin Dowatọ Biblu tọn?

Biblu bẹ owe flinflin 66 hẹn. Sunnu 40 wẹ wlan yé. Owe atọ́n tintan lẹ yin kinkan gbọn Mose dali to nudi owhe 3500 die. Owe he gbọngodo yin kinkan gbọn apọsteli Johanu dali to nuhe hugan owhe 1900 die. Ṣigba, linlẹn Jiwheyẹwhe tọn lẹ wẹ Biblu-kantọ lẹ wlan, e ma yin yetọn titi gba. Enẹwutu, Jiwheyẹwhe wẹ Dowatọ Biblu tọn.—Hia 2 Timoti 3:16; 2 Pita 1:21.

Mí yọnẹn dọ Biblu wá sọn Jiwheyẹwhe dè na e dọ dọdai he sọgbe to gigọ́ mẹ gando sọgodo go wutu. Gbẹtọvi depope ma sọgan wàmọ. (Isaia 46:9, 10) Biblu sọ de jẹhẹnu Jiwheyẹwhe tọn lẹ hia mí. E tindo huhlọn nado diọ gbẹzan gbẹtọ lẹ tọn do dagbe ji. Nugbo ehelẹ wẹ hẹn gbẹtọ livi susu lẹ nado kudeji dọ Biblu yin Ohó Jiwheyẹwhe tọn.—Hia Jọṣua 23:14; 1 Tẹsalonikanu lẹ 2:13.

5. Nawẹ hiẹ sọgan mọnukunnujẹ Biblu mẹ gbọn?

Jesu diyin taidi mẹplọntọ Ohó Jiwheyẹwhe tọn. Dile etlẹ yindọ susu mẹhe e dọhona lẹ tọn wẹ jẹakọ hẹ Owe-wiwe lẹ, yé tindo nuhudo alọgọ tọn nado mọnukunnujẹemẹ. Nado gọalọna yé, Jesu nọ dlẹnalọdo wefọ voovo lẹ bo nọ basi “zẹẹmẹ Owe-wiwe lẹ tọn.” Adà he hosọ etọn yin “Plọnnu sọn Ohó Jiwheyẹwhe Tọn Mẹ” ehe, na gọalọna we to aliho dopolọ mẹ.—Hia Luku 24:27, 45.

Nuhe nọ fọnjlodotenamẹ sọ nupinplọn sọn Jiwheyẹwhe dè gando lẹndai ogbẹ̀ tọn go lẹ ma sù. Ṣigba, homẹ mẹdelẹ tọn sọgan nọma hùn dọ hiẹ to Biblu hia. Ehe ni ma hẹn we gbọjọ blo. Todido towe nado duvivi ogbẹ̀ madopodo tọn sinai do Jiwheyẹwhe yinyọnẹn ji.—Hia Matiu 5:10-12; Johanu 17:3.

Nado mọ nudọnamẹ dogọ, pọ́n weta 2tọ owe Etẹwẹ Bliblu Plọn Mí Taun tọn, he Kunnudetọ Jehovah tọn lẹ zinjẹgbonu.