Mẹdevo lẹ Yiaga Hú Mí

YẸN deji dọ a na yigbe dọ mẹdevo lẹ yiaga, kavi klo bosọ dohuhlọn hú hiẹ po yẹn po. Mẹnu wẹ hiẹ yọnẹn dọ e yiaga hú mí?⁠— Jehovah Jiwheyẹwhe wẹ. Etẹwẹ dogbọn Ovi etọn he yin Mẹplọntọ Daho lọ dali? Be ewọ lọsu yiaga hú mí wẹ ya?⁠— Gbau.

Jesu ko nọgbẹ̀ pọ́n to olọn mẹ po Jiwheyẹwhe po. E yin Ovi gbigbọnọ, kavi angẹli de. Be Jiwheyẹwhe sọ dá angẹli, kavi ovi gbigbọnọ devo lẹ wẹ ya?⁠— Mọwẹ, e dá livi susu lẹ. Angẹli ehelẹ sọ yiaga bo dohuhlọn taun hú mí.​—⁠Psalm 104:4; Daniẹli 7:​10.

Be a flin oyín angẹli he dọho na Malia tọn ya? Gabliẹli wẹ. E dọna Malia dọ ovi he e na ji lọ na yin Ovi Jiwheyẹwhe tọn. Jiwheyẹwhe ze ogbẹ̀ Ovi gbigbọnọ etọn tọn do ohò Malia tọn mẹ na Jesu nido yin jiji di viyẹyẹ de to aigba ji.​—⁠Luku 1:​26, 27.

Be a yise dọ azọ́njiawu mọnkọtọn sọgan jọ ya? Be a yise dọ Jesu ko nọgbẹ̀ to olọn mẹ hẹ Jiwheyẹwhe pọ́n ya?⁠— Jesu lọsu dọ ehe. Nawẹ Jesu wagbọn do yọnẹn? Vlavo to whenue e pò to ovu, Malia sọgan ko dọ nuhe Gabliẹli dọ lẹ na ẹn. Podọ, Josẹfu lọsu sọgan ko dọna Jesu dọ Jiwheyẹwhe wẹ yin Otọ́ etọn jọnun.

To whenuena Jesu yin bibaptizi, Jiwheyẹwhe lọsu tlẹ dọho sọn olọn mẹ, dọmọ: “Ehe wẹ Visunnu ṣie.” (Matiu 3:17) Podọ to ozán he jẹnukọnna okú etọn mẹ, Jesu hodẹ̀ dọmọ: “Otọ́ E, yí dewe do pagigona mi po gigo lọ po he yẹn ko tindo to dè we whẹpo aihọn do jọ.” (Johanu 17:⁠5) Mọwẹ, Jesu biọ dọ Jiwheyẹwhe ni hẹn emi lẹkọwa e dè to olọn mẹ whladopo dogọ. Nawẹ e na wagbọn do nọ dọ́n?⁠— Aliho dopo akàn lọ wẹ yindọ Jehovah Jiwheyẹwhe na lẹ́ ẹ zun omẹ gbigbọnọ mayinukundomọ de, kavi angẹli de.

Todin, dike ma kàn kanbiọ titengbe de biọ we. Be angẹli lẹpo wẹ yin mẹdagbe ya? Etẹwẹ yin gblọndo towe?⁠— To ojlẹ de mẹ wayi, yemẹpo wẹ yin mẹdagbe. Na Jehovah wẹ dá yé, podọ nuhe e dá lẹpo wẹ yọ́n. Ṣigba to godo mẹ angẹli dopo wá lẹzun mẹylankan. Nawẹ enẹ jọ gbọn?

Nado mọ gblọndo lọ, mí dona biọ otàn mẹ vude jẹ whenuena Jiwheyẹwhe dá sunnu po yọnnu tintan lọ po, heyin Adam po Evi po. Mẹdelẹ dọ dọ otangblo de poun wẹ enẹ yin. Ṣigba Mẹplọntọ Daho lọ yọnẹn dọ nugbo wẹ.

To whenuena Jiwheyẹwhe dá Adam po Evi po, e ze yé do jipa whanpẹnọ de mẹ to fie nọ yin yiylọdọ Edẹni. Jipa kavi Paladisi de wẹ filọ yin. Yé na ko tindo ovi susu lẹ, whẹndo daho de, bo na nọ̀ paladisi lọ mẹ kakadoi. Ṣigba onú titengbe de tin he yé dona plọn. Mí ko dọhodo nulọ ji wayi. Gbọ mí ni pọ́n eyin mí gbẹ́ flin in.

Jehovah dọna Adam po Evi po dọ yé sọgan dù atin-sinsẹ́n depope he jlo yé to jipa lọ mẹ. Ṣigba atin dopo de tin to finẹ he yé ma dona dù. Jiwheyẹwhe dọ nuhe na jọ eyin yé wàmọ na yé. E dọmọ: “Hiẹ na kú dandan.” (Gẹnẹsisi 2:17) Enẹwutu, etẹwẹ yin nuplọnmẹ lọ he Adam po Evi po dona plọn?⁠—

Yé dona plọn tonusise. Mọwẹ, gbẹninọ sinai do tonusise na Jehovah Jiwheyẹwhe ji! E ma ko pé na Adam po Evi po nado dọ poun dọ yé na setonuna ẹn gba. Yé dona dohia to nuwiwa yetọn lẹ mẹ dọ yé na wàmọ. Eyin yé setonuna Jiwheyẹwhe, enẹ na dohia dọ yé yiwanna ẹn bo jlo dọ ewọ ni yin Gandutọ yetọn. Gbọnmọ dali, yé na ko nọgbẹ̀ kakadoi to Paladisi mẹ. Ṣigba eyin yé dù atin-sinsẹ́n lọ, etẹwẹ enẹ na dohia?⁠—

E na dohia dọ yé ma yọ́n pinpẹn nuhe Jiwheyẹwhe ko na yé lẹ tọn na taun tọn. Eyin hiẹ wẹ lo, be a na ko setonuna Jehovah to whenẹnu ya?⁠— To bẹjẹeji, Adam po Evi po setonu. Ṣigba to godo mẹ, mẹde he yiaga hú yé klọ Evi, bo hẹn ẹn nado vẹtoli na Jehovah. Mẹnu wẹ mẹlọ?⁠—

Biblu dọ dọ odàn de dọho na Evi. Ṣigba a yọnẹn dọ odàn ma nọ dọho. Enẹwutu, nawẹ e wagbọn do dọho?⁠— Angẹli de wẹ basi taidi dọ odàn lọ wẹ to hodọ nkọ. Ṣigba na nugbo tọn, angẹli lọ wẹ to hodọ. Angẹli lọ ko jẹ onú ylankan lẹ lẹnpọn ji. E jlo dọ Adam po Evi po ni nọ sẹ̀n ẹn. E jlo dọ yé ni nọ setonuna ẹn. E jlo na yí otẹn Jiwheyẹwhe tọn.

Enẹwutu angẹli ylankan enẹ ze linlẹn ylankan lẹ do ayiha mẹ na Evi. E yí odàn lọ zan nado dọna ẹn dọ: ‘Jiwheyẹwhe ma dọ nugbo na we gba. Hiẹ ma na kú gba eyin a dù atin-sinsẹ́n lọ. A na yọnnuin di Jiwheyẹwhe.’ Eyin towe wẹ, be a na ko yí enẹ sè ya?⁠—

Evi jẹ nuhe Jiwheyẹwhe ma na ẹn jlo ji. E dù atin-sinsẹ́n lọ he e ma dona dù. Enẹgodo e na Adam lọsu ga. Adam ma yí nuhe odàn lọ dọ lẹ sè gba. Ṣigba ojlo etọn nado nọhẹ Evi sinyẹn hú owanyi he e tindo na Jiwheyẹwhe. Enẹwutu ewọ lọsu dù atin-sinsẹ́n lọ ga.​—⁠Gẹnẹsisi 3:​1-6; 1 Timoti 2:⁠14.

Etẹwẹ yin kọdetọn lọ?⁠— Adam po Evi po lẹzun mapenọ, bo poyọnho, bosọ kú. Podọ na yé yin mapenọ wutu, ovi he yé ji lẹpo wẹ yin mapenọ ga bo nọ poyọnho bosọ nọ kú. Jiwheyẹwhe ma dolalo gba! Gbẹninọ sinai do tonusise na ẹn ji. (Lomunu lẹ 5:12) Biblu dọna mí dọ angẹli lọ he dolalo na Evi nọ yin yiylọdọ Satani Lẹgba, podọ angẹli devo lẹ he wá lẹzun mẹylankan nọ yin yiylọdọ aovi lẹ.​—⁠Jakobu 2:19; Osọhia 12:⁠9.

Todin, be a yọ́n nuhewutu angẹli dagbe he Jiwheyẹwhe dá lọ wá lẹzun mẹylankan ya?⁠— Na e jẹ onú ylankan lẹ lẹnpọn ji wutu wẹ. E jlo nado yin Mẹhe Yiaga hugan. E yọnẹn dọ Jiwheyẹwhe ko dọna Adam po Evi po nado ji ovi lẹ, bọ e jlo dọ yemẹpo ni nọ sẹ̀n ẹn. Lẹgba jlo na hẹn mẹlẹpo vẹtoli na Jehovah. Enẹwutu e nọ tẹnpọn nado ze linlẹn ylankan lẹ do ayiha mẹ na mí.​—⁠Jakobu 1:​13-15.

Lẹgba dọ dọ mẹdepope ma yiwanna Jehovah nugbonugbo gba. E dọ dọ hiẹ po yẹn po ma yiwanna Jiwheyẹwhe gba podọ mí ma jlo na setonuna Jiwheyẹwhe nugbonugbo gba. E dọ dọ whenuena ninọmẹ lẹ bọawu na mí kẹdẹ wẹ mí nọ setonuna Jehovah. Be nugbo dọ wẹ Lẹgba te ya? Be mọwẹ mí nọ basi ya?

Mẹplọntọ Daho lọ dọ dọ lalonọ wẹ Lẹgba yin! Jesu dohia dọ emi yiwanna Jehovah nugbonugbo gbọn tonusise na Ẹn dali. Podọ e mayin whenue e bọawu na Jesu kẹdẹ wẹ e setonuna Jiwheyẹwhe gba. E wàmọ to whelẹponu, etlẹ yin to whenuena mẹdevo lẹ hẹn ẹn sinyẹnawu na ẹn. E yin nugbonọ na Jehovah kakajẹ okú. Enẹ wẹ zọ́n bọ Jiwheyẹwhe fọ́n ẹn sọnku nado nọgbẹ̀ kakadoi.

Enẹwutu mẹnu wẹ hiẹ na dọ dọ e yin kẹntọgán mítọn?⁠— Mọwẹ, Satani Lẹgba wẹ. Be a sọgan mọ ẹn po nukun po ya?⁠— Lala! Ṣigba mí yọnẹn dọ e tin podọ e yiaga bo dohuhlọn hú mí. Ṣogan, mẹnu wẹ yiaga hú Lẹgba?⁠— Jehovah Jiwheyẹwhe wẹ. Enẹwutu mí yọnẹn dọ Jiwheyẹwhe sọgan basi hihọ́na mí.