Alọgọ sọn Angẹli Jiwheyẹwhe Tọn lẹ Dè

MẸDELẸ dọ dọ nuhe yé sọgan mọ po nukun po lẹ kẹdẹ wẹ yé sọgan yise dọ e tin. Ṣigba nulunu wẹ enẹ yin. Onú susu wẹ tin bọ mí ma ko mọ po nukun mítọn lẹ po pọ́n gbede. Be a sọgan dọ dopo to yé mẹ ya?⁠—

Etẹwẹ dogbọn jẹhọn he mí nọ gbọ́n dali? Be e ma nọ fá do agbasa towe go ya?⁠— Ze alọ towe daga, bo dó fúfú i. Nawẹ e te to agbasa towe go?⁠— E fá to agbasa towe go, ṣigba a ma mọ jẹhọn lọ, kavi e mayin mọwẹ?⁠—

Mí ko dọho gando omẹ gbigbọnọ he mí ma sọgan mọ po nukun po lẹ go. Mí plọn dọ delẹ yin mẹdagbe ṣigba devo lẹ yin mẹylankan. Dọ oyín omẹ gbigbọnọ he mí ma sọgan mọ po nukun po delẹ tọn na mi.⁠— Mọwẹ, Jehovah Jiwheyẹwhe yin dopo, Jesu lọsu tin to yé mẹ, po angẹli dagbe lẹ po. Be angẹli ylankan lẹ tin ga wẹ ya?⁠— Biblu dọ yé tin. Dọ nuhe hiẹ ko plọn dogbọn yé dali na mi.⁠—

Onú dopo he mí yọnẹn wẹ yindọ angẹli dagbe lẹ po angẹli ylankan lẹ po dohuhlọn hú mí. Mẹplọntọ Daho lọ yọ́n nususu gando angẹli lẹ go. Na ewọ lọsu ko yin angẹli de pọ́n whẹpo do yin jiji di viyẹyẹ de to aigba ji. E ko nọ̀ po angẹli devo lẹ po to olọn mẹ. E yọ́n angẹli livi susu lẹ. Be angẹli ehe lẹpo wẹ tindo yinkọ ya?⁠—

Mí plọn dọ Jiwheyẹwhe dó yinkọ na sunwhlẹvu lẹ. Enẹwutu mí sọgan dọ po nujikudo po dọ angẹli lẹ lọsu tindo oyín yetọn ga. Podọ mí yọnẹn dọ yé sọgan dọho hẹ yedelẹ na Biblu dọho dogbọn ‘ogbè angẹli lẹ tọn’ dali. (1 Kọlintinu lẹ 13:1) Etẹ ji wẹ a lẹndọ angẹli lẹ nọ dọhodo to yedelẹ ṣẹnṣẹn? Be yé nọ dọho dogbọn mí mẹhe to aigba ji lẹ dali wẹ ya?⁠—

Mí yọnẹn dọ angẹli Satani tọn lẹ, heyin aovi lẹ to tintẹnpọn nado klọ mí nado vẹtoli na Jehovah. Enẹwutu yé dona nọ dọho to yedelẹ ṣẹnṣẹn gando lehe yé na wà ehe do go. Yé jlo dọ mí ni taidi yé na Jehovah nido gbẹwanna mílọsu lẹ ga. Ṣigba etẹwẹ dogbọn angẹli nugbonọ Jiwheyẹwhe tọn lẹ dali? Be a lẹndọ yelọsu nọ dọho mítọn wẹ ya?⁠— Mọwẹ, yé nọ wàmọ. Yé jlo nado gọalọna mí. Gbọ̀ ma dọ lehe angẹli Jiwheyẹwhe tọn delẹ gọalọna mẹdelẹ he yiwanna Jehovah bo nọ sẹ̀n ẹn do na we.

Di apajlẹ, dawe de tin he yin Daniẹli he nọ̀ Babilọni. Mẹsusu ma yiwanna Jehovah to otò lọ mẹ gba. Gbẹtọ lẹ tlẹ dosẹ́n dọ mẹdepope he hodẹ̀ hlan Jehovah Jiwheyẹwhe na yin yasana. Ṣigba Daniẹli ma sọgan gọ̀n ma hodẹ̀ hlan Jehovah gba. Be a yọ́n nuhe yé wà na Daniẹli ya?⁠—

Mẹylankan lẹ ze Daniẹli dlan odò kinnikinni lẹ tọn de mẹ. Daniẹli kẹdẹ wẹ tin to kinnikinni he huvẹ to hùhù lẹ ṣẹnṣẹn to odò lọ mẹ. Be a yọ́n nuhe jọ to whenẹnu ya?⁠— Daniẹli dọmọ: “Jiwheyẹwhe . . . ko do angẹli etọn hlan, bo ko sọ bọ̀ onù kinnikinni lẹ lọ tọn lẹ dó.” Yé ma gbleawuna ẹn paali! Angẹli lẹ sọgan wà onú jiawu lẹ na mẹhe to Jehovah sẹ̀n lẹ.—Daniẹli 6:18-22.

Enẹgodo, flin whenuena Pita tin to gànpamẹ. Hiẹ na ko flin dọ Pita yin họntọn Mẹplọntọ Daho lọ, heyin Jesu Klisti tọn. Homẹ mẹdelẹ tọn ma hùn to whenuena Pita dọna yé dọ Jesu yin Ovi Jiwheyẹwhe tọn. Enẹwutu yé ze Pita do gànpamẹ. Awhànfuntọ lẹ to Pita ṣọ́ nado mọdọ e ma họnyi. Be mẹde tin he sọgan gọalọna ẹn ya?⁠—

Pita to amlọndọ to awhànfuntọ awe ṣẹnṣẹn, bọ yé sọ dó gẹdẹ alọ na ẹn. Ṣigba Biblu dọmọ: ‘Pọ́n! Angẹli Jehovah tọn wá, bọ hinhọ́n de họ́n to ganpa lọ mẹ. Angẹli lọ doalọ adaja mẹ na Pita, bo fọ́n ẹn, dọmọ, “Fọ́n ṣite plaun.” ’

To whenẹnu, gẹdẹ he blá alọ Pita tọn lẹ flẹ jai! Angẹli lọ sọ dọna ẹn dọ: ‘Dó avọ̀ towe lẹ, bo dó afọpa towe, bosọ hodo mi.’ Awhànfuntọ he to ṣiṣọ́ ẹ lẹ ma sọgan glọnalina yé na angẹli lọ wẹ to alọgọna Pita. To whenuena yé jẹ họngbó ogànnọ lọ kọ̀n, onú jiawu de jọ. Họngbó lọ hùn na ede! Angẹli enẹ tún Pita dote na e nido sọgan zindonukọn to yẹwhehodidọ etọn mẹ.—Owalọ lẹ 12:3-11.

Be angẹli Jiwheyẹwhe tọn lẹ sọgan gọalọna mílọsu ga ya?⁠— Mọwẹ, yé sọgan. Be ehe zẹẹmẹdo dọ yé ma na dike nudepope ni sayana mí pọ́n gbede wẹ ya?⁠— Lala, eyin mí wà onú ylankan lẹ, angẹli lẹ ma nọ basi hihọ́na mí sọn yajiji mẹ gba. Ṣigba eyin mí ma tlẹ wà onú ylankan, mí tlẹ sọgan sọ jiya ga. Azọ́n hihọ́-basinamẹ tọn mọnkọtọn mayin didena angẹli lẹ gba. Kakatimọ, Jiwheyẹwhe ko de azọ́n vonọtaun de na yé.

Biblu dọho dogbọn angẹli de dali he nọ to didọna gbẹtọ lẹ to filẹpo nado sẹ̀n Jiwheyẹwhe. (Osọhia 14:6, 7) Nawẹ angẹli lọ nọ dọ enẹ na yé gbọn? Be e nọ dawhá sọn olọn mẹ na gbẹtọ lẹpo nido sè wẹ ya?⁠— Lala, kakatimọ, hodotọ Jesu tọn he to aigba ji lẹ wẹ nọ dọhona mẹdevo lẹ dogbọn Jiwheyẹwhe dali, bọ angẹli lẹ nọ deanana yé to azọ́n ehe mẹ. Angẹli lẹ nọ deanana yé yì mẹhe jlo na yọ́n Jiwheyẹwhe nugbonugbo lẹ dè na yé nido sè ohó lọ. Mí sọgan tindo mahẹ to azọ́n yẹwhehodidọ tọn ehe mẹ, angẹli lẹ nasọ gọalọna mí.

Ṣigba etẹwẹ mí na wà eyin mẹhe ma yiwanna Jiwheyẹwhe lẹ diọnukunsọ mí? Eyin yé wle mí do gànpamẹ lo? Be angẹli lẹ na tún mí dote wẹ ya?⁠— Yé sọgan wàmọ. Ṣigba yé ma nọ wàmọ to whepoponu gba.

Hodotọ Jesu tọn, Paulu ko sẹngàn pọ́n. E to gbejizọnlin basi to tọjihun de mẹ bọ jẹhọn sinsinyẹn de fọ́n. Ṣigba angẹli lẹ ma whlẹn ẹn to afọdopolọji gba. Na mẹdevo lẹ gbẹ́ pò he dona sè ohó Jiwheyẹwhe tọn wutu. Angẹli dopo dọna ẹn dọmọ: “Paulu, a dibu blo; yè ma na nọma hẹn we jẹ Sesali nukọn.” Mọwẹ, Paulu dona yin hinhẹn yì ogán aihọn tọn Sesali dè na Paulu nido dọyẹwheho na ẹn. Angẹli lẹ nọ saba yọ́n fie Paulu te, bo nọ gọalọna ẹn. Yé na gọalọna mílọsu ga eyin mí sẹ̀n Jiwheyẹwhe nugbonugbo.—Owalọ lẹ 27:23-25.

Azọ́n daho devo de gbẹ́ tin he angẹli lẹ na wà, podọ yé na wà ẹ to madẹnmẹ. Ojlẹ Jiwheyẹwhe tọn nado và mẹylankan lẹ sudo ko sẹpọ. Mẹhe ma nọ sẹ̀n Jiwheyẹwhe nugbo lọ lẹpo wẹ na yin vivasudo. Mẹhe dọ dọ yé ma yise dọ angẹli lẹ tin na yé ma sọgan mọ yé wutu lẹ na wá mọdọ nuṣiwa wẹ emilẹ te.—2 Tẹsalonikanu lẹ 1:6-8.

Etẹwẹ enẹ na zẹẹmẹdo na mí?⁠— Eyin mí yiwanna angẹli Jiwheyẹwhe tọn lẹ, yé na gọalọna mí. Ṣigba be mí yiwanna yé ya?⁠— Mí na dohia dọ mí yiwanna yé gbọn Jehovah sinsẹ̀n dali. Podọ eyin mí nọ sẹ̀n Jehovah, mí na nọ dọna mẹdevo lẹ nado sẹ̀n ẹn ga.