Angẹli lẹ—Lehe Yé Nọ Yinuwado Mí Ji Do

YẸWHEGÁN Daniẹli basi zẹẹmẹ numimọ he e mọ gando whẹndo Jiwheyẹwhe tọn he bẹ angẹli lẹ hẹn go tọn dọmọ: “Fọtọ́n fọtọ́n [angẹli lẹ tọn] to devizọnwa hlan [Jiwheyẹwhe], podọ fọtọ́n ao donu fọtọ́n ao ṣite to ewọ nukọn.” (Daniẹli 7:10) Wefọ ehe do lẹndai he wutu Jiwheyẹwhe dá angẹli lẹ hia. Yé dona nọ wadevizọn na ẹn bo tin to awuwle mẹ nado hẹn anademẹ etọn lẹ di.

Jiwheyẹwhe nọ yí angẹli lẹ zan to whedelẹnu nado wà onú delẹ na gbẹtọvi lẹ. Mí na gbadopọnna lehe e nọ yí yé zan do nado na huhlọn omẹ etọn lẹ bo basi hihọ́na yé, nado dó owẹ̀n gbẹtọvi lẹ, podọ nado hẹn whẹdida etọn ṣẹ do mẹylankan lẹ ji.

Angẹli lẹ Nọ Namẹ Huhlọn Bosọ Nọ Basi Hihọ́ Namẹ

Nudida gbigbọnọ lẹ ko do ojlo vẹkuvẹku hia to gbẹtọvi lẹ mẹ sọn whenue gbọ́n aigba po gbẹtọvi tintan lẹ po yin didá to nukun yetọn mẹ. Jesu Klisti dọho taidi apajlẹ pipé nuyọnẹn tọn whẹpo e do wá aigba ji dọmọ: “Homẹhunhun ṣie . . . tin to ovi gbẹtọ tọn lẹ dè.” (Howhinwhẹn lẹ 8:31) Podọ Biblu dọna mí dọ “angẹli lẹ jlo nado doun” nugbo he gando Klisti go lẹ po sọgodo he ko yin didehia hlan yẹwhegán Jiwheyẹwhe tọn lẹ po mẹ.—1 Pita 1:11, 12.

Dile ojlẹ to yìyì, angẹli lẹ doayi e go dọ suhugan gbẹtọvi lẹ tọn ma to Mẹdatọ owanyinọ yetọn sẹ̀n gba. Lehe ehe dona ko vẹ́ na angẹli nugbonọ lẹ do sọ! To alọ devo mẹ, whedepopenu he ylanwatọ dopo lẹnvọjọ bo lẹhlan Jehovah dè, “ayajijẹ [nọ] tin to angẹli Jiwheyẹwhe tọn lẹ nukọn.” (Luku 15:10) Dagbemẹninọ mẹhe to Jiwheyẹwhe sẹ̀n lẹ tọn nọ duahunmẹna angẹli lẹ taun, podọ Jehovah ko yí yé zan whlasusu nado na huhlọn devizọnwatọ nugbonọ etọn he tin to aigba ji lẹ bo basi hihọ́na yé. (Heblu lẹ 1:14) Gbadopọnna apajlẹ delẹ.

Angẹli awe gọalọna Lọti dodonọ po viyọnnu etọn lẹ po nado lùn vasudo tòdaho ylankan Sọdọmi po Gọmọla po tọn tọ́n gbọn pinplan yé tọ́nsọn lẹdo enẹ mẹ dali.a (Gẹnẹsisi 19:1, 15-26) To owhe kanweko susu godo, yẹwhegán Daniẹli ma yin awugblena dile etlẹ yindọ ewọ yin zizedlan odò kinnikinni lẹ tọn mẹ. Etẹwutu? “Jiwheyẹwhe ṣie ko do angẹli etọn hlan, bo ko sọ bọ̀ onù kinnikinni lẹ lọ tọn lẹ do,” wẹ e dọ. (Daniẹli 6:22) Angẹli lẹ gọalọna Jesu to whenuena e bẹ lizọnyizọn etọn jẹeji to aigba ji. (Malku 1:13) Podọ ojlẹ vude whẹpo Jesu do kú, angẹli de sọawuhia ẹ bo to “huhlọn na ẹn.” (Luku 22:43) Dona nankọtọn die alọgọ angẹli enẹ tọn dona ko yin na Jesu to ojlẹ sinsinyẹn enẹlẹ mẹ to gbẹzan etọn mẹ! Angẹli de sọ tún apọsteli Pita dote sọn ganpamẹ.—Owalọ lẹ 12:6-11.

Be angẹli lẹ nọ basi hihọ́na mí to egbehe ya? Eyin mí sẹ̀n Jehovah sọgbe hẹ anademẹ he tin to Ohó etọn mẹ, mí yin hinhẹn deji dọ angẹli huhlọnnọ, mayinukundomọ etọn lẹ na basi hihọ́na mí. Biblu dopagbe dọmọ: “Angẹli OKLUNỌ tọn lẹdo yé he dibusi i lẹ pé, bosọ whlẹn yé.”—Psalm 34:7.

Ṣigba, mí dona yọnẹn dọ azọngban tintan angẹli lẹ tọn wẹ nado wadevizọn na Jiwheyẹwhe, e ma yin na gbẹtọ lẹ gba. (Psalm 103:20, 21) Yé nọ yigbena anademẹ Jiwheyẹwhe tọn, e ma yin oylọ kavi obiọ gbẹtọ lẹ tọn gba. Enẹwutu, Jehovah Jiwheyẹwhe si wẹ mí dona biọ alọgọ te, e ma yin angẹli lẹ gba. (Matiu 26:53) Na nugbo tọn, to whenuena e yindọ mí ma nọ mọ angẹli lẹ, mí ma sọgan dọ obá he mẹ Jiwheyẹwhe nọ yí yé zan jẹ nado gọalọna gbẹtọ lẹ to whẹho voovo lẹ mẹ gba. Ṣigba mí yọnẹn dọ Jehovah nọ “do ede hia huhlọnnọ na ayiha yé mẹhe tọn yin pipé hlan e dè lẹ tọn.” (2 Otannugbo lẹ 16:9; Psalm 91:11) Podọ mí yin hinhẹn deji dọ “eyin mí biọ nudepope kẹdẹdi ojlo etọn, [Jiwheyẹwhe nọ] sè mítọn.”—1 Johanu 5:14.

Owe-wiwe sọ dọna mí dọ Jiwheyẹwhe kẹdẹ wẹ mí dona nọ hodẹ̀ hlan podọ ewọ dopo kẹdẹ wẹ mí dona sẹ̀n. (Eksọdusi 20:3-5; Psalm 5:1, 2; Matiu 6:9) Angẹli nugbonọ lẹ nọ na mí tuli nado wàmọ. Di apajlẹ, to whenuena apọsteli Johanu jlo na litaina angẹli de, nudida gbigbọnọ enẹ gbẹ́ na ẹn dọ: “Pọ́n, hiẹ basi mọ blo: . . . litaina Jiwheyẹwhe.”—Osọhia 19:10.

Angẹli lẹ Nọ Dó Owẹ̀n Jiwheyẹwhe Tọn Lẹ

Hogbe lọ “angẹli” zẹẹmẹdo “wẹnsagun,” podọ enẹ yin aliho devo he mẹ angẹli lẹ nọ wadevizọn na Jiwheyẹwhe te—taidi wẹnsagun etọn hlan gbẹtọvi lẹ. Di dohia, “angẹli Gabliẹli [yin didohlan] sọn Jiwheyẹwhe dè yì tòdaho Galili tọn de mẹ, he yè nọ ylọ Nazalẹti.” Nado yì wà etẹ? Nado dọna awhli de he nọ yin Malia dọ dile etlẹ yindọ ewọ yin yọnnu alọji de, e na mọhò bo ji visunnu de he na nọ yin yiylọdọ Jesu. (Luku 1:26-31) Angẹli de sọ yin didohlan lẹngbọhọtọ he tin to danji lẹ nado lá na yé dọ “Klisti Oklunọ” ko yin jiji. (Luku 2:8-11) Mọdopolọ, angẹli lẹ lá wẹndomẹ Jiwheyẹwhe tọn na Ablaham, Mose, Jesu, po mẹdevo he yin nùdego to Biblu mẹ lẹ po.—Gẹnẹsisi 18:1-5, 10; Eksọdusi 3:1, 2; Luku 22:39-43.

Nawẹ angẹli lẹ nọ wadevizọn taidi wẹnsagun Jiwheyẹwhe tọn lẹ gbọn to egbehe? Lẹnnupọndo azọ́n he Jesu dọ dọdai dọ hodotọ etọn lẹ na wà jẹnukọnna vivọnu aihọn ylankan ehe tọn ji. E dọmọ: “Yè nasọ dọyẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Matiu 24:3, 14) Kunnudetọ Jehovah tọn lẹ nọ yí hugan ganhiho liva dopo zan to whemẹwhemẹ nado dọyẹwheho wẹndagbe Ahọluduta Jiwheyẹwhe tọn. Ṣigba be hiẹ yọnẹn dọ angẹli lẹ to mahẹ tindo to azọ́n ehe mẹ ga ya? Apọsteli Johanu donù numimọ he e mọ de go, bo dọmọ: “Yẹn sọ mọ angẹli devo . . . , [e] tindo wẹndagbe madopodo de to alọ mẹ, nado dọyẹwheho hlan yé he tin to aigba ji lẹ, hlan akọta lẹpo, hlan hẹnnu lẹpo, hlan ogbè lẹpo, hlan gbẹtọ lẹpo.” (Osọhia 14:6, 7) Wefọ ehe zinnudo azọ́n titengbe hugan he angẹli lẹ nọ wà do gbẹtọvi lẹ tamẹ to egbehe ji.

Kunnudetọ Jehovah tọn lẹ nọ mọ dohia anademẹ angẹli lẹ tọn dile yé to azọ́n yẹwhehodidọ tọn yetọn wà sọn họndekọn jẹ họndekọn. Yé nọ saba mọ mẹdelẹ he ṣẹṣẹ to dẹ̀ho dọ mẹde ni wá gọalọna yé nado mọnukunnujẹ lẹndai Jiwheyẹwhe tọn lẹ mẹ. Na anademẹ angẹli lẹ tọn po vivẹnudido Kunnudetọ lẹ lọsu tọn po wutu, omẹ fọtọ́n kanweko susu nọ plọn nado yọ́n Jehovah to owhe dopodopo mẹ. Na hiẹ lọsu ni mọaleyi sọn azọ́n ogbẹ̀-whlẹngán tọn he to yinyin wiwà to anademẹ angẹli lẹ tọn glọ ehe mẹ.

Angẹli lẹ Nọ Hẹn Whẹdida Jiwheyẹwhe Tọn Ṣẹ

Dile etlẹ yindọ angẹli lẹ ma yin dotẹnmẹna nado dawhẹna gbẹtọ lẹ, yé ma yin nupọntọ lẹ poun gba. (Johanu 5:22; Heblu lẹ 12:22, 23) Yé hẹn whẹdida Jiwheyẹwhe tọn lẹ ṣẹ to ojlẹ he wayi lẹ mẹ. Di apajlẹ, Jiwheyẹwhe yí angẹli lẹ zan to avùnhiho etọn sọta Egiptinu hohowhenu tọn lẹ, he hẹn Islaelivi lẹ do kanlinmọgbenu mẹ. (Psalm 78:49) Podọ to zánto dopo mẹ, “angẹli OKLUNỌ tọn” hù awhànfuntọ fọtọ́n kẹnnẹ-koatọ́n to awhànpa kẹntọ omẹ Jiwheyẹwhe tọn lẹ tọn de mẹ.—2 Ahọlu lẹ 19:35.

To sọgodo, angẹli lẹ na hẹn whẹdida whẹgbledomẹ Jiwheyẹwhe tọn ṣẹ ga. Jesu na wá “po angẹli huhlọnnọ etọn lẹ po, mẹhe to ahọsuyi to yé he ma yọ́n Jiwheyẹwhe lẹ go, podọ yé he ma setonuna wẹndagbe Jesu Klisti Oklunọ mítọn tọn lẹ, to miyọ́n he to jiji mẹ.” (2 Tẹsalonikanu lẹ 1:7, 8) Ṣigba, mẹhe ma kẹalọyi owẹ̀n he to yinyin lilá lẹdo aihọn pé todin po alọgọ angẹli lẹ tọn po lẹ kẹdẹ wẹ na tindo numimọ vasudo enẹ tọn. Mẹhe dín Jiwheyẹwhe bo yinuwa sọgbe hẹ nuplọnmẹ Owe-wiwe tọn lẹ ma na yin awugblena.—Zẹfania 2:3.

Lehe mí yọ́n pinpẹn angẹli nugbonọ lẹ tọn, he nọ hẹn anademẹ Jiwheyẹwhe tọn lẹ di to whepoponu do sọ! Jehovah nọ yí yé zan nado gọalọna devizọnwatọ nugbonọ etọn he tin to aigba ji lẹ podọ nado basi hihọ́na yé. Homẹmiọnnamẹnu daho wẹ ehe yin, na nudida gbigbọnọ ylankan he nọ yin yiylọdọ aovi lẹ tin he jlo nado gbleawuna mí wutu.

Aovi lẹ—Omẹ Nankọ Wẹ Yé Yin?

To nudi owhe 1 500 to whenuena Satani klọ Evi to jipa Edẹni tọn mẹ godo, angẹli Jiwheyẹwhe tọn lẹ doayi e go dọ gbọnvona omẹ nugbonọ vude, taidi Abẹli, Enọku, po Noa po, Satani Lẹgba ko tindo kọdetọn dagbe to kọlilẹ na gbẹtọvi lẹpo sọn Jiwheyẹwhe dè mẹ. (Gẹnẹsisi 3:1-7; Heblu lẹ 11:4, 5, 7) Delẹ to angẹli lọ lẹ mẹ joawuna nuyiwadomẹji Satani tọn ga. Biblu dlẹnalọdo yé taidi gbigbọ he vẹtoli “to Noa whenu” lẹ. (1 Pita 3:19, 20) Nawẹ tolivivẹ yetọn wá jẹ gbangba gbọn?

To ojlẹ Noa tọn mẹ, angẹli atẹṣitọ susu jo otẹn yetọn do to olọn mẹ bo wá aigba ji, bosọ ze agbasa gbẹtọ tọn lẹ dó. Etẹwutu? Yé ko wleawuna ojlo nado tindo kọndopọ zanhẹmẹ tọn hẹ yọnnu lẹ. Taidi kọdetọn de, yé ji ovi he nọ yin yiylọdọ Nẹfilimi lẹ, mẹhe wá lẹzun omẹ gángánsu danuwatọ lẹ. Humọ, “kanyinylan gbẹtọ tọn sù gbau to aigba mẹ, podọ ayilinlẹn ayiha etọn mẹ tọn lẹpo oylan dódó wẹ to whepoponu.” Nalete, Jehovah Jiwheyẹwhe ma na dotẹnmẹ kanyinylan gbẹtọvi lẹ tọn nado zindonukọn gba. E hẹn Singigọ wá aigba lọ blebu ji, ehe zà mẹylankan lẹpo sẹ gọna Nẹfilimi lẹ. Devizọnwatọ nugbonọ Jiwheyẹwhe tọn lẹ kẹdẹ wẹ lùntọ́n.—Gẹnẹsisi 6:1-7, 17; 7:23.

Angẹli atẹṣitọ lẹ ma mọ vasudo yí to Singigọ lọ whenu. Yé jo agbasa gbẹtọvi tọn yetọn lẹ do bo lẹkọyi agblò gbigbọ tọn mẹ taidi nudida gbigbọnọ lẹ. Enẹgodo, yé yin alọdlẹndo taidi aovi lẹ. Yé nọgodona Satani Lẹgba, mẹhe yin yiylọdọ “ogán aovi lẹ tọn.” (Matiu 12:24-27) Taidi ogán yetọn, aovi lẹ jlo dọ gbẹtọvi lẹ ni sẹ̀n emi.

Aovi lẹ ylan taun, ṣigba nuhudo ma tin nado dibusi yé gba. Huhlọn yetọn tindo dogbó. To whenuena angẹli tolivẹtọ lẹ lẹkọyi olọn mẹ, yé ma yin dotẹnmẹna nado lẹkọ biọ whẹndo Jiwheyẹwhe tọn he bẹ angẹli nugbonọ lẹ hẹn mẹ gba. Kakatimọ, yé yin aliglọnna bo ma sọgan mọ anademẹ gbigbọmẹ tọn depope yí sọn Jiwheyẹwhe dè ba. Yé ma tindo todido dagbe depope na sọgodo. Na nugbo tọn, yé yin ginglọndo ninọmẹ zinvlu gbigbọmẹ tọn de mẹ he yin yinyọnẹn taidi “Taltalu.” (2 Pita 2:4, NW) Jehovah ze yé do “ogàn madopodo” mẹ, na yé nido gbọṣi zinvlu gbigbọmẹ tọn mẹ. Humọ, yé masọ sọgan ze agbasa gbẹtọvi lẹ tọn dó todin ba.—Juda 6.

Etẹwẹ Hiẹ Dona Wà?

Be aovi lẹ gbẹ́ nọ yinuwado gbẹtọ lẹ ji wẹ ya? Mọwẹ, yé nọ wàmọ gbọn “bublu,” kavi ayiha wintinwintin yiyizan dali, taidi dehe ogán yetọn, Satani Lẹgba nọ yizan lẹ nkọ. (Efesunu lẹ 6:11, 12) Etomọṣo, gbọn ayinamẹ Ohó Jiwheyẹwhe tọn tọn yiyizan dali, mí sọgan nọavunte sọta aovi lẹ. Humọ, mẹhe yiwanna Jiwheyẹwhe lẹ nọ duvivi hihọ́-basinamẹ angẹli huhlọnnọ lẹ tọn.

Lehe e yin nujọnu dọ hiẹ ni plọn nubiọtomẹsi Jiwheyẹwhe tọn he tin to Owe-wiwe mẹ lẹ bo yinuwado nuhe hiẹ plọn lẹ ji do sọ! Hiẹ sọgan plọn nususu dogọ to Biblu mẹ gbọn tito bibasi hẹ Kunnudetọ Jehovah tọn he tin to lẹdo towe mẹ lẹ kavi wekinkan hlan zinjẹgbonutọ linlinnamẹwe ehe tọn lẹ dali. Homẹ Kunnudetọ Jehovah tọn lẹ tọn na hùn nado plọn Biblu hẹ we vọnu podọ to ojlẹ he yọ́n hugan na we mẹ.

[Nudọnamẹ Odò Tọn]

[Apotin to weda 6]

ANGẸLI LẸ—LEHE YÉ YIN TITO-BASINA DO

Jehovah basi titona whẹndo daho etọn he bẹ angẹli lẹ hẹn to aliho ehe mẹ:

Angẹli he tindo huhlọn po aṣẹpipa yiaga hugan po wẹ Mikaẹli angẹligán lọ, kavi Jesu Klisti. (1 Tẹsalonikanu lẹ 4:16; Juda 9) Selafu lẹ, kelubimi lẹ, po angẹli devo lẹ po tin to anademẹ etọn glọ.

Selafu lẹ tin to otẹn yiaga de mẹ to tito Jiwheyẹwhe tọn mẹ. Yé nọ wadevizọn to ofìn Jiwheyẹwhe tọn kọ̀n. Azọ́ndenamẹ yetọn bẹ wiwe-yinyin Jiwheyẹwhe tọn lilá po omẹ etọn lẹ hinhẹn do wiweji to gbigbọ-liho po hẹn.—Isaia 6:1-3, 6, 7.

Kelubimi lẹ yin kinkọndopọ hẹ ofìn Jiwheyẹwhe tọn bosọ nọ ze kiklo-yinyin Jehovah tọn daga.—Psalm 80:1; 99:1; Ezekiẹli 10:1, 2.

Angẹli devo lẹ yin afọzedaitọ Jehovah tọn lẹ, bo nọ hẹn ojlo etọn di.

[Yẹdide to weda 4]

Angẹli lẹ plan Lọti po viyọnnu etọn lẹ po tọ́nsọn lẹdo owùnọ mẹ

[Yẹdide to weda 5]

Whenuena apọsteli Johanu jlo na litaina angẹli lọ, e dọna ẹn dọ: ‘Hiẹ basi mọ blo!’

[Yẹdide to weda 6]

Angẹli lẹ nọ hẹn whẹdida Jiwheyẹwhe tọn ṣẹ

[Yẹdide to weda 7]

Be hiẹ to alemọyi sọn azọ́n yẹwhehodidọ tọn he nọ yin wiwà to anademẹ angẹli lẹ tọn glọ mẹ ya?