Etẹwẹ Ahọluduta Jiwheyẹwhe Tọn Yin? Lehe Mí Sọgan Dohia dọ E Jlo Mí Gbọn

BE A yọ́n odẹ̀ he Jesu plọn hodotọ etọn lẹ ya?⁠— Eyin a ma yọnẹn, bo dike mí ni hia ẹ dopọ sọn Biblu mẹ, to Matiu 6:9-13 mẹ. Odẹ̀ lọ he mẹsusu nọ ylọdọ Odẹ̀ Oklunọ tọn, bẹ hogbe ehelẹ hẹn: “Ahọludu towe ni wá.” Be a yọ́n nuhe Ahọluduta Jiwheyẹwhe tọn yin ya?⁠—

Ahọlu yin mẹhe dugán do otò kavi agbegbe de ji. Podọ gandudu etọn nọ yin yiylọdọ ahọluduta. To otò delẹ mẹ, mẹhe yin nukọntọ to gandudu lọ mẹ nọ yin yiylọdọ togán. Nawẹ Ogán gandudu Jiwheyẹwhe tọn nọ yin yiylọdọ?⁠— Ahọlu. Nuhe zọ́n niyẹn bọ gandudu Jiwheyẹwhe tọn nọ yin yiylọdọ Ahọluduta.

Be a yọ́n mẹhe Jehovah Jiwheyẹwhe dè nado yin Ahọlu to gandudu Etọn mẹ ya?⁠— Ovi etọn, Jesu Klisti wẹ. Etẹwutu wẹ Jesu do yọ́n hú ogán devo depope he gbẹtọ sọgan dè?⁠— Na Jesu yiwanna Otọ́ etọn Jehovah taun wutu wẹ. Enẹwutu e nọ wà nuhe sọgbe lẹ to whepoponu.

Whenu dindẹn jẹnukọnna jiji Jesu tọn to Bẹtlẹhẹm, Biblu ko dọ dogbọn jiji etọn dali bo dọ dọ e na lẹzun Ogán de he Jiwheyẹwhe dè. Gbọ mí ni hia ehe to Isaia 9:6, 7 mẹ. E hia dọmọ: “Yè ji ovi de hlan mí, yè na visunnu de hlan mí; ahọludu nasọ tin to abọ́ etọn ji: yè na nọ ylọ oyín etọn dọ . . . Ahọvi Jijọho tọn. Ahọludu etọn po jijọho po ma na ponù.”⁠— Wekun flinflin lẹ yin mítọn.

Be a yọ́n nuhe zọ́n bọ Ogán Ahọluduta Jiwheyẹwhe tọn yin yiylọ tofi dọ “Ahọvi” ya?⁠— A yọnẹn dọ, ovi ahọlu de tọn wẹ nọ yin ahọvi. Podọ Jesu wẹ yin Ovi Ahọlu Daho lọ, Jehovah tọn. Ṣigba Jehovah ko sọ de Jesu di Ahọlu to gandudu Etọn, he na dugán do aigba ji na owhe fọtọ́n mẹ. (Osọhia 20:6) To baptẹm Jesu tọn godo, e “ṣẹ yẹwheho dọ, dọmọ, Mì lẹnvọjọ: na ahọludu olọn tọn sẹpọ.”—Matiu 4:17.

Etẹwutu wẹ Jesu do dọ dọ Ahọluduta lọ ko sẹpọ?⁠— Na Ahọlu lọ, he na wá dugán to olọn mẹ, ko tin to ṣẹnṣẹn yetọn to finẹ! Nuhe zọ́n niyẹn bọ Jesu do dọna gbẹtọ lẹ dọmọ: “Ahọluduta Jiwheyẹwhe tọn tin to gblagbla mìtọn mẹ.” (Luku 17:21) Be hiẹ ma na jlo dọ Ahọlu Jehovah tọn ni sẹpọ we sọmọ bọ a tlẹ sọgan doalọ e go ya?⁠—

Ṣigba be a sọgan dọ azọ́n titengbe he Jesu wá basi to aigba ji ya?⁠— Jesu na gblọndo na kanbiọ enẹ, dọmọ: ‘Yẹn dona dọ yẹwheho ahọluduta Jiwheyẹwhe tọn na otò daho devo lẹ ga, na enẹwutu wẹ yè do mi hlan.’ (Luku 4:43) Jesu yọnẹn dọ ewọ dopo kẹdẹ ma sọgan wà azọ́n yẹwhehodidọ tọn lọ gba. Enẹwutu, be a yọ́n nuhe e wà ya?⁠—

Jesu ylọ mẹdevo lẹ bo plọn yé lehe yé sọgan wà azọ́n yẹwhehodidọ tọn gbọn. Omẹ 12 he e dè taidi apọsteli etọn lẹ wẹ yin omẹ tintan he e plọn azọ́n. (Matiu 10:5, 7) Ṣigba be apọsteli etọn lẹ kẹdẹ wẹ Jesu plọn nado wà azọ́n ehe ya? Lala, Biblu dọ dọ Jesu sọ plọn mẹsusu devo lẹ nado dọyẹwheho. To godo mẹ, e do devi etọn 70 devo lẹ hlan awe-awe nado yì dọyẹwheho. Ṣigba etẹwẹ yé plọn gbẹtọ lẹ?⁠— Jesu dọmọ: “[Mì] nọ dọ hlan yé, dọ, Ahọludu Jiwheyẹwhe tọn to sisẹpọ jẹ mì dè.” (Luku 10:9) Gbọnmọ dali, gbẹtọ lẹ plọnnu dogbọn gandudu Jiwheyẹwhe tọn dali.

To hohowhenu to Islaeli, ahọlu he ṣẹṣẹ yin dide lẹ nọ kùn kẹtẹkẹtẹvu yì tòdaho lọ mẹ nado do yede hia gbẹtọ lẹ. Nuhe Jesu lọsu wà niyẹn to whenuena e basi gbejizọnlin etọn godo tọn yì Jelusalẹm. Enẹwutu, Jesu wẹ na yin Ogán to Ahọluduta Jiwheyẹwhe tọn mẹ. Be gbẹtọ lẹ jlo dọ e ni yin Ahọlu yetọn ya?⁠—

Dile e to kẹtẹkẹtẹvu lọ ji, suhugan gbẹtọ lẹ tọn tẹ́ awugbó yetọn lẹ do aliho ji na e nido gbọn e ji. Mẹdevo lẹ sán atinlá lẹ bo tẹ́ yé do aliho ji. Ehe wiwà dohia dọ yé jlo dọ Jesu ni yin Ahọlu yetọn. Yé sọ to awhádo dọmọ: “Donanọ wẹ Ahọlu he ja to oyín [Jehovah] tọn mẹ.” Ṣigba e mayin mẹlẹpo wẹ jaya gba. Sinsẹ̀ngán delẹ tlẹ dọna Jesu dọ, ‘Dọna devi towe lẹ nado bọnùdo.’—Luku 19:28-40.

Jesu yin wiwle to azán etọn atọ́ntọ gbè bo yin hinhẹn yì họ̀nmẹ to togán Pọntiu Pilati nukọn. Kẹntọ Jesu tọn lẹ sawhẹdokọna ẹn dọ Jesu lá ede di ahọlu podọ e jẹagọdo gandudu Lomu tọn. Enẹwutu Pilati kanhose Jesu. Jesu dohia ẹ dọ emi ma to tintẹnpọn nado yí gandudu sọn e si gba. Nuhe e dọna Pilati wẹ yindọ: “Ahọludu ṣie ma yin aihọn he tọn gba.”—Johanu 18:36.

Enẹgodo, Pilati tọ́njẹgbonu bo dọna gbẹtọ lẹ dọ emi ma mọ oylan depope to Jesu mẹ. Ṣigba todin linlẹn gbẹtọ lẹ tọn ko diọ, yé masọ jlo dọ Jesu ni yin Ahọlu yetọn ba. Yé ma jlo dọ Jesu ni yin tuntundote. (Johanu 18:37-40) To whenuena Pilati sọ vọ́ hodọ hẹ Jesu, e mọdọ Jesu ma wà onú ylankan depope. Enẹwutu, whla godo tọn he e hẹn Jesu wá gbonu, Pilati dọmọ: “Mì pọ́n ahọlu mìtọn!” Ṣigba gbẹtọ lẹ dawhá dọmọ: ‘Plan ẹn yì! Plan ẹn yì! Whè e do yatin go!’

Pilati sọ kanse yé dọ: Be yẹn na whè Ahọlu mìtọn do [yatin] go?” Yẹwhenọ daho lẹ sọ gblọn dọmọ: “Míwlẹ ma tindo ahọlu de, adavo Sesali.” Be a sọgan yí nukun homẹ tọn do pọ́n enẹ ya? Yẹwhenọ kanylantọ enẹlẹ ko tẹnpọn bo diọlinlẹnna gbẹtọ lẹ nado gbẹ́ Jesu dai!—Johanu 19:1-16.

Onú dopolọ wẹ to jijọ to egbehe ga. Na nugbo tọn, mẹsusu ma jlo dọ Jesu ni yin Ahọlu yetọn gba. Yé sọgan dọ dọ yé yise to Jiwheyẹwhe mẹ, ṣigba yé ma nọ jlo dọ Jiwheyẹwhe kavi Klisti ni dọ nuhe yé dona wà na yé gba. Yé jlo gandudu yetọn titi lẹ to aigba ji tofi.

Be mílọsu tindo linlẹn dopolọ wẹ ya? To whenuena mí plọnnu dogbọn Ahọluduta Jiwheyẹwhe tọn dali po onú jiawu he e na wà na mí lẹpo po, numọtolanmẹ tẹwẹ enẹ nọ hẹn mí nado tindo gando Jiwheyẹwhe go?⁠— E nọ hẹn mí nado yiwanna ẹn, kavi e mayin mọwẹ?⁠— To whelọnu lo, nawẹ mí sọgan dohia Jiwheyẹwhe dọ mí yiwanna ẹn podọ mí jlo dọ Ahọluduta etọn ni dugán do mí ji gbọn?⁠—

Mí sọgan do numọtolanmẹ mítọn hia Jiwheyẹwhe gbọn hihodo apajlẹ Jesu tọn dali. Ṣigba etẹwẹ Jesu wà nado dohia dọ emi yiwanna Jehovah?⁠— Jesu basi zẹẹmẹ dọ: “Yẹn to nuhe yin homẹhun hlan ẹn lẹ wà to whepoponu.” (Johanu 8:29) Mọwẹ, Jesu wá aigba ji ‘nado wà ojlo Jiwheyẹwhe tọn’ podọ nado “dotana azọ́n etọn.” (Heblu lẹ 10:7; Johanu 4:34) Pọ́n nuhe Jesu wà whẹpo do bẹ azọ́n yẹwhehodidọ tọn etọn jẹeji.

Jesu yì Johanu Baptizitọ lọ dè to Otọ̀ Jọdani tọn mẹ. To whenuena yé biọ otọ̀ lọ mẹ, Johanu ylọn Jesu do osin lọ mẹ pete podọ to enẹgodo e fọ́n ẹn wá aga sọn osin lọ glọ. Be a yọ́n nuhewutu Johanu do baptizi Jesu ya?⁠—

Jesu wẹ biọ to Johanu si nado wàmọ na ẹn. Ṣigba nawẹ mí wagbọn do yọnẹn dọ Jiwheyẹwhe jlo dọ Jesu ni yin bibaptizi?⁠— Mí yọ́n ehe, na whenuena Jesu jẹgbonu sọn osin lọ mẹ godo, e sè ogbè Jiwheyẹwhe tọn sọn olọn mẹ dọmọ: “Hiẹ wẹ Ovi yiwanna ṣie, towe mẹ homẹ ṣie hùn do tlala.” Jiwheyẹwhe tlẹ do gbigbọ wiwe etọn hlan bọ e jẹ do Jesu ji di apoe de. Enẹwutu, baptẹm he Jesu yí dohia dọ e jlo nado sẹ̀n Jehovah to gbẹzan etọn lẹpo mẹ, mọwẹ, kakadoi.—Malku 1:9-11.

Nugbo wẹ dọ hiẹ gbẹ́ pò to ovu todin. Ṣigba etẹwẹ hiẹ na jlo nado wà eyin a whẹ́n?⁠— Be hiẹ na yin bibaptizi di Jesu ya?⁠— A dona hodo apajlẹ etọn, na Biblu dọ dọ e ze ‘apajlẹ de dai na we nado hodo pẹkipẹki.’ (1 Pita 2:21) Eyin hiẹ lọsu yí baptẹm, a to didohia dọ emi jlo dọ Ahọluduta Jiwheyẹwhe tọn ni dugán do emi ji. Ṣigba baptẹm yíyí poun ma ko pé gba.

Mí dona setonuna nuhe Jesu plọnmẹ lẹpo. Jesu plọnmẹ dọ mí ma dona “yin aihọn tọn.” Be mí sọgan dọ dọ mí to tonusena Jesu eyin mí jẹ walọ aihọn tọn lẹ zan ji ya? Jesu po apọsteli etọn lẹ po dapana walọ aihọn tọn lẹ. (Johanu 17:14) Ṣigba etẹwẹ yé wà?⁠— Yé nọ lá Ahọluduta Jiwheyẹwhe tọn na mẹdevo lẹ. Enẹ wẹ yin azọ́n titengbe hugan to gbẹzan yetọn mẹ. Be mí sọgan wà enẹ ga ya?⁠— Mọwẹ, mí na wàmọ eyin mí nọ yinuwa sọgbe hẹ odẹ̀ he mí nọ hò lọ, dọ Ahọluduta Jiwheyẹwhe tọn ni wá.