Nuhe Biblu Dọ Gando Gbẹdai po Kinklan po Go

Jehovah nọ donukun dọ mẹhe ko wlealọ lẹ ni hẹn opà alọwle tọn go po nugbonọ-yinyin po. To whenuena Jehovah to sunnu po yọnnu tintan lọ po kọndopọ to alọwle mẹ, e dọmọ: “Sunnu . . . na sẹbọdo asi etọn go: yé nasọ lẹzun [agbasalan] dopo.” To nukọn mẹ, Jesu Klisti vọ́ ohó enẹ dọ bo yidogọ dọmọ: “Enẹwutu, nuhe Jiwheyẹwhe kọndopọ mì dike gbẹtọ klan ẹn blo.” (Gẹnẹsisi 2:24; Matiu 19:3-6) Enẹwutu, Jehovah po Jesu po nọ pọ́n alọwle hlan taidi kanṣiṣa gbẹwhenu tọn he ma dona wá vivọnu adavo alọwlemẹ dopo kú. (1 Kọlintinu lẹ 7:39) To whenuena e yindọ alọwle yin tito wiwe de, gbẹdai ma dona yin pinpọnhlan taidi whẹho vlẹkẹsẹ de poun gba. Na nugbo tọn, Jehovah gbẹwanna gbẹdai he ma tindo dodonu Owe-wiwe tọn depope lẹ.—Malaki 2:15, 16.

Etẹwẹ yin dodonu Owe-wiwe tọn na gbẹdai? E họnwun dọ Jehovah gbẹwanna ayọdide po galilọ po. (Gẹnẹsisi 39:9; 2 Samuẹli 11:26, 27; Psalm 51:4) Na nugbo tọn, e gbẹwanna galilọ sọmọ bọ e do e hia taidi dodonu de na gbẹdai. (Nado mọ zẹẹmẹ gigọ́ do nuhe galilọ bẹhẹn ji, pọ́n Weta 9, hukan 7, fie galilọ yin hodọdeji te.) Jehovah na dotẹnmẹ alọwlemẹ homẹvọnọ lọ nado basi dide vlavo nado gbẹ́ nọpọ́ hẹ alọwlemẹ he doafọgbé lọ kavi nado basi gbẹdai. (Matiu 19:9) Enẹwutu, eyin alọwlemẹ homẹvọnọ de de nado basi gbẹdai, e ma ze afọdide he Jehovah gbẹwanna de gba. Ṣigba to ojlẹ dopolọ mẹ, agun Klistiani tọn ma na tuli mẹdepope nado basi gbẹdai. Na nugbo tọn, ninọmẹ delẹ sọgan whàn alọwlemẹ homẹvọnọ lọ nado gbẹ́ nọpọ́ hẹ mẹhe doafọgbé lọ, titengbe eyin e lẹnvọjọ sọn ahun mẹ wá. To popolẹpo mẹ, mẹhe tindo whẹwhinwhẹ́n sinai do Biblu ji nado basi gbẹdai lẹ dona basi nudide yedetiti tọn bo kẹalọyi kọdetọn depope he e sọgan hẹnwa.—Galatianu lẹ 6:5.

To ninọmẹ he sinyẹn zẹjlẹgo delẹ mẹ, Klistiani delẹ ko basi dide nado klan kavi gbẹ́ alọwlemẹ yetọn dai dile etlẹ yindọ omẹ awetọ lọ ma deayọ. To whẹho mọnkọtọn mẹ, Biblu zinnudeji dọ mẹhe jẹvò lọ “ni tin mawlealọhẹ, kavi yè ni hẹn ẹn gbọwhẹ.” (1 Kọlintinu lẹ 7:11) Klistiani he jẹvò enẹ ma sọgan wlealọ hẹ mẹdevo gba. (Matiu 5:32) Todin, mì gbọ mí ni lẹnnupọndo ninọmẹ he sinyẹn zẹjlẹgo delẹ ji he mẹdelẹ ko pọnhlan taidi dodonu dagbe na kinklan.

Didesọn ojlo mẹ ma nado penukundo whẹndo go. Whẹndo de sọgan jẹhẹ́n pete bo ma tindo dandannu gbẹ̀mẹ tọn lẹ na asu lọ gboawupo nado penukundo yé go, dile etlẹ yindọ e tindo nugopipe lọ nado wazọ́n. Biblu dọmọ: “Eyin mẹde ma wleawudaina . . . whédo etọn lọsu lẹ, e mọ́n yise lọ, e sọ ylanhu mayisenọ.” (1 Timoti 5:8) Eyin sunnu mọnkọtọn gbẹ́ nado diọ, asi lọ sọgan basi dide vlavo eyin e biọ dọ ni basi hihọ́na dagbemẹninọ ede tọn po ovi etọn lẹ po tọn bo klan to osẹ́n-liho. Na nugbo tọn, Klistiani mẹho agun tọn lẹ dona yí sọwhiwhe do dindona alọsọakọ́n lọ dọ Klistiani de gbẹ́ nado penukundo whẹndo etọn go. Klistiani de sọgan yin didesẹ sọn agun mẹ eyin e gbẹ́ gbidigbidi nado penukundo whẹndo etọn go.

Danuwadomẹgo zẹjlẹgo. Alọwlemẹ danuwatọ de sọgan nọ yinuwa po kanyinylan po sọmọ bọ agbasalilo gọna ogbẹ̀ awetọ etọn tọn tin to owù mẹ. Eyin Klistiani wẹ alọwlemẹ danuwatọ lọ yin, mẹho agun tọn lẹ dona dindona nugbo-yinyin whẹho lọ tọn. Eyin Klistiani de nọ gblehomẹ zẹjlẹgo bo nọ wadanu do awetọ etọn go, e sọgan yin didesẹ sọn agun mẹ.—Galatianu lẹ 5:19-21.

Gbigbọnọ-yinyin zizedo owù mẹ petepete. Alọwlemẹ de sọgan nọ tẹnpọn to whepoponu nado glọnalina awetọ etọn ma nado zindonukọn to sinsẹ̀n-bibasi nugbo mẹ kavi tlẹ hẹn ẹn gánnugánnu nado tùnafọ gbedide Jiwheyẹwhe tọn lẹ ji to whẹho delẹ mẹ. To ninọmẹ mọnkọtọn mẹ, alọwlemẹ he tin to owù mẹ lọ sọgan basi dide vlavo eyin aliho dopo akàn lọ nado “setonuna Jiwheyẹwhe hú gbẹtọ” wẹ nado klan to osẹ́n-liho.—Owalọ lẹ 5:29.

To ninọmẹ he sinyẹn zẹjlẹgo mọnkọtọn lẹpo mẹ taidi dehe ṣẹṣẹ yin hodọdeji lẹ, mẹdepope ma dona diọlinlẹnna alọwlemẹ homẹvọnọ lọ nado klan kavi nọpọ́ hẹ awetọ etọn. Dile etlẹ yindọ họntọn he whèwhín to gbigbọ-liho lẹ gọna mẹho agun tọn lẹ sọgan na alọgọ po ayinamẹ sinai do Biblu ji lẹ po, yé ma sọgan yọ́n nuhe to asu po asi po de ṣẹnṣẹn lẹpo to gigọ́ mẹ gba. Jehovah kẹdẹ wẹ sọgan yọnẹn. Nado dọ hójọhó, asi kavi asu Klistiani de ma na do sisi hia Jiwheyẹwhe kavi tito alọwle tọn eyin e gbọn hójijlẹ dali dósin nuhahun whẹndo etọn tọn lẹ ji kiki na e jlo na klan sọn alọwlemẹ etọn go wutu. Jehovah yọ́n linlẹn he wutu mẹde basi dide nado klan, mahopọnna lehe mẹlọ sọgan tẹnpọn nado ze e whla do. Na nugbo tọn, “onú lẹpo wẹ to omẹ́ bosọ hùndonuvo to nukun etọn mẹ, mẹhe míwlẹ do onú nado wà hẹ” kavi dogbena. (Heblu lẹ 4:13) Ṣigba eyin ninọmẹ he sinyẹn zẹjlẹgo de gbẹ́ zindonukọn janwẹ, mẹdepope ma dona mọhodọdo Klistiani de go eyin e mọdọ onú godo tọn he emi sọgan wà wẹ nado klan. To tadona mẹ, mí dona flindọ “mímẹpo wẹ na nọte to whẹda-zìnpo Jiwheyẹwhe tọn nukọn.”—Lomunu lẹ 14:10-12.