Nukun Tẹwẹ Kunnudetọ Jehovah Tọn lẹ Nọ Yí Do Pọ́n Gbẹdai?
Mí nọ kẹalọyi pọndohlan Biblu tọn gando alọwle po gbẹdai po go. Jiwheyẹwhe ze tito alọwle tọn dai nado yin kọndopọ tẹgbẹ tọn de to sunnu de po yọnnu de po ṣẹnṣẹn. Whẹwhinwhẹ́n sinai do Owe-wiwe ji dopo gee he wutu yè sọgan basi gbẹdai wẹ fẹnnuwiwa zanhẹmẹ tọn.—Matiu 19:5, 6, 9.
Be Kunnudetọ lẹ nọ gọalọna asu po asi po he to nuhahun mẹ lẹ ya?
Mọwẹ, to aliho susu mẹ:
Owe lẹ. Owe ehelẹ nọ saba bẹ nudọnamẹ lẹ hẹn he sọgan hẹn alọwle lẹ lodo, etlẹ yin dehe ko dibla gbà lẹ. Di apajlẹ, pọ́n hosọ lọ lẹ “Hẹn Gbemima Alọwle Tọn Towe Go,” “Comment pardonner [Lehe Yè Sọgan Jonamẹ Do],” gọna “Hiẹ Sọgan Vọ́ Awuwlena Jidide Do Alọwlemẹ Towe Go.”
Opli lẹ. Mí nọ dọhodo ayinamẹ Biblu tọn he yọ́n-na-yizan na alọwlemẹ lẹ ji to opli agun tọn lẹ po plidopọ lẹ po ji.
Mẹho lẹ. Mẹho agun tọn lẹ nọ gọalọna asu po asi po lẹ, gbọn ayidonugo yetọn dindọn wá wefọ lẹ ji dali, taidi Efesunu lẹ 5:22-25.
Be mẹho agun tọn lẹ dona nagbè Kunnudetọ de nado basi gbẹdai wẹ ya?
Lala. Etlẹ yin to whenue asu po asi po he to nuhahun tindo to alọwle mẹ de dín alọgọ mẹho lẹ tọn, dotẹnmẹ ma yin nina yé nado dọ nuhe asu po asi po lọ na wà na yé. (Galatianu lẹ 6:5) Ṣigba, mẹhe de nado basi gbẹdai matin whẹwhinwhẹ́n Owe-wiwe tọn depope, ma pegan nado mọ lẹblanulọkẹyi vonọtaun lẹ yí to agun mẹ podọ sọgbe hẹ Owe-wiwe lẹ, ewọ ma vò nado vọ́ alọwle.—1 Timoti 3:1, 5, 12.
Nukun tẹwẹ Kunnudetọ lẹ nọ yí do pọ́n kinklan?
Biblu na tuli alọwlemẹ lẹ nado nọ nọpọ́, etlẹ yin to whenue nuhahun madonukun lẹ wá fọ́n. (1 Kọlintinu lẹ 7:10-16) Nuhahun susu sọgan yin dididẹ gbọn odẹ̀ vẹkuvẹku, nunọwhinnusẹ́n Biblu tọn lẹ yíyí-do-yizan mẹ po owanyi didohia po dali.—1 Kọlintinu lẹ 13:4-8; Galatianu lẹ 5:22.
Ṣigba, to ninọmẹ sinsinyẹn taidi dehe bọdego lẹ mẹ, Klistiani delẹ ko de nado klan:
Didesọn ojlo mẹ ma nado penukundo whẹndo go.—1 Timoti 5:8.
Danuwadomẹgo zẹjlẹgo.—Salmu lẹ 11:5.
Gbigbọnọ-yinyin zizedo owù mẹ petepete. Di apajlẹ, alọwlemẹ de sọgan nọ tẹnpọn nado hẹn Kunnudetọ de gánnu-gánnu nado tùnafọ gbedide Jiwheyẹwhe tọn lẹ ji to whẹho delẹ mẹ bọ alọwlemẹ he tin to owù mẹ lọ sọgan basi dide dọ kinklan wẹ yin aliho dopo akàn lọ nado “setonuna Jiwheyẹwhe taidi ogán kakati nido yin gbẹtọ lẹ.”—Owalọ lẹ 5:29.