Nawẹ Hiẹ Sọgan Dọnsẹpọ Jiwheyẹwhe Gbọn?

1. Be Jiwheyẹwhe nọ sè odẹ̀ lẹpo wẹ ya?

Jiwheyẹwhe basi oylọna gbẹtọ wunmẹ lẹpo nado nọ dọnsẹpọ ewọ to odẹ̀ mẹ. (Salmu lẹ 65:2) Ṣogan, e ma nọ dotoaina odẹ̀ lẹpo gba. Di apajlẹ, odẹ̀ sunnu he nọ sayana asi etọn tọn sọgan yin aliglọnna. (1 Pita 3:7) Podọ to whenue Islaelivi lẹ zindonukọn to ylanwiwa mẹ, Jiwheyẹwhe gbẹ́ nado sè odẹ̀ yetọn lẹ. Matin ayihaawe, lẹblanulọkẹyi de wẹ odẹ̀ yin. Etomọṣo, Jiwheyẹwhe na sè odẹ̀ mẹhe tlẹ yin ylanwatọ akonka lẹ tọn eyin yé lẹnvọjọ.—Hia Isaia 1:15; 55:7.

Pọ́n video lọ Be Jiwheyẹwhe Nọ Sè Odẹ̀ Lẹpo Wẹ Ya?

2. Nawẹ mí dona nọ hodẹ̀ gbọn?

Odẹ̀ yin apadewhe sinsẹ̀n-bibasi mítọn tọn, enẹwutu Mẹdatọ mítọn Jehovah kẹdẹ wẹ mí dona nọ hodẹ̀ hlan. (Matiu 4:10; 6:9) Podọ, to whenuena e yindọ mapenọ wẹ mí yin, mí dona nọ hodẹ̀ to oyín Jesu tọn mẹ na ewọ wẹ kú na ylando mítọn lẹ wutu. (Johanu 14:6) Jehovah ma jlo dọ mí ni nọ vọ́ odẹ̀ he yin pinplọn do tamẹ kavi yin kinkandai lẹ dọ poun. E jlo dọ mí ni nọ hodẹ̀ sọn ahun mẹ wá.—Hia Matiu 6:7; Filipinu lẹ 4:6, 7.

Mẹdatọ mítọn tlẹ sọgan sè odẹ̀ he ma yin hihò daga lẹ. (1 Samuẹli 1:12, 13) E basi oylọna mí nado nọ hodẹ̀ to whepoponu, taidi to bẹjẹeji po vivọnu azán de tọn po, to núdùdù whenu podọ to whenue mí tindo nuhahun lẹ.—Hia Salmu lẹ 55:22; Matiu 15:36.

3. Naegbọn Klistiani nugbo lẹ do nọ pli dopọ?

E ma nọ bọawu nado dọnsẹpọ Jiwheyẹwhe na mí to gbẹnọ to mẹhe ma tindo yise to Jiwheyẹwhe mẹ bo nọ ṣàn opagbe etọn nado hẹn jijọho wá aigba ji kò lẹ ṣẹnṣẹn wutu. (2 Timoti 3:1, 4; 2 Pita 3:3, 13) Enẹwutu, mí tindo nuhudo gbẹdido mẹjlọdote tọn hẹ yisenọ hatọ lẹ podọ yelọsu tindo nuhudo mítọn.—Hia Heblu lẹ 10:24, 25.

Gbẹdido hẹ mẹhe yiwanna Jiwheyẹwhe lẹ nọ gọalọna mí nado dọnsẹpọ ẹ dogọ. Opli Kunnudetọ Jehovah tọn lẹ tọn nọ hùn dotẹnmẹ dagbe lẹ dote nado mọaleyi sọn yise mẹdevo lẹ tọn mẹ.—Hia Lomunu lẹ 1:11, 12.

4. Nawẹ hiẹ sọgan dọnsẹpọ Jiwheyẹwhe gbọn?

Hiẹ sọgan dọnsẹpọ Jehovah gbọn ayihamẹlinlẹnpọn do nuhe a ko plọn sọn Ohó etọn mẹ lẹ ji dali. Nọ lẹnnupọn do nuyiwa etọn lẹ, ayinamẹ etọn lẹ po opagbe etọn lẹ po ji. Odẹ̀ po ayihamẹlinlẹnpọn po na gọalọna mí nado mọ lehe owanyi po nuyọnẹn Jiwheyẹwhe tọn po họakuẹ sọ.—Hia Jọṣua 1:8; Salmu lẹ 1:1-3.

Hiẹ sọgan dọnsẹpọ Jiwheyẹwhe kiki eyin a dejidego bo tindo yise to ewọ mẹ. Ṣigba, yise taidi nutogbẹ̀ de he tindo nuhudo núdùdù tọn. Hiẹ dona nọ na núdùdù yise towe whẹwhẹ gbọn dogbigbapọnna nuhe sisẹ́ we nado yise lẹ dali.—Hia Matiu 4:4; Heblu lẹ 11:1, 6.

5. Ale tẹlẹ wẹ hiẹ na mọyi eyin a dọnsẹpọ Jiwheyẹwhe?

Jehovah nọ hò mẹhe yiwanna ẹn lẹ tọn pọ́n. E sọgan basi hihọ́na yé sọn nudepope he na ze yise po todido ogbẹ̀ madopodo tọn yetọn po do owù mẹ lẹ si. (Salmu lẹ 91:1, 2, 7-10) E nọ na avase mí gando aliho gbẹninọ tọn he nọ ze agbasalilo po ayajẹ mítọn po do owù mẹ lẹ go. Jehovah nọ plọn mí aliho gbẹninọ tọn dagbe hugan lọ.—Hia Salmu lẹ 73:27, 28; Jakọbu 4:4, 8.