Plọnnu sọn Ohó Jiwheyẹwhe Tọn Mẹ

Nawẹ Hiẹ Sọgan Dọnsẹpọ Jiwheyẹwhe Gbọn?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Be Jiwheyẹwhe nọ sè odẹ̀ lẹpo ya?

Jehovah basi oylọna gbẹtọ akọta lẹpo tọn nado dọnsẹpọ ewọ to odẹ̀ mẹ. (Psalm 65:2) Ṣigba, e ma nọ dotoaina odẹ̀ lẹpo. Di apajlẹ, to whenue Islaelivi lẹ ma dealọ sọn ylanwiwa mẹ, Jiwheyẹwhe gbẹ́ nado sè odẹ̀ yetọn lẹ. (Isaia 1:15) Podọ, eyin asu de nọ yinuwa hẹ asi etọn to aliho agọ̀ mẹ, odẹ̀ etọn lẹ sọgan yin aliglọnna. (1 Pita 3:7) Etomọṣo, Jiwheyẹwhe na sè odẹ̀ mẹhe peve to ylanwiwa mẹ lẹ tọn eyin yé lẹnvọjọ.—Hia 2 Otannugbo lẹ 33:9-13.

2. Nawẹ mí dona nọ hodẹ̀ gbọn?

Odẹ̀ yin lẹblanulọkẹyi de podọ adà sinsẹ̀n-bibasi mítọn tọn, enẹwutu Jehovah kẹdẹ wẹ mí dona nọ hodẹ̀ hlan. (Matiu 4:10; 6:9) To whenuena e yindọ ylandonọ wẹ mí yin, mí dona nọ hodẹ̀ to yinkọ Jesu tọn mẹ, na ewọ wẹ “aliho” dide lọ wutu. (Johanu 14:6) Jehovah ma jlo dọ mí ni nọ hia odẹ̀ he yin pinplọn do tamẹ kavi he yin kinkandai lẹ gba, ṣigba e nọ jlo dọ mí ni nọ hodẹ̀ sọn ahun mẹ wá.—Hia Matiu 6:7; Filippinu lẹ 4:6, 7.

Mẹdatọ mítọn tlẹ sọgan sè odẹ̀ he ma yin hihò po gbèzeyiaga po lẹ. (1 Samuẹli 1:12, 13) Ewọ basi oylọna mí nado nọ hodẹ̀ to nuwiwa lẹpo whenu, taidi to bẹjẹeji po vivọnu azán de tọn po, to núdùdù whenu, podọ to whenue mí pehẹ nuhahun lẹ.—Hia Psalm 55:22; Matiu 15:36.

3. Naegbọn Klistiani lẹ dona nọ pli dopọ?

E ma bọawu nado dọnsẹpọ Jiwheyẹwhe, na mí to gbẹnọ to mẹhe ma tindo yise to Jiwheyẹwhe mẹ bo nọ ṣàn opagbe etọn nado hẹn jijọho wá aigba ji kò lẹ ṣẹnṣẹn. (2 Timoti 3:1, 4; 2 Pita 3:3, 13) Enẹwutu, mí tindo nuhudo gbẹdido mẹjlọdote tọn hẹ yisenọ hatọ lẹ.—Hia Heblu lẹ 10:24, 25.

Hiẹ sọgan dọnsẹpọ Jiwheyẹwhe eyin a nọ jihọntọn hẹ mẹhe yiwanna Jiwheyẹwhe lẹ. Opli Kunnudetọ Jehovah tọn lẹ tọn nọ hùn dotẹnmẹ dote na mí nado mọaleyi sọn yise mẹdevo lẹ tọn mẹ.—Hia Lomunu lẹ 1:11, 12.

4. Nawẹ hiẹ sọgan dọnsẹpọ Jiwheyẹwhe gbọn?

Hiẹ sọgan dọnsẹpọ Jehovah gbọn ayihamẹlinlẹnpọn do nuhe a plọn sọn Ohó etọn mẹ lẹ ji dali. Nọ lẹnnupọndo nuyiwa etọn lẹ, anademẹ etọn lẹ, po opagbe etọn lẹ po ji. Dẹ̀hiho po ayihamẹlinlẹnpọn po nọ whàn mí nado do pinpẹn-nutọn-yinyọnẹn hia na owanyi po nuyọnẹn Jiwheyẹwhe tọn po.—Hia Jọṣua 1:8; Psalm 1:1-3.

Hiẹ sọgan dọnsẹpọ Jiwheyẹwhe kiki eyin a dejido ewọ go, yèdọ eyin a tindo yise to ewọ mẹ. Ṣigba, yise taidi nutogbẹ̀ de he dona yin nukunpedego. Hiẹ dona nọ penukundo yise towe go gbọn nulinlẹnpọn do nuhe a ko plọn lẹ ji whẹwhẹ dali.—Hia 1 Tẹsalonikanu lẹ 5:21; Heblu lẹ 11:1, 6.

5. Ale tẹlẹ wẹ hiẹ sọgan mọyi eyin a dọnsẹpọ Jiwheyẹwhe?

Jehovah nọ hò mẹhe yiwanna ẹn lẹ tọn pọ́n. E nọ basi hihọ́na yé sọn nudepope he sọgan ze yise po todido ogbẹ̀ madopodo tọn yetọn po do owù mẹ lẹ si. (Psalm 91:1, 2, 7-10) Ewọ nọ na mí avase gando aliho gbẹninọ tọn he nọ ze agbasalilo po ayajẹ mítọn po do owù mẹ lẹ go. Aliho gbẹninọ tọn dagbe hugan wẹ Jehovah nọ plọn mí.—Hia Psalm 73:27, 28; Jakọbu 4:4, 8.

Na nudọnamẹ dogọ, pọ́n weta 17 owe Etẹwẹ Biblu Plọn Mí Taun? tọn, he Kunnudetọ Jehovah tọn lẹ zinjẹgbonu.