Etẹwẹ Sọgan Hẹn Ayajẹ Wá to Whẹndo Mẹ?

NUHE BIBLU DỌ

“Ayajẹnọ wẹ mẹhe to ohó Jiwheyẹwhe tọn sè bo to yíyí i hẹn lẹ!”—Luku 11:28, Lẹdogbedevomẹ Aihọn Yọyọ Tọn.

ALE HE ENẸ SỌGAN HẸNWA NA WE

Owanyi nugbo na tin.—Efesunu lẹ 5:28, 29.

Sisi sisosiso na tin.—Efesunu lẹ 5:33.

Hihọ́ nujọnu tọn na tin.—Malku 10:6-9.

BE MÍ SỌGAN YÍ NUHE BIBLU DỌ SÈ NUGBONUGBO YA?

Mọwẹ, e whè gbau na whẹwhinwhẹ́n awe ehelẹ wutu:

• Jiwheyẹwhe wẹ Dowatọ whẹndo tọn. Biblu dọ dọ Jehovah Jiwheyẹwhe dè wẹ “whẹndo lẹ . . . mọ oyín yetọn yí sọn.” (Efesunu lẹ 3:14, 15) To hogbe devo mẹ, Jehovah wẹ ze tito whẹndo tọn dai. Naegbọn e do yin nujọnu nado yọ́n ehe?

  Lẹnnupọn vude: Eyin núdùdù de vivi to onù towe mẹ bọ a jlo na yọ́n dadonu he yè yí do dà ẹ lẹ, mẹnu wẹ a na kanbiọ? E họnwun dọ mẹhe dà núdùdù lọ wẹ.

  Mọdopolọ, nado yọ́n nuhe sọgan hẹn ayajẹ wá to whẹndo mẹ lẹ, mí dona lẹhlan Jehovah, he yin Dowatọ whẹndo tọn.—Gẹnẹsisi 2:18-24.

• Jiwheyẹwhe nọ hò towe pọ́n. Nuyọnẹnnu wẹ e na yin dọ whẹndo lẹ ni nọ dín ayinamẹ Jehovah tọn, he e nọ na to Ohó etọn mẹ. Etẹwutu? “Na e to [towe] hòpọn wutu.” (1 Pita 5:6, 7) Dagbemẹninọ towe nọ duahunmẹna Jehovah, podọ ayinamẹ etọn lẹ nọ wazọ́n to whepoponu!—Howhinwhẹn lẹ 3:5, 6; Isaia 48:17, 18.