NUPINPLỌN 13
Timoti Jlo Na Gọalọna Gbẹtọ Lẹ
Timoti yin jọja sunnu de he nọ mọ ayajẹ to alọgigọna gbẹtọ lẹ mẹ. E zingbejizọnlin yì fisusu nado gọalọna mẹdevo lẹ. Enẹ zọ́n bọ e tindo ayajẹ taun to gbẹzan etọn mẹ. Be a jlo na sè otàn etọn ya?—
Onọ̀ Timoti tọn po onọ̀-daho etọn po plọnnu in gando Jehovah go
Timoti whẹ́n to tòdaho de mẹ he nọ yin yiylọdọ Listla. To whenue e to pẹvi, onọ̀-daho etọn Loisi po onọ̀ etọn Euniki po jẹ nuplọn ẹn ji gando Jehovah go. To whenue Timoti wá whẹ́n, ewọ jlo na gọalọna mẹdevo lẹ na yé nido yọ́n Jehovah.
To whenue Timoti gbẹ́ pò to jọja mẹ wẹ Paulu kanbiọ ẹ eyin e na hodo emi nado yì dekunnu to fidevo lẹ. Timoti yigbe dọ: ‘N’na yì!’ Ewọ jlo na hodo Paulu bo gọalọna mẹdevo lẹ.
Timoti hodo Paulu yì tòdaho de he nọ yin Tẹsalonika mẹ to Makedonia. Nado yì tòdaho enẹ mẹ, yé dona zinzọnlin taun podọ enẹgodo yé na do bato. To whenue yé jẹ dọ́n, yé gọalọna mẹsusu nado plọnnu gando Jehovah go. Amọ́, mẹdelẹ gblehomẹ do yé go bo tẹnpọn nado wadanu do yé. Enẹwutu, Paulu po Timoti po dona tọ́n sọn finẹ bo yì dekunnu to fidevo lẹ.
Timoti tindo ayajẹ to gbẹ̀mẹ
To osun delẹ godo, Paulu dọna Timoti dọ ni lẹkọyi Tẹsalonika nado yì pọ́n lehe mẹmẹsunnu lẹ te do. E biọ adọgbigbo taun nado lẹkọyi tòdaho he mẹ owù tin te enẹ mẹ! Amọ́ Timoti lẹkọyi, na onú mẹmẹsunnu he to finẹ lẹ tọn to ahunmẹduna ẹn. To whenue e lẹkọ, e hẹn owẹ̀n dagbe lẹ wá na Paulu. Mẹmẹsunnu he to Tẹsalonika lẹ to tonusena osẹ́n Jehovah tọn lẹ!
Timoti wazọ́n hẹ Paulu na owhe susu lẹ. To gbèdopo, Paulu wlan dọ Timoti wẹ yin omẹ dagbe hugan he emi sọgan dohlan nado yì gọalọna agun lẹ. Timoti yiwanna Jehovah bosọ yiwanna gbẹtọ lẹ.
Be a yiwanna gbẹtọ lẹ bo jlo na gọalọna yé nado plọnnu gando Jehovah go ya?— Eyin a wàmọ, a na tindo ayajẹ to gbẹ̀mẹ taidi Timoti!