Plọn Ovi Towe Lẹ

Timoti—Wleawufo bo Ze Ede Jo Nado Wadevizọn

“A KO wleawufo?” Be mẹde ko kàn kanbiọ enẹ sè we pọ́n ya?—a Mẹhe kàn kanbiọ enẹ sè we jlo na yọnẹn eyin a ko wleawu. Di apajlẹ, e sọgan ko yindọ mẹlọ to kinkanse dọ: ‘Be nuplọnmẹwe towe lẹ ko sọgbe ya? Be a ko plọn nuhe mì kàn to wehọmẹ lẹ ya?’ Dile mí na mọ do, Timoti wleawufo.

Timoti sọ ze ede jo. Be a yọ́n nuhe enẹ zẹẹmẹdo ya?— To whenuena Timoti yin oylọ-basina nado wá sẹ̀n Jiwheyẹwhe, e yinuwa pẹpẹ taidi devizọnwatọ Jiwheyẹwhe tọn devo he dọmọ: “Yẹn die; do mi hlan.” (Isaia 6:8) Na Timoti wleawufo bosọ ze ede jo nado wadevizọn wutu, e duvivi gbẹzan he gọ́ na ayajẹ de tọn. Be a jlo na sè otàn etọn ya?—

Timoti yin jiji to Listla he dẹn do Jelusalẹm na kilomẹtlu susu. Onọ̀-daho etọn Loisi po onọ̀ etọn Euniki po nọ yí sọwhiwhe do plọn Owe-wiwe lẹ. Etlẹ yin to whenue Timoti gbẹ́ yin viyẹyẹ de, yé jẹ Ohó Jiwheyẹwhe tọn plọn ẹn ji.—2 Timoti 1:5; 3:15.

E yọnbasi dọ Timoti gbẹ́ pò to aflanmẹ to whenuena apọsteli Paulu dla Listla pọ́n to gbejizọnlin gaa yẹwhehodidọ tọn etọn tintan whenu, to pọmẹ hẹ Balnaba. Vlavo ojlẹ enẹ mẹ wẹ onọ̀ Timoti tọn po onọ̀-daho etọn po lẹzun Klistiani. Be a jlo na yọ́n nuhahun he Paulu po Balnaba po pehẹ lẹ ya?— Eyọn, mẹhe ma yiwanna Klistiani lẹ dlanzannu do Paulu, bo ze e jai, bosọ dọ̀n ẹn tọ́n sọn tòdaho lọ mẹ. Yé lẹndọ e ko kú.

Mẹhe yí nuhe Paulu to pinplọnmẹ sè lẹ lẹdo e bọ e fọ́n. To wunkẹngbe, Paulu po Balnaba po yì sọn tòdaho lọ mẹ, ṣigba yé sọ lẹkọwa Listla to ojlẹ vude godo. To whenuena yé lẹkọwa, Paulu dọ togunmẹho de bo dọna devi lẹ dọ: “Mí ma sọgan nọma gbọn nukunbia susu mẹ biọ ahọludu Jiwheyẹwhe tọn mẹ gba.” (Owalọ lẹ 14:8-22) Be a yọ́n nuhe dọ Paulu te ya?— Nuhe dọ e te wẹ yindọ mẹdevo lẹ na nọ hẹn nuhahun wá na mẹhe to Jiwheyẹwhe sẹ̀n lẹ. Paulu kanwehlan Timoti to godo mẹ dọmọ: ‘Mẹhe jlo na nọ̀ jijọ-di-Jiwheyẹwhe mẹ lẹpo na nọ doakọnna homẹkẹn.’—2 Timoti 3:12; Johanu 15:20.

To whenuena Paulu po Balnaba po tọ́n sọn Listla, yé lẹkọyi whé. To osun delẹ godo, Paulu de Sila nado zingbejizọnlin hẹ ẹ, podọ yé omẹ awe lẹ lẹkọyi nado na tuli devi yọyọ lẹ to otò he Paulu ko dlapọn dai lẹ mẹ. To whenuena yé wá Listla, lehe homẹ Timoti tọn na ko hùn do sọ nado mọ Paulu whladopo dogọ! Homẹ Timoti tọn tlẹ sọ hùn dogọ to whenuena ewọ yin oylọ-basina nado zingbejizọnlin hẹ Paulu po Sila po. Timoti kẹalọyi oylọ-basinamẹ lọ. E wleawufo bosọ ze ede jo nado yì.—Owalọ lẹ 15:40–16:5.

Yé omẹ atọ̀n lẹ zingbejizọnlin dopọ, bo zinzọnlin na kilomẹtlu susu, podọ to enẹgodo yé dó tọjihun de. To whenuena yé jẹte sọn tọjihun lọ mẹ, yé zinzọnlin yì Tẹsalonika to Grèce. To finẹ, mẹsusu lẹzun Klistiani. Ṣigba, mẹdevo lẹ gblehomẹ bo fọ́n hunyanhunyan de dote. Ogbẹ̀ Paulu, Sila po Timoti po tọn tin to owù mẹ, enẹwutu yé tlọ́n finẹ bo yì Belea.—Owalọ lẹ 17:1-10.

Ninọmẹ mẹhe ṣẹṣẹ yise to Tẹsalonika lẹ tọn gbẹ́ to ahunmẹduna Paulu, enẹwutu e gọ̀ Timoti dohlan dọ́n. Be a yọ́n nuhe zọ́n ya?— Paulu wá basi zẹẹmẹ na Klistiani Tẹsalonika tọn lẹ to godo mẹ dọmọ: ‘Nado hẹn mì lodo, podọ nado miọnhomẹna mì na mẹdepope nikaa gbọjọ.’ Be a yọ́n nuhewutu Paulu do Timoti hlan azọ́ndenamẹ owùnọ enẹ mẹ, dile ewọ tlẹ yin jọja de ya?— Nukundiọsọmẹtọ lọ lẹ ma yọ́n Timoti sọmọ, podọ ewọ lọsu ze ede jo nado yì. Enẹ biọ adọgbigbo taun! Nawẹ nulẹ wá yì do to dlapọn lọ whenu? To whenuena Timoti lẹkọwa Paulu dè, e dọna ẹn dọ Tẹsalonikanu lẹ hẹn nugbonọ-yinyin yetọn go taun. Enẹwutu Paulu kanwehlan yé dọ: “Mí do homẹmimiọn to mì ji.”—1 Tẹsalonikanu lẹ 3:2-7.

Timoti wadevizọn hẹ Paulu na owhe ao he bọdego lẹ. Enẹgodo Paulu yin wiwle do ganpamẹ to Lomu, podọ Timoti, he ṣẹṣẹ yin tuntundote sọn ganpamẹ, yì nọ̀ e dè. To whenuena Paulu tin to ganpamẹ, e do wekanhlanmẹ de hlan Filippinu lẹ, podọ vlavo Timoti wẹ na ko kàn owe lọ na ẹn. Paulu dọmọ: ‘Yẹn to linlẹn nado do Timoti hlan mì, na yẹn ma tindo mẹdevo depope he yin nugbonọ sọmọ bo na gọalọna mì di ewọ.’—Filippinu lẹ 2:19-22; Heblu lẹ 13:23.

Lehe hogbe enẹlẹ na ko hẹn homẹ Timoti tọn hùn do sọ! Paulu yiwanna Timoti taun na ewọ wleawufo bosọ ze ede jo nado wadevizọn. Todido mítọn wẹ yindọ hiẹ lọsu na wàmọ.

[Nudọnamẹ odò tọn]

Kanbiọ Lẹ:

○ Fie wẹ Timoti whẹ́n te, podọ etẹwẹ jọ whla tintan he Paulu yì finẹ?

○ Etẹwẹ Timoti wà to whenuena e yin oylọ-basina nado zingbejizọnlin hẹ Paulu po Sila po?

○ Nawẹ Timoti do adọgbigbo hia gbọn, podọ etẹwutu Paulu do yiwanna ẹn sọmọ?

[Yẹdide to weda 18]

Etẹwẹ jọ tofi?