Paulu po Timoti Po

Timoti yin mẹmẹsunnu jọja de to agun Listla tọn mẹ. Otọ́ etọn yin Glẹkinu bọ onọ̀ etọn yin Juvi de. Onọ̀ Timoti tọn, Euniki po onọ̀-daho etọn Loisi po wẹ plọnnu in gando Jehovah go sọn ovu whenu.

Whenue Paulu dla Listla pọ́n to gbejizọnlin yẹwhehodidọ tọn etọn awetọ whenu, e doayi e go dọ Timoti yiwanna mẹmẹsunnu lẹ taun bosọ nọ to jejeji nado gọalọna yé. Paulu basi oylọna Timoti nado hodo e to gbejizọnlin lọ whenu. Dile ojlẹ to yìyì, Paulu plọnazọ́n Timoti bọ e lẹzun yẹwhehodọtọ podọ mẹplọntọ dagbe de.

Gbigbọ wiwe nọ deanana Paulu po Timoti po to fidepope he yé yì. To zánmẹ gbèdopo, Paulu mọ numimọ de he mẹ dawe de biọ to e si te nado wá gọalọna yé to Makedonia. Enẹwutu, Paulu, Timoti, Sila po Luku po yì dọ́n nado dọyẹwheho bo do agun lẹ ai.

To tòdaho Makedonia tọn he yin Tẹsalonika mẹ, sunnu po yọnnu po susu wẹ lẹzun Klistiani. Amọ́, Ju delẹ jẹ awuwhàn Paulu po gbẹdohẹmẹtọ etọn lẹ po ji. Yé bẹ gbẹtọgun de pli bo dọ̀n mẹmẹsunnu lọ lẹ yì ogán tòdaho lọ tọn lẹ dè bo to awhádo dọmọ: ‘Kẹntọ gandudu Lomu tọn wẹ omẹ ehelẹ!’ Na ogbẹ̀ Paulu po Timoti po tọn tin to owù mẹ wutu, yé họnyi Belea to zánmẹ.

Omẹ Belea tọn lẹ to jejeji nado sè wẹndagbe lọ podọ Glẹkinu po Ju he to finẹ lẹ po lẹzun yisenọ. Ṣigba, whenue Ju delẹ wá sọn Tẹsalonika bo fọ́n bẹwlu dote, Paulu gbọ bo yì Atẹni. Timoti po Sila po gbọṣi Belea nado na tuli mẹmẹsunnu lẹ. To nukọn mẹ, Paulu gọ̀ Timoti dohlan Tẹsalonika na e nido gọalọna mẹmẹsunnu he to finẹ lẹ nado pehẹ homẹkẹn sinsinyẹn he glọ yé tin te. To godo mẹ, Paulu do Timoti hlan nado yì dla agun susu devo lẹ pọ́n bo na tuli yé.

Paulu dọna Timoti dọmọ: ‘Mẹhe jlo na sẹ̀n Jehovah lẹpo wẹ na yin homẹkẹndo.’ Timoti jiya homẹkẹn tọn bo yin wiwle do gànpamẹ na yise etọn wutu. Homẹ etọn hùn, na ehe hùn dotẹnmẹ dote na ẹn nado do nugbonọ-yinyin etọn hlan Jehovah hia.

Paulu dọna Filipinu lẹ dọ: ‘N’to Timoti dohlan mì. Ewọ na plọn mì nuhe e zẹẹmẹdo nado zinzọnlin to nugbo mẹ, e nasọ plọnazọ́n mì to lizọnyizọn lọ mẹ.’ Paulu yọnẹn dọ emi sọgan ganjẹ Timoti go. Yé wazọ́n dopọ taidi họntọn podọ taidi azọ́nwatọgbẹ́ na owhe susu.