Jesu Do Zohunhun Hia Na Sinsẹ̀n-Bibasi Nugbo

To alọwle Kana tọn godo, Jesu dedo Kapẹlnaumi. Onọ̀ Jesu tọn po nọvisunnu daa etọn lẹ po, yèdọ Jakọbu, Josẹfu, Simọni po Juda po to gbejizọnlinzin hẹ ẹ.

Ṣigba, etẹwutu Jesu yì Kapẹlnaumi? Lẹdo he mẹ tòdaho ehe tin te yọ́n taun yijlẹdo Nazalẹti kavi Kana go, podọ e họnwun dọ e sọ klo hú yé. Humọ, devi yọyọ Jesu tọn susu nọ nọ̀ Kapẹlnaumi kavi fie sẹpọ ẹ lẹ. Gbọnmọ dali, Jesu sọgan na yé azọ́nplọnmẹ to lẹdo yetọn mẹ.

Jesu sọ wà azọ́njiawu susu to whenue e tin to Kapẹlnaumi. Gbọnmọ dali, gbẹtọ he nọ nọ̀ tòdaho lọ po fihe lẹdo e lẹ po mẹ lẹ sèhó gando nuhe e wà to finẹ lẹ go. Ṣigba, Jesu po hodotọ etọn lẹ po, yèdọ sunnu Juvi he nọ dibusi Jiwheyẹwhe ehelẹ dona dedo Jelusalẹm to madẹnmẹ, nado yì hùnwhẹ Juwayi tọn owhe 30 W.M. tọn tẹnmẹ.

To whenue Jesu po devi etọn lẹ po to tẹmpli mẹ to Jelusalẹm, nuyiwa Jesu tọn de jiawu na yé taun, ehe gbọnvo taun na lehe e nọ yinuwa do dai.

Osẹ́n Jiwheyẹwhe tọn biọ to Islaelivi lẹ si nado basi avọ́sinsan kanlin tọn lẹ to tẹmpli mẹ, podọ jonọ lẹ tindo nuhudo nado họ̀ núdùdù to ojlẹ he mẹ yé na tin to finẹ. Enẹwutu, Osẹ́n lọ kẹalọyi dọ mẹhe zingbejizọnlin sọn fidindẹn wá Jelusalẹm lẹ ni hẹn akuẹ nado họ̀ “oyìn, lẹngbọ, gbọgbọẹ,” gọna nudevo depope he yé na zan to ojlẹ he mẹ yé na tin to tòdaho lọ mẹ. (Deutelonomi 14:24-26) Enẹ zọ́n bọ to Jelusalẹm, ajọwatọ lẹ nọ sà kanlin lẹ po ohẹ̀ lẹ po to awánu daho tẹmpli lọ lọsu tọn mẹ. Podọ delẹ to yé mẹ nọ tafu gbẹtọ lẹ bo nọ doahi vivẹ́ na yé.

Na homẹgble Jesu taun wutu, e kọ̀n abọgan-kuẹ akuẹdiọtọ lẹ tọn yìngbe, takitina tafo yetọn lẹ bosọ yàn yé jẹgbonu. Enẹgodo, Jesu dọmọ: “Mì bẹ onú ehelẹ sọn fi! Mì sọ yí ohọ̀ Otọ́ ṣie tọn do basi ohọ̀ ajọwiwa tọn ba blo!”—Johanu 2:16.

To whenue devi Jesu tọn lẹ mọ ehe, yé flin dọdai he dọ gando Visunnu Jiwheyẹwhe tọn go dọmọ: “Yẹn gọ́ na zohunhun na ohọ̀ towe.” Ṣigba, Ju lẹ kanbiọ ẹ dọ: “Ohia tẹwẹ a tindo nado dohia mí dọ hiẹ tindo aṣẹ nado wà onú ehelẹ?” Jesu gblọn dọmọ: “Mì họ́ tẹmpli ehe liai, yẹn nasọ jlọ ẹ dote to azán atọ̀n gblamẹ.”—Johanu 2:17-19; Psalm 69:9.

Na Ju lẹ lẹndọ tẹmpli he to Jelusalẹm lọ hodọ wẹ Jesu te tlọlọ wutu, yé kanse e dọmọ: “Owhe 46 gblamẹ wẹ tẹmpli ehe yin gbigbá, bọ hiẹ na jlọ ẹ dote to azán atọ̀n gblamẹ ya?” (Johanu 2:20) Ṣigba, agbasa ede tọn wẹ Jesu to alọdlẹndo taidi tẹmpli de. To owhe atọ̀n godo, devi etọn lẹ flin hogbe ehelẹ to whenue e yin finfọnsọnku.