NUPINPLỌN 76
Jesu Klọ́ Tẹmpli lọ Wé
To amakikọ-whenu owhe 30 W.M., Jesu yì Jelusalẹm. Mẹsusu ko wá tòdaho lọ mẹ nado basi hùnwhẹ Juwayi tọn. To hùnwhẹ lọ whenu, yé nọ basi avọ́sinsan kanlin tọn lẹ to tẹmpli mẹ. Mẹdelẹ nọ hẹn kanlin he yé na yizan lẹ wá, amọ́ mẹdevo lẹ nọ họ̀ kanlin lẹ to Jelusalẹm.
Whenue Jesu yì tẹmpli mẹ, e mọdọ mẹdelẹ to kanlin lẹ sà to finẹ. Yé to ajọwa to ohọ̀ he mẹ yè nọ basi sinsẹ̀n hlan Jehovah te! Nawẹ Jesu yinuwa gbọn? E yí okàn lẹ do basi obá de bo yàn lẹngbọ po oyìn lọ lẹ po jẹgbonu sọn tẹmpli mẹ. E bli tafo akuẹdiọtọ lẹ tọn bo kọ̀n abọgan-kuẹ yetọn lẹ do kọmẹ. Jesu dọna mẹhe to apoe sà lẹ dọmọ: ‘Mì bẹ onú ehelẹ sọn fi! Mì ma yí ohọ̀ Otọ́ ṣie tọn do basi ohọ̀ ajọwiwa tọn blo!’
Nuhe Jesu wà lọ paṣa mẹhe to tẹmpli mẹ lẹ. Devi etọn lẹ flin dọdai he ko yin didọ gando Mẹsia lọ go dọmọ: ‘Yẹn na gọ́ na zohunhun na ohọ̀ Jehovah tọn.’
To nukọn mẹ, to owhe 33 W.M., Jesu vọ́ klọ́ tẹmpli lọ wé whla dopo dogọ. E ma nọ dike mẹdepope ni do sisi matindo hia na ohọ̀ Otọ́ etọn tọn.
“Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.” —Luku 16:13