Zọnlinzinzin po Ayiha Dopo Po
“Oklunọ E, ... Hẹn ayiha ṣie do dopo nado nọ dibusi oyín towe.”—PSALM 86:11.
1. Nawẹ Jehovah nọ dona omẹ nugbonọ etọn lẹ gbọn?
‘JEHOVAH E, hiẹ dopokẹdẹ wẹ Jiwheyẹwhe.’ (Psalm 86:8, 10) Davidi pagigona Jiwheyẹwhe sọn ahun he gọ́na pinpẹn nutọn yinyọnẹn mlẹnmlẹn de mẹ. Yèdọ whẹpo Davidi do lẹzun ahọlu do Islaeli lẹpo ji, Jehovah ko whlẹn ẹn sọn Sauli si podọ sọn Filistinu lẹ si. Gbọnmọ, ewọ sọgan jihàn dọmọ: “Oklunọ wẹ osé ṣie, podọ figángán ṣie, podọ whlẹntọ ṣie. ... Hẹ omẹ pipe hiẹ na do dewe hia pipe.” (2 Samuẹli 22: 2, 26) Jehovah ko hẹn ogbẹ̀ devizọnwatọ nugbonọ etọn lẹ tọn dote sọn whlepọn susu lẹ mẹ. Davidi sọgan zé tugbigbo po jide etọn po do Jiwheyẹwhe nugbonọ etọn mẹ, ṣigba e tindo nuhudo anademẹ whepoponu tọn. Davidi todin vẹvẹna Jiwheyẹwhe dọmọ: “Oklunọ E, plọn ali towe mi.”—Psalm 86:11.
2. Nawẹ Jehovah basi awuwledainanu na mí nido yin pinplọn gbọn dali etọn gbọn?
2 Davidi ma jlo nado yí nudepope wà hẹ linlẹn kavi tamẹnuplọnmẹ aihọn mẹ tọn lẹ gba. E jlo nado yin “pinplọn sọn Oklunọ de,” dile yẹwhegan Jiwheyẹwhe tọn do e hia to nukọnmẹ do. (Isaia 54:13) Davidi sọgan ko lẹnayihamẹpọn do kiki owe Biblu tọn ṣinẹnẹ he tin to alọnu to azan etọn gbe ji. Ṣogan, nuplọnmẹ enẹ sọn Jehovah dè yin nuhọakuẹ na ẹn! To yinyin pinplọn dali, míwlẹ to egbehe sọgan dunú sọn owe Biblu tọn 66 lẹ mẹ, gọna susugege owe Ahọluduta lọ tọn he yin awuwlena gbọn “afànumẹ nugbonọ, nuyọnẹntọ” lọ dali. (Matiu 24:45) Taidi Davidi, mì gbọ mí ni ylọ Jehovah, na gbigbọ etọn nido sọgan gọalọna mí nado basi dodinnanu biọ “onu he Jiwheyẹwhe wleawu etọn lẹ na yé he yiwanna ẹn lẹ [mẹ]. ... yèdọ onu sisosiso Jiwheyẹwhe tọn lẹ.”—1 Kọlintinu lẹ 2:9, 10.
3. Aliho tẹlẹ mẹ wẹ nuplọnmẹ Biblu tọn lẹ sọgan yin alè na mí te?
3 Biblu tindo gblọndo na kanbiọ po nuhahun he sọgan fọ́ndote to gbẹ̀zan mítọn mẹ lẹpo. “Na onu depope he yè ko wlan dai, yè wlan yé na oplọn mítọn, dọ míwlẹ gbọn homẹfa po homẹmiọn Owe wiwe lẹ tọn po dali nido tindo otódo.” (Lomunu lẹ 15:4) Nuplọnmẹ he sọn Jehovah dè yíyí do ahunmẹ na hẹn mí lodo nado doakọ́nna awusinyẹn lẹ, bo miọnhomẹna mí to ojlẹ ayimajai tọn mẹ, bo hẹn todido Ahọluduta lọ tọn họnwun to ahun mítọn lẹ mẹ. Na mí ni tindo ayajẹ to hihia Ohó Jiwheyẹwhe tọn mẹ po ayihamẹ-linlẹnpọn do e ji po, “to okle po ozan po,” ná nuyọnẹn he sinai do Biblu ji nọ lẹzun “atin ogbẹ̀ tọn hlan yé he hẹn e go: Jijọhonọ wẹ omẹ he hẹn e go gligli.”—Psalm 1:1-3; Howhinwhẹn lẹ 3:13-18; sọ pọ́n Johanu 17:3 ga.
4. Gando nuyiwa mítọn lẹ go, apajlẹ tẹwẹ Jesu zedai na mí?
4 Visunnu Jiwheyẹwhe tọn, Jesu, he yè sọ nọ ylọ dọ “Visunnu Davidi tọn” nọ pọ́n Jehovah dè na ayinamẹ to whepoponu. (Matiu 9:27)a Ewọ dọmọ: “Ovi ma sọgan wà nude ededenu, adavo onu he e mọ otọ́ wà: na nudepope he e wà ehelẹ wẹ Ovi to wiwà mọ ga.” “Yẹn ma wà nude na dee: ṣigba le Otọ́ ṣie plọ́n mi do, wẹ yẹn to onu helẹ dọ.” (Johanu 5:19; 8:28) Jesu zé ohia de dai na mi nado “gbọn afọ etọn ji.” (1 Pita 2:21) Saa lẹn enẹ pọn! Eyin mí plọnnu dile Jesu na ko basi do, to ninọmẹ depope mẹ mí na penugo nado yinuwa dile Jehovah na jlo dọ mí ni yinuwa do. Aliho Jehovah tọn nọ saba yin aliho jijlọ.
5. Etẹwẹ “nugbo” yin?
5 Enẹgodo Davidi lá dọmọ: “Yẹn na nọ zinzọnlin to nugbo towe mẹ.” (Psalm 86:11) To owhe fọtọ́n dopo godo, Pilati, he to hodọ hlan Visunnu Davidi tọn, yèdọ Jesu, kanse dọmọ: “Etẹwẹ nugbo?” Ṣigba Jesu ko ṣẹṣẹ na gblọndo kanbiọ enẹ tọn, to didọna Pilati dọmọ: “Ahọludu ṣie ma yin aihọn he tọn gba,” bo yidogọ dọmọ: “Hiẹ dọ dọ ahọlu de wẹ yẹn. Hlan opodo he wẹ yè ko do jì mi, podọ hlan opodo he wẹ yẹn do wá aihọn mẹ, na yẹn nido dekunnu hlan nugbo lọ.” (Johanu 18:33-38) Jesu gbọnmọ dali hẹn ẹn zun yinyọnẹn dọ nugbo lọ tá hinhọ́n do Ahọluduta Mẹssia tọn ji. Na nugbo tọn, hosọ Biblu tọn pete wẹ yin klandowiwe oyin Jehovah tọn gbọn Ahọluduta lọ dali.—Ezekiẹli 38:23; Matiu 6:9, 10; Osọhia 11:15.
6. To zọnlinzinzin to nugbo lọ mẹ, gando etẹ go wẹ mí dona tin to aṣeji na?
6 Etẹwẹ e zẹẹmẹdo nado zinzọnlin to nugbo lọ mẹ? E zẹẹmẹdo nado hẹn todido Ahọluduta lọ tọn zun nuduahunmẹnamẹ tangan lọ to gbẹzan mítọn mẹ. Mí dona nọgbẹ̀ sọgbe hẹ nugbo Ahọluduta lọ tọn. Mí ma na yin ayifẹsẹna to ojlo Ahọluduta lọ tọn yíyí do otẹn tintan mẹ gba, mí dona yin zohunnọ sọgbe hẹ dotẹnmẹ hundote mítọn lẹ to kunnudide dogbọn nugbo Ahọluduta lọ tọn dali, to apajlẹ Jesu tọn hihodo mẹ. (Matiu 6:33; Johanu 18:37) Mí ma sọgan yí apadewhe ojlẹ lọ tọn do zinzọnlin to nugbo lọ mẹ, bo to mahẹ vude poun tindo to sinsẹ̀nzọn lọ mẹ do to pekọ hẹnwana mídelẹ gbọn aliho pípánanú tọn ji gbigbọn nado tindo mahẹ to ayidedayi zẹjlẹgo kavi nado biọ nuyanwle he nọ yí whenu susu mẹ kavi nado “sẹ̀n ... Mamọni.” (Matiu 6:24) Mí sọgan bú to aliho gbigblo mọnkọtọn lẹ ji, bo ma na mọ aliho lọ nado gọwa ‘aliho bibó lọ he hẹn omẹ yì ogbẹ́ mẹ’ ji gbede ba. Mì dike mí ni dánbú sọn aliho enẹ ji blo! (Matiu 7:13, 14) Mẹplọntọ Daho mítọn, yèdọ Jehovah, gbọn Ohó etọn po titobasinanu etọn po dali nọ tá hinhọ́n do aliho lọ ji, bo dọmọ: “Ehe wẹ aliho [lọ], mì zinzọnlin to e mẹ, whenuena mì lẹ́ do adusi, podọ whenuena mì lẹ́ do amìyọn.”—Isaia 30:21.
Obú he Sọgbe
7. Nawẹ mí sọgan hẹn ayiha mítọn lẹ do “dopo” gbọn?
7 Odẹ̀ Davidi tọn zindonukọn to wefọ 11 mẹ dọmọ: “Hẹn ayiha ṣie do dopo nado nọ dibusi oyín towe.” Taidi Davidi, mí na jlo dọ ayiha mítọn lẹ ni ma yin fifẹsẹna, yin pipe, to ojlo Jiwheyẹwhe tọn wiwa mẹ. Ehe tin to gbesisọ mẹ hẹ ayinamẹ Moṣe tọn dọmọ: “Etẹwẹ Oklunọ lọ Jiwheyẹwhe towe jijlo sọn de we dinvie lò, Islaeli, adavo nado nọ dibusi Oklunọ lọ Jiwheyẹwhe towe, nado nọ zinzọnlin to ali etọn lẹpo mẹ, podọ nado nọ yiwanna ẹn, podọ nado nọ sẹ̀n Oklunọ lọ Jiwheyẹwhe towe po ayiha towe lẹpo po, podọ po alindọn towe lẹpo po, nado nọ payi gbèdide Oklunọ lọ tọn lẹ lọ go, po aṣẹdai etọn lẹ po, he yẹn degbèna we to egbé he na dagbe towe?” (Deutelonomi 10: 12, 13) Na nugbo tọn, na dagbe mítọn wẹ e yin nado yí ayiha mítọn po alindọn mítọn po hlan Jehovah sinsẹ̀n. Gbọnmọ dali mí na do obú he jẹ hia hlan oyín jiawu etọn. Na paa tọn oyín Jehovah tọn zẹẹmẹdo “E Hẹn Nado Tin,” titengbe na nuhe dù hinhẹn lẹndai daho etọn lẹ wá tadona kọ̀n. E sọ nọtena huhlọn nupojipetọ etọn tọn do wẹkẹ lẹpo ji ga. To devizọnwiwa po obú po to gigo Jiwheyẹwhe tọn mẹ, mí ma na yin ayifẹsẹna gbọn obú gbẹtọ he nọ kú tọn dali gba. Ayiha mítọn ma na yin kinklan do voovo gba. Kakatimọ, mí na dibu nado wà nudepope he na hẹn Jehovah, yèdọ Whẹdatọ Daho lọ po Oklunọ Nupojipetọ lọ, he hẹn ogbẹ̀ mítọn do alọ etọn mẹ lọ gblehomẹ.—Isaia 12:2; 33:22.
8, 9. (a) Etẹwẹ e zẹẹmẹdo ma nado “yin aihọn tọn”? (b) Afọdide tẹlẹ wẹ mí dona zé na mí yin mẹhe “yé yí do basi omẹ pinpọn de” wutu?
8 Yèdọ to whenuena mí pannukọn mẹvlẹko po homẹkẹndomẹ po, mí na hodo apajlẹ adọgbigbo Jesu tọn to mayin apadewhe aihọn ylankan he lẹdo mí tọn mẹ. (Johanu 15:17-21) Ehe ma zẹẹmẹdo dọ devi Jesu tọn lẹ na yì sáwhé dolá kavi zé yede whla do ohọ yẹwhenọ lẹ tọn mẹ na whẹjijọ sinsẹ̀n tọn wutu gba. Jesu dọ to odẹ̀ mẹ hlan Otọ́ etọn dọmọ: “Yẹn ma basi okanbiọ dọ, hiẹ nido fọ̀ yé sọn aihọn mẹ gba, ṣigba dọ hiẹ ni whla yé sọn oylan mẹ. Yé ma yin aihọn tọn, yèdọ dile yẹn ma yin aihọn tọn do. Lẹ yé we to nugbo towe mẹ: ohó towe wẹ nugbo. Dile hiẹ do mi hlan aihọn mẹ; yèdọ mọwẹ yẹn do yé hlan aihọn mẹ.” (Johanu 17:15-18) Taidi Jesu, mí yin didohlan nado basi lilá nugbo Ahọluduta lọ tọn. Jesu yin mẹhe yè sọgan dọnsẹpọ. Gbẹtọ lẹ yin kọfana gbọn aliho mẹpinplọn etọn tọn dali. (Yijlẹgo Matiu 7:28, 29; 11:28, 29; Johanu 7:46 go.) E dona yin onu dopolọ po mí po ga.
9 Jẹhẹnu họntọnjihẹmẹ tọn mítọn, aṣọdido po awusọhia mítọn he yọnpọn po, hodọdopọ he wé bo dọnmẹdogo, dona hẹn mí po owẹn mítọn po yin alọkẹyi hlan omẹ ahunjijlọnọ lẹ. Mí dona dapana dihonọ-yinyin, aṣọ́ he ma tin to jlẹkaji, ogbẹ́ he sọgan dekọtọn do mahẹ tintindo to onu aihọn tọn lẹ mẹ, po aliho gbẹzan nunọwhinnusẹ́n he ma tin to hihọ́ mẹ he mí to mimọ to aihọn he lẹdo mí mẹ po. To lilẹzun mẹhe “yè yí ... do basi omẹ pinpọn de hlan aihọn, podọ hlan angẹli lẹ, podọ hlan gbẹtọ lẹ” mí tindo azọ́ngban ganhiho 24 tọn to egbesọegbesọ nado wà sinsẹ̀nzọn podọ nado nọgbẹ̀ taidi Klistiani apajlẹ dagbenọ lẹ. (1 Kọlintinu lẹ 4:9; Efesunu lẹ 5:1-4; Filippinu lẹ 4:8, 9; Kọlọsinu lẹ 4:5, 6) Ayiha mítọn dona yin dopo hlan opodo ehe.
10. Nawẹ Jehovah nọ flin mẹhe nọ hẹn ayiha yetọn yin dopo to sinsẹ̀nzọn wiwe lọ mẹ gbọn?
10 Mí mẹhe hẹn ayiha mítọn lẹ do dopo to obú oyín Jehovah tọn mẹ, bo to ayihamẹlẹnpọn do lẹndai gigonọ etọn ji po hinhẹn gbẹzan mítọn lẹ gọ́ po sinsẹ̀nzọn wiwe-ṣeke po, na yin finflin gbọn Jehovah dali. “Na nukun Oklunọ tọn lẹ to godo po nukọn po yì lẹdo aigba lẹpo pete, nado do ede hia huhlọnnọ na ayiha yé mẹhe tọn yin pipe hlan e de lẹ tọn wutu.” (2 Otannugbo lẹ 16:9) To alọdlẹndo azán mítọn gbè to dọdai liho, Malaki 3:16 hia dọmọ: “Whenẹnu wẹ yé he dibusi Oklunọ lẹ to hodọ ode po awetọ po: Oklunọ sọ tùntóai, bo sè, podọ yè sọ wlan owe oflin tọn de to ewọ nukọn, na yé he dibusi Oklunọ lẹ, podọ he to oyín etọn tọn lẹnpon lẹ.” Na ayiha mítọn lẹ ni yin dopo to obú Jehovah tọn he jẹ mọnkọtọn mẹ!
Dagbewanyi Jehovah Tọn
11. Nawẹ dagbewanyi Jehovah tọn na yin didohia hlan omẹ nugbonọ lẹ gbọn?
11 Lehe odẹ̀ Davidi tọn yin vẹkuvẹku do sọ! E zindonukọn dọmọ: “Yẹn na pà we, Oklunọ Jiwheyẹwhe ṣie E, po ayiha ṣie lẹpo po: yẹn nasọ nọ pagigona oyín towe kakadoi. Na daho wẹ lẹblanu towe hlan dali ṣie: hiẹ ko dè ayiha ṣie sọn okútò sisosiso mẹ.” (Psalm 86:12, 13) Whlaawetọ to psalm ehe mẹ, Davidi pagigona Jehovah na dagbewanyi Etọn—yèdọ owanyi nugbonọ etọn. Owanyi ehe klo sọmọ bọ e sọgan whlẹn omẹ to ninọmẹ todido matindo tọn lẹ mẹ. To whenuena Sauli to ogbé etọn yàn to zungbo mẹ, Davidi sọgan ko tindo numọtolanmẹ zínzín ede do osópo mẹ nado kú tọn. E taidi mimọ Sheol nukun-sọ-nukun—yèdọ yọdo sisosiso nkọtọn. Ṣigba Jehovah whlẹn ẹn gán! To ninọmẹ dopolọ mẹ, Jehovah ko nọ saba hẹn kọgbọ wá na devizọnwatọ egbezangbe etọn lẹ to aliho jiawu lẹ mẹ, podọ e ko hẹn afọ tenọgligo hẹntọ he ko doakọ́nnanu po nugbonọ-yinyin po yèdọ jẹ kúdonu lẹ tọn dote. Nugbonọ lẹpo na mọ alè yetọn yí, yèdọ gbọn fọ́nsọnku dali eyin e biọ domọ.—Yijlẹdo Job 1:6-12; 2:1-6, 9, 10; 27:5; 42:10; Howhinwhẹn lẹ 27:11; Matiu 24:9, 13; Osọhia 2:10.b
12. Nawẹ sinsẹngan lẹ yin saklanọ po kanylantọ po gbọn, podọ etẹwẹ na yin ale yetọn?
12 Gando homẹkẹndomẹtọ lẹ go Davidi dawhá jẹgbonu dọmọ: “Jiwheyẹwhe E, osaklanọ lẹ fọ́n do oji e, agun budonamẹtọ lẹ tọn to ayiha ṣie din pé; yé ma hò we pọn to nukun yetọn mẹ gba.” (Psalm 86:14) To egbehe, homẹkẹndomẹtọ lọ lẹ ko bẹ́ sinsẹ̀ngan Mẹylọhodotọklisti tọn hẹn. Omẹ ehelẹ sọalọakọn nado to sinsẹ̀n-basi hlan Jiwheyẹwhe ṣigba yí tẹnmẹ yínkọ lọ “Oklunọ” do diọtẹnna oyín wiwe etọn bo ze e donukọnnamẹ taidi Atọ̀n-to-dopomẹ dinmamọdona he na nugbo tọn ma yin hodọdeji to fidepope to Biblu mẹ. Lehe e yin saklanọ-yinyin do sọ! To yidogọmẹ na ehe, yé nọ tẹnpọn nado vẹvẹna huhlọn tonudọtọ lẹ tọn nado dosẹ́n do zé Kunnudetọ Jehovah tọn lẹ dlan ganpamẹ, dile e gbẹsọ po to yinyin bibasi po nupaṣamẹ po do to sọha oto daho lẹdo aigba ji pe tọn lẹ mẹ. Tewùdotọ nuzantọ do oyin Jiwheyẹwhe tọn go ehelẹ na gbẹ̀n ale yetọn, to pọmẹ po ada he taidi ayọdetọ Babilọni Daho tọn lẹ po.—Osọhia 17:1, 2, 15-18; 19:1-3.
13. Jẹhẹnu tẹlẹ wẹ Jehovah nọ dohia to dagbewa etọn hinhẹn zun yinyọnẹn mẹ?
13 To vogbingbọn ayajẹ tọn de mẹ odẹ̀ Davidi tọn zindonukọn dọmọ: “Ṣigba hiẹ, Oklunọ E, wẹ Jiwheyẹwhe he gọ́ na lẹblanu, dagbenọ, podọ awuwhletọ nado sadi, bo sọ sù [to] dagbewanyi po nugbo po mẹ. (Psalm 86:15) Na nugbo tọn, jẹhẹnu Jiwheyẹwhe tọn mọnkọtọn lẹ yiaga taun. Hogbe helẹ hẹn mí sọyì Osó Sinai tọn ji to whenuena Moṣe biọ nado mọ gigo Jehovah tọn. Jehovah gblọn dọmọ: “Yẹn na hẹn dagbewa ṣie lẹpo gbọn nukọn towe, bo nasọ lá oyín Oklunọ lọ tọn lọ to nukọn towe.” Ṣigba e gbẹnuna Moṣe dọmọ: “Hiẹ ma sọgan mọ nukunmẹ ṣie gba: na gbẹtọ mọ mi ma na nọgbẹ̀ gba.” Enẹgodo, Jehovah jẹte to aslọ mẹ, bo to lilá dọmọ: “Oklunọ lọ, Oklunọ lọ, Jiwheyẹwhe he gọna akọ́ndonanú podọ dagbewanyinọ, awuwhletọ nado sadi, podọ sùsùnọ to lẹblanu po nugbo po mẹ.” (Eksọdusi 33:18-20; 34:5, 6) Davidi yí hogbe ehelẹ dọ to odẹ̀ etọn mẹ. Jẹhẹnu Jehovah tọn mọnkọtọn lẹ zẹẹmẹdo nuhe hugan awusọhia agbasa tọn depope! Sọn numimọ mí lọsu titi tọn mẹ, be mí ma yọn pinpẹn dagbewa Jehovah tọn dile e yin didohia do to jẹhẹnu dagbe helẹ mẹ ya?
‘Ohia de he Zẹẹmẹdo Dagbewa’
14, 15. Nawẹ Jehovah nọ hẹn devizọnwatọ etọn lẹ tindo kọdetọn dagbe gbọn ‘ohia dagbewa tọn de’ dali gbọn?
14 Davidi biọ dona Jehovah tọn whladopo dogọ, dọmọ: “Lẹ́ do dee, bo wàlẹblanuna mi, do huhlọn towe hlan devi towe, bo whlẹn visunnu deviyọnnu towe tọn gán. Yí [ohia he zẹẹmẹdo dagbewanyi de na mi, “NW”]; na yé he gbẹwanna mi lẹ nido mọn ẹn, na winyan nido hù yé: Na hiẹ, Oklunọ, ko gọalọna mi, bo sọ miọnhomẹna mi wutu.” (Psalm 86:16, 17) Davidi yọnẹn dọ taidi ‘visunnu deviyọnnu Jehovah tọn’ ewọ lọsu dona yin Jehovah tọn ga. Onu dopolọ wẹ e yin hẹ mímẹpo to egbehe he ko klan gbẹ̀zan mítọn lẹ do wiwe hlan Jehovah podọ bo nọ wadevizọn to sinsẹnzọn etọn mẹ. Mí tindo nuhudo huhlọn mẹwhiwhlẹn Jehovah tọn gbọn gbigbọ wiwe etọn gblamẹ. Gbọnmọ dali, mí na biọ Jiwheyẹwhe mítọn nado na mí ‘ohia he zẹẹmẹdo dagbewa de.’ Dagbewa Jehovah tọn bẹ́ jẹhẹnu dagbe he ji mí ṣẹṣẹ dọhodo helẹ hẹn. To dodonu ehe tọn ji, ohia, kavi kunnudenu tẹwẹ mí sọgan donukun dọ Jehovah ni na mí?
15 Jehovah wẹ Ninatọ “nunina dagbedagbe po nunina he sọgbè lẹpo po” tọn podọ e sọ nọ hùnalọ, dile Jesu hẹn mí tindo jide etọn do, to nina “gbigbọ wiwe hlan yé he biọ to e de lẹ.” (Jakobu 1:17; Luku 11:13) Gbigbọ wiwe—lehe e yin nunina họakuẹ talala de sọn Jehovah dè do sọ! Gbọn gbigbọ wiwe dali, Jehovah nọ wleawuna ayajẹ ayihamẹ tọn, yèdọ to ojlẹ homẹkẹndomẹ tọn mẹ. Gbọnmọ dali, apọsteli Jesu tọn lẹ, to whenuena yé tin to whlepọn glọ na ogbẹ̀ yetọn, sọgan yí ayajẹ do lá dọ Jiwheyẹwhe nọ na gbigbọ wiwe mẹhe to tónusena ẹn lẹ taidi ogán. (Owalọ lẹ 5:27-32) Ayajẹ gbigbọ wiwe tọn nọ hẹn yé tindo kọdetọn dagbe gbọn ‘ohia he zẹẹmẹdo dagbewa de’ nina yé dali.—Lomunu lẹ 14:17, 18.
16, 17. (a) Ohia dagbewa etọn tọn tẹwẹ Jehovah na Paulu po Balnaba po? (b) Ohia tẹwẹ yin nina Tẹsalonikanu he yin homẹkẹndo lẹ?
16 To gbejizọnlin mẹdehlan yetọn tọn whenu gbọn Asie Mineure gblamẹ, Paulu po Balnaba po pehẹ awusinyẹn lẹ, gọna homẹkẹndomẹ sinsinyẹn. To whenuena yé dekunnu to Antioku Pisidia tọn, Ju lẹ ma kẹalọyi owẹ̀n yetọn gba. Gbọnmọ dali, yé lẹhlan kosi lẹ dè. Etẹwẹ yin kọdetọn lọ? “Whenuena Kosi lẹ sè ehe, yé jaya, bo sọ pagigona ohó Oklunọ tọn: omẹ sọha he yè dèdo ogbẹ̀ madopodo mẹ lẹ yise.” Ṣigba Ju lẹ fọ́n bẹwlu dote, sọmọ bọ mẹdehlan enẹlẹ yin zizedlan sọn otò lọ mẹ. Be yéwlẹ po yisenọ yọyọ lọ lẹ po yin hinhẹn gbọjọ dogbọn ehe dali wẹ ya? Gbede pọn! Kakatimọ, “nuplọntọ lẹ sọ gọ́ na ayajẹ po gbigbọ wiwe po.” (Owalọ lẹ 13:48, 52) Jehovah na yé ohia enẹ he yin dagbewa etọn tọn.
17 To godomẹ, agun yọyọ he tin to Tẹsalonika biọ homẹkẹndomẹ glọ. Ehe hẹn apọsteli Paulu nado wlan wekanhlanmẹ homẹmiọnnamẹ tọn de, bo na pipa akọndonanu yetọn tọn to nukunbibia glọ. Yé ko “yí ohó lọ to nukunbibia susu mẹ, po ayajijẹ gbigbọ wiwe tọn po.” (1 Tẹsalonikanu lẹ 1:6) “Ayajijẹ gbigbọ wiwe tọn” to huhlọn na yé zọnmii taidi ohia kunnudenu tọn de sọn Jiwheyẹwhe mẹhe yin lẹblanunọ po dagbewanyinọ po, awuwhletọ nado sadi, podọ sùsùnọ to lẹblanu po nugbo po mẹ.
18. Nawẹ mẹmẹsunnu mítọn lẹ to Whèzẹtẹn Europe tọn do pinpẹn nutọn yinyọnẹn hia na dagbewa Jehovah tọn gbọn?
18 To ojlẹ agọe tọn lẹ mẹ, Jehovah ko do dagbewanyi etọn hia hlan mẹmẹsunnu nugbonọ mítọn lẹ to Whèzẹtẹn Europe tọn, bo dowinyan mẹhe gbẹwanna yé lẹ—yèdọ homẹkẹndomẹtọ yetọn dai tọn lẹ. Dile e tlẹ yindọ yé mọ kọgbọ sọn yasanamẹ owhe ao ao tọn lẹ si to agọe do sọ, mẹmẹsunnu vivẹ́ mítọn ehelẹ gbẹ́ tindo nuhudo akọndonanu tọn, na susu yetọn pannukọn awufiẹsa akuẹzinzan tọn lẹ. Etomọṣo, “ayajijẹ [yetọn] to gbigbọ wiwe mẹ” miọnhomẹna yé. Ayajẹ daho tẹwẹ yé sọ sọgan tindo hugan yíyí mẹdekannujẹ yọyọ he yé mọyí zan nado hẹn kunnudide lọ gblodeji? Mẹsusu to tódoai hlan yé, dile linlin plidopọ tọn lẹ po baptẹm tọn lẹ po dohia do.—Yijlẹgo Owalọ lẹ 9:31 go.
19. Nawẹ mí sọgan yí hogbe Psalm 86:11 tọn lẹ do basi mídetiti tọn gbọn?
19 Nuhe ko yin hodọdeji to hosọ ehe po dehe ko wayi po mẹ lẹpo basi dọvọdọ odẹ̀ vẹkuvẹku Davidi tọn hlan Jehovah dọmọ: “Oklunọ E, plọn ali towe mi, ... Hẹn ayiha ṣie do dopo nado nọ dibusi oyín towe.” (Psalm 86:11) Mì gbọ mí ni yí hogbe enẹlẹ heyin hosọ owhe 1993 mítọn tọn do basi mídetiti tọn dile mí to azọ́n wà po ahun lẹpo po to godoninọna alemọyinu Ahọluduta lọ tọn lẹ mẹ podọ to pinpẹn nutọn yinyọnẹn didohia hlan dagbewa madoalọte Jiwheyẹwhe dopo mítọn tọn, yèdọ Oklunọ Nupojipetọ lọ Jehovah. (Pọn w-F 15/12/92, weda 14)
[Nudọnamẹ Odò Tọn]
a Taidi “okún” he yè dọ dọdai etọn lọ, Jesu yin whédutọ ahọluduta Davidi tọn podọ gbọnmọ dali yin “Visunnu Davidi tọn” to aliho agbasa tọn po gbigbọ tọn po mẹ.—Gẹnẹsisi 3:15; Psalm 89:29, 34-37.
b Na apajlẹ egbezangbe tọn lẹ, pọn Annuaire des Témoins de Jéhovah, zinjẹgbonu 1974 tọn, weda 113-212; 1985, weda 194-197; 1986, weda 237-238; 1988, weda 182-185; 1990, weda 171-172; 1992, weda 174-181.
Nawẹ Hiẹ Na Na Gblọndo Gbọn?
◻Etẹwẹ mí dohia gbọn dẹhiho dali dọmọ, “Oklunọ E, plọn ali towe mi”?
◻Etẹwẹ e zẹẹmẹdo dọ ayiha mítọn yin hinhẹn do dopo nado dibusi oyín Jehovah tọn?
◻Nawẹ Jehovah na do dagbewanyi etọn hia hlan omẹ nugbonọ lẹpo gbọn?
◻Nawẹ Jehovah nọ do ‘ohia dagbewa tọn de’ hia mí gbọn?
[Apotin to weda 26]
Hosọ Owhe 1993 Tọn:
“Oklunọ E, plọn ali towe mi, ... Hẹn ayiha ṣie do dopo nado nọ dibusi oyín towe.”—Psalm 86:11.
[Yẹdide to weda 25]
Jehovah yin osó gángán de po huhlọn de po na mẹhe zinzọnlin jijlọ to nugbo lọ mẹ lẹ
[Yẹdide to weda 28]
To Plidopọ Akọjọpli “Hinhọ́n Tindo Tọ́ Lẹ” tọn heyin Kunnudetọ Jehovah Tọn lẹ tọn to Saint-Pétersbourg, (Russie) to juin, gbẹtọ 46 214 wẹ wá bọ omẹ 3 256 yin bibaptizi. Lehe ehelẹ to yede zejo to aliho jiawu mẹ na dagbewa Jehovah tọn, po “ayajijẹ to gbigbọ wiwe mẹ” po do sọ!