Lẹngbọhọtọ lẹ po Lẹngbọ lẹ po to Yẹwhehọluduta de Mẹ
“Oklunọ wẹ whẹ̀datọ mítọn, Oklunọ wẹ osẹ́nnọ mítọn, Oklunọ wẹ ahọlu mítọn; ewọ na whlẹn mí gán.”—ISAIA 33:22.
1. Nawẹ e sọgan yin didọ gbọn dọ Klistiani owhe kanweko tintan whenu tọn lẹ po Klistiani egbehe tọn lẹ tọn po yin yẹwhehọluduta de do?
YẸWHEHỌLUDUTA zẹẹmẹdo gandudu gbọn Jiwheyẹwhe dali. E bẹ́ alọkẹyi aṣẹpipa Jehovah tọn podọ hihodo anademẹ po nugbẹnamẹ etọn lẹ po to dide daho po pẹvi po he mí nọ basi to gbẹmẹ lẹ hẹn. Agun owhe kanweko tintan whenu tọn yin yẹwhehọluduta nujọnu tọn. To whelọnu lo Klistiani lẹ sọgan dọ po nugbonọ-yinyin po dọmọ: “Oklunọ wẹ whẹdatọ mítọn, Oklunọ wẹ osẹ́nnọ mítọn, Oklunọ wẹ ahọlu mítọn.” (Isaia 33:22) Po pipotọ yiamisisadode etọn lẹ po taidi ada tangan etọn tọn lẹ, titobasinanu Jehovah Jiwheyẹwhe tọn to egbehe na taun tọn yin yẹwhehọluduta de to aliho dopolọ mẹ.
To Aliho Tẹlẹ Mẹ Wẹ Mí Tin to Ninọmẹ Yẹwhehọluduta tọn Mẹ to Egbehe?
2. Aliho dopo tẹ mẹ wẹ Kunnudetọ Jehovah tọn lẹ nọ litai hlan gandudu Jehovah tọn te?
2 Nawẹ mí sọgan dọ dọ titobasinanu aigba ji Jehovah tọn yin yẹwhehọluduta tọn de gbọn? Na mẹhe tin to e mẹ lẹ na nugbo tọn nọ zé yede jó na gandudu Jehovah tọn wutu wẹ. Podọ yé nọ hodo anademẹ Jesu Klisti tọn, mẹhe Jehovah ko zé do ofìn ji taidi Ahọlu. Di apajlẹ, to ojlẹ opòdo tọn mẹ, gbedide tlọlọ ehe sọn Omẹ Yẹwhehọluduta tọn Daho lọ dè ehe yin didọna Jesu dọmọ: “Zín agbogọdọẹ towe do e mẹ, bo to gbìngbẹ̀n: na ojlẹ ko wá na we nado gbẹ̀n: na ojì aigba tọn ko bíapa pó.” (Osọhia 14:15) Jesu sètonu bo penukundo ojijẹ aigba ji tọn go. Klistiani lẹ nọ nọgodona Ahọlu yetọn to azọ́n daho ehe mẹ gbọn yẹwheho wẹndagbe lọ tọn didọ po zohunhun po gọna devi lẹ bibasi dali. (Matiu 28:19; Malku 13:10; Owalọ lẹ 1:8) To mọbibasi mẹ, yé yin azọnwatọgbẹ́ lẹ hẹ Jehovah ga, yèdọ Omẹ Yẹwhehọluduta tọn Daho lọ.—1 Kọlintinu lẹ 3:9.
3. Nawẹ Klistiani lẹ nọ litai hlan yẹwhehọluduta to whẹho walọ dagbe tọn lẹ mẹ gbọn?
3 Mọdopolọ, to walọyizan mẹ, Klistiani lẹ nọ litai hlan gandudu Jiwheyẹwhe tọn. Jesu dọmọ: “Mẹhe wà nugbo wẹ nọ wá hinhọ́n nù, na yè nido do azọ́n etọn lẹ hia, dọ yè basi yé to Jiwheyẹwhe mẹ.” (Johanu 3:21) To egbehe, nudindọn mapote lẹ tin do nujinọtedo walọyizan tọn lẹ ji, ṣigba nudìndọ̀n ehelẹ ma tindo otẹn de to Klistiani lẹ ṣẹnṣẹn gba. Yé nọ pọ́n nuhe Jehovah dọ dọ e yin walọmawe hlan taidi walọmawe, podọ yé nọ dapana walọmawe taidi azọ̀n ylankan! Yé sọ nọ penukundo whẹndo yetọn lẹ go, nọ setonuna mẹjitọ yetọn lẹ, bo nọ gbọṣi taliai mẹ hlan huhlọn daho lẹ. (Efesunu lẹ 5:3-5, 22-33; 6:1-4; 1 Timoti 5:8; Titu 3:1) Gbọnmọ, yé nọ yinuwa to yẹwhehọluduta liho, yèdọ to gbesisọmẹ hẹ Jiwheyẹwhe.
4. Walọyizan agọ tẹlẹ wẹ yin didohia gbọn Adam po Evi po gọna Sauli dali, podọ nawẹ Klistiani lẹ nọ do walọyizan he gbọnvo hia gbọn?
4 Adam po Evi po hẹn Paladisi bú na yé jlo nado basi dide yedetiti tọn lẹ na nuhe du dagbe po nuhe yin oylan po wutu. Jesu jlo nuhe gbọnvo pete na ehe. Ewọ dọmọ: “Yẹn ma to ojlo ṣie lọsu dín gba, adavo ojlo mẹhe do mi hlan tọn.” Klistiani lẹ nọ dín onu dopolọ. (Johanu 5:30; Luku 22:42; Lomunu lẹ 12:2; Heblu lẹ 10:7) Sauli, ahọlu tintan Islaeli tọn, setonuna Jehovah—ṣigba jẹ oba de mẹ poun. Na ehe tọn wutu e yin gbigbẹ́dai. Samueli dọna ẹn dọmọ: “Nado sètónu yin pọnte hú avọ́, podọ nado tùntóai hú ojó agbò lẹ tọn.” (1 Samueli 15:22) Be nuhe sọgbe hẹ yẹwhehọluduta wẹ e yin nado hodo ojlo Jehovah tọn jẹ oba de mẹ, vlavo gbọn yinyin gbesọtọ to azọ́n yẹwhehodidọ lọ tọn mẹ kavi to opli lẹ yìyì mẹ, podọ to whelọnu lo nado jogbe to whẹho walọdagbe tọn mẹ kavi to aliho devo lẹ mẹ ya? Na nugbo tọn lala! Mí nọ dovivẹnu nado ‘wà ojlo Jiwheyẹwhe tọn po ahun lẹpo po.’ (Efesunu lẹ 6:6; 1 Pita 4:1, 2) Gbọnvona Sauli, mí nọ litai mlẹnmlẹn hlan gandudu Jiwheyẹwhe tọn.
Yẹwhehọluduta Egbezangbe Tọn De
5, 6. Nawẹ Jehovah nọ yinuwa hẹ gbẹtọvi lẹ do to egbehe, podọ etẹ mẹ wẹ gbekọndopọ hẹ tito ehe nọ dekọtọn do?
5 To hohowhenu, Jehovah dugan bo nọ do nugbo lẹ hia gbọn mẹdopodopo lẹ dali, taidi yẹwhegan lẹ, ahọlu lẹ, po apọsteli lẹ po. To egbehe, whẹho lọ ma sọ to mọ yin ba gba; yẹwhegan lẹ kavi apọsteli gbọdo depope ma sọ tin ba. Kakatimọ, Jesu dọ dọ to tintin tofi gigonọ etọn whenu, emi na do pipli hodotọ nugbonọ delẹ hia, yèdọ “afanumẹ nugbonọ nuyọnẹntọ,” lọ bo na yí ì do basi ogán do nutindo etọn lẹpo ji. (Matiu 24:45-47; Isaia 43:10) To 1919 afanumẹ enẹ yin yinyọnẹn taidi pipotọ Klistiani mẹyiamisisadode lẹ tọn. Sọn whenẹnu gbọ́n, dile e yin tenọna gbọn Hagbẹ́ Anademẹtọ Kunnudetọ Jehovah tọn lẹ dali do, e ko yin ahọ́nji yẹwhehọluduta tọn to aigba ji. Lẹdo aihọn pe, Hagbẹ́ Anademẹtọ lọ nọ yin tenọna gbọn Whedegbẹ́ Alahọ Tọn lẹ, nugopọntọ tomẹyìtọ lẹ, po mẹho agun tọn lẹ po dali.
6 Gbekọndopọ hẹ titobasinanu yẹwhehọluduta tọn yin adà tangan taliai na yẹwhehọluduta tọn de. Gbekọndopọ mọnkọtọn nọ wàzọn na pọninọ po titojininọ po lẹdo aihọn pe to “mẹmẹsunnu lẹ” mẹ. (1 Pita 2:17) Taidi kọdetọn de, ehe nọ hẹn homẹ Jehovah hùn, mẹhe ma yin ‘Jiwheyẹwhe nudaitọ numanúkannu tọn de gba, adavo jijọho tọn.’—1 Kọlintinu lẹ 14:33.
Mẹho lẹ to Yẹwhehọluduta de Mẹ
7. Naegbọn e do sọgan yin didọ dọ mẹho Klistiani lẹ nọ yin dide to yẹwhehọluduta liho?
7 Sunnu mẹho he yin dide lẹpo, depope he otẹn aṣẹpipa yetọn tọn sọgan yin, jẹ jẹhẹnu he yin titodohukanji to Biblu mẹ lẹ na otẹn nugopọntọ tọn, kavi sunnusi mẹho tọn kọ̀n. (1 Timoti 3:1-7; Titu 1:5-9) Yinukọndogọ, hogbe Paulu tọn lẹ hlan mẹho Efesunu lẹ tọn he dọmọ: “Mì payì mìde go, po apó he gbigbọ wiwe yí mì do basi nugopọntọ na lẹpo po, nado nọ yìn agun Jiwheyẹwhe tọn,” yọn-na-yizan na mẹho lẹpo. (Owalọ lẹ 20:28) Mọwẹ, mẹho lẹ yin dide gbọn gbigbọ wiwe dali, he nọ wá sọn Jehovah Jiwheyẹwhe dè. (Johanu 14:26) Mẹdide yetọn yin yẹwhehọluduta tọn. Humọ, yé nọ yìn lẹngbọpa Jiwheyẹwhe tọn. Jehovah tọn wẹ lẹngbọpa lọ, e ma yin mẹho lẹ tọn gba. Titobasinanu Jiwheyẹwhe tọn yin yẹwhehọluduta tọn de.
8. Etẹwẹ yin azọ́ngbàn paa mẹho lẹ tọn to egbehe?
8 To wekanhlanmẹ etọn mẹ hlan Efesunu lẹ, apọsteli Paulu basi todohukanji azọ́ngbàn paa mẹho lẹ tọn, bo dọmọ: “E sọ yí na mẹdelẹ azọ́n apọsteli tọn; podọ na mẹdelẹ azọ́n yẹwhegan tọn; na mẹdelẹ azọ́n evangelisti tọn; na mẹdelẹ azọ́n lẹngbọhọtọ tọn po azọ́n mẹplọntọ tọn po; nado hẹn mẹwiwe lẹ sọgbe, na devizọnwiwa, nado hẹn agbasa Klisti tọn dote.” (Efesunu lẹ 4:11, 12) Apọsteli lẹ po yẹwhegan lẹ po ma sọ tin ba to ovú “agbasa Klisti tọn” godo. (Yijlẹdo 1 Kọlintinu lẹ 13:8 go.) Ṣigba alọnu mẹho lẹ tọn gbẹ́sọ ján tlala to yẹwhehodidọ, lẹngbọhihọ, po mẹpinplọn po mẹ.—2 Timoti 4:2; Titu 1:9.
9. Nawẹ mẹho lẹ sọgan wleawuna yedelẹ gbọn nado zé ojlo Jiwheyẹwhe tọn dai to agun lẹ mẹ?
9 To whenuena e yindọ yẹwhehọluduta yin gandudu Jiwheyẹwhe tọn, mẹho he pegan lẹ nọ jẹakọhẹ ojlo Jiwheyẹwhe tọn mlẹnmlẹn. Joṣua yin gbedena nado nọ hia Osẹ́n lọ to egbesọegbesọ. Mẹho lẹ ga tindo nuhudo nado plọnnu bo nọ gbadopọnna Owe wiwe lẹ to gbesisọ mẹ podọ jẹakọ pẹkipẹki hẹ owe Biblu tọn lẹ he nọ yin zínzínjẹgbonu gbọn afanumẹ nugbonọ nuyọnẹntọ lọ dali. (2 Timoti 3:14, 15) Ehe bẹ́ linlinnamẹwe Atọ̀họ̀-Nuhihọ́ Lọ Tọn po Réveillez-vous! po hẹn po owe devo lẹ po he do lehe nunọwhinnusẹ́n Biblu tọn lẹ gando ninọmẹ titengbe lẹ go do hia.a Ṣigba, whenuena eyin onu titengbe na mẹho de nado yọnẹn bo hodo anademẹ he yin zínzínjẹgbonu to owe Ogbẹ́ Watch Tower tọn mẹ lẹ, ewọ sọ dona jẹakọhẹ nunọwhinnusẹ́n Owe wiwe tọn lẹ he yin dodonu anademẹ lọ lẹ tọn. Ewọ na gbọnmọdali do tin to otẹn de mẹ nado yí anademẹ Owe wiwe tọn lẹ do yizan mẹ po nukunnumọjẹnumẹ po gọna awuvẹmẹ.—Yijlẹdo Mika 6:8 go.
Devizọnwiwa po Gbigbọ Klistiani Tọn de Po
10. Walọyizan ylankan tẹwẹ mẹho lẹ dona họ́ yedelẹ sọta, podọ gbọnna?
10 To nudi owhe 55 W.M. tọn mẹ, apọsteli Paulu wlan wekanhlanmẹ etọn tintan hlan agun Kọlinti tọn. Dopo to nuhahun he go e penukundo lẹ mẹ tindo onu nado yiwà hẹ sunnu he jlo nado yin omẹ nukundeji delẹ to agun lọ mẹ. Paulu wlan dọmọ: “Dinvie mìwlẹ yín omẹ he gọ́, dinvie mìwlẹ yín adọkunnọ, mìwlẹ to gandu di ahọlu matin mí: mọwẹ, yẹn sọ jlo dọ mì ni to gandu, na míwlẹ ga nido dugan hẹ mì.” (1 Kọlintinu lẹ 4: 8) To owhe kanweko tintan W.M. tọn mẹ, Klistiani lẹpo tindo todido gandudu taidi ahọlu olọnmẹ tọn lẹ po yẹwhenọ lẹ po hẹ Jesu. (Osọhia 20:4, 6) Ṣigba, e họnwun dọ, mẹdelẹ to Kọlinti wọnji e go dọ ahọlu lẹ matin to aigba ji to yẹwhehọluduta Klistiani tọn mẹ gba. Kakati nado yinuwa taidi ahọlu aihọn ehe tọn lẹ, Klistiani lẹngbọhọtọ lẹ nọ wleawuna whiwhẹ, yèdọ jẹhẹnu he nọ hẹn homẹ Jehovah tọn hùn de.—Psalm 138:6; Luku 22:25-27.
11. (a) Etẹwẹ yin delẹ to apajlẹ ayidonugo whiwhẹ tọn lẹ mẹ? (b) Pọndohlan dogbọn yedelẹ dali tẹlẹ wẹ mẹho lẹ po Klistiani devo lẹpo po dona tindo?
11 Be madogan wẹ whiwhẹ yin ya? Gbede pọn! Jehovah lọsu yin zẹẹmẹ-basina taidi mẹhe yin whiwhẹnọ. (Psalm 18:35) Ahọlu Islaeli tọn lẹ plan awhanpa lẹ sọyì awhangbenu bo dugan do akọta lọ ji to Jehovah glọ. Ṣogan, mẹdopodopo dona họ́ ede ‘na ayiha etọn ma nado yin zizé daga hugan mẹmẹsunnu etọn lẹ.’ (Deutelonomi 17:20) Jesu he yin finfọnsọnkú lọ yin Ahọlu olọn mẹ tọn de. Ṣigba, to whenuena e tin to aigba ji, é klọ afọ devi etọn lẹ tọn. Whiwhẹ nankọtọn die! Podọ to didohia dọ emi jlo dọ apọsteli emitọn lẹ lọsu ni yin whiwhẹnọ to aliho dopolọ mẹ, é dọmọ: “Enẹwutu eyin yẹn mẹhe yin Oklunọ mìtọn, bo sọ yin Mẹplọntọ mìtọn klọ́ afọ mìtọn; é sọ jẹ na mìwlẹ ni sọ klọ́ afọ mìnọzo tọn ga. (Johanu 13:14; Filippinu lẹ 2:5-8) Gigo po pipa lẹpo po dona yì Jehovah dè, e ma yin gbẹtọ depope gba. (Osọhia 4:11) Vlavo yé yin mẹho lẹ wẹo kavi lala, Klistiani lẹpo dona lẹn yedelẹ pọ́n to hinhọ́n ohó Jesu tọn lẹ mẹ he dọmọ: “Afànumẹ madoalenọ wẹ mí: onu he yin azọ́n wiwà mítọn wẹ mí wà.” (Luku 17:10) Pọndohlan depope he gbọnvo na ehe ma yin yẹwhehọluduta tọn gba.
12. Naegbọn owanyi do yin jẹhẹnu titengbe de na mẹho Klistiani lẹ nado wleawuna?
12 To pọmẹ po whiwhẹ́ po, mẹho Klistiani lẹ nọ wleawuna owanyi. Apọsteli Johanu do nujọnu-yinyin owanyi tọn hia whenuena é dọmọ: “Ewọ he ma yiwanna omẹ, ma yọn Jiwheyẹwhe, na Jiwheyẹwhe wẹ owanyi.” (1 Johanu 4:8) Mẹhe ma tindo owanyi lẹ ma to nuyiwa to aliho yẹwhehọluduta tọn mẹ gba. Yé ma yọn Jehovah gba. Gando Visunnu Jiwheyẹwhe tọn go, Biblu dọmọ: “[Jesu] yiwanna omẹ etọn titi he tin to aihọn mẹ lẹ ..., é yiwanna yé jẹ pòdo.” (Johanu 13: 1) To hodọna sunnu 11 he na yin apadewhe hagbẹ́ anademẹtọ lọ tọn to agun Klistiani tọn mẹ whenu, Jesu dọmọ: “Ehe wẹ osẹ́n ṣie, dọ mì ni yiwanna mìnọzo, yèdọ dile yẹn yiwanna mì do.” (Johanu 15:12) Owanyi wẹ ohia mẹdohia Klistiani nugbo tọn. E nọ dọ̀n ayiha he gbado, mẹhe tin to awubla mẹ lẹ, po mẹhe tin to kanlinmọgbenu gbigbọmẹ tọn he to mẹdekannujẹ dín lẹ po dogo. (Isaia 61:1, 2; Johanu 13:35) Mẹho lẹ dona yin apajlẹ dagbenọ to owanyi didohia mẹ.
13. Dile etlẹ yindọ nuhahun lẹ to egbehe sọgan sinyẹn, nawẹ mẹho de sọgan yin huhlọn mẹwhinwhan tọn na dagbe to ninọmẹ lẹpo mẹ gbọn?
13 To egbehe, yè nọ saba biọ to mẹho lẹ si nado penukundo whẹho he gẹdẹ lẹ go. Awusinyẹnnamẹnu alọwle tọn lẹ sọgan tindo dodonu he lodo dẹ̀n-to-aimẹ. Jọja lẹ nọ tindo nuhahun lẹ he sọgan sinyẹn na mẹho lẹ nado mọnukunnujẹemẹ. Awutu numọtolanmẹ tọn lẹ nọ saba sinyẹn nado mọnukunnujẹemẹ. Mẹho he panukọn onu mọnkọtọn lẹ sọgan nọ ma tindo jide nuhe e na wà tọn. Ṣigba e sọgan tindo jide dọ eyin e ganjẹ nuyọnẹn Jehovah tọn go po odẹ̀ po, eyin e nọ gbadopọnna Biblu podọ to nudọnamẹ he yin zinzinjẹgbonu gbọn afanumẹ nugbonọ nuyọnẹntọ lọ dali, podọ e nọ yinuwa po whiwhẹ́ po gọna owanyi hẹ lẹngbọ lọ, e na yin nuyiwadomẹji he tindo alè etlẹ yin to ninọmẹ he sinyẹn hugan lẹ mẹ.
14, 15. Hogbe tẹwẹ dohia dọ Jehovah ko dona omẹ etọn lẹ po mẹho dagbe lẹ po?
14 Jehovah ko dona titobasinanu etọn susugege po “nunina gbẹtọ lẹ” tọn po. (Efesunu lẹ 4:8) Sọn ojlẹ de mẹ jẹ devo mẹ, Ogbẹ́ Watch Tower tọn nọ mọ wekanhlanmẹ kọfanamẹ tọn lẹ yí he to dido kunnudenu owanyi he yin didohia gbọn mẹho whiwhẹ́nọ lẹ he nọ họ́ lẹngbọpa Jiwheyẹwhe tọn po awuvẹmẹ po dali. Di apajlẹ, mẹho agun de tọn wlan dọmọ: “Yẹn ma sọ flin dlapọn nugopọntọ lẹdo tọn devo he yinuwa do jie hugan kavi he gbẹ́ pò to yinyin họdọdeji to agun lọ mẹ. Nugopọntọ lẹdo tọn lọ gọalọna mi nado mọnukunnujẹ nujọnu-yinyin walọyizan nujikudo tọn to whenuena yè to nuyiwahẹ mẹmẹsunnu lẹ mẹ, po nuzindo mẹpipa po ji.”
15 Mẹmẹyọnnu de he zingbejizọnlin sọyì dotowhé he tin to tòmapọ́tò de mẹ nado yin azọ̀nhẹngbọna wlan dọmọ: “Lehe e hẹnmẹdeji dogọ do sọ nado penugo nado dukosọ hẹ mẹho de to ozán enẹ mẹ he yẹn tin to nuhiha mẹ to dotowhé he dẹn do whégbè tlala! Ewọ po mẹmẹsunnu devo lẹ po yí whenu susu zan to dee. Yèdọ aihọnmẹnu he jẹakọhẹ nuhe to wiwà mi lẹ tlẹ tindo numọtolanmẹ dọ yẹn ma na ko gán gbede matin homẹmiọnnamẹ, mẹgopinpọn, po odẹ̀ mẹmẹsunnu wanyinanọ po mẹdezejotọ enẹlẹ tọn po gba.” Mẹmẹyọnnu devo wlan dọmọ: “Yẹn tin to ogbẹ̀ to egbehe na pipli mẹho lẹ tọn yí whiwhẹ do deanana mi to avùnhiho ṣie mẹ hẹ ayimajai sinsinyẹn. ... Mẹmẹsunnu dopo po asi etọn po ma yọn nuhe yé na dọ na mi. ... Ṣigba nuhe hẹn homẹ ṣie hùn hugan wẹ yindọ dile e tlẹ yindọ yé ma yọn nuhe to wiwà mi lẹpo, yé gbọn owanyi dali do penukundo go e.”
16. Tudohomẹnamẹ tẹlẹ wẹ Pita na mẹho lẹ?
16 Mọwẹ, susu mẹho lẹ tọn to ayinamẹ apọsteli Pita tọn lọ he dọmọ: “Mì nọ yìn lẹngbọpa Jiwheyẹwhe tọn he tin [to] mì ṣẹnṣẹn, bo nọ donukun e go, é gbọn mananọmawà dali blo, adavo po ojlo po; é ma yin adọwhẹ́n tọn gba, adavo ojlo zogbe tọn; mì sọ yí mìde do basi ogán do ogú Jiwheyẹwhe tọn ji blo, adavo dọ mì ni yin ohia hlan lẹngbọpa lọ” yido-yi-zan mẹ. (1 Pita 5:1-3) Lehe mẹho yẹwhehọluduta tọn mọnkọtọn lẹ yin dona de do sọ!
Lẹngbọ lẹ to Yẹwhehọluduta Mẹ
17. Dọ delẹ to jẹhẹnu he hagbẹ́ agun lọ tọn lẹpo dona wleawuna lẹ mẹ.
17 Ṣigba, yẹwhehọluduta ma bẹ́ mẹho lẹ kẹdẹ hẹn gba. Eyin lẹngbọhọtọ lẹ dona yinuwa to aliho yẹwhehọluduta tọn mẹ, mọdopolọ wẹ lẹngbọ lẹ lọsu ga dona basi do niyẹn. To aliho tẹlẹ mẹ wẹ? Eyọn, nunọwhinnusẹ́n dopolọ lẹ he nọ deanana lẹngbọhọtọ lẹ dona deanana lẹngbọ lẹ lọsu ga. Klistiani lẹpo, e ma yin mẹho lẹ kẹdẹ gba, dona yin whiwhẹnọ eyin yé na mọ dona Jehovah tọn yí. (Jakobu 4:6) Mẹlẹpo dona wleawuna owanyi na matin owanyi avọsinsan mítọn lẹ hlan Jehovah ma na hẹn homẹ etọn hùn. (1 Kọlintinu lẹ 13:1-3) Podọ mímẹpo, e ma yin mẹho lẹ kẹdẹ gba, dona “gọ́ na yinyọnẹn ojlo [Jehovah] tọn to wuntuntun mẹ podọ to nuyọnẹn gbigbọnọ lẹpo mẹ.”—Kọlọsinu lẹ 1:9.
18. (a) Naegbọn oyọnẹn agbòte nugbo lọ tọn ma do pe? (b) Nawẹ mímẹpo sọgan gọ́ na oyọnẹn he pegan gbọn?
18 Jọja po mẹho lẹ po to pọmẹ nọ pannukọn dide sinsinyẹn lẹ pludopludo dile yé to vivẹnudo nado gbọṣi nugbonọ-yinyin mẹ mahopọnna gbẹninọ to aihọn Satani tọn mẹ. Ojlo aihọn tọn to avọdido, ohunhiho, sinnimoto, po owe lẹ po mẹ nọtena whlepọn gbigbọmẹ tọn na mẹdelẹ. Oyọnẹn agbòtè nugbo lọ tọn ma ko pe nado gọalọna mí nado hẹn jlẹkajininọ mítọn go gba. Nado tindo jide gbigbọṣi nugbonọ-yinyin mẹ tọn, mí dona yin gigọ́ po oyọnẹn he pegan po. Mí tindo nuhudo wuntuntun po oyọnẹn po he Ohó Jiwheyẹwhe tọn kẹdẹ sọgan na mí tọn. (Howhinwhẹn lẹ 2:1-5) Ehe zẹẹmẹdo awuwlena walọyizan nupinplọn dagbe tọn lẹ, ayihamẹlinlẹnpọn do nuhe mí plọn ji, po yíyí yé do yizan mẹ po dali. (Psalm 1:1-3; Osọhia 1:3) Paulu to wekan hlan Klistiani lẹpo, e ma yin mẹho lẹ kẹdẹ gba, to whenuena e dọmọ: “Ṣigba núdùdù sinsinyẹn yin yé he tindo azán susu to ota lẹ tọn, yé he gbọn linlẹn zinzán tọn dali yí nuyọnẹn yetọn do to dagbe po oylan po yọnẹn.”—Heblu lẹ 5:14.
Lẹngbọhọtọ lẹ po Lẹngbọ lẹ po Nọ Wazọ́n Dopọ
19, 20. Tudohomẹnamẹ tẹlẹ wẹ yin nina hlan mẹlẹpo nado kọngbedopọ hẹ mẹho lẹ, podọ etẹwutu?
19 To godomẹ, e dona yin didọ dọ gbigbọ yẹwhehọluduta nugbo tọn nọ yin didohia gbọn mẹhe nọ kọngbedopọ hẹ mẹho lẹ dali. Paulu kanwe hlan Timoti dọmọ: “Mẹho he pọ́n onu go dagbe wẹ yè ni lẹn jẹ na yẹyi whla awe, humọ mẹhe to tukla ohó po oplọn po tọn jẹ lẹ.” (1 Timoti 5:17; 1 Pita 5:5, 6) Mẹho-yinyin yin lẹblanulọkẹyi jiawu de, ṣigba susu mẹho lẹ tọn yin sunnu whẹndonọ lẹ he nọ yì agbasazọ́n yetọn lẹ mẹ egbesọegbesọ podọ he tindo asi lẹ po ovi lẹ po nado penukundo. To whenuena e yindọ yé yin ayajẹnọ nado wà sinsẹ̀nzọn, sinsẹ̀nzọn yetọn bọawu bosọ tindo ale susu to whenuena agun lọ na alọgọ, bo ma yin homọdọdonugotọ glanglan po nususu donukuntọ po.—Heblu lẹ 13:17.
20 Apọsteli Paulu dọmọ: “Mì flín yé he [to nukọntọ yin to mì ṣẹnṣẹn lẹ NW], yé he to ohó Jiwheyẹwhe tọn dọ hlan mì lẹ: mì nọ hodo yise yetọn, bo sọ nọ lẹn opòdo owalọ yetọn tọn pọ́n.” (Heblu lẹ 13:7) Lala, Paulu ma na tuli mẹmẹsunnu lẹ nado hodo mẹho lẹ gba. (1 Kọlintinu lẹ 1:12) Gbẹtọ de hihodo ma sọgbe hẹ yẹwhehọluduta gba. Ṣigba na jide tọn nuyọnẹnnu wẹ e yin nado hodo yise sọawuhia mẹho yẹwhehọluduta tọn de he yin zohunnọ to azọ́n yẹwhehodidọ tọn mẹ, mẹhe nọ́ wá opli lẹ to gbesisọ mẹ, podọ mẹhe nọ yinuwa to whiwhẹ po owanyi po mẹ hẹ agun lọ.
Kunnudenu Yise tọn De
21. Nawẹ Klistiani lẹ nọ do yise he lodo taidi Moṣe tọn hia gbọn?
21 Na nugbo tọn, tintin titobasinanu yẹwhehọluduta de tọn to ojlẹ he ylan hugan to whenuho gbẹtọvi tọn ehe mẹ yin kunnudenu de hlan huhlọn Omẹ Yẹwhehọluduta tọn Daho lọ. (Isaia 2:2-5) E sọ yin kunnudenu yise nuhe diblayì livi atọ́n sunnu, yọnnu, po ovi Klistiani lẹ po tọn, mẹhe nọ vánkan po nuhahun egbesọegbesọ gbẹzan tọn lẹ po ṣigba ma wọnji gbede dọ Jehovah wẹ yin Gandutọ yetọn gba. Kẹdẹdile Moṣe nugbonọ “doakọ́n na ẹn taidi é mọ ewọ he yin mamọ lọ” do, mọdopolọ wẹ Klistiani lẹ to egbehe tindo yise he lodo dopolọ. (Heblu lẹ 11:27) Yé tindo lẹblanulọkẹyi lọ nado tin to yẹwhehọluduta de mẹ, podọ yé nọ dopẹ́ na Jehovah egbesọegbesọ na enẹ. (Psalm 100:4, 5) Dile yé to numimọ huhlọn whlẹngan Jehovah tọn tọn tindo, yé yin ayajẹnọ nado lá dọmọ: “Oklunọ wẹ whẹ̀datọ mítọn, Oklunọ wẹ osẹ́nnọ mítọn, Oklunọ wẹ ahọlu mítọn; ewọ na whlẹn mí gán.”—Isaia 33:22. (Pọ́n w-F 15/1/94, weda 15.)
[Nudọnamẹ Odò Tọn]
a To Owe mọnkọtọn lẹ mẹ wẹ owe lọ ‘Mì Payì Mìde Go po Apó Lẹpo Po,’ he bẹ́ anademẹ Owe wiwe tọn lẹ hẹn podọ yin awuwle etọn basi na nugopọntọ agun mẹ tọn he yin dide lẹ, kavi mẹho lẹ.
Etẹwẹ Biblu Dohia?
◻ To aliho tẹ mẹ wẹ Klistiani lẹ nọ litaina yẹwhehọluduta te?
◻ Nawẹ yẹwhehọluduta yin titobasina gbọn to egbehe?
◻ To aliho tẹlẹ mẹ wẹ mẹho lẹ dona wleawuna yedelẹ nado hẹn azọ́ngbàn yetọn lẹ dì?
◻ Jẹhẹnu Klistiani tọn tẹlẹ wẹ yin onu titengbe na mẹho lẹ nado wleawuna bosọ dohia?
◻ To yẹwhehọluduta lọ mẹ, haṣinṣan tẹwẹ dona tin to lẹngbọ lẹ po lẹngbọhọtọ lẹ po ṣẹnṣẹn?
[Yẹdide to weda 14]
Adam po Evi po hẹn Paladisi bú na yé jlo nado basi dide yedetiti tọn lẹ dogbọn dagbe po oylan po dali wutu
[Yẹdide to weda 16]
Eyin mẹho de nọ gbọn whiwhẹ́ po owanyi po dali do yinuwa hẹ lẹngbọ lọ, e na nọ saba yin huhlọn mẹwhinwhàn na dagbe tọn