Naegbọn Hiẹ Nado Tindo Ojlo to Sinsẹ̀n Mẹ?

OJLO sinsẹ̀n tọn tin to otò he tin to aigba ji lẹpo mẹ. To alọ devo mẹ, mẹsusu tin he nọ dọ po nujikudo po taun dọ yé ma tindo ojlo to sinsẹ̀n mẹ gba. Ṣigba be mọwẹ numọtolanmẹ yetọn nọ saba yin ya?

Gbẹtọvi lẹ yin dida to aliho de mẹ bọ gbẹtọ de na taun tọn ma nọ tindo pekọ po agbasanu lẹ kẹdẹ po gba. Gbẹtọvi lẹ tindo nuhudo onu gbigbọmẹ tọn. Gbẹninọ egbesọ egbesọ tọn he yin zize sinai do dandannu agbasa tọn lẹ mimọyi kẹdẹ ji, gọna ayidedai to ojlẹ delẹ mẹ, ma nọ hẹn pekọ wá na nuhudo tangan gbẹtọvi lẹ tọn to gigọmẹ gba. Gbọnvona kanlin lẹ, gbẹtọvi lẹ jlo nado yọn, ‘Etẹwẹ lẹndai ogbẹ̀ tọn yin?’ ‘Gbẹzan he whègli ehe, he bẹ́ nuhe yọnwhanpẹ susu lẹ hẹn ṣigba bo sọ tindo suhugan nuhe ylan lẹ tọn, be popo lẹpo die ya?’ Be hiẹ ma ko kan kanbiọ ehelẹ nkọtọn sè pọ́n ya?

Ṣogan, livi susu gbẹtọ lẹ tọn he tin to ogbẹ̀ to egbehe whẹ́n to lẹdo he mẹ yè ma nọ yí nukun dagbe do pọ́n ojlo depope tintindo to sinsẹ̀n mẹ te. Nuyiwadomẹji enẹ sọgan ko wá sọn mẹjitọ yetọn lẹ, mẹplọntọ yetọn lẹ, hagbẹ yetọn lẹ, kavi etlẹ yin sọn ahọlu dè.

Skalabrino, dawe jọja de sọn Albanie, basi zẹẹmẹ dọ to gandudu communiste tọn glọ gbẹtọ lẹ yin pinplọn dọ Jiwheyẹwhe de matin. Yinukọn dogọ, owunu wẹ e yin na yé nado dọho dogbọn sinsẹ̀n dali; mọwiwa sọgan dekọtọn do ganpamẹ yìyì mẹ. Ṣogan, to 1991, to whenuena e tin to Suisse taidi fibẹtado-dintọ de, e yin nina dotẹnmẹ hundote lọ nado plọn Biblu. E kẹalọyi. Etẹwutu?

Eyọn, to Albanie e ko sè dọ owe de tin he nọ yin Biblu, ṣigba na taun tọn ewọ ma yọn nudepope dogbọn dali etọn gba. Gbọnmọ dali, to bẹjẹeji etọn e sọgan gọn ma yin ojlo lọ nado mọnukunnujẹ Biblu mẹ wẹ whan ẹn to tintan whenu. Dile e tlẹ yindọ e yin didọna dọ e na to nuplọn gando lẹndai Jiwheyẹwhe tọn na gbẹtọvi lẹ po aigba po go, e sọ mọn ẹn taidi dotẹnmẹ hundote de nado tindo nukọn yìyì to ogbè otò etọn mẹ tọn dido ganji mẹ go. Ṣigba, po awuyiya po, e wá mọdọ nuhe plọn e te hẹn pekọ wá na ojlo sisosiso na onu gbigbọmẹ edetiti tọn. Ahún etọn gọna ayajẹ to whenuena e plọnnu dogbọn aihọn yọyọ he Jiwheyẹwhe dopagbe etọn fie jijọho na gbayipe te dali, yèdọ aihọn de fie gbẹtọ lẹ sọgan nọgbẹ̀ kakadoi bo duvivi susugege dandannu gbẹ̀mẹ tọn lẹ tọn te. Ojlo etọn sọ yin hinhẹn jideji to whenuena e plọn dọ ewọ po whẹndo etọn po sọgan yin apadewhe aihọn yọyọ ehe tọn. To ma penugo nado hẹn wẹndagbe ehe do ede ṣo de, e tẹkan hlan whẹndo etọn to Albanie nado tindo mahẹ etọn hẹ yé.

Aleksei, mẹhe nọ nọ Russie, sọ yin pipaṣa dogbọn nugandomẹgo he oyọnẹn he pegan Biblu tọn sọgan tindo do gbẹzan mẹde tọn ji dali ga. Yin gigọ́ po nuhahun lẹ po bo ma penugo nado mọ zẹẹmẹ pekọhẹnwanamẹ tọn lẹ na lẹndai ogbẹ̀ tọn, e basi dide nado hù ede. Ṣigba, tintan whẹ́, e yì Finlande nado dla họntọn de pọn. To aliji, to pinpan mẹ, e dọho hẹ hundotọ hatọ etọn lẹ dogbọn nuhahun etọn lẹ dali. To yé mẹ wẹ dopo to Kunnudetọ Jehovah Tọn lẹ mẹ tin te, mẹhe dotuhomẹ na ẹn nado plọn Biblu na e wleawu pọngbọ tọn do nuhahun mọnkọtọn lẹ ji wutu. E tindo ayihaawe. To kọlilẹ sọn gbejizọnlin etọn whenu, e tindo numimọ dopolọ. To ojlẹ ehe mẹ Kunnudetọ devo wẹ dọ linlẹn etọn tọ́n tlọlọ bo dọna ẹn dọ emi ko nọ tindo nuhahun mọnkọtọn lẹ dai ṣigba dọ Biblu ko gọalọna emi nado duto yé ji. Ewọ lọsu dotuhomẹna ẹn nado plọn Biblu. To whenuena e gọ̀ jẹ whégbè, alokan dọnú. Họntọn devo wẹ, ehe to nuplọn hẹ Kunnudetọ Jehovah Tọn lẹ bo tindo ayajẹ taun. Aleksei ṣẹṣẹ wá to nukunnumọjẹemẹ dọ vlavo Biblu sọgan wleawuna nuhe emi tindo nuhudo etọn, ṣigba e yọnẹn dọ matin alọgọ emi ma sọgan mọnukunjẹ e mẹ gba. E yigbe nado tindo plọnmẹ Biblu gbesisọ whégbè tọn hẹ Kunnudetọ Jehovah Tọn lẹ, bọ e jẹ opli yetọn lẹ yì ji. E ma yí ì na whenu dindẹn nado mọnukunnujẹ nuhewutu mẹhe hẹn gbẹzan yetọn lẹ sọgbe hẹ nuhe Biblu nọ plọnmẹ lẹ do yin ayajẹnọ sọmọ, dile e tlẹ yindọ yelọsu nọ pannukọn nuhahun he gbayipe na gbẹtọvi lẹ.

Po wuntuntun po do lehe gbẹtọvi yin dida do mẹ, Jesu Klisti dọmọ: “Nado sọgan nọgbè, gbẹtọ matindo nuhudo akla tọn kẹdẹ gba.” (Matiu 4:4, Kuen) E sọ dọmọ: “Ayajẹnọ wẹ mẹhe onú gbigbọmẹ tọn yetọn nọ duahunmẹna lẹ.” (Matiu 5:3, NW) Yé nọ tindo ayajẹ na yé yọn nuhudo yetọn sisosiso, bo zé afọdide he sọgbe lẹ nado hẹn pekọ wá na ẹn, bo tindo numimọ dona Jiwheyẹwhe tọn. Ṣigba, onu gbigbọmẹ tọn mítọn lẹ ma nọ yin pekọhẹnwana gbọn awukọndopọ hẹ ṣọṣi de kavi nuwiwa sinsẹ̀n tọn delẹ tẹnmẹ yìyì dali gba. Sinsẹ̀n he nọ hodo aliho nuwiwa paa tọn de sọgan dọnmẹdogo to numọtolanmẹ liho, ṣigba be e nọ wleawuna pọngbọ nujọnu tọn lẹ na nuhahun gbẹ̀mẹ tọn lẹ ya? Eyin e tlẹ yindọ sinsẹ̀n de nọ zé aliho walọyizan titengbe he sọgbe de daga, eyin e gboawupo nado wleawu nukunnumọjẹnumẹ nugbo dogbọn lẹndai nujọnu ogbẹ̀ tọn dali, be e sọgan hẹn pekọwana nuhudo gbigbọmẹ tọn towe ya? Dehe tlẹ sọ duahunmẹnamẹ hugan wẹ yindọ, be sinsẹ̀n mọnkọtọn bibasi na dekọtọn do haṣinṣan dagbe de tintindo hẹ Jiwheyẹwhe mẹ ya? Matin enẹ, dojijẹ na tin to pekọ nugbo tintindo mẹ.

To pọndohlan ehe tọn mẹ, mẹsusu to dindin nuhe yé ma ko mọ de pé. (Pọ́n w-F 1/6/94, weda 3.)

[Yẹdide to weda 3]

Be nuhudo gbigbọmẹ tọn towe lẹ na yin pekọ hẹnwana nugbo nugbo gbọn awukọndopọ hẹ ṣọṣi de dali ya?

[Yẹdide to weda 4]

Mẹsusu ko mọ dọ to whenuena yé mọnukunnujẹ Biblu mẹ, gbẹzan nọ wá tindo zẹẹmẹ yọyọ de