Taliai po Ayajẹ po Hlan Aṣẹpipa
“Mì lẹzun tonusetọ sọn ayiha mẹ.”—LOMUNU LẸ 6:17.
1, 2. (a) Gbigbọ tẹwẹ tin to aihọn lọ mẹ to egbehe, podọ etẹwẹ yin asisa etọn po nugandomẹgo etọn lẹ po? (b) Nawẹ devizọnwatọ klandowiwe Jehovah tọn lẹ nọ dohia dọ yé gbọnvo gbọn?
“GBIGBỌ he to azọ́nwa to dinvie to ovi tolivivẹ tọn lẹ mẹ” nọ yin mimọ to egbehe po mẹhẹnjọsi po. Gbigbọ mẹdekannujẹ he ma tindo dogbo tọn de, he nọ wá sọn Satani, yedọ “ahọvi huhlọn [jẹhọn] mẹ tọn” dè wẹ. Gbigbọ ehe, “jẹhọn” ehe, kavi walọ ṣejannabi po tolivivẹ tọn po, nọ yí “aṣẹpipa,” kavi huhlọn zan, do suhugan gbẹtọvi lẹ tọn ji. Ehe yin whẹwhinwhẹn dopo na nuhewutu aihọn lọ do to jujugbọn nuhe ko yin yiylọ dọ hunyanhunyan aṣẹpipa tọn de mẹ.—Efesunu lẹ 2:2.
2 Po ayajẹ po, devizọnwatọ klandowiwe Jehovah tọn lẹ to egbehe ma nọ hẹn afuje gbigbọmẹ yetọn tọn lẹ gọ́ po “jẹhọn,” kavi gbigbọ atẹṣiṣi tọn po gba. Yé yọnẹn dọ “homẹgble Jiwheyẹwhe tọn ja ovi tolivivẹ tọn lẹ ji.” Apọsteli Paulu yidogọ dọmọ: “Enẹwutu mì yín mahẹtọ po yé po blo.” (Efesunu lẹ 5:6, 7) Kakatimọ, Klistiani nugbo lẹ nọ dovivẹnu nado “gọ́ na gbigbọ [Jehovah tọn],” podọ yé nọ nù to “nuyọnẹn he sọn aga” mẹ, he “wé, [he] yin jijọho, bo sọ nọ wà dẹdẹ, [he] ma sinyẹnawu nado vẹvẹ na.”—Efesunu lẹ 5:17, 18; Jakobu 3:17.
Taliai sọn Ojlo mẹ Wá Hlan Nupojipetọ-yinyin Jehovah Tọn
3. Etẹwẹ yin họnhungan taliai sọn ojlo mẹ wá tọn, podọ nuplọnmẹ daho tẹwẹ whenuho plọn mí?
3 Họnhungan lọ hlan taliai sọn ojlo mẹ wá wẹ yin yinyọ́n aṣẹpipa he sọgbe hẹ osẹ́n. Whenuho gbẹtọvi lẹ tọn dohia dọ nupojipetọ-yinyin Jehovah tọn gbigbẹdai ma hẹn ayajẹ wá gba. Gbẹdai mọnkọtọn ma hẹn ayajẹ wá na Adam po Evi po, kavi na mẹhe sisẹ yé nado ṣiatẹ lọ, Satani Lẹgba gba. (Gẹnẹsisi 3:16-19) To ninọmẹ he gblezọn dinwhenu etọn tọn mẹ, Satani tindo “homẹgble daho” na e yọnẹn dọ ojlẹ emitọn whègli. (Osọhia 12:12) Jijọho po ayajẹ gbẹtọvi tọn po, mọwẹ, yedọ wẹkẹ lọ pete tọn, sinai do yinyọ́n nupojipetọ-yinyin dodo wẹkẹ mẹ Jehovah tọn ji.—Psalm 103:19-22.
4. (a) Wunmẹ taliai po tonusise tọn tẹ po wẹ Jehovah jlo dọ devizọnwatọ etọn lẹ ni dohia? (b) Gando etẹ go wẹ mí dona yin dudu deji, podọ nawẹ psalmkantọ lọ do ehe hia gbọn?
4 Ṣogan, na jẹhẹnu jlẹkaji jiawu etọn tọn lẹ wutu, Jehovah ma nọ tindo pekọ po tonusise he ma sọn ojlo mẹ wá po gba. Ewọ tindo huhlọn, oo, mọwẹ! Ṣigba ewọ ma nọ yí huhlọn etọn zan do agọ̀ gba. Jiwheyẹwhe owanyi tọn wẹ ewọ yin, podọ e jlo dọ nudida yiaga etọn lẹ ni setonuna ẹn po ojlo po, yedọ sọn owanyi mẹ wá. E jlo dọ yé ni litai hlan nupojipetọ-yinyin etọn na yé dè sọn ahun mẹ wá nado zé yede do aṣẹpipa dodo he sọgbe hẹ osẹ́n etọn glọ, bo yin dudu deji dọ nudepope ma sọgan yọ́n na yé hugan nado setonuna ẹn kakadoi gba. Wunmẹ gbẹtọ he tọn Jehovah jlo to wẹkẹ etọn mẹ tindo numọtolanmẹ dopolọ hẹ psalmkantọ lọ he wlan dọmọ: “Osẹ́n Oklunọ tọn pé, e nọ hẹn awuya ayiha: Aṣẹdai Oklunọ tọn wẹ nugbo: bo nọ diọ mayọndenọ zun nuyọnẹntọ. Ogbèdai Oklunọ tọn lẹ jlọ, yé nọ hẹn ayiha jaya: Wiwe wẹ gbedide Oklunọ tọn, e sọ nọ basi hinhọ́n nukun tọn. Osi Oklunọ tọn wé, e tin ai kaka; nugbo sọ wẹ whẹdida Oklunọ tọn podọ dodo wẹ yé omẹ pó.” (Psalm 19:7-9) Jidide mlẹnmlẹn to jijlọ po nupojipetọ-yinyin dodo Jehovah tọn po mẹ—wẹ dona yin walọyizan mítọn eyin mí jlo nado nọgbẹ̀ to aihọn yọyọ Jehovah tọn mẹ.
Taliai po Ayajẹ po Hlan Ahọlu Mítọn
5. Nawẹ Jesu yin didona na tonusise etọn gbọn, podọ etẹwẹ mí nọ kẹalọyi po ojlo po?
5 Jesu Klisti lọsu yin apajlẹ dagbe de heyin taliai hlan Otọ́ etọn olọn mẹ tọn. Mí hia dọ “e whiwhẹ ede, bo sọ lẹzun tonusetọ kaka jẹ okú, yedọ okú [yatin] tọn.” Paulu yidogọ dọmọ: “Enẹwutu Jiwheyẹwhe zé e do oji aga ga, bo sọ na oyín de ewọ he hú oyín lẹpo; dọ to oyín Jesu tọn mẹ kligonu lẹpo nido nọ jẹklo, yé he tin to olọn mẹ lẹ tọn, yé he tin to aigba lẹ tọn, po yé he tin to aigba sabọ lẹ tọn po. Podọ na odẹ́ lẹpo ni nọ yigbe dọ, Jesu Klisti wẹ Oklunọ, hlan gigo Jiwheyẹwhe Otọ́ tọn.” (Filippinu lẹ 2:8-11) Mọwẹ, mí nọ jẹklo po ayajẹ po to Nukọntọ mítọn po Ahọlu he to gandu, Klisti Jesu nukọn.—Matiu 23:10.
6. Nawẹ Jesu sọawuhia nado yin kunnudetọ de po nukọntọ pipli akọta lẹ tọn po gbọn, podọ nawẹ “ahọludu” etọn na zindonukọn to nukunbibia daho lọ godo gbọn?
6 Gando Klisti taidi Nukọntọ mítọn go, Jehovah dọdai dọmọ: “Dayi e go, yẹn ko yí ewọ na gbẹtọ lẹ na kunnudetọ nukọntọ, otogán na gbẹtọ lẹ.” (Isaia 55:4) Gbọn lizọnyizọn aigba ji etọn tọn podọ gbọn anadena azọ́n yẹwhehodidọ tọn etọn sọn olọn mẹ wá to okú etọn po fọnsọnku etọn po godo dali, Jesu ko do ede hia nado yin “kunnudetọ dodonọ, nugbonọ” Otọ́ etọn tọn hlan gbẹtọ akọta lẹpo tọn. (Osọhia 3:14; Matiu 28:18-20) Pipli akọta mọnkọtọn tọn lẹ todin yin tenọna to sọha he to jideji tindo lẹ heyin “gbẹtọ susugege” lẹ mẹ, he na lùn “nukunbibia daho” lọ tọ́n to nukọntọ-yinyin Klisti tọn glọ. (Osọhia 7:9, 14) Ṣigba nukọntọ-yinyin Jesu tọn ma doalọte do finẹ gba. “Ahọludu” etọn na dẹn to aimẹ họ owhe fọtọ́n. Na gbẹtọvi tonusetọ lẹ, ewọ na yinuwa sọgbe hẹ yinkọ etọn heyin “Jawu, Hónamẹtọ, Jiwheyẹwhe huhlọnnọ, Otọ madopodo, Ahọvi Jijọho tọn.”—Isaia 9:6, 7; Osọhia 20:6.
7. Eyin mí jlo dọ Jesu ni plan mí hlan “osìn ogbẹ̀ tọn kọ̀n,” etẹwẹ mí dona wà madọngban, podọ etẹwẹ na hẹn mí nado yin wanyina gbọn Jesu po Jehovah po dali?
7 Eyin mí tindo ojlo nado mọaleyi sọn “asisa osìn ogbẹ̀ tọn” lọ mẹ ehe Lẹngbọvu lọ, Klisti Jesu, nọ deanana gbẹtọvi ahun jijlọnọ lẹ hlan, mí dona dohia matin gbandindọn gbọn aliho nuwiwa mítọn tọn dali dọ mí nọ litai po ayajẹ po hlan aṣẹpipa etọn taidi Ahọlu. (Osọhia 7:17; 22:1, 2; yijlẹdo Psalm 2:12 go.) Jesu dohia dọmọ: “Eyin mì yiwanna mi, mì bo yìn osẹ́n ṣie lẹ. Ewọ he tindo osẹ́n ṣie lẹ, bo sọ yìn yé, ewọ lọ wẹ mẹhe yiwanna mi: mẹhe sọ yiwanna mi, yé na yiwan na ẹn sọn Otọ́ ṣie de, yẹn nasọ yiwan na ẹn, bo nasọ do dee hia hlan ẹn.” (Johanu 14:15, 21) Be hiẹ jlo nado yin wanyina gbọn Jesu po Otọ́ etọn po dali ya? To whelọnu lò yin taliaitọ hlan aṣẹpipa yetọn.
Nugopọntọ lẹ nọ Setonu po Ayajẹ Po
8, 9. (a) Etẹwẹ Klisti wleawuna na jijlọ dote agun lọ tọn, podọ to ninọmẹ tẹ mẹ wẹ sunnu ehelẹ dona yin apajlẹ na apó lọ te? (b) Nawẹ taliai Klistiani nugopọntọ lẹ tọn yin yẹdena to owe Osọhia tọn mẹ gbọn, podọ nawẹ yé na din “ahun tonusise tọn” de to whenuena yé to nukunpedo whẹho whẹdida tọn lẹ go gbọn?
8 “Agun yin mẹmẹglọ hlan Klisti.” Taidi Nugopọntọ etọn, ewọ ko wleawuna “nunina gbẹtọ” tọn na agun lọ hinhẹn “dote.” (Efesunu lẹ 4:8, 11, 12; 5:24) Sunnu he whẹ́n gbigbọmẹ tọn ehelẹ yin didọna nado ‘yìn lẹngbọpa Jiwheyẹwhe tọn he yè zé na yé lọ,’ e ma yin nado “yí [yede] do basi ogán do ogu Jiwheyẹwhe tọn ji [gba], adavo dọ [yé] ni yin ohia hlan lẹngbọpa lọ.” (1 Pita 5:1-3) Jehovah tọn wẹ lẹngbọpa lọ yin, podọ Klisti wẹ “lẹngbọhọtọ dagbe” etọn. (Johanu 10:14) To whenuena e yindọ nugopọntọ lẹ nọ gbọn jlọjẹ dali do donukun godonọnamẹ sọn ojlo mẹ wá sọn lẹngbọ lẹ he Jehovah po Klisti po zé do nukunpedonugo yetọn glọ, yewlọsu dona yin apajlẹ dagbe taliai tọn ga.—Owalọ lẹ 20:28.
9 To owhe kanweko tintan whenu, nugopọntọ yiamisisadode lẹ yin tenọna gbọn yẹhiadonu dali taidi tintin to “ada,” kavi “awa,” adusiwhe Klisti tọn mẹ, he nọtena taliai yetọn hlan ẹn taidi Ota agun lọ tọn. (Osọhia 1:16, 20; 2:1) Nudopolọ yin bibiọ to egbehe, nugopọntọ lẹ to gblagbla agun Kunnudetọ Jehovah Tọn lẹ tọn mẹ dona litai na anademẹ Klisti tọn bo ‘whiwhẹ yede to alọ huhlọnnọ Jiwheyẹwhe tọn glọ.’ (1 Pita 5:6) To whenuena e yin bibiọ to mì si nado penukundo whẹho whẹdida tọn lẹ go, taidi Sọlọmọni to owhe nugbonọ etọn tọn lẹ whenu, yé dona hodẹ̀ hlan Jehovah dọmọ: “Na ayiha wuntuntun tọn de mẹmẹsi towe nado dawhẹna gbẹtọ towe lẹ, na yẹn nido tùnayinugo to dagbe po oylan po ṣẹnṣẹn.” (1 Ahọlu lẹ 3:9) Ahun tonusetọ de na whàn mẹho de nado din nado pọn onu lẹ dile Jehovah po Klisti Jesu po nọ pọn yé do na dide he yin bibasi to aigba ji lọ ni sọgbe hẹ enẹ heyin bibasi to olọn mẹ pẹkipẹki dile e yọnbasi do.—Matiu 18:18-20.
10. Nawẹ nugopọntọ lẹpo dona dovivẹnu nado hodo apajlẹ Jesu tọn to aliho he mẹ e yinuwa hẹ lẹngbọ lẹ te gbọn?
10 Mọdopolọ nugopọntọ tomẹyitọ lẹ po mẹho agun tọn lẹ po na dovivẹnu nado hodo apajlẹ Klisti tọn to aliho he mẹ e nọ yinuwa hẹ lẹngbọ lẹ te. Gbọnvona Falẹsi lẹ, Jesu ma zé osẹ́n susu he vẹawu nado hodo lẹ dai gba. (Matiu 23:2-11) E dọ na omẹ taidi lẹngbọ lẹ dọmọ: “Mì wá dee, mì he to tuklajẹ, bọ yè doagbàn pinpẹ̀n na lẹ, yẹn nasọ na gbọjẹ mì. Mì yí zẹgẹ ṣie do okọ̀ mìtọn, na mì ni sọ plọn nupinplọn ṣie: na homẹmimiọnnọ podọ ayiha whiwhẹnọ wẹ yẹn: mì nasọ mọ gbọjẹ hlan alindọn mìtọn lẹ. Na zẹgẹ ṣie bọawu, agbàn ṣie sọ fua.” (Matiu 11:28-30) To whenuena e yin nugbo dọ Klistiani dopodopo dona “hẹn agbàn ede tọn,” nugopọntọ lẹ dona flin apajlẹ Jesu tọn bo gọalọna mẹmẹsunnu yetọn lẹ nado tindo numọtolanmẹ dọ agbàn yetọn heyin azọngban Klistiani tọn “bọawu,” “fua,” bo yin onu ayajẹ tọn de nado hẹn.—Galatianu lẹ 6:5.
Taliai to Aliho Yẹwhehọluduta Tọn Mẹ
11. (a) Nawẹ mẹde sọgan tindo osi na tatọ-yinyin podọ ṣogan gọn ma yinuwa to aliho yẹwhehọluduta tọn mẹ na taun tọn gbọn? Na apajlẹ. (b) Etẹwẹ e zẹẹmẹdo nado yinuwa to aliho yẹwhehọluduta tọn mẹ na nugbo tọn?
11 Gandudu gbọn Jiwheyẹwhe dali wẹ yẹwhehọluduta yin. E bẹ nunọwhinnusẹn tatọ-yinyin he yin didohia to 1 Kọlintinu lẹ 11:3 mẹ hẹn. Ṣigba e bẹ hugan mọ hẹn ga. Mẹde sọgan sọawuhia nado do osi hia na tatọ-yinyin podọ ṣogan nọ ma tindo gbigbọ yẹwhehọluduta tọn to linlẹn gigọ hogbe lọ tọn mẹ. Nawẹ ehe sọgan yin mọ gbọn? Nado basi dohia, démocratie yin gandudu gbọn gbẹtọ lẹ dali, podọ démocrate yin zẹẹmẹ basina taidi “mẹde he tindo yise to nuyiwa démocratie tọn mẹ.” Mẹde sọgan sọalọakọn nado kẹalọyi gandudu démocratie tọn, tindo mahẹ to vobibla mẹ, bo tlẹ yin tonudọtọ lọsu. Ṣigba eyin, to walọyizan paa etọn mẹ, e jẹagọdo gbigbọ démocratie tọn po nunọwhinnusẹn he e bẹhẹn lẹpo po, be e sọgan yin didọ dọ e tindo yise to gandudu démocratie tọn mẹ nugbo nugbo ya? Mọdopolọ, nado yin omẹ yẹwhehọluduta tọn nugbo nugbo, mẹde dona yinuwa hugan nado litai na tatọ-yinyin to aliho paa mẹ. E dona hodo apajlẹ aliho po jẹhẹnu Jehovah tọn lẹ po. Na nugbo tọn ewọ dona yin gandudeji gbọn Jehovah dali to aliho lẹpo mẹ. Podọ to whenuena e yindọ Jehovah ko na aṣẹpipa gigọ Visunnu etọn, nado yinuwa to aliho yẹwhehọluduta tọn mẹ sọ zẹẹmẹdo hihodo apajlẹ Jesu tọn.
12, 13. (a) Etẹ, na taun tọn, wẹ nuyiwa to aliho yẹwhehọluduta tọn mẹ bẹhẹn? (b) Be taliai to aliho yẹwhehọluduta tọn mẹ bẹ tonusise na osẹ́n susu lẹ hẹn ya? Na apajlẹ.
12 Flindọ, Jehovah jlo taliai sọn ojlo mẹ wá he yin whinwhan gbọn owanyi dali. Enẹ wẹ yin aliho he mẹ ewọ nọ dugan do wẹkẹ lọ ji te. Ewọ wẹ asisa daho hugan owanyi tọn. (1 Johanu 4:8) Klisti Jesu wẹ yin “hinhọ́n gigo etọn tọn, podọ ojlẹmọ dodo odohia etọn tọn.” (Heblu lẹ 1:3) E biọ to devi etọn nugbo lẹ si nado yiwanna ode awetọ. (Johanu 15:17) Enẹwutu nado yinuwa to aliho yẹwhehọluduta tọn mẹ ma bẹ taliatọ yinyin kẹdẹ hẹn gba ṣigba e sọ bẹ yinyin owanyinọ hẹn ga. Whẹho lọ sọgan yin bibladopọ dole: Gandudu gbọn Jiwheyẹwhe dali wẹ yẹwhehọluduta yin; Jiwheyẹwhe wẹ owanyi; enẹwutu yẹwhehọluduta nọ yin gandu deji gbọn owanyi dali.
13 Mẹho de sọgan lẹndọ nado sọgan yinuwa to aliho yẹwhehọluduta tọn mẹ, mẹmẹsunnu lẹ dona setonuna wunmẹ osẹ́n lẹpo tọn. Mẹho delẹ ko basi osẹ́n lẹ sọn ayinamẹ he nọ yin nina sọn ojlẹ de mẹ jẹ devo mẹ gbọn “afanumẹ nugbonọ, nuyọnẹntọ” lọ dali. (Matiu 24:45) Di dohia, yè na ayinamẹ etọn to whedenu wayì dọ na dagbe nado yọ́n mẹmẹsunnu lẹ ganji to agun lọ mẹ tọn wutu, e sọgan yin nuhe yọ́n ma nado nọ sinai to oján dopo lọ ji to whepoponu to Plitẹnhọ Ahọluduta Lọ Tọn mẹ. Ehe yin bibasi nado yin ayinamẹ yọn-na-yizan de, e ma yin osẹ́n egblemaku tọn de gba. Ṣigba mẹho delẹ sọgan tindo ayilinlẹn lọ nado diọkọ na ẹn zun osẹ́n de podọ nado tindo numọtolanmẹ lọ dọ mẹhe ma hodo e lẹ ma to nuyiwa to aliho yẹwhehọluduta tọn mẹ gba. Ṣogan, whẹwhinwhẹn dagbe susu lẹ sọgan tin na nuhewutu mẹmẹsunnu de kavi mẹmẹyọnnu de sọgan jlo nado nọ sinai do awa taun de ji. Eyin mẹho de ma yí owanyi do ze ninọmẹ mọnkọtọn lẹ do lẹnpọn mẹ, be ewọ lọsu yin mẹhe to nuyiwa to aliho yẹwhehọluduta tọn mẹ nugbo nugbo ya? Nado yin omẹ yẹwhehọluduta tọn, “mì gbọ onu mìtọn lẹpo ni yin wiwa to owanyi mẹ.”—1 Kọlintinu lẹ 16:14.
Devizọnwiwa po Ayajẹ Po
14, 15. (a) Nawẹ mẹho de sọgan hẹn mẹmẹsunnu kavi mẹmẹyọnnu delẹ nado hẹn ayajẹ yetọn bú to Jehovah sinsẹ̀n mẹ gbọn, podọ naegbọn ehe ma nado yin walọ nuyiwa to aliho yẹwhehọluduta tọn mẹ tọn? (b) Nawẹ Jesu dohia dọ e yọn pinpẹn owanyi he yin didohia gbọn sinsẹnzọn mítọn dali, kakati hugan sọha lọ gbọn? (c) Etẹwẹ mẹho lẹ dona zé do lẹnpọn mẹ?
14 Yinyin mẹhe nọ yinuwa to aliho yẹwhehọluduta tọn mẹ sọ zẹẹmẹdo devizọnwiwa hlan Jehovah po ayajẹ po ga. Jehovah yin “Jiwheyẹwhe [ayajẹ, NW] tọn.” (1 Timoti 1:11) E jlo dọ sinsẹ̀n-basitọ emitọn lẹ ni sẹ̀n emi po ayajẹ po. Mẹhe nọ hẹn osẹ́n sinsinyẹn zẹjlẹgo dona flin dọ osẹ́n lọ lẹ he Islaeli tindo nado “nọ payi” wẹ yin ehelẹ: “Podọ hiẹ nasọ nọ jaya to Oklunọ lọ Jiwheyẹwhe towe nukọn to ehe hiẹ yí alọ towe do hlan lẹpo mẹ.” (Deutelonomi 12:1, 18) Nudepope he mí basi to sinsẹnzọn Jehovah tọn mẹ dona yin ayajẹ tọn de, e ma dona yin nupẹ̀nagbànmẹ de gba. Nugopọntọ lẹ sọgan yí onu susu basi nado hẹn mẹmẹsunnu lẹ tindo numọtolanmẹ ayajẹ tọn nado wà nuhe go yé pe to Jehovah sinsẹ̀n mẹ. To alọ devo mẹ, eyin mẹho lẹ ma tin to aṣeji, yé sọgan hẹn mẹmẹsunnu delẹ nado hẹn ayajẹ yetọn bú. Eyin, di apajlẹ, yé basi nuyijlẹdonugo lẹ, pipa nina mẹhe jẹ kavi zẹ madozẹnzẹn ganmẹ he agun lọ yizan nado dọyẹwheho go podọ gbọn hódinmẹnu dali to vivlẹ mẹhe ma jẹ e kọ̀n lẹ ko, etẹwẹ na yin numọtolanmẹ mẹhe tindo whẹwhinwhẹn họakuẹ lẹ na ganmẹ he yìdo nina tọn? Be ehe ma na hẹn yé nado tindo numọtolanmẹ whẹgbledo mẹde tọn he na hẹn ayajẹ yetọn bú ya?
15 Ganmẹ vude lẹ he mẹdelẹ sọgan zejo na kunnudide gbangba tọn sọgan nọtena vivẹnudido daho de hugan ganmẹ susu lẹ he mẹdevo lẹ nọ yizan to yẹwhehodidọ mẹ, to pọndohlanmẹ na nuhe dù jọja lẹ, agbasalilo, po ninọmẹ devo lẹ po. To ninọmẹ ehe mẹ, mẹho lẹ ma dona dawhẹ na yé gba. Na nugbo tọn, hlan Jesu wẹ Otọ́ lọ na “huhlọn nado dawhẹ.” (Johanu 5:27) Be Jesu ṣàn asuṣiọsi hẹntọnọ lọ ko na nunina etọn ma sọ madozẹnzẹn tọn wẹ ya? Lala, e yọ́n lehe e dovivẹnu nado mọ abọgankuẹ flinflin awe lọ lẹ do tọn. Yé yin “onu he e tindo lẹpo ... yedọ gbẹ̀mẹnu etọn lẹpo.” Owanyi he siso nankọ na Jehovah wẹ yé nọtena! (Malku 12:41-44) Be mẹho lẹ dona tindo pọndohlan he depo depope na vivẹnudido owanyinọ lẹ heyin mẹhe nutindo yetọn lẹpo whèpo to sọha “madozẹnzẹn” tọn mẹ wẹ? To hogbe owanyi na Jehovah tọn mẹ, vivẹnudido mọnkọtọn lẹ sọgan hugan madozẹnzẹn taun!
16. (a) Eyin nugopọntọ lẹ nọ yí sọha lẹ zan to hodidọ yetọn lẹ mẹ, etẹwutu wẹ yé do tindo nuhudo wuntuntun po jlẹkajininọ dagbe tọn po? (b) Nawẹ mẹmẹsunnu lẹ sọgan yin alọgọna ganji nado hẹn sinsẹnzọn yetọn jideji gbọn?
16 Be ayidonugo ehelẹ todin dona yin didiọzun “osẹ́n” yọyọ de dọ sọha lẹ—yedọ madozẹnzẹn lẹ—ma dona yin nùdego ba wẹ ya? Paali! Onu agokun lọ wẹ yindọ nugopọntọ lẹ dona yin jlẹkajinọtọ to tulinina mẹmẹsunnu lẹ nado hẹn lizọnyizọn yetọn gblo po alọgigọna yé nado wà nuhe go yé pe po ayajẹ po mẹ. (Galatianu lẹ 6:4) To oló Jesu tọn mẹ gando talẹnti go, ogán lọ bẹ nutindo etọn lẹ na afanumẹ etọn lẹ “dopodopo yetọn le huhlọn etọn te.” (Matiu 25:14, 15) Mọdopolọ mẹho lẹ dona zé yọnbasi wẹnlatọ Ahọluduta lọ tọn dopodopo do lẹnpọn mẹ. Ehe biọ wuntuntun. E sọgan yindọ mẹdelẹ na nugbo tọn tindo nuhudo tuli tọn nado yinuwa dogọ. Yé sọgan yọ́n pinpẹn alọgọ lọ tọn na tito basina nuyiwa yetọn. To whẹho depope mẹ, eyin yé sọgan yin alọgọna nado wà nuhe go yé pe po ayajẹ po, vlavo ayajẹ enẹ na ná yé huhlọn nado hẹn nuyiwa Klistiani yetọn tọn gblodeji to fie e yọnbasi te.—Nẹhemia 8:10; Psalm 59:16; Jẹlemia 20:9.
Jijọho he nọ Wá sọn Taliai po Ayajẹ po Mẹ
17, 18. (a) Nawẹ taliai po ayajẹ po sọgan hẹn jijọho po dodo po wá na mí gbọn? (b) Etẹwẹ sọgan yin mítọn eyin mí payi gbedide Jiwheyẹwhe tọn lẹ go nugbo nugbo?
17 Taliai po ayajẹ po hlan nupojipetọ sọgbe hẹ osẹ́n Jehovah tọn nọ hẹn jijọho daho wá na mí. Psalmkantọ lọ dọ to odẹ̀ mẹ hlan Jehovah dọmọ: “Daho wẹ jijọho he yé he yiwanna osẹ́n towe lẹ tindo: Yé ma tindo núhẹnmẹklẹnafọ ahlida tọn depope.” (Psalm 119:165) Gbọn tonusena osẹ́n Jiwheyẹwhe tọn dali, mí nọ hẹn alè wá na míde. Jehovah dọ na Islaeli dọmọ: “Le wẹ Oklunọ Omẹflitọ, Omẹ Wiwe Islaeli tọn dọ; yẹn wẹ Oklunọ Jiwheyẹwhe towe, he plọn we na alè, he plan we gbọn aliho he ji hiẹ na gbọ̀n. Eyindọ hiẹ ko dotoai hlan osẹ́n ṣie! Whenẹnu wẹ jijọho towe do ko taidi otọ̀, dodo towe di agbowhẹn ohù tọn.”—Isaia 48:17, 18.
18 Avọsinsan ofligọ Klisti tọn nọ hẹn jijọho hẹ Jiwheyẹwhe wá. (2 Kọlintinu lẹ 5:18, 19) Eyin mí tindo yise to ohùn ofligọ Klisti tọn mẹ bo dovivẹnu sinsinyẹn nado nọavunte sọta madogan mítọn lẹ bo wà ojlo Jiwheyẹwhe tọn, mí na mọ kọgbọ yí sọn numọtolanmẹ whẹgbledomẹ tọn si. (1 Johanu 3:19-23) Yise mọnkọtọn, he yè nọgodona gbọn azọ́n dali, nọ na mí teninọ dodo tọn to Jehovah nukọn po todido jiawu lùnlùn “nukunbibia daho lọ” tọn tọ́n po bo nọgbẹ̀ kakadoi to aihọn yọyọ Jehovah tọn mẹ. (Osọhia 7:14-17; Johanu 3:36; Jakobu 2:22, 23) Ehe lẹpo sọgan yin mítọn ‘kiki eyin mí na payi gbedide Jiwheyẹwhe tọn lẹ go nugbo nugbo.’
19. Etẹ ji wẹ ayajẹ mítọn todin po todido ogbẹ̀ madopodo tọn po sinai do, podọ nawẹ Davidi do numọtolanmẹ dudu to mẹji mítọn hia gbọn?
19 Mọwẹ, ayajẹ mítọn todin po todido po heyin ogbẹ̀ madopodo tọn to paladisi aigba tọn de ji sinai do ayajẹ taliai mítọn tọn hlan aṣẹpipa Jehovah tọn taidi Oklunọ Nupojipetọ wẹkẹ lọ tọn ji. Mì gbọ mí ni nọ tindo mahẹ to numọtolanmẹ Davidi tọn mẹ, he dọmọ: “Oklunọ E, towe kiklo yin, po huhlọn po, po gigo po, po awhangba po, po gigodaho po: na ehe tin to olọn mẹ lẹpo podọ to wẹkẹ mẹ towe wẹ; towe wẹ ahọludu, Oklunọ E, hiẹ wẹ yé sọ zedaga di ota to popo ji. Enẹwutu dinvie, Jiwheyẹwhe mítọn, mí dopẹna we, bo sọ pà oyín towe gigonọ.”—1 Otannugbo lẹ 29:11, 13. (Pọ́n w-F 1/7/94, weda 23.)
Nuagokun lẹ Nado Flin
◻ Wunmẹ taliai po tonusise tẹ tọn po wẹ Jehovah jlo dọ devizọnwatọ etọn lẹ ni dohia?
◻ Nawẹ Jesu yin didona na tonusise etọn gbọn, podọ etẹwẹ mí dona dohia gbọn aliho nuyiwa mítọn tọn dali?
◻ Nawẹ nugopọntọ lẹpo dona hodo apajlẹ Jesu tọn to aliho he mẹ e yinuwa hẹ lẹngbọ lẹ mẹ gbọn?
◻ Etẹwẹ nuyiwa to aliho yẹwhehọluduta tọn mẹ bẹhẹn?
◻ Dona tẹlẹ wẹ taliai po ayajẹ po nọ hẹnwá na mí?
[Yẹdide to weda 24]
Mẹho lẹ nọ na tuli lẹngbọpa lọ nado wà nuhe go yé pe po ayajẹ po
[Yẹdide to weda 26 ]
Homẹ Jehovah tọn nọ hùn do mẹhe nọ setonuna ẹn sọn ahun mẹ wá lẹ go