‘Mọwẹ Yé Basi Do’
“Na ehe wẹ owanyi Jiwheyẹwhe tọn, dọ mí ni yìn osẹ́n etọn.” —1 JOHANU 5:3.
1. Etẹwẹ sọgan yin didọ gando obá he mẹ owanyi Jiwheyẹwhe tọn gblo jẹ go?
“JIWHEYẸWHE WẸ OWANYI.” Mẹhe wá yọ́n Jiwheyẹwhe bo setonuna gbedide etọn lẹpo nọ mọ pinpẹn nutọn yinyọnẹn he siso de yí na sisosiso-yinyin owanyi enẹ tọn. “Ehe mẹ wẹ owanyi te, e ma yin dọ mílẹ yiwanna Jiwheyẹwhe gba, ṣigba dọ ewọ yiwanna mí bosọ do Ovi etọn hlan nado yin oyẹsu na ylando mítọn.” Dile mí to yise dohia to avọ́sinsan họakuẹ ofligọ Jesu tọn mẹ, mí ‘gbọṣi owanyi Jiwheyẹwhe tọn mẹ.’ (1 Johanu 4:8-10, 16) Gbọnmọ dali mí sọgan duvivi adọkun dona gbigbọmẹ tọn lẹ todin podọ to titonu he ja, yèdọ ogbẹ̀madopodo.—Johanu 17:3; 1 Johanu 2:15, 17.
2. Nawẹ tonusena gbedide Jiwheyẹwhe tọn lẹ nọ hẹn ale wá na devizọnwatọ etọn lẹ gbọn?
2 Kandai Biblu tọn gọna apajlẹ mẹhe setonuna gbedide Jiwheyẹwhe tọn bo ko yin didona tlala na mọ bibasi wutu lẹ. Omẹ ehelẹ bẹ kunnudetọ jẹnukọnna-ojlẹ Klistiani lẹ tọn hẹn, gando delẹ he go apọsteli Paulu wlan dọmọ: “Yé omẹ helẹ pó wẹ kú to yise mẹ, bo ma mọ opagbe lọ yí, ṣigba yé ko mọ ẹn to aganu boboe, bo yọnẹn to yede mẹ, bosọ jlẹgbèna yé, bosọ yigbe dọ jonọ, towiwehisizọnlinnọ wẹ yé to aihọn mẹ.” (Heblu lẹ 11:13) To nukọn mẹ, devizọnwatọ mẹdezejotọ Jiwheyẹwhe tọn lẹ mọ ale yí sọn “Jesu Klisti mẹ [mẹhe dali] ojọmiọn po nugbo po gbọn wá.” (Johanu 1:17) To owhe 6 000 whenuho gbẹtọvi tọn lẹpo gblamẹ, Jehovah ko na ale kunnudetọ nugbonọ he setonuna gbedide etọn lẹ, he na nugbo tọn ma “yin nupẹ̀nagbanmẹ.”—1 Johanu 5:2, 3.
To Azán Noa Tọn lẹ Gbè
3. To aliho tẹlẹ mẹ wẹ Noa ‘basi domọ’ te?
3 Kandai Biblu tọn dọmọ: “Gbọn yise dali Noa, whenuena yè dohia onú he yè ma ko mọ lẹ tọn na ẹn sọn Jiwheyẹwhe de, le obu di i, e wleawu ohún (aki) tọn dai na whlẹngán owhé etọn tọn: gbọn ehe tọn dali e gblewhẹdo aihọn, bosọ lẹzun whédutọ dodo he tin gbọn yise dali tọn.” Taidi “yẹwhehodọtọ dodo tọn,” Noa setonuna Jiwheyẹwhe mlẹnmlẹn, bo na avase aihọn danuwatọ he jẹnukọnna-Osingigọ lọ dogbọn whẹdida sọn olọn mẹ wá he sẹpọ lọ dali. (Heblu lẹ 11:7; 2 Pita 2:5) To aki lọ gbigbá whenu, e yí sọwhiwhe do hodo anademẹ họgbigbá sọn olọn mẹ wá tọn lọ. Enẹgodo e bẹ kanlin heyin ṣinṣinyan lẹ po núdùdù po biọ e mẹ. “Noa sọ basi; kẹdẹdi enẹ he Jiwheyẹwhe ko degbena ẹn lẹpo; mọwẹ e basi do.”—Gẹnẹsisi 6:22.
4, 5. (a) Nawẹ nuyiwadomẹji aovi de tọn gando gbẹtọvi lẹ go kakajẹ egbehe gbọn? (b) Naegbọn mí dona ‘basi domọ’ to tonusisena anademẹ sọn olọn mẹ wá?
4 Noa po whẹndo etọn po dona diahihẹ nuyiwadomẹji aovi-nuwiwa angẹli tolivẹtọ lẹ tọn. Ovi Jiwheyẹwhe tọn ehelẹ yí agbasa gbẹtọ tọn dó bo zanhẹ yọnnu lẹ, bo ji ovi-flusọ he tindo huhlọn zẹ jọwamọ go lẹ he nọ bianukunna gbẹtọvi lẹ. “Aigba sọ gble to Jiwheyẹwhe nukọn, aihọn sọ gọ́ na adìngbàndido.” Jehovah do Osingigọ lọ hlan nado zà whẹndo ylankan enẹ sẹ. (Gẹnẹsisi 6:4, 11-17; 7:1) Sọn azán Noa tọn gbè gbọ́n angẹli aovi tọn lẹ ma sọ yin nina dotẹnmẹ nado zé agbasa gbẹtọ tọn dó ba. Etomọṣo, ‘aihọn lẹpo zindonukọn nado tin to huhlọn mẹylankan lọ,’ Satani Lẹgba tọn glọ. (1 Johanu 5:19; Osọhia 12:9) To dọdai liho, Jesu yí whẹndo atẹṣitọ azán Noa tọn gbè enẹ jlẹdo whẹndo gbẹtọvi lẹ tọn he gbẹ ẹ dai sọn whenuena ohia “tintin tofi” etọn jẹ awusọhia ji to 1914 go.—Matiu 24:3, 34, 37-39; Luku 17:26, 27.
5 To egbehe, taidi to azán Noa tọn gbè, Satani to tintẹnpọn nado hẹn gbẹtọvi lẹ po planẹti mítọn po biọ vasudo mẹ. (Osọhia 11:15-18) Enẹwutu onú niyaniya tọn wẹ eyin nado setonuna gbedide gbọdo lọ he dọmọ: “Mì zé gbaja Jiwheyẹwhe tọn lẹpo bla dogo, na mì nido penugo nado nọte gligli sọta ayiha wintinwintin Lẹgba tọn.” (Efesunu lẹ 6:11, NW, nudọnamẹ odò tọn) To ehe mẹ, mí yin huhlọnna gbọn pinplọn Ohó Jiwheyẹwhe tọn po yiyi i zan po dali to gbẹzan mítọn lẹ mẹ. Humọ, mí tindo titobasinanu nukunpedomẹgotọ Jehovah tọn, po “afanumẹ nugbonọ nuyọnẹntọ” yiamisisadode lọ po gọna mẹho owanyinọ etọn lẹ, nado yìn mí po homẹfa po to aliho he ji mí na zinzọnlin gbọn. Mí tindo azọ́n yẹwhehodidọ globu tọn de nado wadotana. (Matiu 24:14, 45-47) Taidi Noa, he yí sọwhiwhe do setonuna nudọnamẹ sọn olọn mẹ wá lẹ, na mí ni nọ saba ‘basi domọ.’
Mose—Homẹmimiọnnọ Hú Gbẹtọ Lẹpo
6, 7. (a) Dide alemọyi tọn tẹwẹ Mose basi? (b) Aliho nuyiwa adọgbigbo tọn tẹwẹ Mose jodo na mí?
6 Lẹnnupọn do sunnu he tindo yise devo ji—yèdọ Mose. E sọgan ko duvivi gbẹdudu tọn to adọkun Egipti tọn lẹ mẹ. Ṣigba e dè nado “jiya nukunbibia tọn hẹ omẹ Jiwheyẹwhe tọn lẹ, hú nado dugbẹ ylando tọn to ojlẹ pẹvide mẹ.” Taidi devizọnwatọ he yè deazọ́nna Jehovah tọn, “e pọ́n hlan ahọsu ale lọ tọn [ bo] doakọn na ẹn taidi e mọ ewọ he yin mamọ lọ.”—Heblu lẹ 11:23-28.
7 To Osọha lẹ 12:3 mẹ, mí hia dọmọ: “Dawe lọ Mose yin homẹmimiọnnọ tlala hú omẹ he tin to nukunmẹ aigba lọ tọn ji lẹpo.” To vogbingbọn mẹ, Falo Egipti tọn yinuwa taidi goyitọ hugan to gbẹtọ lẹ mẹ. To whenuena Jehovah degbena Mose po Aalọn po nado lá whẹdida etọn do Falo ji, etẹwẹ yin gblọndo yetọn? Mí yin didọna dọmọ: “Mose po Aalọn po sọ wà mọ; dile Oklunọ degbena yé do, mọwẹ yé wá do.” (Eksọdusi 7:4-7) Lehe e yin aliho nuyiwa adọgbigbo tọn de na mí he nọ lá whẹdida Jiwheyẹwhe tọn to egbehe do sọ!
8. Nawẹ e yin bibiọ to Islaelivi lẹ si nado ‘basi mọpẹpẹ’ gbọn, podọ nawẹ ayajijẹ he dekọtọn na yin onú dopolọ to sọgodo he tin to yakẹ de mẹ gbọn?
8 Be Islaelivi lẹ nọgodona Mose po nugbonọ-yinyin po ya? To whenuena Jehovah ko yí azọ̀nylankan ṣinẹnẹ to ao lọ lẹ mẹ do hò Egipti po godo, e na nudọnamẹ gigọ Islaeli do hùnwhẹ Juwayi tọn bibasi ji. “Gbẹtọ lẹ sọ dó ota odò bo sẹ̀n. Ovi Islaeli tọn lẹ yì bo wà mọ; dile Oklunọ ko degbena Mose po Aalọn po do, mọwẹ yé wà do.” (Eksọdusi 12:27, 28) To ozán gbodawe azán nujijọ enẹ tọn, yèdọ to Nisan 14, 1513 J.W.M., angẹli Jiwheyẹwhe tọn zindonukọn nado hù ovi plọnji Egipti tọn lẹpo ṣigba jugbọn owhé Islaelivi lẹ tọn ji. Naegbọn ovi plọnji Islaelivi lẹ tọn do yin jijodo? Na yé ko mọ hihọ́ yí to ohùn lẹngbọvu Juwayi lọ tọn, heyin sisado ohọ̀ dotin yetọn lẹ go wutu. Yé basi mọpẹpẹ dile Jehovah ko degbe na Mose po Aalọn po. Mọwẹ, “yé wà do.” (Eksọdusi 12:50, 51) To Ohù Vẹẹ tó, Jehovah basi azọ́n jiawu yinukọn dogọ to whinwhlẹn omẹ tonusetọ etọn lẹ gan mẹ to whenuena e và Falo po awhàn-kẹkẹ huhlọnnọ etọn po sudo. Lehe Islaelivi lẹ jaya do sọ! Mọdopolọ to egbehe, mẹsusu he ko setonuna gbedide Jehovah tọn lẹ na jaya nado yin mẹhe na yí nukun do mọ whẹsuna etọn to Amagẹdọni whenu.—Eksọdusi 15:1, 2; Osọhia 15:3, 4.
9. Lẹblanulọkẹyi egbezangbe tọn tẹlẹ wẹ ‘bibasi domọ’ Islaelivi lẹ tọn nọtena to kọndopọmẹ po gòhọtúntún lọ po?
9 To whenuena Jehovah degbena Islaelivi lẹ nado basi nunina bo gbá gòhọtúntún de to zungbo mẹ, omẹ lọ lẹ yí homẹ dagbe do basi godonọnamẹ gigọ yetọn. Enẹgodo, na zẹẹmẹ he tlẹ whè hugan lẹ, Mose po azọ́nwatọgbẹ́ ojlonọ etọn lẹ po hodo tito yẹdide họgbigbá tọn lẹ heyin awuwlena gbọn Jehovah dali. “Le wẹ yè vọ̀ azọ́n gòhọtúntún ogohọ̀ opli tọn lọ tọn do; Ovi Islaeli tọn lẹ basi kẹdẹdi ehe Oklunọ lọ degbena Mose lẹpo, mọwẹ yé wà do.” Mọdopolọ, to hùnwhẹ didoai yẹwhenọduta tọn whenu, “le wẹ Mose wà do: kẹdẹdi ehe Oklunọ lọ degbena ẹn lẹpo, mọwẹ e wà do.” (Eksọdusi 39:32; 40:16) To ojlẹ egbezangbe tọn lẹ mẹ, mí tindo dotẹnmẹ hundote lọ nado ná godonọnamẹ sọn ahunmẹ wá hlan azọ́n yẹwhehodidọ lọ tọn podọ hlan tito-to-whinnu lẹ na hẹngblo Ahọluduta lọ tọn. Gbọnmọ dali lẹblanulọkẹyi mítọn wẹ e yin nado kọnawudopọ to ‘bibasi domọ’ mẹ.
Jọṣua—Adọgbotọ po Huhlọnnọ Taun Po
10, 11. (a) Etẹwẹ hẹn Jọṣua pegan na kọdetọn dagbe tintindo? (b) Nawẹ mí sọgan yin huhlọnna nado pehẹ whlepọn egbezangbe tọn lẹ gbọn?
10 To whenuena Mose deazọ́nna Jọṣua nado plan Islaeli biọ aigba dopagbe lọ mẹ, e yọnbasi dọ Ohó gbọdo kinkan Jehovah tọn tin to aimẹ kiki to owe atọ́n Mose tọn lẹ, psalm dopo kavi awe, po owe Job tọn po mẹ. Mose ko dọ na Jọṣua nado pli gbẹtọ lọ lẹ dopọ to whenuena yé jẹ Aigba Pagbe tọn lọ ji bo “hia osẹ́n he to Islaeli lẹpo nukọn to sise yetọn mẹ.” (Deutelonomi 31:10-12) Humọ, Jehovah lọsu degbena Jọṣua dọmọ: “Owe osẹ́n lọ tọn he ma na yìsọn onù towe gba, ṣigba hiẹ na nọ lẹnayihamẹpọn to e mẹ finẹ to okle po ozán po, na hiẹ nido payi nado nọ wà kẹdẹdi enẹ he yè wlan do e mẹ finẹ lẹpo: na whenẹnu wẹ hiẹ na hẹn aliho towe yin nuyọnnanọ, podọ whenẹnu hiẹ na tindo nuwadotana dagbe.”—Jọṣua 1:8.
11 Hihia egbesọegbesọ “owe” Jehovah tọn hẹn Jọṣua pegan nado pehẹ ojlẹ sinsinyẹn he tin to nukọn, kẹdẹdile hihia egbesọegbesọ Ohó Jehovah tọn, yèdọ Biblu lọ, na huhlọn Kunnudetọ egbezangbe Etọn lẹ nado pehẹ whlepọn ‘azán godo tọn’ sinsinyẹn ehelẹ do. (2 Timoti 3:1) Na yinyin lilẹdo dile mí te do gbọn aihọn danuwiwa tọn de dali, mì gbọ mí ni hẹn tudohomẹnamẹ Jiwheyẹwhe tọn hlan Jọṣua do ayihamẹ he dọmọ: “Yin huhlọnnọ po tudotọ dagbe de tọn po; a yín avosatọ blo, a sọ yin butọnọ blo: na Oklunọ Jiwheyẹwhe towe tin po hiẹ po to ofi hiẹ yìyì depope.” (Jọṣua 1:9) To gbigbawhan Kananinu lẹ tọn godo, akọta Islaeli tọn lẹ yin ahọsuna tlala to whenuena yé to ogú yetọn lẹ du. “Dile Oklunọ degbena Mose do, mọwẹ ovi Islaeli tọn lẹ wà do.” (Jọṣua 14:5) Alemọyi dopolọ to tenọpọn mímẹpo to egbehe he nọ hia Ohó Jiwheyẹwhe tọn bo nọ yi i zan to gbẹzan mítọn lẹ mẹ, bo nọ gbọn tonusise dali do nọ ‘basi domọ.’
Ahọlu—Nugbonọ po Tolivẹtọ lẹ Po
12. (a) Gbedide tẹwẹ yin nina hlan ahọlu lẹ to Islaeli? (b) Awugbopo ahọlu lẹ tọn nado setonu dekọtọn do etẹ mẹ?
12 Etẹwẹ dogbọn ahọlu lẹ dali to Islaeli? Jehovah ko hẹn ahọlu lẹ po huhlọn po nado setonuna nubiọtomẹsi ehe dọmọ: “Whenuena ewọ sinai to ofìn ahọludu etọn tọn lọ ji, wẹ e na wlan ohiadoai osẹ́n he tọn de to owe de mẹ, sọn enẹ he tin to yẹwhenọ Levinu lẹpo lọ nukọn: e bo na tin to e de, e bo na nọ hia finẹmẹ to azán ogbẹ̀ etọn tọn lẹpo mẹ: na e nido nọ plọn nado nọ dibusi Oklunọ lọ Jiwheyẹwhe etọn, nado nọ payi ohó osẹ́n he tọn lẹpo go po osẹ́ndoai helẹ po, nado nọ basi yé.” (Deutelonomi 17:18, 19) Be ahọlu Islaeli tọn lẹ setonuna gbedide enẹ ya? To aliho susu mẹ, yé gboawupo pete, sọmọ bọ yé jiya dẹhodo heyin didọdai to Deutelonomi 28:15-68 mẹ. To godomẹ, Islaeli yin gbigbado “sọn opodo aigba de tọn jẹ opodo aigba devo tọn.”
13. Nawẹ mí sọgan mọ ale yí, taidi Davidi, to owanyi didohia na Ohó Jehovah tọn dali gbọn?
13 Nalete, Davidi—ahọlu gbẹtọvi nugbonọ tintan to Islaeli—do mẹdezejo vonọtaun hia hlan Jehovah. E sọawuhia nado yin ‘ovi kinnikinni de tọn to Juda,’ he nọtena Klisti Jesu, heyin ‘kinnikinni whẹndo Juda tọn he gbawhàn lọ, yèdọ adọ̀ Davidi tọn.’ (Gẹnẹsisi 49:8, 9; Osọhia 5:5) Mẹnu wẹ yin asisa huhlọn Davidi tọn? E tindo pinpẹn nutọn yinyọnẹn he siso na Ohó kinkan Jehovah tọn bo nọgbẹ̀ to kọndopọmẹ hẹ anademẹ etọn. To Psalm 19 mẹ, yèdọ “ohàn Davidi tọn” mẹ, mí hia dọmọ: “Osẹ́n Oklunọ tọn pé.” To alọdlẹndo nuflinmẹ, aṣẹ, gbedide, po dide whẹdida Jehovah tọn lẹ po godo, Davidi zindonukọn nado dohia dọmọ: “Yè nọ jlo yé hú sika, mọwẹ, hú sika kinkọ̀n he yọ́n gbahugbahu: yé sọ vivi hú owín owíntọ tọn. Mọ gbọn yé dali wẹ yè hùntó na mẹmẹglọ towe; podọ to sisọ yé whlá mẹ wẹ ale susu te.” (Psalm 19:7-11) Eyin Ohó Jehovah tọn hihia egbesọegbesọ po ayihamẹlinlẹnpọn do e ji po hẹn ale wá to owhe 3 000 lẹ die wayi, nẹmunẹmu e na yin nuhe humọ do to egbehe!—Psalm 1:1-3; 13:6; 119:72, 97, 111.
14. To aliho tẹ mẹ wẹ nuyiwa Sọlọmọni tọn do nuhudo lọ na nuhe hugan oyọnẹn poun tintindo hia gbọn?
14 Ṣogan, e ma ko pé nado mọ oyọnẹn poun yí gba. E sọ yin onú titengbe na devizọnwatọ Jiwheyẹwhe tọn lẹ nado yinuwa do oyọnẹn enẹ ji, nado yi i zan sọgbehẹ ojlo sọn olọn mẹ wá—mọwẹ, nado ‘basi domọ.’ Ehe sọgan yin didohia to whẹho visunnu Davidi tọn heyin Sọlọmọni tọn mẹ, ehe Jehovah dè nado “sín ofìn ahọludu Oklunọ tọn tọn ji to Islaeli ji.” Sọlọmọni mọ azọ́ndenamẹ lọ yí nado gbá tẹmpli lọ, to yíyí tito anademẹ họgbigbá tọn lẹ he Davidi mọyi gbọn “gbigbọ” dali zan. (1 Otannugbo lẹ 28:5, 11-13) Nawẹ Sọlọmọni sọgan basi wadotana azọ́n pligidi ehe tọn gbọn? To gblọndo mẹ na odẹ̀ de, Jehovah na ẹn nuyọnẹn po oyọnẹn po. Po ehelẹ po, podọ gbọn hihodo tito sọn olọn mẹ wá he yin nina ẹn dali, Sọlọmọni penugo nado gbá ohọ̀ whanpẹnọ, he yin gigọ́ po gigo Jehovah tọn po enẹ. (2 Otannugbo lẹ 7:2, 3) Nalete, to nukọnmẹ, Sọlọmọni gboawupo. To aliho tẹ mẹ? Osẹ́n Jehovah tọn ko dohia gando ahọlu Islaeli tọn go dọmọ: “Mọ ewọ ma na da asi lẹ plisù hlan ede gba, na ayiha etọn ma na do lẹ́ yì gba.” (Deutelonomi 17:17) Ṣogan Sọlọmọni “sọ tindo asi nuọ̀ntọ̀n kanweko, ahọviyọnnu lẹ, po yọnnuyìyì fọdekanweko po: asi etọn lẹ sọ lẹ́ ayiha etọn [vude vude] . . . do yẹwhe devo lẹ godo.” To owhe nukọnmẹ etọn tọn lẹ mẹ, Sọlọmọni lẹ́ sọn ‘bibasi domọ’ mẹ.—1 Ahọlu lẹ 11:3, 4; Nẹhemia 13:26.
15. Nawẹ Josia ‘basi domọ’ gbọn?
15 Ahọlu tonusetọ vude wẹ tin to Juda, to ehe mẹ godo tọn yin Josia. To owhe 648 J.W.M., e jẹ boṣiọsinsẹ̀n za sẹ ji sọn aigba lọ ji podọ nado vọ́ tẹmpli Jehovah tọn gbá. To finẹ wẹ yẹwhenọ daho lọ “mọ owe osẹ́n Oklunọ tọn tọn lọ he yè na gbọn alọ Mose tọn mẹ.” Etẹwẹ Josia wà dogbọn ehe dali? “Ahọlu sọ hẹji yì jẹ ohọ̀ Oklunọ tọn lọ mẹ, po mẹho Juda tọn lẹpo po po tomẹnu Jelusalẹm tọn lẹ po, po yẹwhenọ lẹ po, po Levinu lẹ po: po gbẹtọ lẹpo po, daho po pẹvi po: e sọ hia to otó yetọn lẹ mẹ ohó owe alẹnu lọ tọn he yè mọ to ohọ̀ Oklunọ tọn mẹ tọn lẹpo. Ahọlu sọ ṣite to otẹn etọn mẹ, bo basi alẹnu de to Oklunọ nukọn, nado nọ zinzọnlin to Oklunọ godo, podọ nado nọ, yí ayiha etọn lẹpo po alindọn etọn lẹpo po do payi gbedide etọn lẹ go, po aṣẹdai etọn lẹ po, podọ osẹ́ndoai etọn lẹ po, nado yí ohó alẹnu lọ tọn lẹ he yé wlan to owe he mẹ basi.” (2 Otannugbo lẹ 34:14, 30, 31) Mọwẹ, Josia ‘basi domọ.’ Taidi kọdetọn nuyiwa nugbonọ etọn wutu, whẹdida vasudo Jehovah tọn do Juda he ma yin nugbonọ ji yin alọhẹndotena kakajẹ azán visunnu sẹ́nhẹngbatọ etọn lẹ whenu.
Gbẹninọ Sọgbe hẹ Ohó Jiwheyẹwhe Tọn
16, 17. (a) To ninọmẹ tẹ mẹ wẹ mí dona hodo afọdòmẹ Jesu tọn lẹ te? (b) Devizọnwatọ nugbonọ Jiwheyẹwhe tọn devo tẹlẹ wẹ yin apajlẹ na mí?
16 To gbẹtọvi he ko nọgbẹ pọ́n lẹpo mẹ, apajlẹ dagbe hugan ayihamẹlinlẹnpọn do Ohó Jiwheyẹwhe tọn ji tọn po gbẹninọ sọgbe hẹ ẹ po wẹ Oklunọ Jesu Klisti. Ohó Jiwheyẹwhe tọn taidi núdùdù na ẹn. (Johanu 4:34) E dọ na todoaitọ etọn lẹ dọmọ: “Ovi ma sọgan wà núde ededenu, adavo onú he e mọ Otọ́ wà: na nudepope he e wà, ehelẹ wẹ Ovi to wiwa mọ ga.” (Johanu 5:19, 30; 7:28; 8:28, 42) Jesu ‘basi domọ,’ bo dọmọ: “Na yẹn jẹte sọn olọn, e ma yin nado wà ojlo ṣie lọsu gba, adavo ojlo ewọ he do mi hlan tọn.” (Johanu 6:38) Míwlẹ heyin Kunnudetọ klandowiwe Jehovah tọn lẹ yin yiylọ nado ‘basi domọ’ gbọn afọdòmẹ Jesu tọn lẹ hihodo dali.—Luku 9:23; 14:27; 1 Pita 2:21.
17 Ojlo Jiwheyẹwhe tọn wiwà saba nọ tin to otẹn tintan mẹ to ayiha Jesu tọn mẹ. Ewọ jẹakọ mlẹnmlẹn hẹ Ohó Jiwheyẹwhe tọn podọ gbọnmọ dali wleawu nado na gblọndo Owe wiwe tọn lẹ. (Matiu 4:1-11; 12:24-31) Gbọn ayidonugo vonọtaun nina Ohó Jiwheyẹwhe tọn dali, mílọsu ga sọgan lẹzun mẹhe yè hẹn “pegan, he yè hẹn sọgbe mlẹnmlẹn hlan azọ́n dagbe lẹpo.” (2 Timoti 3:16, 17) Mì gbọ mí ni hodo apajlẹ devizọnwatọ nugbonọ ojlẹ hohowhenu Jehovah tọn po ojlẹ he bọdo yé go tọn lẹ po podọ to popolẹpo mẹ enẹ heyin Ogán mítọn, yèdọ Jesu Klisti tọn, he dọmọ: “Na aihọn nido yọnẹn dọ yẹn yiwanna Otọ́; podọ dile Otọ́ na osẹ́n mi do, yèdọ mọwẹ yẹn wà do.” (Johanu 14:31) Na mílọsu ga ni do owanyi mítọn hia na Jiwheyẹwhe gbọn nukọnzinzindo to ‘bibasi domọ’ mẹ dali.—Malku 12:29-31.
18. Etẹwẹ dona whan mí nado lẹzun “basitọ ohó lọ tọn,” podọ etẹwẹ na yin hodọdeji bọdego?
18 Dile mí to ayihamẹlẹnpọn do aliho tonusise devizọnwatọ Jiwheyẹwhe tọn heyin ojlẹ Biblu tọn lẹ ji do, be mí ma nọ yin tulina nado wà sinsẹnzọn nugbonọ to azán vivọnu titonu ylankan Satani tọn lọ mẹ ya? (Lomunu lẹ 15:4-6) Na nugbo tọn mí dona yin whinwhan nado yin “basitọ ohó lọ tọn” to aliho gigọ mẹ, dile hosọ he bọdego na basi zẹẹmẹ deji do.—Jakobu 1:22.
Be Hiẹ Flin Ya?
◻ Etẹwẹ “owanyi Jiwheyẹwhe tọn” dona zẹẹmẹdo na mí?
◻ Etẹwẹ mí plọn sọn apajlẹ Noa, Mose, po Jọṣua tọn lẹ po mẹ?
◻ Jẹ obá tẹ mẹ wẹ ahọlu lẹ to Islaeli setonuna “ohó” Jiwheyẹwhe tọn?
◻ Nawẹ Jesu yin Apajlẹnọ mítọn to ‘bibasi domọ’ mẹ gbọn?
[Yẹdide to weda 8]
Noa, Mose, po Jọṣua po ‘basi domọ’