‘Be Yẹn Họakuẹ Na Jiwheyẹwhe Ya?’

“BE YẸN họakuẹ ya? Be Jiwheyẹwhe Nọ Hò Mẹtọn Pọ́n Ya?’’ Mọwẹ hogo lọ to hosọ he sọawuhia to Christianity Today dọ do. “Susu to azọ́n ṣie mẹ taidi wekantọ de ko yin lilẹdo gbọn nuhahun awufiẹsa tọn dali,’’ wẹ Philip Yancey dọ, yèdọ mẹhe wlan hosọ lọ. “Yẹn lẹkọwa kanbiọ dopolọ lẹ ji pludopludo taidi dọ yẹn to alọkido apà hoho he ma ko kú ganji de mẹ nkọ. Yẹn nọ sè sọn owe ṣie hiatọ lẹ dè, podọ otan awufiẹsa yetọn tọn nọgodona ayihaawe tintindo ṣie lẹ.’’

Vlavo hiẹ lọsu ko yin pipaṣa dogbọn ojlo Jiwheyẹwhe tọn dali to gbẹzan towe mẹ. Oo, hiẹ sọgan ko jẹakọ hẹ Johanu 3:16, he dọmọ “Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ.’’ Kavi hiẹ sọgan ko hia Matiu 20:28, he dọ dọ Jesu wá “nado yí ogbẹ̀ etọn do basi ofligọ na omẹ susu.’’ Ṣogan hiẹ sọgan kanse, ‘Be Jiwheyẹwhe nọ doayi go e ya? Be ewọ nọ hò ṣie pọ́n taidi omẹ de ya?’ Whẹwhinwhẹn dagbe tin nado yise dọ e nọ basi mọ, dile mí na mọ do.