Awuwlena Kọgbọ to Gbakija lẹ Ṣẹnṣẹn
VIVẸNUDIDO gbẹtọ tọn nado wleawu kọgbọ tọn to nugbajẹmẹji whenu jẹ na pipà taun. Susu tito-to-whinnu kọgbọ tọn lẹ ko gọalọ nado vọ́ owhé lẹ gbá, vọ́ whẹndo lẹ kọndopọ, podọ, hú popolẹpo, whlẹn ogbẹ̀ lẹ gán.
To whenuena nugbajẹmẹji wá aimẹ, Kunnudetọ Jehovah Tọn lẹ—nọ yí awuwledainanu depope he yin bibasi gbọn tito-to-whinnu aihọn tọn dali zán—podọ nọ yọ́n pinpẹn ehe tọn. To ojlẹ dopolọ mẹ, yé tindo azọngban Owe wiwe tọn lọ nado “wà dagbe . . . [titengbe, NW ] hlan yé he yin yise whédo [yetọn] tọn lẹ.” (Galatianu lẹ 6:10) Mọwẹ, Kunnudetọ lẹ nọ tindo numọtolanmẹ taidi dọ yé yin hẹnnumẹ dopolọ nkọtọn; yé nọ pọ́n ode awetọ yetọn lẹ hlan taidi “whẹndo.” Enẹwu-tu wẹ yé do nọ dlẹnalọdo ode awetọ yetọn taidi “mẹmẹsunnu” po “mẹmẹyọnnu” po.—Yijlẹdo Malku 3:31-35; Filemọni 1, 2 go.
Enẹwutu to whenuena nugbajẹmẹji de gando lẹdo de go, mẹho lẹ to Kunnudetọ Jehovah Tọn lẹ ṣẹnṣẹn nọ dovivẹnu vẹkuvẹku nado din nọtẹn po nuhudo hagbẹ agun tọn lẹpo mọ bo nọ basi tito lẹ na alọgọ he jẹ. Lẹnnupọn do lehe ehe yinmọ do ji to Accra, Ghana; San Angelo, États-Unis; po Kobe po, to Japon.
Accra—“Singigọ Pẹvi Azán Noa Gbè Tọn De”
Jikun lọ jẹ jijà ji to nudi ogàn 11 mẹ to zanmẹ, bọ e to jijà madoalọte na ganhiho susu. “Jikun to jijà sinsinyẹn sọmọ bọ whẹndo ṣie pete gbọṣi nukle,” wẹ John Twumasi dopo to Kunnudetọ Jehovah Tọn lẹ mẹ to Accra dọ. Linlinwe lọ Daily Graphic ylọ ẹ dọ “singigọ pẹvi Azán Noa gbè tọn de.” John zindonukọn dọmọ: “Mí tẹnpọn nado zé nutindo họakuẹ delẹ sọyi petlezìn ji, ṣigba dile mí hùn ohọ̀n ali he yì petlezìn ji tọn, aisìn singigọ lọ tọn họ́ biọ họmẹ po huhlọn po.”
Ahọlu na avase nado bẹ́ agbàn tọ́n, ṣogan mẹsusu dọngban, to obu mẹ dọ owhé he gbè mẹde ma tin te—eyin etlẹ gọ́ na osìn—sọgan dọ̀n ayidonugo ogblànnu-fìntọ lẹ tọn. Mẹdelẹ ma sọgan tọ́n eyin yé tlẹ jlo nado wà mọ. “Yẹn po onọ̀ ṣie po ma penugo nado tọ́n sọn họmẹ gba,” wẹ viyọnnu he nọ yin Paulina dọ. “Osìn lọ to gigọ́ madoalọte, enẹwutu mí ṣite to gàn-gbá atin tọn de ji bo hẹn zàtin go. To godo mẹ, to nudi ogàn atọ́n mẹ afọnnu, kọmẹnu mítọn lẹ whlẹn mí.”
Dile e sọgan yawu yọnbasi do, Kunnudetọ Jehovah Tọn lẹ bẹazọ́n jẹeji. Mẹmẹyọnnu Klistiani de he nọ yin Beatrice na linlin dọmọ: “Mẹho he tin to agun mẹ lẹ to dindin mí pé, podọ yé mọ mí to owhé hatọ yisenọ de tọn gbe, fie mí din fibẹtado te. To azán atọ̀n poun to osingigọ godo, mẹho lẹ po hatọ jọja agun lọ mẹ tọn lẹ po wá nado gọalọna mí bo whlẹ́ ogbọ̀n sọn họmẹ po kọ́hò owhé mítọn tọn po. Ogbẹ́ Watch Tower tọn yí avọ̀yàn-dí, owán-hùnú, osẹ̀n, aimlọnnu, akánmavọ̀, avọ̀, po avọ̀dido ovi lẹ tọn po hlan. Mẹmẹsunnu lẹ to núdùdù yidohlan mí na azán susu lẹ. Apàpà sọ́ mi taun!”
John Twumasi, he yin hoyidọ sọn e dè dai, na linlin dọmọ: “Yẹn dọna họhayatọ devo lẹ dọ Ogbẹ́ mítọn yí avọ̀yàn-dí lẹ po owán-hùnú—he pé lẹ po hlan mí nado klọ́ ohọ lọ pete. Nudi họhayatọ 40 wẹ gọalọ to nukiklọ́ lọ mẹ. Yẹn yí delẹ to avọ̀yàn-dí lọ lẹ mẹ na kọmẹnu ṣie lẹ, gọna dawe de he yin yẹwhenọ to ṣọṣi okọ́ lọ tọn mẹ. Azọ́nwatọgbẹ́ ṣie lẹ tindo linlẹn agọ̀ dọ Kunnudetọ Jehovah Tọn lẹ nọ do owanyi hia omẹ yetọn titi lẹ kẹdẹ.”
Klistiani mẹmẹsunnu po mẹmẹyọnnu lẹ po yọ́n pinpẹn godonọnamẹ owanyinọ he yin nina yé tọn taun. Mẹmẹsunnu Twumasi dotana dọmọ: “Dile etlẹ yindọ akuẹ nuhe yẹn hẹnbu to osingigọ lọ mẹ tọn yiaga tlala hugan nunina kọgbọ tọn lọ lẹ, yẹn po whẹndo ṣie po tindo numọtolanmẹ dọ na awuwledainanu awuvẹmẹ tọn ehelẹ sọn Ogbẹ́ dè wutu, mí ko mọale he hugan nuhe mí hẹnbu tọn yí.”
San Angelo—“E Dọnú Taidi Dọ Aihọn lọ to Vivọnu Wá”
Oyu-jẹhọn he hẹn San Angelo jẹvọ́ to 28 mai 1995, họ̀n atín lẹ, họ́ pòtin lẹtliki tọn lẹ, bo ze lẹtlikikan he go lẹtliki te lẹ dlan ali lẹ ji. Jẹhọn lọ diahi na nudi kilomẹtlu 160 to ganhiho dopo mẹ, bo hẹn azọ́nwhé ahọlu tọn lẹ gble. Hugan owhé 20 000 lẹ wẹ ma tindo lẹtliki. Enẹgodo kẹnjikun lọ bẹjẹeji. Azọ́nwhé Ninọmẹ Aimẹ Otò Tọn na linlin dọmọ “kẹnjikun he kiklo etọn sọ yovozẹn,” enẹgodo “kẹnjikun he kiklo etọn sọ bọlu tafo ji tọn,” podọ to godo mẹ, “kẹnjikun he kiklo etọn sọ zigbó tọn.” Ogbè jijà kẹnjikun lọ tọn yiaga tlala. Kọmẹnu dopo dọmọ: “E dọnú taidi dọ aihọn lọ to vivọnu wá nkọtọn.”
Abọẹninọ dobunamẹ de bọdo oyu-jẹhọn lọ go. Gbẹtọ lẹ jẹ tintọ́n dẹẹdẹ sọn ohọ yetọn he ko gídí lẹ mẹ nado dindona nuhe yin hinhẹngble. Nugonu atin he gbẹ́ pò to ote lẹ tọn ko yin jijà kọnai. Ohọ he gbẹ́ pò to ote lẹ sọawuhia taidi dọ yè ko klọ́n yé nkọtọn. To awa delẹ ji aisìn kẹnjikun lọ tọn gọ́ aigba bo siso yì mẹtlu dopo nkọtọn. Fọtọ́n susu fleṣe ohọ po mọto lẹ po tọn ko yin gbigbà to oyu-jẹhọn lọ mẹ, bọ e wá yindọ todin jàjá mẹpọ́nnu gbigbà lẹ tọn to sisẹ́ mlánmlán to kẹnjikun he gọ́ aigba lọ mẹ. Yọnnu de dọmọ: “To whenuena yẹn gọ̀ jẹ whégbè, yẹn sinai to gbẹduhun ṣie he tin to aliho owhé ṣie gbè tọn mẹ bo bẹ́avi. Hẹngble lọ ylan hugan, e hẹn apọ̀ṣi mi pete.”
Po awuyiya po tito-to-whinnu kọgbọ tọn lẹ po dotowhé lẹ po wleawu godonọnamẹ to akuẹ-liho, nuyizan họgbigbá tọn lẹ, nukunpedomẹgo dotowhé tọn, po ayinamẹ lẹ po. To aliho he jẹ na pipà mẹ, susu dopodopo mẹhe adán oyu-jẹhọn lọ tọn gbò lẹ lọsu wà nuhe go yé pé nado gọalọna mẹdevo lẹ.
Agun Kunnudetọ Jehovah Tọn lẹ tọn lọsu sọ yinuwa ga. Aubrey Conner, mẹho de to San Angelo, na linlin dọmọ: “Tlolo he oyu-jẹhọn lọ doalọte, alokan ko tin to alọmẹ na mí nado yọ́n ninọmẹ ode awetọ mítọn tọn. Mí gọalọna mídelẹ podọ kọmẹnu mítọn he ma yin Kunnudetọ lẹ ga nado dó fleṣe lẹ, gbá họta lẹ, bo na oyu-jẹhọn glónu owhé lọ lẹ dile e sọgan yọnbasi do. Enẹgodo mí basi kandai dopodopo owhé mẹhe tọn yin gingandego he tin to agun lọ mẹ lẹ tọn. Nudi owhé kanweko wẹ tindo nuhudo yinyin vivọjlado tọn, podọ nuyizan he yin nina gbọn azọ́nwhé kọgbọ tọn dali ma pé gba. Enẹwutu mí họ̀ nuyizan devo lẹ dogọ bo basi tito na mídelẹ na azọ́n. To lẹndopọ mẹ, Kunnudetọ 1 000 delẹ ze yedelẹ jó nado gọalọ, nudi gbẹtọ 250 to sẹfifo dopodopo mẹ. Yé wá sọn aliho he dẹnsọ kilomẹtlu 740. Yemẹpo wazọ́n kuda-gbẹda to ninọmẹ aimẹ he dibla miọn na 40°C. tọn glọ. Yèdọ mẹmẹyọnnu owhe 70 mẹvi de nọ wazọ́n po mí po to sẹfifo lẹpo adavo dopo, podọ enẹ wẹ yin to whenuena ohọ ewlọsu titi tọn to yinyin vivọjlado. Podọ to sẹfifo enẹ e hẹ họta ewlọsu titi tọn ji nado gọalọ to nujlado lọ lẹ mẹ!
“Mí nọ saba sè hogbe lẹ sọn nupọntọ lẹ dè taidi, ‘Be e ma na pọnte eyin sinsẹ̀n devo lẹ na basi ehe na hagbẹ yetọn lẹ ya?’ Homẹ kọmẹnu mítọn lẹ tọn hùn nado mọ pipli azọ́nwatọ mẹdezejotọ 10 jẹ 12 (gọna mẹmẹyọnnu lẹ) tọ́nta to afọnnu fuu Ahọluzangbe to owhé hatọ yisenọ de tọn gbe, bo nọ tin to awuwlemẹ nado jla etlẹ yin nado vọ́ họta lọ pete gbá vọnu. To whẹho susu lẹ mẹ azọ́n lọ lẹ nọ yin tadona to sẹfifo dopo. To whedelẹnu, gbonutọ azọ́nyiwatọ de na tindo mahẹ gigọ́ to azọ́n họta gbigbá de tọn mẹ to whenuena pipli azọ́nwatọ mítọn lẹ jẹ ohọ̀n he bọdego kọ̀n. Mí na klọ́n họta hoho lọ sẹ̀ bo na vọ́ họta yọyọ mítọn titi gbá bo nọ hẹn lẹdo lọ do wiwe ji whẹpo gbonutọ azọ́nyiwatọ lọ po azọ́nwatọ etọn lẹ po do nọ fó yetọn. Whedelẹnu yé nọ doalọtena azọ́n yetọn nado pọ́n mí poun!”
Mẹmẹsunnu Conner dotana dọmọ: “Mímẹpo na wá jẹdò numimọ he mí ko tindo to pọmẹ lẹ tọn. Mí ko wá yọ́n ode awetọ mítọn sọn pọndohlan he gbọnvo mẹ gbọn owanyi mẹmẹsunnu tọn didohia hugan gbede pọ́n tọn po yinyin mẹhe yè do e hia na po dali. Mí tindo numọtolanmẹ dọ ehe yin apajlẹ nuhe e na taidi poun to aihọn yọyọ Jiwheyẹwhe tọn mẹ, gọna mẹmẹsunnu po mẹmẹyọnnu lẹ po to alọgọna ode awetọ yetọn lẹ na yé jlo nado wà mọ nugbonugbo wutu.”—2 Pita 3:13.
Kobe—“Gbakija Atin, Nutlẹ́nu po Agbasa Gbẹtọvi Tọn lẹ Po”
E taidi dọ kọmẹnu Kobe tọn lẹ tin to awuwlemẹ nkọtọn. Na nugbo tọn, to 1er septembre lẹpo wẹ yé nọ doayi Azán Alọhẹndotena Nugbajẹmẹji Tọn go. Wehọmẹvi lẹ nọ basi aihundida aigba sisọsisọ tọn, awhànfuntọ lẹ nọ basi zepọn agahun pẹvi tọn nado whlẹn afọzedaitọ lẹ, podọ azọ́nwatẹn miyọ́n tọn lẹ nọ ze zomọ aigba sisọsisọ yetọn lẹ tọ́n, to ehe mẹ mẹdezejotọ lẹ nọ tẹ́n azọ́nyọnẹn lunluntọ́n yetọn lẹ tọn pọ́n te to ohọ he taidi apotin de mẹ he nọ whàn bosọ nọ sisọ taidi aigba sisọsisọ nkọtọn. Ṣigba to whenuena nujọnu lọ wá aimẹ to 17 janvier 1995, awuwle lọ lẹpo taidi nuvọ́. Fọtọ́n donu ao ao họta lẹ tọn wẹ họ́—nude he ma ko jọ pọ́n do zomọ aigba whinwhàn lọ tọn go. Gànjihun lẹ blìsú; apadewhe alihogbo tọn lẹ gídí; amìdo po osìn-whín lẹ po wujẹgbonu; ohọ lẹ họ́jai taidi owhlẹ nkọtọn. Linlinwe Time basi zẹẹmẹ numimọ lọ tọn taidi “gbakija atin, nutlẹ́nu po agbasa gbẹtọvi tọn lẹ po.”
Enẹgodo miyọ́n bọdego. Ohọ lẹ bẹ miyọ́n to whenuena miyọ́n-ṣitọ́ he jẹflumẹ lẹ nọte gun-un na kilomẹtlu lẹ to mọto he tò vlìlì lẹ mẹ. Mẹhe sẹpọ miyọ́n lọ lẹ mọdọ osìn ma sọgan yin mimọ sọn osìndò tòdaho lọ tọn mẹ gba. “Azán tintan lọ gọna síjijọ daho,” wẹ ahọluzọnwatọ de dọ. “Yẹn ma ko tindo numọtolanmẹ huhlọn matindo tọn sọmọ to gbẹzan ṣie mẹ pọ́n gba, to yinyọnẹn dọ gbẹtọ susu wẹ yin dìdì do ohọ̀ he fiọ mọnkọtọn lẹ mẹ. Podọ to yinyọnẹn dọ nudepope matin he yẹn sọgan wà dogbọn dali etọn.”
To lẹndopọ mẹ, gbẹtọ 5 000 delẹ yin hùhù, podọ diblayi ohọ 50 000 lẹ wẹ fiọ zun akán. Kobe tindo madoatọ̀n poun to núdùdù he e tindo nuhudo etọn mẹ. Nado sọgan mọ osìn mẹdelẹ gbọ bo nọ sọ̀n osìn dihonọ sọn osìn-whín he wujẹgbonu lọ lẹ mẹ. Susu mẹhe ma tindo ohọ lẹ tọn họ̀n sọyi fibẹtado lẹ kọ̀n, fie dopodopo yetọn nọ yin núdùdù jlẹ́ na te, bo nọ má lẹ́si alọgògò dopo na mẹdopodopo to azán dopodopo gbe. Pekọ matindo gbayipe to ojlẹ vude godo. “Ahọlu ma ko wà nudepope gba,” wẹ dawe de wule dọ. “Eyin mí zindonukọn nado ganjẹ yé go mí na kú huvẹ.”
Agun Kunnudetọ Jehovah Tọn lẹ tọn to Kobe podọ to lẹdo he sẹpọ lẹ mẹ basi tito na yedelẹ to afọdopolọji. Agahun pẹvi kuntọ de he mọ azọ́n yetọn to tintan whenu dọmọ: “Yẹn yì nọtẹn nugbajẹmẹji lọ tọn to gbeegbe aigba sisọsisọ lọ wá aimẹ te bo yí osẹ dopo zán to finẹ. To whenuena yẹn jẹ fibẹtado dopo kọ̀n, bẹwlu mẹ wẹ nulẹpo tin te. Azọ́n kọgbọ tọn depope ma yin bibasi gba. Kunnudetọ Jehovah Tọn lẹ kẹdẹ wẹ yin mẹhe dowezun yì nọtẹn lọ, bo to azọ́n dandan tọn lẹ yí wà.”
Na nugbo tọn, azọ́n susu tin nado wà. Plitẹnhọ Ahọluduta Tọn ao wẹ yin hinhẹnzun nuhe ma jẹ na yizan ba, podọ hugan Kunnudetọ 430 lẹ yin mẹhe ma tindo owhé. Owhé 1 206 devo he mẹ yé nọ nọ̀ lẹ wẹ tindo nuhudo yinyin vivọjlado tọn. E ma yin enẹ kẹdẹ gba ṣigba whẹndo 15 Kunnudetọ lẹ tọn he ko kú to nugbajẹmẹji lọ mẹ lẹ tọn tin to nuhudo niyaniya tọn mẹ na homẹmimiọn.
Kunnudetọ 1 000 delẹ sọn otò lọ mẹ ze whenu yetọn jo nado gọalọ to azọ́n nuvọjlado tọn lọ mẹ. “To whenuena mí wazọ́n do ohọ nuplọntọ Biblu tọn he ma ko yí baptẹm tọn lẹ ji,” wẹ ayidonugo he mẹmẹsunnu dopo basi, “mí nọ saba yin kinkanse dọmọ, ‘Akuẹ nẹmu wẹ mí na sú na onú ehe lẹpo?’ To whenuena mí dọna yé dọ azọ́n lọ yin godonọna gbọn agun lẹ dali, yé dọnudo mí, dọmọ, ‘Nuhe mí ko plọn lọ yin nujọnu todin!’ ”
Homẹ mẹsusu tọn hùn do gbeyiyi niyaniya po mlẹnmlẹn po Kunnudetọ lọ lẹ tọn go na nugbajẹmẹji lọ. Agahun pẹvi kuntọ he yin hoyidọ sọn e dè dai dọmọ: “Homẹ ṣie hùn tlala. Mì nọ ylọ ode awetọ mìtọn lẹ dọ ‘mẹmẹsunnu’ po ‘mẹmẹyọnnu’ po. Yẹn ko mọ lehe mì nọ gọalọna ode awetọ mìtọn do; whẹndo de wẹ mì omẹ ehelẹ yin nugbonugbo.”
Kunnudetọ lẹ lọsu plọn nuplọnmẹ họakuẹ lẹ sọn aigba sisọsisọ lọ mẹ. Mẹmẹyọnnu dopo yigbe dọmọ: “Yẹn ko nọ saba tindo numọtolanmẹ dọ lehe titobasinanu de klo do, mọwẹ e na sinyẹn do niyẹn nado do mẹtọnhopọn mẹdetiti tọn hia.” Ṣigba nukunpedomẹgo awuvẹmẹ tọn he e mọyi diọ pọndohlan etọn. “Yẹn wá yọnẹn todin dọ Jehovah to nukunpedo mí go e ma yin taidi titobasinanu de kẹdẹ wẹ gba ṣigba taidi omẹ dopodopo.” Ṣigba, kọgbọ tẹgbẹ̀ tọn sọn nugbajẹmẹji lẹ si tin to nukọn.
Kọgbọ Tẹgbẹ̀ Tọn to Madẹnmẹ!
Kunnudetọ Jehovah Tọn lẹ pọ́n nukọn hlan ojlẹ lọ whenuena gbẹzan gbẹtọvi lẹ tọn po alọgọnu gbẹninọ tọn lẹ po ma nasọ yin sinsán do ogli gbọn nugbajẹmẹji lẹ dali ba. To aihọn yọyọ Jiwheyẹwhe tọn mẹ, gbẹtọ na yin pinplọn nado kọngbedopọ hẹ lẹdo aigba ji tọn. Dile gbẹtọvi lẹ gbẹ́ nuyiwa ṣejannabi tọn lẹ dai, yé ma na tin to owù mẹ sọmọ na adangbòmẹ jọwamọ tọn lẹ gba. Yinukọn dogọ, Jehovah Jiwheyẹwhe—yèdọ Didatọ huhlọn jọwamọ tọn lẹ—na penukundego dọ whẹndo gbẹtọvi tọn etọn po nudida aigba ji tọn lẹ po ma sọ yin budona gbede gbọn huhlọn jọwamọ tọn lẹ dali ba. To whenẹnu aigba lọ na yin paladisi de nugbonugbo. (Isaia 65:17, 21, 23; Luku 23:43) Dọdai Osọhia 21:4 tọn na yin hinhẹndi to aliho gigonọ tọn de mẹ he dọmọ: “Jiwheyẹwhe nasọ súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.”
[Yẹdide to weda 5]
Beatrice Jones (amiyọnwhé) to didohia lehe ewọ po mẹdevo lẹ po hẹn alọ yedelẹ tọn go nado gbọn osingigọ lọ mẹ lùntọ́n
[Yẹdide to weda 6]
Azọ́n kọgbọ tọn to oyu-jẹhọn lọ godo