Alọgigọna Mẹdevo lẹ Nado Plọn Nubiọtomẹsi Jiwheyẹwhe Tọn Lẹ
“Mananọmawà tin to ojí e; na, dindọn tin hlan mi, eyin yẹn ma dọyẹwheho wẹndagbe tọn!”—1 KỌLINTINU LẸ 9:16.
1, 2. (a) To azọ́n awe-to-pọmẹ tẹmẹ wẹ Jehovah biọ dọ mí ni tindo mahẹ te? (b) Etẹwẹ gbẹtọ ahunjijlọnọ lẹ dona plọn nado sọgan lẹzun mẹjidugando Ahọluduta Jiwheyẹwhe Tọn lẹ?
JEHOVAH tindo wẹndagbe na gbẹtọvi lẹ. E tindo Ahọluduta de, podọ e nọ jlo dọ gbẹtọ lẹ sọn filẹpo ni sè dogbọn dali etọn! Tlolo he mí plọn wẹndagbe ehe, Jiwheyẹwhe biọ dọ mí ni má ẹn hẹ mẹdevo lẹ. Ehe yin azọ́n awe-to-pọmẹ de. Tintan, mí dona lá wẹndagbe Ahọluduta Jiwheyẹwhe Tọn tọn. To dọdai etọn mẹ dogbọn ‘vivọnu whenu-nu onú lẹ tọn’ dali, Jesu dọmọ: “Yè nasọ dọyẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.”—Matiu 24:3, 14.
2 Adà awetọ azọ́n ehe tọn bẹ pinplọn mẹhe yigbe dagbe hlan nulilá Ahọluduta lọ tọn lẹ hẹn. To fọnsọnku etọn godo, Jesu dọna pipli daho nuplọntọ etọn lẹ tọn de dọmọ: “Enẹwutu mì yì, bo hẹn akọta lẹpo zùn nuplọntọ, bosọ nọ baptizi yé do oyín Otọ́ tọn, po Ovi tọn po, po gbigbọ wiwe tọn po mẹ: Na mì ni sọ nọ plọ́n yé nado nọ doayi onú lẹpo go, nudepope he yẹn degbena mì: bo pọ́n, yẹn tin to mì de to whepoponu, kakajẹ opodo aihọn tọn.” (Matiu 28:19, 20) ‘Onú he Klisti ko degbena lẹ’ ma wá sọn ede gba; e plọn mẹdevo lẹ nado doayi gbedide Jiwheyẹwhe tọn lẹ go, kavi nubiọtomẹsi lẹ. (Johanu 14:23, 24; 15:10) Gbọnmọ dali pinplọn mẹdevo lẹ nado ‘doayi onú he Klisti ko degbena lẹ go’ bẹ alọgigọna yé nado plọn nubiọtomẹsi Jiwheyẹwhe tọn lẹ hẹn. Gbẹtọ ahunjijlọnọ lẹ dona jẹ̀ nubiọtomẹsi Jiwheyẹwhe tọn lẹ kọ̀n nado sọgan lẹzun mẹjidugando Ahọluduta etọn tọn.
3. Etẹwẹ Ahọluduta Jiwheyẹwhe Tọn yin, podọ etẹwẹ e na wadotana he hẹn owẹ̀n Ahọluduta lọ tọn yin wẹndagbe mọnkọtọn?
3 Etẹwẹ Ahọluduta Jiwheyẹwhe Tọn yin? Podọ etẹwẹ e na wadotana he hẹn owẹ̀n Ahọluduta lọ tọn yin wẹndagbe mọnkọtọn? Ahọluduta Jiwheyẹwhe Tọn yin gandudu olọn mẹ tọn de. E yin nuhọakuẹ taun hlan ahun Jehovah tọn, na gbọn dali etọn wẹ e na klan oyín etọn do wiwe, bo de masin lẹpo sẹ sọn e go. Ahọluduta lọ wẹ yin azọ́nwanu he Jehovah na yizan nado hẹn ojlo etọn yin wiwà to aigba ji dile e te do to olọn mẹ. Enẹwutu wẹ Jesu do plọn mí nado hodẹ̀ na Ahọluduta Jiwheyẹwhe Tọn nado wá podọ dotuhomẹna mí nado ze e do otẹn tintan mẹ to gbẹzan mítọn mẹ. (Matiu 6:9, 10, 33) Be hiẹ mọ nuhewutu e do yin onú titengbe sọmọ na Jehovah dọ mí ni plọn mẹdevo lẹ dogbọn Ahọluduta etọn dali ya?
Avùnnukundiọsọmẹnu Ṣigba Mayin Nupẹnagbanmẹ de Gba
4. Nawẹ e sọgan yin dohia basina dọ dandannu mítọn nado dọyẹwheho wẹndagbe lọ tọn mayin agbànpẹnmẹnu de gbọn?
4 Be nupẹnagbanmẹ de wẹ e yin nado dọyẹwheho wẹndagbe ehe tọn ya? Gbede pọ́n! Di dohia: Otọ́ de tindo dandannu nado wleawuna whẹndo etọn to agbasaliho. Awugbopo nado wàmọ yin onú dopolọ po yise Klistiani tọn gbigbẹdai po. Apọsteli Paulu wlan dọmọ: “Ṣigba eyin mẹde ma wleawu dai na etọn titi lẹ, humọ na owhédo etọn lọsu lẹ, e mọ́n yise lọ, e sọ ylan hú mayisenọ.” (1 Timoti 5:8) Ṣigba be dandannu enẹ yin agbàn pinpẹn de na sunnu Klistiani wẹ ya? Lala eyin ewọ yiwanna whẹndo etọn, bo jlo nado wleawudai na yé.
5. Dile etlẹ yindọ azọ́n yẹwhehodidọ po devi lẹ bibasi tọn po yin dandannu de, naegbọn mí dona yin homẹhunnọ nado tindo mahẹ to e mẹ?
5 Mọdopolọ, azọ́n yẹwhehodidọ tọn po devi lẹ bibasi tọn po yin dandannu de, nubiọtomẹsi de, do ehe ji gbẹzan mítọn sinai do. Paulu dọ to aliho ehe mẹ dọmọ: “Mananọmawà tin to ojí e; na, dindọn tin hlan mi, eyin yẹn ma dọyẹwheho wẹndagbe tọn!” (1 Kọlintinu lẹ 9:16; yijlẹdo Ezekiẹli 33:7-9 go.) Etomọṣo, mẹwhinwhàn mítọn na yẹwhehodidọ wẹ owanyi, e mayin azọ́n to kọjinamẹ poun gba. Onú tintan lọ wẹ yindọ mí yiwanna Jiwheyẹwhe, ṣigba mí sọ yiwanna kọmẹnu mítọn lẹ ga, podọ mí yọ́n lehe eyin onú titengbe na yé do nado sè wẹndagbe lọ. (Matiu 22:37-39) E nọ na yé todido de na sọgodo. Ahọluduta Jiwheyẹwhe Tọn ko pọ́ jijlá whẹdida agọ̀ lẹ do, de yasanamẹ lẹpo sẹ̀, bo gọ̀ jijọho po pọninọ po wá—popolẹpo hlan dona madopodo mẹhe jo yede hlan gandudu dodonọ etọn tọn lẹ. Be mí mayin homẹhunnọ, mọwẹ yin whinwhàn, nado má wẹndagbe mọnkọtọn hẹ mẹdevo lẹ ya?—Psalm 110:3.
6. Naegbọn azọ́n yẹwhehodidọ po devi lẹ bibasi tọn po ze avùnnukundiọsọmẹnu taun de donukọnnamẹ?
6 To ojlẹ dopolọ mẹ, azọ́n yẹwhehodidọ po devi lẹ bibasi po tọn ehe nọ ze avùnnukundiọsọmẹnu nujọnu tọn de donukọnnamẹ. Gbẹtọ lẹ gbọnvo. Mẹlẹpo ma nọ tindo ojlo kavi nugopipe dopolọ lẹ gba. Mẹdelẹ yọnwe taun, to whenue mẹdevo lẹ ma yimọ do yọnwe. Wehihia—to ojlẹ dagbe de mẹ dai—ko nọ saba yin pinpọnhlan taidi awusinyẹnnu de todin. Nukun fọnlín-wehihia tọn, he yin zẹẹmẹ basina taidi “jẹhẹnu kavi ninọmẹ nugopipe nado hia tọn ṣigba matindo ojlo to mọ wiwà mẹ,” yin nuhahun he to whinwhẹ́n de, etlẹ yin to otò he sọalọakọn nado tindo suhugan weyọnẹntọ lẹ tọn mẹ. To whelọnu lo, nawẹ mí sọgan gọalọna gbẹtọ he tindo dodonu po ojlo voovo mọnkọtọn lẹ po nado plọn nuhe Jiwheyẹwhe biọ lẹ gbọn?—Yijlẹdo 1 Kọlintinu lẹ 9:20-23 go.
Yin Awuwlena Ganji Nado Gọalọna Mẹdevo Lẹ
7. Nawẹ “afanumẹ nugbonọ, nuyọnẹntọ” wleawuna mí nado gọalọna mẹdevo nado plọn nubiọtomẹsi Jiwheyẹwhe tọn lẹ gbọn?
7 Azọ́n avùnnukundiọsọmẹ tọn de nọ bọawu nado wà eyin hiẹ tindo azọ́nwanu kavi nuyizan he sọgbe. Azọ́nwanu he jẹ na azọ́n titengbe de to egbehe sọgan yin jijlado kavi tlẹ yin didiọ to osọ na nuhudo he tin to zoji lẹ wutu. Onú dopolọ wẹ po azọ́ndenamẹ mítọn nado lá owẹ̀n dogbọn Ahọluduta Jiwheyẹwhe Tọn dali po. To owhe lẹ gblamẹ, “afanumẹ nugbonọ, nuyọnẹntọ” ko wleawuna mí po azọ́nwanu he jẹ lẹ po, owe heyin awuwlena vonọtaun na yizan to anadena plọnmẹ Biblu whégbè tọn lẹ mẹ. (Matiu 24:45) Gbọnmọ wẹ mí ko yin awuwlena nado gọalọna gbẹtọ lẹ sọn “akọta lẹpo mẹ, sọn ohẹnnu lẹpo mẹ, podọ . . . sọn ogbè lẹpo mẹ,” nado plọn nubiọtomẹsi Jiwheyẹwhe tọn lẹ. (Osọhia 7:9) Sọn ojlẹ de mẹ jẹ devo mẹ, azọ́nwanu dogọ lẹ ko nọ yin awuwlena nado sọgbe hẹ nuhudo he to didiọ lẹ to lẹdo aihọn tọn mẹ. Mì gbọ mí ni gbadopọnna apajlẹ kleun delẹ.
8. (a) Adà tẹwẹ owe lọ “Que Dieu soit reconnu pour vrai” tindo to wepinplọn Biblu tọn hinhẹngblo mẹ? (b) Azọ́nwanu azọ́n plọnmẹ Biblu tọn tẹwẹ yin awuwlena to 1968, podọ nawẹ e yin awuwlena na titengbe tọn gbọn? (c) Nawẹ owe Nugbo tọn gọalọ to azọ́n devi lẹ bibasi tọn mẹ gbọn?
8 Sọn 1946 jẹ 1968, owe lọ “Que Dieu soit reconnu pour vrai” yin yiyizan taidi azọ́nwanu huhlọnnọ de na wepinplọn Biblu tọn, podọ vọkan 19 250 000 delẹ wẹ yin zinzinjẹgbonu to ogbè 54 lẹ mẹ. Nudetọn to 1968, owe lọ Nugbo he Nọ Planmẹ Sọyi Ogbẹ̀ Mavọmavọ Mẹ po kọdetọn dagbe po yin yiyizan na owhe susu to Biblu pinplọn hẹ jlodotọ lẹ mẹ. To agọe, e tlẹ gbayipe na mẹdelẹ nado plọnnu hẹ Kunnudetọ Jehovah Tọn lẹ na owhe susu bo nọ gọ̀n ma yí baptẹm. Ṣigba azọ́nwanu ehe yin awuwlena nado gando nuplọntọ lọ go, bo na ẹn tuli nado yí nuhe ewọ to pinplọn do yizan mẹ. Kọdetọn lọ? Owe lọ Les Témoins de Jéhovah—Prédicateurs du Royaume de Dieu dọmọ: “Na owhe sinsẹ̀nzọn tọn atọ̀n he bẹjẹeji sọn 1er septembre 1968, bo wá vivọnu to 31 août 1971, lẹndopọ gbẹtọ 434 906 wẹ yin bibaptizi—hugan whlaawe sọha he yí baptẹm to owhe sinsẹ̀nzọn tọn atọ̀n he wayi lẹ mẹ!” Sọn didetọn etọn whenu gbọ́n, mimá lẹdope owe Nugbo tọn ko tindo kọdetọn sẹhundaga de—hugan 107 000 000 to ogbè 117 lẹ mẹ.
9. Adà vonọtaun tẹwẹ owe Nọgbẹ̀ Kakadoi tọn tindo, podọ nugandomẹgo tẹwẹ e tindo do pipli Ahọluduta lọ tọn lẹ ji?
9 To 1982 owe lọ Hiẹ Sọgan Nọgbẹ̀ Kakadoi to Paladisi mẹ to Aigba Ji lẹzun owe tangan lọ heyin yiyizan to anadena plọnmẹ Biblu lẹ mẹ. Azọ́nwanu ehe tindo yẹdide yinukundomọ hugan 150 lẹ, he dopodopo yetọn tindo nudọnamẹ yẹdide tọn he yin kẹ́nṣinyanna ganji he basi bladopọ onú agokun tlọlọ nuplọnmẹ yẹdide lọ lẹ tọn. Zinjẹgbonu Lizọnyizọn Ahọluduta Tọn Mítọn octobre 1982 tọn dọmọ: ‘To nudi owhe 20 lẹ he ‘Que Dieu soit reconnu pour vrai’ yin owe tangan oplọn tọn mítọn (sọn 1946 jẹ ṣẹnṣẹn 1960 tọn) hugan 1 000 000 lilatọ Ahọluduta tọn yọyọ lẹ wẹ yin yiyidogọ sọha mítọn. Enẹgodo wẹnlatọ 1 000 000 devo lẹ yin yiyidogọ to whenuena Nugbo he Nọ Planmẹ Sọyi Ogbẹ̀ Mavọmavọ Mẹ lẹzun owe oplọn tọn tangan mítọn bọdo zinzinjẹgbonu etọn go to 1968. Po yizan owe yọyọ oplọn tọn mítọn po, Hiẹ Sọgan Nọgbẹ̀ Kakadoi to Paladisi mẹ to Aigba Ji, be mí na mọ jideji dopolọ to sọha wẹnlatọ Ahọluduta lọ tọn lẹ mẹ ya? Matin ayihaawe, eyin ehe yin ojlo Jehovah tọn!’ E họnwun dọ ojlo Jehovah tọn wẹ, na sọn 1982 jẹ 1995, hugan 2 700 000 wẹ yín yiyidogọ sọha lilatọ Ahọluduta lọ tọn lẹ!
10. Azọ́nwanu yọyọ tẹwẹ yin awuwlena to 1995, podọ naegbọn e dona hẹn Biblu plọntọ lẹ nado basi nukọnyiyi gbigbọmẹ tọn po awuyiya po jẹ obá de mẹ?
10 “Ojijẹ sù nugbo, ṣigba azọ́nwatọ lẹ ma sù,” wẹ Jesu dọ. (Matiu 9:37) Ojijẹ, na nugbo tọn, sù. Onú susu gbẹ́ po nado wà. To otò delẹ mẹ gbẹtọ lẹ dona yin todohukanji basina na oplọn Biblu tọn lẹ. Enẹwutu po yanwle lọ po nado hẹn oyọnẹn Jiwheyẹwhe tọn gbayipe po awuyiya po dogọ, to 1995 “afanumẹ nugbonọ, nuyọnẹntọ” wleawuna azọ́nwanu yọyọ de, owe weda 192 tọn he hosọ etọn yin Oyọnẹn He Nọ Planmẹ Sọyi Ogbẹ̀ Madopodo Mẹ. Azọ́nwanu họakuẹ ehe ma zinnudo sinsẹ̀n-nuplọnmẹ lalo tọn lẹ ji gba. E ze nugbo Biblu tọn lẹ donukọnnamẹ to aliho nujikudo tọn de mẹ. E yin nukundo dọ e na hẹn Biblu plọntọ lẹ nado basi nukọnyiyi gbigbọmẹ tọn po awuyiya po jẹ obá de mẹ. Owe Oyọnẹn tọn ko to nuyiwadomẹji tindo lẹdo aihọn pe po vọkan 45 500 000 lẹ po heyin zinzinjẹgbonu to ogbè 125 lẹ mẹ podọ gọna lẹdogbedevomẹ to ogbè 21 mẹ dogọ to alọnu.
11. Azọ́nwanu kọdetọn dagbenọ tẹwẹ yin awuwlena nado gọalọ to oplọn mẹhe mayọnwe lẹ kavi he ma nọ hiawe ganji lẹ tọn mẹ, podọ nawẹ e ko basi ayidonugo huhlọnnọ de do tito-to-whinnu mẹpinplọn globu tọn mítọn ji gbọn?
11 Sọn ojlẹ de mẹ jẹ devo mẹ, ‘afanumẹ nugbonọ lọ’ ko wleawuna azọ́nwanu lẹ he tin na omẹ taun de, kavi mẹplidopọ he tindo dogbo de tọn. Di apajlẹ, etẹwẹ dogbọn gbẹtọ he sọgan tindo nuhudo alọgọ vonọtaun tọn na dodonu aṣa kavi sinsẹ̀n yetọn tọn wutu lẹ dali? Nawẹ mí sọgan gọalọna yé nado plọn nubiọtomẹsi Jiwheyẹwhe tọn lẹ gbọn? To 1982 mí mọ nuhe mí tindo nuhudo na taun lọ yí—yèdọ alọnuwe weda 32 tọn lọ Dùvivi Ogbẹ̀ Tọn To Aigba Ji Kakadoi! Owe yẹdide yẹyinọ ehe ko yin azọ́nwanu kọdetọn dagbenọ to pinplọn mẹhe ma yọnwe lẹ kavi he ma yọnwe hia ganji lẹ mẹ. E bẹ nuzedonukọnnamẹ dodonu bọawu mẹpinplọn Owe wiwe tọn he ma vẹawu nado mọnukunnujẹemẹ lẹ hẹn. Sọn didetọn etọn whenu gbọ́n, alọnuwe Ogbẹ̀ To Aigba Ji ko tindo mahẹ daho do tito-to-whinnu mẹpinplọn globu tọn mítọn ji. Hugan vọkan 105 100 000 wẹ ko yin zinzinjẹgbonu to ogbè 239 lẹ mẹ, bo hẹn ẹn zun owe he lẹdogbedevomẹ etọn tọn gbayipe hugan dehe Ogbẹ́ Watch Tower tọn ko detọn kakajẹ egbehe!
12, 13. (a) Sọn 1990 gbọ́n, aliho yọyọ tẹwẹ ‘afanumẹ nugbonọ lọ’ ko wleawuna nado jẹ suhugan gbẹtọ lẹ tọn dè? (b) Nawẹ mí sọgan yí video Ogbẹ́ tọn lẹ zan to lizọnyizọn kunnudegbe tọn mítọn mẹ gbọn? (c) Azọ́nwanu yọyọ tẹwẹ yin awuwlena to agọe nado gọalọ to azọ́n devi lẹ bibasi tọn mítọn mẹ?
12 To yidogọmẹ na owe zinjẹgbonu lẹ, bẹsọn 1990 ‘afanumẹ nugbonọ lọ’ ko wleawuna mí po nuyizan mẹpinplọn tọn de po he ze aliho yọyọ de donukọnnamẹ nado jẹ suhugan gbẹtọ lẹ tọn dè—yèdọ kasẹti video tọn lẹ. To octobre owhe enẹ tọn mẹ, video nukunwhiwhe 55 tọn lọ Les Témoins de Jéhovah: un nom, une organisation yin didetọn—yèdọ video tintan to de heyin didetọn gbọn Ogbẹ́ Watch Society dali mẹ. Zedonukọnnamẹ nudọnamẹ whànpẹnọ lọ, tin to aimẹ to ogbè 35 lẹ mẹ, bo nọ do titobasinanu lẹdo aihọn pe gbẹtọ mẹdezejotọ Jehovah tọn lẹ hia he to hinhẹn gbedide Jesu tọn di nado lá wẹndagbe lọ to aigba lẹpo mẹ. Na titengbe tọn video lọ yin awuwlena nado gọalọ to azọ́n devi lẹ bibasi tọn mítọn mẹ. Wẹnlatọ Ahọluduta tọn lẹ ma hẹn whenu depope gú to yíyí azọ́nwanu yọyọ ehe zan to lizọnyizọn kunnudegbe tọn mẹ. Mẹdelẹ nọ hẹn ẹn to saki owe tọn yetọn lẹ mẹ, bo nọ tin to aṣeji nado dohia kavi whé e na jlodotọ lẹ. Tlolo to didetọn etọn godo, nugopọntọ tomẹyitọ de wlan dọmọ: “Video ko lẹzun nuyizan owhe kanweko 21tọ tọn de nado jẹ ayiha po ahun gbẹtọ livi lẹ tọn mẹ, enẹwutu todido mítọn wẹ eyin dọ video ehe na yin tintan to video susu lẹ mẹ he Ogbẹ́ na yizan nado hẹn azọ́n Ahọluduta tọn lẹdo aihọn pe lọ yinukọn.” Na nugbo tọn, video dogọ lẹ ko yin awuwlena, gọna tito adà atọ̀nnọ tọn La Bible—Un Livre Historique et Prophétique po Jehovah’s Witnesses Stand Firm Against Nazi Assault [glẹnsigbe] po. Eyin video Ogbẹ́ tọn lẹ tin to aimẹ to ogbè towe mẹ, be hiẹ ko basi yizan yetọn to lizọnyizọn kunnudegbe tọn towe mẹ ya?a
13 To agọe azọ́nwanu yọyọ de, alọnuwe lọ Etẹwẹ Jiwheyẹwhe Biọ to Mí Si?, yin awuwlena nado gọalọ to azọ́n devi lẹ bibasi tọn mítọn mẹ. Naegbọn e do yin zinzinjẹgbonu? Nawẹ e sọgan yin yiyizan gbọn?
Dogbapọnna Azọ́nwanu Yọyọ De
14, 15. Mẹnu lẹ wẹ alọnuwe lọ Etẹwẹ Jiwheyẹwhe Biọ yin awuwlena, podọ etẹwẹ e bẹhẹn?
14 Owe yọyọ lọ Etẹwẹ Jiwheyẹwhe Biọ to Mí Si? yin awuwlena na mẹhe ko yise to Jiwheyẹwhe mẹ lẹ bo na sisi Biblu lọ. Nugopọntọ tomẹyitọ lẹ to pọmẹ po mẹdehlan heyin azọ́nplọn to wehọmẹ Gileadi tọn lẹ po owhe susu numimọ tọn lẹ po to otò he to nukunhùn lẹ mẹ gọalọ to awuwle alọnuwe ehe tọn mẹ. E bẹ tito oplọn kitokito tọn de hẹn, bo dọhodo adà titengbe nuplọnmẹ Biblu tọn lẹ ji. Hogbe etọn lẹ dọnmẹdogo, bọawu, bo yì hogo ji tlọlọ. To ojlẹ dopolọ mẹ, owe lọ ma yin hinhẹn bọawu zẹjlẹgo gba. E zedonukọnnamẹ e mayin “oyìnnọ” poun gba ṣigba mọdopolọ “núdùdù sinsinyẹn” sọn Ohó Jiwheyẹwhe Tọn mẹ to aliho he mẹ gbẹtọ susu dona penugo nado mọnukunnujẹemẹ te.—Heblu lẹ 5:12-14.
15 To owhe agọe tọn lẹ mẹ wẹnlatọ Ahọluduta tọn lẹ to otò voovo lẹ mẹ tlẹ ko kàn owe mọnkọtọn sè. Di apajlẹ, alahọ Ogbẹ́ Watch Tower tọn to Papouasie-Nouvelle-Guinée mẹ wlan dọmọ: “Gbẹtọ lẹ biọ bẹwlu mẹ gbọn nuplọnmẹ sinsẹ̀n tọn he sọta yede lẹ dali. Yé tindo nuhudo hogbe gli nugbo lọ tọn, heyin godonọna gbọn sọha wefọ Biblu tọn de he yé sọgan gbadopọnna to Biblu yetọn titi lẹ mẹ dali. Yé tindo nuhudo nuzedonukọnnamẹ tangan he họnwun gando nuhe Jiwheyẹwhe nọ biọ to Klistiani nugbo lẹ si podọ aṣa po walọyizan lẹ po he mayin alọkẹyi hlan ẹn.” Alọnuwe lọ Etẹwẹ Jiwheyẹwhe Biọ wẹ nuhe mí tindo nuhudo etọn poun nado gọalọna omẹ mọnkọtọn lẹ nado plọn nubiọtomẹsi Jiwheyẹwhe tọn lẹ.
16. (a) Mẹnu na titengbe tọn wẹ sọgan mọaleyi sọn zẹẹmẹ bọawu lẹ to alọnuwe yọyọ lọ mẹ? (b) Nawẹ mẹhe tin to aigba-denamẹ towe ji lẹ sọgan mọaleyi sọn alọnuwe Etẹwẹ Jiwheyẹwhe Biọ lọ mẹ gbọn?
16 Nawẹ hiẹ sọgan yí azọ́nwanu yọyọ ehe zan gbọn? Tintan, e sọgan yin yiyizan nado plọnnu hẹ gbẹtọ he tindo awusinyẹn wehihia tọn kavi mẹhe ma tindo ojlo sọmọ na wehihia lẹ.b Omẹ mọnkọtọn lẹ sọgan mọaleyi sọn zẹẹmẹ bọawu lẹ mẹ to alọnuwe lọ mẹ. To dogbapọn basina vọkan owe ehe tọn jẹnukọn godo, alahọ Watch Tower tọn lẹ wlan nuhe bọdego lọ dọmọ: “Alọnuwe lọ na yin alọgọnamẹnu taun to adà susu otò tọn fie gbẹtọ lẹ ma tindo ojlo sọmọ nado hiawe na ojlẹ dindẹn te.” (Brésil) “Sọha waṣinu delẹ tọn tin he ma sọgan hia ogbè yetọn titi lẹ bosọ tindo awusinyẹnnamẹnu delẹ nado hia Flansegbe. Alọnuwe ehe sọgan yin yiyizan taidi alọgọ de to nupinplọn hẹ omẹ mọnkọtọn lẹ mẹ.” (France) Be hiẹ sọgan lẹnnupọndo gbẹtọ lẹ to aigba-denamẹ towe ji he sọgan mọaleyi sọn alọnuwe Etẹwẹ Jiwheyẹwhe Biọ tọn lọ mẹ ya?
17. To aliho tẹmẹ wẹ alọnuwe yọyọ lọ sọgan yọn-na-yizan to otò susu mẹ te, podọ etẹwutu?
17 Awetọ, to otò susu mẹ alọnuwe lọ sọgan yọ́n-na-yizan to plọnmẹ Biblu de bibẹjẹeji hẹ gbẹtọ budisi-Jiwheyẹwhe tọ lẹ mẹ mahopọnna lehe yé yọnwe sọ. Nugbo wẹ dọ, vivẹnu dona yin dido nado bẹ oplọn de jẹeji to owe Oyọnẹn He Nọ Planmẹ Sọyi Ogbẹ̀ Madopodo Mẹ. Ṣigba to whẹho delẹ mẹ e sọgan bọawu nado bẹ oplọn de jẹeji to alọnuwe de mẹ. Enẹgodo to ojlẹ he sọgbe mẹ, oplọn lọ dona yin adadiọna hlan owe Oyọnẹn tọn lọ mẹ, yèdọ alọgọnamẹnu oplọn tọn tintan mítọn. Gando yizan alọnuwe Etẹwẹ Jiwheyẹwhe Biọ tọn ehe go, alahọ Watch Tower tọn lẹ wlan dọmọ: “Bibẹ plọnmẹ Biblu jẹeji nọ vẹawu, podọ dotẹnmẹ hundote oplọn de bibẹjẹeji tọn nọ taidi nuhe pọnte to whenuena wẹnlatọ lẹ bẹjẹeji po alọnuwe de po.” (Allemagne) “Alọnuwe alọpa ehe na yin kọdetọn dagbenọ taun to plọnmẹ Biblu tọn yọyọ lẹ bibẹjẹeji mẹ, enẹgodo ehe sọgan zindonukọn po owe Oyọnẹn tọn po.” (Italie) “Dile etlẹ yindọ weyọnẹntọ taun wẹ mẹhe sọn Japon lẹ yin, suhugan yetọn tindo oyọnẹn Biblu tọn po dodonu nuplọnmẹ etọn tọn lẹ po he tindo dogbo. Alọnuwe lọ dona yin asisa dagbe de hlan owe Oyọnẹn tọn lọ.”—Japon.
18. Etẹwẹ mí dona flin dogbọn nubiọtomẹsi Jiwheyẹwhe tọn lẹ kọ̀n jijẹ dali?
18 Alahọ Ogbẹ́ tọn lẹ lẹdo aihọn pe basi obiọ na alọnuwe ehe, podọ alọkẹyi ko yin nina nado basi lẹdogbedevomẹ etọn do ogbè 221 lẹ mẹ. Na owe yọyọ ehe ni na kunnudenu họakuẹ to alọgọna mí nado gọalọna mẹdevo lẹ nado plọn nuhe Jehovah Jiwheyẹwhe biọ to yé si mẹ. Na adà mítọn, mì gbọ mí ni flin dọ jijẹ nubiọtomẹsi Jiwheyẹwhe tọn lẹ kọ̀n, gọna gbedide lọ nado dọyẹwheho bo basi devi lẹ, na mí dotẹnmẹ hundote họakuẹ de nado dohia Jehovah lehe mí yiwanna ẹn do sọ. Mọwẹ, nuhe Jiwheyẹwhe nọ biọ to mí si mayin agbànpẹnmẹnu gba. Aliho he yọ́n hugan nado nọgbẹ̀ wẹ e yin!—Psalm 19:7-11.
[Nudọnamẹ Odò Tọn]
a Owe lọ Les Témoins de Jéhovah—Prédicateurs du Royaume de Dieu dọmọ: “Kasẹti video tọn lẹ ma yí otẹn zinjẹgbonu lẹ tọn kavi kunnudide mẹdetiti lẹ tọn to alọ depope mẹ gba. Owe Ogbẹ́ tọn lẹ to nukọnzindo nado yí onú titengbe de wà to wẹndagbe lọ hinhẹn gbayipe mẹ. Azọ́n whédegbè-jẹ-whédegbè Kunnudetọ Jehovah Tọn lẹ tọn gbẹ́ yin adà sinsinyẹn dodonu Owe wiwe tọn na lizọnyizọn yetọn tọn. Etomọṣo, kasẹti video heyin yiyidogọ na ehelẹ todin taidi azọ́nwanu họakuẹ na awuwlena yise to opagbe họakuẹ Jehovah tọn lẹ mẹ bo nọ fọn pinpẹn-nutọn-yinyọnẹn dote na nuhe e to wadotana etọn basi to aigba ji to azán mítọn gbe.”
b Na zẹẹmẹ lehe yè na deanana oplọn de to alọnuwe Etẹwẹ Jiwheyẹwhe Biọ tọn mẹ, pọ́n hosọ lọ “Azọ́nwanu Yọyọ de Nado Gọalọna gbẹtọ lẹ Nado Plọn Nubiọtomẹsi Jiwheyẹwhe tọn lẹ,” to weda 16-17 mẹ.
Be Hiẹ Sọgan Basi Zẹẹmẹ Ya?
◻ To azọ́n awe-to-pọmẹ tẹ mẹ wẹ Jehovah biọ devizọnwatọ etọn lẹ nado tindo mahẹ te?
◻ Naegbọn dandannu mítọn nado dọyẹwheho bo basi devi lẹ mayin agbànpẹnmẹnu de na mí?
◻ Azọ́nwanu tẹlẹ wẹ “afanumẹ nugbonọ, nuyọnẹntọ” lọ ko wleawu etọn na yizan to azọ́n yẹwhehodidọ po devi lẹ bibasi po tọn mítọn mẹ?
◻ Mẹnu lẹ wẹ alọnuwe lọ Etẹwẹ Jiwheyẹwhe Biọ yin awuwlena, podọ nawẹ mí sọgan yí i zan to lizọnyizọn mítọn mẹ gbọn?
[Yẹdide to weda 15]
Yẹwhehodidọ mítọn po azọ́n devi lẹ bibasi tọn po mayin agbànpẹnmẹnu gba
[Yẹdide to weda 17]
“Que Dieu soit reconnu pour vrai” (1946, vọdiọ 1952 tọn): 19 250 000 to ogbè 54 lẹ mẹ
“Nugbo he Nọ Planmẹ Sọyi Ogbẹ̀ Mavọmavọ Mẹ” (1968): 107 000 000 to ogbè 117 lẹ mẹ (dohia Flansegbe tọn)
“Hiẹ Sọgan Nọgbẹ̀ Kakadoi to Paladisi mẹ to Aigba Ji” (1982): 80 900 000 to ogbè 130 lẹ mẹ (dohia Russie tọn)
“Oyọnẹn He Nọ Planmẹ Sọyi Ogbẹ̀ Madopodo Mẹ” (1995): 45 500 000 to ogbè 125 lẹ mẹ (dohia Allemagne tọn)