Lilatọ Ahọluduta Tọn lẹ Na Linlin
Hinhọ̀n wá Titobasinanu Yẹwhehọluduta Jehovah Tọn Mẹ
OWHE susu lẹ die wayi yẹwhegan Isaia yin whinwhan nado lá dọmọ: ‘Yé dona pagigona Jehovah to lopo ohù tọn ji.’ (Isaia 24:15) Kunnudetọ Jehovah Tọn lẹ nọ pọ́n lopo ohù tọn lẹ dohlan taidi adà “aigba fininọ lẹpo” ehe Jesu dọ dọ “yè ma sọgan nọ ma dọhó wẹndagbe tọn pé” te.—Matiu 24:14; Malku 13:10.
Lopo Marquises tọn lẹ tin to kilomẹtlu 1 400 delẹ to agewaji whezẹtẹn Tahiti tọn. Yé yin apadewhe pipli he to lopo he tin to olá de ji to Huwaji Pacifique tọn he nọ yin yiylọdọ Polynésie Française. Po aigba osó tọn dagbe gọna yozo tọn de po, agahomẹ he gọna osin lẹ, omá lẹ nọ whẹ́n vlovlo to lopo ehelẹ ji. Ṣigba, Marquises sọ to sinsẹ́n wunmẹ devo detọ́n ga. Gbadopọnna whẹho whẹndo dopo he yigbena owẹ̀n Ahọluduta lọ tọn to lopo Hiva Oa tọn ji.
Jean po asi etọn Nadine po, mahunhomẹ do ogbẹ́ he nọ yin yiylọdọ nukunhunhun Whèzẹtẹn Europe tọn go to ehe mẹ yé tin te. Enẹwutu, yé basi dide nado jó aliho ogbẹ̀ tọn he ján enẹ do godo bo sẹtẹn po ovi yetọn po wá Lopo Marquises tọn lẹ ji. Owhé yọyọ yetọn, he yè yí obá do gbá, yin gbigbá to agbadò he tin to olá de mẹ. Nado sọgan jẹ kọmẹnu he sẹpọ hugan yetọn lẹ dè, yé dona zinzọnlin gbọn aliho osó kanṣankanṣan tọn ji na ganhiho awe. Gbetato he sẹpọ hugan bo tindo doto de, wehọmẹ, gọna nusatẹn he dẹn na ganhiho atọ̀n gbọn ahi-hun dali.
Jean po Nadine po matindo ojlo to sinsẹ̀n mẹ gba. Ṣigba, yé nọ tindo mahẹ to hodọdopọ lẹ mẹ dogbọn bẹjẹeji ogbẹ̀ tọn dali. Yé nọ saba wleawuna tamẹnuplọnmẹ doglẹ nulẹ tin yededenu tọn lẹ. Ṣigba depope to tamẹnuplọnmẹ yetọn lẹ mẹ ma hẹn pekọ wá na yé gba.
To tintin to nọtẹn he to olá mẹ na owhe ṣidopo lẹ godo, yé yin pipaṣa nado mọ dlapọn de gbọn Kunnudetọ Jehovah Tọn awe dali. Kunnudetọ lọ lẹ ko kàn fie Jean po Nadine po nọnọ biọ sọn gbetanu he to yakẹ lẹ dè. To jọwamọ liho, hodọdopọ lọ planmẹ jẹ hodidọ tamẹnuplọnmẹ nulẹ tin yededenu tọn kọ̀n. Nuhe yin awuvivinu na asu po asi po lọ lẹ wẹ yindọ, Kunnudetọ lọ lẹ hẹn vọkan owe lọ La vie—comment est-elle apparue? Évolution ou création? tọn, heyin zinzinjẹgbonu gbọn Kunnudetọ Jehovah Tọn lẹ dali. Homẹ Jean po Nadine tọn po hùn nado tindo owe de he ze dogbapọnnanu mlẹnmlẹn donukọnnamẹ do lehe ogbẹ̀ wáfi gbọn ji.
Ojlẹ gli de godo, plọnmẹ Biblu de bẹjẹeji. Hugan ojlẹ nudi owhe atọ̀n tọn, Jean po Nadine po basi nukọnyiyi dolido. Yé lẹzun nujikudonọ dọ to madẹnmẹ aigba lọ pete na lẹzun paladisi de. To whenuena whẹndo yetọn sudeji jẹ ovi atọ̀n godo, gbejizọnlin bibasi na ganhiho ẹnẹ nado yì opli Klistiani tọn lẹ to Plitẹnhọ Ahọluduta Tọn lọ mẹ wá lẹzun avùnnukundiọsọmẹnu taun. Ṣigba, enẹ ma hẹnalọdote na yé sọn yìyì mẹ gba. To agọgbọnẹnmẹ Jean po Nadine po basi yẹhiadonu klandowiwe yetọn tọn hlan Jehovah gbọn baptẹm osin tọn dali. Ehe wẹ yé basi to plidopọ heyin bibasi to gbetato nukundeji lọ mẹ, fie lẹndopọ pete agayiyi mẹhe wá lẹ tọn yin gbẹtọ 38 te!
Nado sọgan gọalọna pipli pẹvi wẹnlatọ Ahọluduta lọ tọn lẹ, whẹndo lọ basi dide nado jó owhé yetọn he tin to olá do. Yé sẹtẹn jẹ gbetato de mẹ he tindo nudi gbẹtọ fọtọ́n nkọtọn, fie Jean todin to sinsẹ̀nzọnwà taidi devizọnwatọ lizọnyizọnwiwa tọn de te to agun Kunnudetọ Jehovah Tọn lẹdo lọ tọn mẹ. Whẹndo ehe, he to ojlẹ de mẹ wayi họ̀n sọyi lopo lẹ ji nado họ̀nna nukunhunhun, pọ́n ẹn hlan di lẹblanulọkẹyi de nado mọ fiwiwe nugbo dopo lọ, yèdọ titobasinanu yẹwhehọluduta Jehovah tọn.