Lilatọ Ahọluduta Tọn lẹ Na Linlin

Mẹdekannujijẹ sọn Nuyiwadomẹji Aovi Tọn Si

AFINYỌNNỌNUWIWA ko nọ deanana gbẹzan livi susu gbẹtọ lẹ tọn na whenu dindẹn. Ṣigba e yọnbasi nado jẹ mẹdekannu! Enẹ wẹ nuhe jọ hẹ mẹsusu to tòdaho Efesu hohowhenu tọn mẹ. Sọgbe hẹ kandai Biblu tọn, “susu yetọn ga he nọ zan anà hunkọhunkọ bẹ́ owe yetọn lẹ plidopọ, bo mẹ̀ yé . . . Mọwẹ ohó Jiwheyẹwhe tọn to whinwhẹ́n do e ji, bosọ to aihẹn.”—Owalọ lẹ 19:19, 20.

Mọdopolọ to egbehe agun Klistiani tọn to numimọ whinwhẹ́n tọn tindo. Dile whẹho lọ te do to Efesu, to mẹhe to lilẹzun yisenọ lẹ ṣẹnṣẹn wẹ mẹhe ko nọ yí aovinuwiwa zan wayi lẹ te. Numimọ he bọdego lọ sọn Zimbabwe do ehe hia.

Gogo (Onọdahó) Mthupha yin yinyọnẹn tlala na huhlọn afinyọnnọnuwiwa tọn etọn lẹ. Gbẹtọ lẹ nọ wá sọn fidindẹn lẹ taidi Zambie, Botswana, po Afrique du Sud po na ewọ nido penukundo yé go po gbemasin etọn po. Gogo Mthupha sọ nọ plọn mẹdevo lẹ lehe yè na yin n’anga, kavi amawatọ do. Podọ to whedelẹnu e nọ sabogbè!

To Sẹgbe afọnnu dopo Gogo Mthupha yin dlapọn basina gbọn Kunnudetọ Jehovah Tọn lẹ he to mahẹ tindo to lizọnyizọn whédegbè-jẹ-whédegbè tọn mẹ dali. Ewọ duvivi hodọdopọ mlẹnmlẹn de tọn hẹ yé dogbọn opagbe Biblu tọn dali gando aihọn yọyọ dodonọ tọn de go, aihọn de he vò sọn nuyiwadomẹji ylankan lẹpo si. E kẹalọyi owe lọ Hiẹ Sọgan Nọgbẹ̀ Kakadoi to Paladisi mẹ to Aigba Ji bo yigbe nado tindo plọnmẹ Biblu whégbè tọn de.a To oplọn atọ̀n poun godo, e bẹ opli lẹ yìyì jẹeji.

Gbọn plọnmẹ Biblu etọn tọn dali, Gogo Mthupha plọn dọ huhlọn vonọtaun etọn wá sọn nudida ylankan gbigbọnọ he ko ṣiatẹ sọta nupojipetọ-yinyin Jehovah tọn dè. (2 Pita 2:4; Juda 6) E sọ plọn dọ aovi ehelẹ magbe nado lẹ́ mẹlẹpo dile yé sọgan pe e go do sọta Jehovah podọ sọta sinsẹ̀n-bibasi wiwe ṣeke. To whenuena e yindọ gbẹninọ etọn sinai do kanṣiṣa hẹ nudida ylankan gbigbọnọ ehelẹ ji, etẹwẹ ewọ na wà?

Gogo Mthupha do ojlo lọ hia nado vò sọn obó etọn lẹpo po nutindo afinyọnnọnuwiwa tọn lẹ po mẹ. Ehe bẹ odà bibasi vonọtaun etọn po “oyinzo he nọ dọho” po hẹn, ehe e nọ yizan to azọ̀nhẹngbọ n’anga tọn etọn mẹ. Gogo Mthupha jlo nado vò sọn nuyizan mọnkọtọn lẹpo mẹ na ewọ nido sọgan basi sinsẹ̀n hlan Jiwheyẹwhe nugbo gbẹnọ lọ kẹdẹ, yèdọ Jehovah.

Ṣigba, hẹnnumẹ etọn delẹ jẹagọdo na ewọ nọ gọalọna yé to akuẹzinzan liho. Yé vẹ̀ ẹ nado bẹ nuyizan lọ lẹ na yé, to pọmẹ po huhlọn hugan jọwamọ tọn etọn po na yé nido sọgan zindonukọn nado to alemọyi. Gogo Mthupha gbẹ́.

Po alọgọ agun Kunnudetọ Jehovah Tọn lẹdo lọ tọn lẹ po, e bẹ nuyizan afinyọnnọnuwiwa tọn saki daho atọ̀n pli bo fiọ yemẹpo. Dile azọ́nwanu sinsẹ̀n-bibasi aovi tọn etọn lẹ to miyọ́n ji, Gogo Mthupha dawhá dọmọ: “Pọ́n! azò enẹ, e ma sọgan whlẹn ede gán gba.”

To ojlẹ vude godo, Gogo Mthupha po ayajijẹ po basi yẹhiadonu klandowiwe etọn hlan Jehovah gbọn baptẹm osìn tọn dali. Nawẹ e to nukunpedo ede go gbọn todin? Gbọn omá sisa dali. Mọwẹ, gbọn huhlọn Ohó Jiwheyẹwhe Tọn dali, mẹde sọgan jẹ mẹdekannu sọn sinsẹ̀n-bibasi aovi tọn si. Gogo Mthupha dọmọ: “Yẹn ma ko tindo numọtolanmẹ vivomẹ tọn sọmọ pọ́n gbede gba.”

[Nudọnamẹ Odò Tọn]