Kanbiọ lẹ sọn Wehiatọ lẹ Dè

Eyin aovi lẹ to tuklado mẹde, etẹwẹ e sọgan wà nado mọ pọngbọ?

Ohó Jiwheyẹwhe tọn dohia dọ mẹhe to oyà mẹgbeyinyan aovi tọn ji lẹ sọgan jẹ mẹdekannu sọn yasanamẹ mọnkọtọn mẹ. Odẹ̀ yin nujọnu nado jẹ mẹdekannu. (Malku 9:25-29) Ṣigba, mẹhe aovi lẹ to tuklado lọ sọgan sọ ze afọdide devo lẹ. Nujijọ he gando Klistiani owhe kanweko tintan tọn go do nudevo he sọgan sọ yin wiwà hia.

Mẹdelẹ to Efesu hohowhenu tọn mẹ ko doalọ to aovinuwiwa mẹ whẹpo do wá lẹzun hodotọ Klisti tọn lẹ. Ṣigba, to whenuena yé magbè nado sẹ̀n Jiwheyẹwhe, “[yé] he nọ zan anà hunkọhunkọ bẹ owe yetọn lẹ plidopọ, bo mẹ̀n yé to gbẹtọ lẹpo nukọn.” (Owalọ lẹ 19:19) Gbọn owe dọṣẹ tọn yetọn lẹ vivasudo dali, yisenọ yọyọ Efesu tọn enẹlẹ ze apajlẹ de dai na mẹdepope he jlo na mọ tundote yí sọn mẹgbeyinyan aovi tọn lẹ si to egbehe. Dandannu wẹ e yin na omẹ mọnkọtọn lẹ nado bẹ nuyizan he gando afinyọnnuwiwa go lẹpo dlan. Ehe bẹ owe lẹ, linlinwe lẹ, sinimọto lẹ, nudọnamẹ lẹ sọn Internet ji, tito-to-whinnu televiziọn tọn delẹ, hànjigbán he gando afinyọnnuwiwa go lẹ, gọna dèfinfẹ̀n lẹ kavi obó devo lẹ he nọ yin sìnsìn na “hihọ́” kavi nudepope he tindo kanṣiṣa hẹ afinyọnnuwiwa lẹ hẹn.—Deutelonomi 7:25, 26; 1 Kọlintinu lẹ 10:21.

To owhe kleun delẹ he Klistiani Efesu tọn lẹ ko và owe afinyọn tọn yetọn lẹ sudo godo, wẹ apọsteli Paulu wlan dọmọ: ‘Míwlẹ to ahidi hẹ huhlọn gbigbọ ylankan tọn lẹ.’ (Efesunu lẹ 6:12) Paulu dotuhomẹna Klistiani lẹ dọmọ: “Mì ze gbaja Jiwheyẹwhe tọn lẹpo blá dogo, na mì nido nọte pehẹ bublu [kavi ayiha wintinwintin] Lẹgba tọn.” (Efesunu lẹ 6:11) Ayinamẹ enẹ gbẹsọ yọn-na-yizan to egbehe. Klistiani lẹ dona dovivẹnu vẹkuvẹku nado hẹn gbigbọnọ-yinyin yetọn lodo nado sọgan hoavùn sọta gbigbọ ylankan lẹ. Paulu zinnudeji dọmọ: “To popolẹpo ji, mì yí sagba yise tọn hẹn, ehe mì na yí do ṣimiyọ́n ogá mẹylankan tọn lẹpo.” (Efesunu lẹ 6:16) Mí nọ hẹn yise mítọn lodo gbọn Biblu pinplọn dali. (Lomunu lẹ 10:17; Kọlọsinu lẹ 2:6, 7) Enẹwutu, Biblu pinplọn to gbesisọ mẹ nọ gọalọna mí nado wleawuna yise he nọ basi hihọ́na mí sọta nuyiwadomẹji gbigbọ ylankan tọn lẹ.—Psalm 91:4; 1 Johanu 5:5.

Klistiani Efesu tọn enẹlẹ sọ tindo nuhudo nado ze afọdide titengbe devo. Paulu dọna yé dọmọ: “Mì nọ yí whepoponu do hodẹ̀, to odẹ̀ po ovẹ̀ lẹpo po mẹ, to [gbigbọ] mẹ.” (Efesunu lẹ 6:18) Mọwẹ, hihọ́-basinamẹ Jehovah tọn bibiọ vẹkuvẹku to odẹ̀ mẹ, na nugbo tọn, yin onú titengbe na mẹhe jlo na jẹ mẹdekannu sọn mẹgbeyinyan aovi tọn si lẹ to egbehe. (Howhinwhẹn lẹ 18:10; Matiu 6:13; 1 Johanu 5:18, 19) Biblu gbọn gbesisọ dali dọmọ: “Enẹwutu mì lita mìtọn ai hlan Jiwheyẹwhe. Mì diọnukunsọ Lẹgba; e nasọ họ̀n sọn mì dè.”—Jakobu 4:7.

Eyin mẹhe to mẹgbeyinyan aovi tọn glọ lọ to dẹ̀ho vẹkuvẹku na pọngbọ, Klistiani nugbo devo lẹ sọgan sọ hodẹ̀ na mẹhe jlo vẹkuvẹku nado sẹ̀n Jehovah bosọ to vivẹnu sinsinyẹn dó nado diọnukunsọ gbigbọ ylankan lẹ. Yé sọgan biọ to Jiwheyẹwhe si dọ mẹhe gbigbọ aovi tọn lẹ to tukla dó lọ ni mọ huhlọn gbigbọmẹ tọn yí nado nọavunte sọta mẹgbeyinyan aovi tọn lẹ. To whenuena e yindọ Ohó Jiwheyẹwhe tọn basi zẹẹmẹ dọ “odẹ̀ zogbezogbe dodonọ de tọn, magbọvọ nọ wazọ́n susu,” odẹ̀ he devizọnwatọ Jiwheyẹwhe tọn lẹ nọ hò po nujikudo po, na gọalọna mẹhe aovi to yasana lọ, he to vivẹnu lẹpo dó nado “diọnukunsọ Lẹgba.”—Jakobu 5:16.

[Yẹdide to weda 31]

Yisenọ he tin to Efesu lẹ và owe afinyọn tọn yetọn lẹ sudo