Ayihadawhẹnamẹnu—Nupẹnagbanmẹ Kavi Nuhọakuẹ De?

‘AYIHADAWHẸNAMẸNU ṣie to tuklado mi!’ Diblayin mẹlẹpo wẹ nọ tindo numimọ nuhahun ayihadawhẹnamẹnu tọn, sọn ojlẹ de mẹ jẹ devo mẹ. Numọtolanmẹ mọnkọtọn lẹ sọgan yin sọn ayimajai awubibọ tọn ji biọ awufiẹsa sinsinyẹn lẹ mẹ. Ayihadawhẹnamẹnu heyin tuklado sọgan dọn flumẹjijẹ kavi numọtolanmẹ awugbopo sisosiso tọn wá.

To whelọnu lo, be ayihadawhẹnamẹnu mayin nupẹnagbanmẹ de, to pọndohlan ehe tọn mẹ ya? Mẹdelẹ sọgan lẹndọ mọwẹ. Whẹndo nulẹnpọntọ he ko wayi lẹ nọ saba pọ́n ayihadawhẹnamẹnu hlan taidi jọwamọnu, nugopipe heyin jiji po mẹde po. Mẹsusu lẹndọ e yin anadenamẹnu walọyizan tọn heyin nina tlọlọ dogbọn Jiwheyẹwhe lọsu dali. Gbọnmọ dali, ayihadawhẹnamẹnu ko yin yiylọdọ “tintin Jiwheyẹwhe tọn to gbẹtọ mẹ,” “jijọ dowhenu tọn mítọn,” podọ etlẹ yin “ogbè Jiwheyẹwhe tọn.”

Ṣigba, to owhe agọe tọn lẹ mẹ, e ko lẹzun nuhe gbayipe nado dọ po nujikudo po dọ ayihadawhẹnamẹnu yin nugopipe he nọ yawu yin awuwlena de—kọdetọn nuyiwadomẹji mẹjitọ po ogbẹ́ tọn po de. Di apajlẹ, lẹnunnuyọnẹntọ walọyizan tọn lẹ dọnnu dọ ovi de nọ plọn nado joagọ sọn walọyizan he ma jẹ lẹ kọ̀n kẹdẹ na obu nado yin yasana tọn wutu, bo yise dọ nuhe mí nọ ylọ dọ ayihadawhẹnamẹnu yin linlẹn nuhọakuẹ gbẹtọ-yinyin po nuyise mẹjitọ mítọn lẹ tọn po poun. Mẹdevo lẹ dlẹnalọdo nuhe ogbẹ́ nọ yiwà to paa mẹ nado plọnmẹ nuhọakuẹ lẹ po nujinọtedo lẹ po. Mẹdelẹ nọ pọ́n tukladomẹ ayihadawhẹnamẹnu tọn hlan taidi agọjẹdonu ode awetọ he tin to nuhe mí na jlo nado wà po nuhe ogbẹ́ kọgbidinamẹ tọn nọ biọ dọ mí ni wà po ṣẹnṣẹn poun!

Mahopọnna hodidọ lẹ gbọn ayihadawhẹnamẹnu dali, gbọzangbọzan gbẹtọ lẹ ko magbe po nujikudo po mahopọnna mẹjitọ lẹ, whẹndo lẹ, po ogbẹ́ lọ pete po na ayihadawhẹnamẹnu yetọn dọna yé nado wàmọ wutu. Yèdọ mẹdelẹ tlẹ ko yin ojlonọ nado yí ogbẹ̀ yetọn do sanvọ́ na ayihadawhẹnamẹnu wutu! Podọ mahopọnna vogbingbọn họnwun lẹ he tin to aṣa aihọn tọn lẹ mẹ, nuyiwa mọnkọtọn lẹ taidi mẹhuhu, ajojijẹ, ayọdide, lalodido, podọ zanhẹmẹ hẹnnumẹ tọn nọ diblayin pinpọn lẹdo aihọn pe taidi nuhe ylan de. Be ehe ma na whẹwhinwhẹ́n na ayihadawhẹnamẹnu taidi jọwamọnu, nude heyin jiji po mẹde po ya?

Ayihadawhẹnamẹnu—Pọndohlan Biblu Tọn

Huhlọn hugan do hosọ ehe ji wẹ Jehovah Jiwheyẹwhe. To popolẹpo mẹ, “Ewọ [Jiwheyẹwhe] wẹ mẹhe da mí, etọn wẹ míwlẹ.” (Psalm 100:3) E mọnukunnujẹ lehe mí yin awuwlena gbọn dali ganji. Ohó Jiwheyẹwhe Tọn, Biblu, basi zẹẹmẹ dọ gbẹtọ yin didá to “boṣiọ” Jiwheyẹwhe tọn mẹ. (Gẹnẹsisi 1:26) Gbẹtọ yin didá po numọtolanmẹ nuhe yọ́n po nuhe ylan tọn po; sọn bẹjẹeji, ayihadawhẹnamẹnu yin apadewhe jijọ gbẹtọ tọn.—Yijlẹdo Gẹnẹsisi 2:16, 17 go.

Apọsteli Paulu do nugbo-yinyin ehe tọn hia to wekanhlanmẹ etọn mẹ hlan Lomunu lẹ, dọmọ: “Na whenuena Kosi lẹ, he ma tindo osẹ́n, wà onú he tin to osẹ́n mẹ lẹ gbọn jijọ dali, ehelẹ, le yé ma tindo osẹ́n, yé yin osẹ́n de hlan yede: to enẹ mẹ yé do azọ́n osẹ́n tọn he yè wlan do ayiha yetọn mẹ hia, ayiha yetọn ga sọ to kunnude, linlẹn yetọn lẹ sọ nọ to owhẹ̀ yenọzo tọn jẹ, eyin e mayin mọ yé na nọ mọhodọ na yenọzo.” (Lomunu lẹ 2:14, 15) Doayi e go dọ suhugan mẹhe ma ko yin pinpọn e go whẹ́n to Osẹ́n sọn olọn mẹ wá heyin nina Juvi lẹ glọ gbẹ nọ hodo delẹ to nunọwhinnusẹ́n osẹ́n Jiwheyẹwhe tọn lẹ mẹ, e mayin gbọn kọgbidinamẹnu ogbẹ́ tọn dali gba, ṣigba “gbọn jijọ dali”!

Whelọnu lo, kakati nido yin agbanpẹnmẹnu, ayihadawhẹnamẹnu yin nunina sọn olọn mẹ de, nuhọakuẹ de. Nugbo wẹ dọ, e sọgan hẹn awufiẹsa wá. Ṣigba whenuena eyin tonusena ganji, e sọgan sọ na alè numọtolanmẹ pekọ sisosiso po jijọho homẹ tọn lẹ po mí. E sọgan deanana, họ́, podọ whàn mí. The Interpreter’s Bible basi zẹẹmẹ dọmọ: “Agbasalilo apọnmẹ tọn po numọtolanmẹ tọn po sọgan yin hihọ́ basina kẹdẹ dile mẹdopodopo to tintẹnpọn nado de vogbingbọn he tin to nuhe e to wiwà po nuhe e lẹndọ emi dona wà lọ po mẹ do.” Nawẹ mẹde sọgan de vogbingbọn ehe pò gbọn? Be e yọnbasi nado wleawuna podọ plọ́n ayihadawhẹnamẹnu mítọn ya? Kanbiọ ehelẹ na yin dogbapọnna to hosọ he na bọdego lọ mẹ.