Yise Klistiani Tọn Na Yin Whiwhlepọn
“Na omẹ pó ma tindo yise gba.”—2 TẸSALONIKANU LẸ 3:2.
1. Nawẹ whenuho ko dohia gbọn dọ e mayin mẹlẹpo wẹ tindo yise nugbo gba?
GBỌN whenuho gblamẹ, sunnu, yọnnu, po ovi lẹ po he tindo yise nugbo lẹ tin. Hogbe zẹẹmẹ basinanu tọn lọ “nugbo” yin dehe sọgbe na omẹ livi susu devo lẹ wẹ ko do wunmẹ yise de he taidi dehe ma yọ́n yise hia, yèdọ awuwiwle nado yise matin dodonu kavi whẹwhinwhẹ́n he sọgbe. Yise mọnkọtọn ko nọ saba bẹ yẹwhe lalo lẹ kavi wunmẹ sinsẹ̀n-bibasi tọn he matin to kọndopọmẹ hẹ Ganhunupotọ lọ, Jehovah, po Ohó dehia etọn po hẹn. Gbọnmọ dali apọsteli Paulu wlan dọmọ: “Omẹ pó ma tindo yise gba.”—2 Tẹsalonikanu lẹ 3:2.
2. Naegbọn e yin onú titengbe nado gbadopọnna yise míde titi tọn?
2 Ṣigba hodidọ Paulu tọn zẹẹmẹdo dọ to whenẹnu dọ́n mẹdelẹ tindo yise nugbo podọ, to bladopọ mẹ, mẹdelẹ sọ wàmọ to egbehe ga. Suhugan mẹhe nọ hia linlinnamẹwe ehe tọn lẹ jlo nado tindo podọ nado jideji to yise nugbo tọn mẹ—yèdọ yise he tin to kọndopọmẹ hẹ oyọnẹn he pegan nugbo sọn olọn mẹ wá tọn lọ. (Johanu 18:37; Heblu lẹ 11:6) Be enẹ yinmọ po hiẹ po ya? To whelọnu lo e lẹzun dandannu dọ hiẹ dona yọnẹn bosọ wleawudai na nugbo lọ dọ yise towe na yin whiwhlepọn. Naegbọn enẹ sọgan yin didọ?
3, 4. Naegbọn mí dona pọnhlan Jesu gando whlepọn yise tọn go?
3 Mí dona yigbe dọ Jesu Klisti wẹ yin dodonu yise mítọn tọn. Na nugbo tọn, Biblu dọho gando ewọ go taidi Opodo yise mítọn tọn. Enẹ yinmọ na nuhe Jesu dọ bosọ wà lẹ wutu, titengbe lehe ewọ hẹn dọdai lẹ di do. E hẹn dodonu he ji gbẹtọvi lẹ sọgan ze yise nugbo sinai do lodo. (Heblu lẹ 12:2; Osọhia 1:1, 2) Etomọṣo, mí hia dọ Jesu yin ‘whiwhlepọn kẹdẹdi míwlẹ, ṣigba to matin ylando mẹ.’ (Heblu lẹ 4:15) Mọwẹ, yise Jesu tọn yin whiwhlepọn. Kakati nado hẹn mí gbọjọ kavi jẹflumẹ, enẹ dona miọnhomẹna mí.
4 Gbọn juju gbọn whlepọn daho lẹ mẹ etlẹ yin jẹ obá okú to yatin ji tọn mẹ, Jesu ‘plọn tonusise.’ (Heblu lẹ 5:8) Ewọ dohia dọ gbẹtọvi lẹ sọgan nọgbẹ gbọn yise nugbo dali mahopọnna whlepọn depope he sọgan wá yé ji. Ehe tindo zẹẹmẹ nujọnu tọn eyin mí lẹnnupọn do nuhe Jesu dọ gando hodotọ etọn lẹ go ji dọmọ: “Mì ni flin ohó he yẹn ko dọ hlan mì dọ, Afanumẹ ma klohu oklunọ etọn.” (Johanu 15:20) Na nugbo tọn, gando hodotọ etọn lẹ go to ojlẹ mítọn mẹ, Jesu dọ dọdai dọmọ: “Yè nasọ gbẹwanna mì to akọta lẹpo mẹ na oyín ṣie tọn wutu.”—Matiu 24:9.
5. Nawẹ Owe-wiwe lẹ dohia gbọn dọ mí na pannukọn whlepọn?
5 To bẹjẹeji owhe kanweko ehe tọn, whẹdida bẹjẹeji po owhé Jiwheyẹwhe tọn po. Owe-wiwe lẹ dọ dọdai dọmọ: “Ojlẹ lọ wá, bọ whẹdida na ṣẹ̀ sọn owhé Jiwheyẹwhe tọn gbè janwẹ; eyin mìwlẹ whẹwhẹ dè wẹ e ṣẹ̀ sọn, etẹwẹ opodo yé he ma setonuna wẹndagbe Jiwheyẹwhe tọn na yin? Yin e sọ yin, huhlọn tlala wẹ dodonọ lẹ nado gán, fie wẹ mẹylankan po ylandonọ lẹ po na gbọn?”—1 Pita 4:17, 18.
Yise Whiwhlepọn—Etẹwutu?
6. Naegbọn yise heyin whiwhlepọn yin nuhọakuẹ?
6 To linlẹn de mẹ, yise he mayin whiwhlepọn ma tindo nuhọakuẹ depope gba, podọ jẹhẹnu etọn lẹ gbọṣi mayọnẹn mẹ. Hiẹ sọgan yí ì jlẹdo akuẹ-yiwema he ma ko yin akuẹ de go. Hiẹ sọgan ko mọ akuẹ-yiwema de yí na azọ́n he hiẹ ko wà, na agbàn he hiẹ wleawuna, kavi etlẹ sọgan yin nunina de. Akuẹ-yiwema lọ sọgan taidi nuhe yọnwhanpẹ, ṣigba be mọwẹ ya? Be e họakuẹ sọ sọha akuẹ he sọawuhia to e ji lọ na nugbo tọn ya? Mọdopolọ, yise mítọn dona hugan awusọhia de po yíyí onù do dọ poun po. E dona yin whiwhlepọn eyin mí jlo na dohia dọ e tindo nugonu po jẹhẹnu nujọnu tọn po. To whenuena yise mítọn yin whiwhlepọn, mí sọgan mọdọ e dolido bosọ họakuẹ. Whlepọn de sọgan sọ do awà he ji yise mítọn tindo nuhudo kiklọwe kavi hinhẹn lodo te hia.
7, 8. Sọn asisa tẹmẹ wẹ whlepọn yise mítọn tọn lẹ nọ wá sọn?
7 Jiwheyẹwhe nọ na dotẹnmẹ homẹkẹn po whlepọn yise tọn devo lẹ po nado wá mí ji. Mí hia dọmọ: “Whenuena yè whle mẹde pọ́n, e dọmọ Jiwheyẹwhe dè wẹ yè whle e pọ́n sọn blo: na yè ma sọgan yí oylan do whle Jiwheyẹwhe pọ́n gba, mọ e masọ nọ whle mẹdepope pọ́n.” (Jakobu 1:13) Mẹnu kavi etẹwẹ nọ hẹn whlepọn mọnkọtọn lẹ wá? Satani, aihọn, po agbasa mape mílọsu tọn po wẹ.
8 Mí sọgan yigbe dọ Satani to nuyiwadomẹji huhlọnnọ de tindo do aihọn lọ ji, do lẹnpọn etọn po aliho etọn lẹ po ji. (1 Johanu 5:19) Podọ mí sọ yọnẹn vlavo dọ ewọ nọ fọ́n homẹkẹn dote sọta Klistiani lẹ. (Osọhia 12:17) Ṣigba be mí kudeji domọ dọ Satani to tintẹnpọn nado hẹn mí buali gbọn whinwhan agbasa mape mítọn dali, bo yí nuhe nọ dọnmẹ aihọn tọn lẹ donukọnna mí, po todido lọ po dọ mí na jogbe hlan whlepọn, bo vẹtoli do Jiwheyẹwhe, bo yin gbigbẹdai gbọn Jehovah dali ya? Na nugbo tọn, aliho nuyiwa Satani tọn lẹ ma dona paṣa mí gba, na ewọ yí nuyọnẹn wintinwintin dopolọ lẹ zan to whenuena e to tintẹnpọn nado whle Jesu pọ́n.—Matiu 4:1-11.
9. Nawẹ mí sọgan mọaleyi sọn apajlẹ yise tọn lẹ mẹ gbọn?
9 Gbọn Ohó etọn po agun Klistiani tọn po gblamẹ, Jehovah wleawu apajlẹ dagbe yise tọn he sọgan yin hihodo lẹ dai na mí. Paulu dotuhomẹnamẹ dọmọ: “Mẹmẹsunnu emi, mì yin mẹhodotọ ṣie, bosọ nọ doayi yé he to zọnlinzin do mọ lẹ go ga, yèdọ dile míwlẹ yin ohia de na mì do.” (Filippinu lẹ 3:17) Taidi dopo to devizọnwatọ yiamisisadode Jiwheyẹwhe tọn lẹ mẹ to owhe kanweko tintan whenu, Paulu yin nukọntọ to azọ́n yise tọn lẹ wiwà mẹ mahopọnna whlepọn dahodaho he ewọ tindo numimọ etọn lẹ. To vivọnu owhe kanweko 20tọ lọ tọn mẹ, mí ma gbọ̀agba apajlẹ yise mọnkọtọn lẹ tọn gba. Hogbe Heblu lẹ 13:7 tọn yinuwa to egbehe po huhlọn susu po taidi to whenuena Paulu wlan yé dai dọmọ: “Mì flin mẹhe to nukọntọ yin to mì ṣẹnṣẹn lẹ, mẹhe ko dọ ohó Jiwheyẹwhe tọn hlan mì lẹ, podọ dile mì to nulẹnpọn do lehe walọ yetọn te do mì hodo apajlẹ yise yetọn tọn, NW.”
10. Apajlẹ yise tọn tangan tẹlẹ wẹ mí tindo to ojlẹ agọe tọn lẹ mẹ?
10 Tudohomẹnamẹ enẹ tindo huhlọn vonọtaun to whenuena mí gbadopọnna nuhe yin kọdetọn walọyizan pipotọ mẹyiamisisadode lẹ tọn. Mí sọgan lẹnnupọndo apajlẹ yetọn ji bo hodo apajlẹ yise yetọn tọn. Yise yetọn yin yise nugbo he ko yin kiklọwe gbọn whlepọn lẹ dali. Po bẹjẹeji kleun de po yigodo jẹ 1870 lẹ, mẹmẹsunnu-yinyin Klistiani tọn lẹdo aihọn pé de ko wleawu. Taidi sinsẹ́n yise po akọndonanu mẹyiamisisadode lẹ tọn po sọn whenẹnu gbọ́n, hugan Kunnudetọ Jehovah tọn livi atọ́n daa wẹ to yẹwhehodọ bo to mẹplọ́n gando Ahọluduta Jiwheyẹwhe tọn go todin. Agun globu egbezangbe tọn heyin sinsẹ̀n-basitọ zohunhunnọ nugbonọ lẹ tọn yin kunnudenu yise heyin whiwhlepọn de tọn.—Titu 2:14.
Yise Whiwhlepọn Gando 1914 Go
11. Nawẹ 1914 yin titengbe na C. T. Russell po gbẹdohẹmẹtọ etọn lẹ po gbọn?
11 Owhe lẹ jẹnukọnna gbigbajẹgbonu wẹkẹ-whàn tintan tọn, pipotọ mẹyiamisisadode lẹ tọn ko to lilá dọ 1914 na yin azán ayidego tọn de to dọdai Biblu tọn mẹ. Ṣigba, delẹ to nukundido yetọn lẹ mẹ yin dehe ojlẹ yetọn gbẹ́ pò to nukọn, podọ pọndohlan yetọn na nuhe na wá jọ lẹ ma sọgbe mlẹnmlẹn gba. Di apajlẹ, C. T. Russell, azinponọ tintan Ogbẹ́ Watch Tower tọn, po gbẹdohẹmẹtọ etọn lẹ po sọgan mọdọ azọ́n yẹwhehodidọ tọn daho de yin dandannu. Yé hia dọmọ: “Yè nasọ dọyẹwheho wẹndagbe ahọludu tọn he to aigba fininọ lẹpo mẹ na okunnu de hlan akọta lẹpo; podọ whenẹnu wẹ opodo na wá.” (Matiu 24:14, King James Version) Nalete, nawẹ pipli he whè tlala yetọn sọgan wà enẹ gbọn?
12. Nawẹ gbẹdohẹmẹtọ Russell tọn lẹ dopo yigbe hlan nugbo Biblu tọn gbọn?
12 Lẹnnupọn do lehe ehe yinuwa do A. H. Macmillan, gbẹdohẹmẹtọ Russell tọn de ji do. Yin jiji to Canada, Macmillan ma ko pé owhe 20 mẹvi to whenuena e mọ owe Russell tọn lọ The Plan of the Ages (1886) yí. (Owe ehe, he sọ yin yiylọdọ Le divin plan des âges, lẹzun Bladopọ 1 owe debọdo-dego tọn heyin mimá gbayipe taidi Études des Écritures tọn. Bladopọ 2tọ, Le temps est proche [1889] tọn, dlẹnalọdo 1914 taidi opodo “ojlẹ Kosi lẹ tọn.” [Luku 21:24, KJ]) To ozán lọ he mẹ Macmillan jẹ hihia ẹ ji, e lẹnnupọn dọ: “Eyọn, enẹ dọnú taidi nugbo!” To alunlun 1900 tọn mẹ, e dukosọ hẹ Russell to plidopọ Biblu Plọntọ lẹ tọn de ji, dile Kunnudetọ Jehovah tọn lẹ nọ yin yiylọdọ to whenẹnu. To madẹnmẹ Macmillan yin bibaptizi bosọ jẹ azọ́nwa hẹ Mẹmẹsunnu Russell ji to tatọ-tẹnnọ Ogbẹ́ tọn to New York.
13. Nuhahun tẹwẹ Macmillan po mẹdevo lẹ po mọ gando hẹndi Matiu 24:14 tọn go?
13 Sinai do Biblu hihia yetọn ji, Klistiani yiamisisadode enẹlẹ dlẹnalọdo 1914 taidi ojlẹ diọdo titengbe tọn de to lẹndai Jiwheyẹwhe tọn mẹ. Ṣigba Macmillan po mẹdevo lẹ po yin pipaṣa lehe yẹwhehodidọ hlan akọta lẹpo heyin didọdai to Matiu 24:14 sọgan yin wiwadotana do to ojlẹ gli he pò lọ mẹ. E dọ to godo mẹ dọmọ: “Yẹn flin hodidọ gbọzangbọzan do enẹ ji hẹ Mẹmẹsunnu Russell, bọ ewọ dọmọ, ‘Eyọn, mẹmẹsunnu, mí tindo Juvi susu to New York hugan dehe tin to Jelusalẹm. Mí tindo susu omẹ Irlande tọn lẹ tofi hugan dehe tin to Dublin lẹ. Podọ mí tindo suhugan omẹ Italie tọn lẹ tofi hugan dehe tin to Lomu lẹ. Todin eyin mí jẹ yé dè tofi, enẹ na zẹẹmẹdo jijẹ gbẹtọ lẹpo dè po owẹ̀n lọ po.’ Ṣigba enẹ ma taidi nuhe na pekọ ayiha mítọn lẹ gba. Enẹwutu to whenẹnu linlẹn awuwiwlena ‘Photo-Drame de la création’ tọn wá aimẹ.”
14. Jẹnukọnna 1914, azọ́n vonọtaun tẹwẹ to yinyin wiwà?
14 Nukunnumọjẹnumẹ yọyọ nankọ die yizan “Photo-Drame de la creation” tọn hẹnwa! E kọ̀n yẹdide he nọ to yìyì lẹ po yẹdide adógo tọn sinmẹ mẹpọ́nnu tọn lẹ po dopọ, he nọ yin didohia to ojlẹ dopolọ mẹ po hodidọ Biblu tọn lẹ po gọna ohunhiho to agbán glamafonu tọn lẹ ji. To 1913, Atọ̀họ̀-Nuhihọ́ Lọ Tọn dọ dogbọn plidopọ de to Arkansas, États-Unis dali dọmọ: “E yin alọkẹyi po gbekọndopọ po dọ ojlẹ ko wá na yizan yẹdide he to yìyì tọn na nugbo Biblu tọn lẹ pinplọnmẹ. . . . [Russell] basi zẹẹmẹ dọ emi ko to azọ́nwa do tito ehe lọ ji na owhe atọ̀n lẹ podọ todin ko tindo yẹdide whanpẹnọ kanweko susu, ehe matin ayihaawe na dọ̀n gbẹtọ susu lẹ bo nasọ lá Wẹndagbe lọ, bo gọalọna gbẹtọ lẹ nado vọ́ yise yetọn hẹngọwa to Jiwheyẹwhe mẹ.”
15. Kọdetọn nankọtọn lẹ wẹ “Photo-Drame” lọ tindo?
15 “Photo-Drame” lọ wà enẹ pẹpẹ to didohia tintan etọn godo to janvier 1914. Bọdego wẹ linlin lẹ sọn Atọ̀họ̀-Nuhihọ́ Lọ Tọn 1914 tọn mẹ:
1er avril: “Agbago-gán de, to whenuena e ko pọ́n adà awe godo, dọmọ, ‘Yẹn ko mọ odaa PHOTO-DRAME DE LA CRÉATION lọ tọn poun, ṣigba ko plọn onú susu gando Biblu lọ go sọn e mẹ hugan dehe yẹn ko plọn na owhe atọ̀n wehọmẹ daho sinsẹ̀n-nuplọnmẹ tọn ṣie lẹ mẹ.’ To whenuena Juvi de pọ́n ẹn godo e dọ dọ, ‘Yẹn tọ́n yì taidi Juvi he pọnte de hugan whenuena yẹn biọ họmẹ.’ Yẹwhenọ po yẹwhenọ-yọnnu pamẹnọtọ susu Katoliki tọn lẹ po ko mọ DRAME lọ bosọ do pinpẹn-nutọn-yinyọnẹn daho de hia. . . . Adà debọdo-dego wiawe DRAME lọ tọn poun wẹ ko yin fifo . . . Ṣogan mí ko jẹ bosọ to dido e hia todaho gbàn-nukun-dopo lẹ . . . Hugan gbẹtọ fọtọ́n donu gbán-atọ́n to gbedopo wẹ to pinpọn ẹn, sisè, yin pipaṣa, to nulẹnpọn bosọ to yinyin didona.”
15 juin: “Yẹdide lọ lẹ ko hẹn mi yin zohunhunnọ hugan nado lá Nugbo lọ, bo ko hẹn owanyi ṣie jideji na Otọ́ Olọn mẹ tọn po Mẹmẹsunnu Mẹho vivẹ́ mítọn Jesu po. Yẹn nọ hodẹ̀ egbesọegbesọ na dona adọkunnọ hugan Jiwheyẹwhe tọn do PHOTO-DRAME DE LA CRÉATION lọ po mẹhe tindo mahẹ to zize e donukọnnamẹ lẹpo po ji . . . Yẹn wẹ devizọnwatọ mìtọn to Ewọ mẹ, F. W. KNOCHE.—Iowa.”
15 juillet: “Mí jaya nado doayi nuyiwadomẹji dagbe mẹpaṣa tọn he yẹdide lẹ ko jo dai to todaho ehe mẹ go, podọ mí tindo numọtolanmẹ nujikudo tọn dọ kunnudide hlan aihọn lọ ehe sọ to yinyin yiyizan nado bẹ mẹsusu he na kunnudenu yinyin nuhọakuẹ mẹdide Oklunọ lọ titi tọn lẹ pli. Mí yọnẹn dogbọn sọha vude Biblu plọntọ zohunhunnọ lẹ tọn dali he to gbẹdohẹ Klasi lọ taidi kọdetọn azọ́n Photo-Drame lọ tọn. . . . Mẹmẹyọnnu mìtọn to Oklunọ mẹ, EMMA L. BRICKER.”
15 novembre: “Mí tindo jide dọ mì na yin ayajẹnọ nado sè dogbọn kunnudide jiawu he to yinyin nina dogbọn yizan PHOTO-DRAME DE LA CRÉATION lọ dali to Owhé Hànjitẹn Londre tọn, to Kingsway. Alọ anademẹ Oklunọ tọn ko yin sisọhia po nujiawu po to zẹẹmẹ gigọ́ nudohia ehe tọn lẹpo mẹ bọ mẹmẹsunnu lẹ to ayajẹ taun . . . Mẹplidopọ mítọn lẹ wá sọn ogbẹ́ po wunmẹ gbẹtọ tọn lẹpo po mẹ; mí ko sọ doayi nukọntọ sinsẹ̀n tọn susu go to mẹplidopọ lẹ mẹ. Mẹnọmẹtẹnmẹ sinsẹ̀ngán tọn dopo . . . biọ tike na ewọ po asi etọn po nido sọgan wá vọ́ ẹ pọ́n whladopo dogọ. Nukọntọ Ṣọṣi Angleterre tọn de ko yì pọ́n DRAME lọ whlasusu, bo . . . ko hẹn susu họntọn etọn lẹ tọn wá nado pọ́n ẹn. Biṣọpu awe ko sọ wá pọ́n ẹn ga, gọna omẹ diyin susu.”
1er décembre: “Asi ṣie po yẹn po na nugbo tọn dopẹna Otọ́ Olọn mẹ tọn mítọn na dona daho họakuẹ he ko wá mí dè gbọn azọ́nwanu towe dali. PHOTO-DRAME towe wẹ ko zọ́n bọ mí mọ bosọ kẹalọyi Nugbo lọ . . . Mí tindo bladopọ ṣidopo ÉTUDES DES ÉCRITURES towe tọn. Alọgọnamẹnu daho de wẹ yé yin.”
Gbeyiyi Hlan Whlepọn lẹ to Whenẹnu
16. Naegbọn 1914 hẹn whlepọn yise tọn de wá?
16 Etẹwẹ, to whelọnu lo, to whenuena Klistiani mẹdezejotọ ahundoponọ enẹlẹ mọdọ todido yetọn nado yin kinkọndopọ hẹ Oklunọ to 1914 mayin hinhẹndi? Mẹyiamisisadode enẹlẹ jù gbọn ojlẹ whlepọn sinsinyẹn taun tọn lẹ mẹ. Atọ̀họ̀-Nuhihọ́ Lọ Tọn (Glẹnsigbe) 1er novembre 1914 tọn lá dọmọ: “Mì gbọ mí ni flin dọ mí tin to ojlẹ mẹwhlepọn tọn mẹ.” Gando ehe go, Les Témoins de Jéhovah—Prédicateurs du Royaume de Dieu (1993) dọmọ: “Na nugbo tọn, owhe lẹ sọn 1914 jẹ 1918, sọawuhia nado yin ‘ojlẹ mẹwhlepọn tọn de’ na Biblu Plọntọ lẹ.” Be yé na dike na yise yetọn ni yin kiklọwe bọ linlẹn yetọn na yin vivọjlado na yé nido sọgan kẹalọyi azọ́n daho he tin to nukọnna yé lọ ya?
17. Nawẹ mẹyiamisisadode nugbonọ lẹ yinuwa hlan pipò to aigba ji to 1914 godo gbọn?
17 Atọ̀họ̀ Nuhihọ́ Lọ Tọn (Glẹnsigbe) 1er septembre, 1916 tọn, dọmọ: “Mí lẹndọ azọ́n bibẹpli Ojijẹ Ṣọṣi [mẹyiamisisadode lẹ] tọn na yin tadona jẹnukọnna opodo Ojlẹ Kosi lẹ tọn wẹ; ṣigba nudepope di enẹ nkọ mayin didọ to Biblu mẹ gba. . . . Be mí yin awublanọ na azọ́n Jibẹwawhé tọn gbẹ́ to nukọnzindo wutu wẹ? . . . Mẹmẹsunnu vivẹ emì, walọyizan mítọn dinvie tọn, dona yin pẹdido daho tọn dohlan Jiwheyẹwhe, pinpẹn-nutọn-yinyọnẹn na Nugbo yọnwhanpẹ dogọ lọ he Ewọ ko na mí lẹblanulọkẹyi yinyin mimọ podọ yinyin hiadogona hẹ, podọ vivẹnudido yiaga dogọ to alọgigọ nado hẹn Nugbo enẹ jẹ oyọnẹn mẹdevo lẹ tọn mẹ.” Yise yetọn ko yin zize do whlepọn de mẹ, ṣogan yé pannukọn whlepọn enẹ bosọ pehẹ ẹ po kọdetọn dagbe po. Ṣigba mí Klistiani lẹ dona yọnẹn dọ whlepọn yise tọn sọgan sù bosọ gbọnvo.
18, 19. Whlepọn yise tọn devo tẹlẹ wẹ hodo okú Mẹmẹsunnu Russell tọn na omẹ Jiwheyẹwhe tọn lẹ?
18 Di apajlẹ, whlepọn wunmẹ devo wá pipotọ mẹyiamisisadode lẹ tọn ji to okú Mẹmẹsunnu Charles T. Russell tọn godo tlolo. Enẹ yin whlepọn nugbonọ-yinyin po yise yetọn po tọn. Mẹnu wẹ yin “afanumẹ nugbonọ” Matiu 24:45 mẹ tọn lọ? Mẹdelẹ lẹndọ Mẹmẹsunnu Russell lọsu na ede wẹ, bọ yé gbẹ́ nado kọngbedopọ hẹ tito titobasinanu tọn yọyọ lẹ. Eyin ewọ ko yin afanumẹ lọ, etẹwẹ mẹmẹsunnu lẹ na wà todin he ewọ ko kú? Be yé dona hodo omẹ yọyọ he yin dide devo de wẹ, kavi be din wẹ ojlẹ lọ nado yọnẹn dọ Jehovah to zinzan, e mayin omẹ dopo poun de gba, ṣigba pipli blebu Klistiani tọn lẹ de taidi azọ́nwanu de, kavi hagbẹ afanumẹ tọn de ya?
19 Whlepọn dogọ wá Klistiani nugbo lẹ ji to 1918 to whenuena nukọntọ aihọn tọn lẹ, yin whinwhan dogbọn nukọntọ sinsẹ̀n Mẹylọhodotọklisti tọn lẹ dali, bo ‘wleawu oylan gbọn osẹ́n dali’ sọta titobasinanu Jehovah tọn. (Psalm 94:20, KJ) Agbowhẹn homẹkẹn danuwiwa tọn de yin awuwlena sọta Biblu Plọntọ lẹ to Agewaji Amelika tọn podọ to Europe. Nukundiọsọmẹ heyin finfọndote gbọn nukọntọ sinsẹ̀n tọn lẹ dali wá agayiyi de kọ̀n to 7 mai 1918, to whenuena gbedide mẹwiwle États-Unis tọn yin zinzinjẹgbonu na wiwle J. F. Rutherford po gbẹdohẹmẹtọ pẹkipẹki etọn susu lẹ po gọna A. H. Macmillan. Yé yin owhẹ̀ lalo agọjẹdo gandudu tọn sadokọna, bọ aṣẹpipa lẹ gbẹ́ owhẹvọylọ homẹvọnọ tọn yetọn dai.
20, 21. Dile e yin didọdai to Malaki 3:1-3 mẹ do, azọ́n tẹwẹ yin wiwà to mẹyiamisisadode lẹ ṣẹnṣẹn?
20 Dile e ma tlẹ yin yinyọnẹn domọ do to whenẹnu, azọ́n nuklọwe tọn de to yìyì, dile e yin zẹẹmẹ etọn basi do to Malaki 3:1-3 dọmọ: “Mẹnu wẹ sọgan nọtepọn azán wiwá etọn tọn? podọ mẹnu wẹ na nọte whenuena e sọawuhia? na [wẹnsagun alẹnu tọn lọ] tin taidi miyọ́n gànkọ̀ntọ de tọn, podọ taidi adí avọ̀yantọ tọn: podọ ewọ na sinai di gànkọ̀ntọ de po kiklọtọ fataka tọn po, ewọ bo nasọ klọ́ visunnu Levi tọn lẹ, bosọ klọ́ yé wé di sika po fataka po; yé bo nasọ nọ na avọ́ nunina lẹ hlan OKLUNỌ to dodo mẹ.”
21 Dile Wẹkẹ-whàn I to dindọn sẹpọ vivọnu, delẹ to Biblu Plọntọ lẹ mẹ pannukọn whlepọn yise tọn devo—vlavo yé na hẹn kadaninọ yetọn go gligli gando whẹho awhànfunfun tọn go. (Johanu 17:16; 18:36) Mẹdelẹ ma wàmọ gba. Enẹwutu to 1918, Jehovah do “wẹnsagun alẹnu tọn lọ” hlan, yèdọ Klisti Jesu, hlan tito tẹmpli gbigbọmẹ tọn Etọn mẹ nado klọ́ hagbẹ kleun sinsẹ̀n-basitọ Etọn lẹ tọn wé sọn dihonu aihọn tọn lẹ mẹ. Mẹhe jo yedelẹ na yise nugbo didohia lẹ plọnnu sọn numimọ lọ mẹ bosọ yin whinwhan, bo to yẹwhehodọ po zohunhun po zọnmii.
22. Gando whlepọn yise tọn go, etẹwẹ pò nado yin dogbapọnna?
22 Nuhe mí ko gbadopọnna lọ mayin whenuho awuvivi tọn he ko juwayi de poun gba. E gando ninọmẹ gbigbọmẹ tọn heyin agun lẹdo aihọn pé Jehovah tọn go tlọlọ. Ṣigba mì gbọ na mí ni gbadopọnna delẹ to whlepọn yise tọn lẹ heyin pipehẹ dogbọn omẹ Jiwheyẹwhe tọn lẹ dali to egbehe bo pọ́n lehe mí sọgan duto ehelẹ ji po kọdetọn dagbe po do to hosọ he na bọdego lọ mẹ.
Be Hiẹ Flin Ya?
● Naegbọn omẹ Jehovah tọn lẹ dona donukun dọ yise yetọn dona yin whiwhlepọn?
● Wunmẹ vivẹnudido nado hẹn wẹndomẹ Jiwheyẹwhe tọn gbayipe tẹlẹ wẹ ko yin awuwlena jẹnukọnna 1914?
● Etẹwẹ “Photo-Drame” lọ yin, podọ kọdetọn tẹlẹ wẹ e detọn?
● Nawẹ nujijọ 1914-18 tọn lẹ yinuwa nado whle mẹyiamisisadode lẹ pọ́n gbọn?
[Yẹdide to weda 12]
Sẹpọ vivọnu owhe kanweko lọ tọn, gbẹtọ lẹ to aigba susu ji to Biblu plọn po alọgọ debọdo-dego “L’Aurore du Millénium” tọn po, he to godo mẹ yin yiylọdọ “Études des Écritures”
[Yẹdide to weda 13]
Wekanhlanmẹ de sọn C. T. Russell dè po owe homẹbibiọ tọn po na hoyidokanji de to ehe mẹ ewọ dọmọ: “ ‘Photo-Drame de la création’ yin zizedonukọnnamẹ gbọn IBSA—Ogbẹ́ Biblu Plọntọ Akọjọpli tọn lẹ dali. Lẹndai etọn yin nuplọnmẹ gbangba tọn to kọndopọmẹ hẹ hukan sinsẹ̀n po lẹnunnuyọnẹn po tọn, podọ to avunlọyiyina Biblu mẹ”
[Yẹdide to weda 15]
Demetrius Papageorge basi gbejizọnlin bo to “Photo-Drame de la création” lọ dohia. To godo mẹ, e yin zize do ganpamẹ na kadaninọ Klistiani tọn etọn wutu