Be Hiẹ Yọ́n Pinpẹn Titobasinanu Jehovah Tọn Ya?
“Le wẹ OKLUNỌ dọ, olọn wẹ ofin ṣie, aigba wẹ tokloafọligbe ṣie tọn.”—ISAIA 66:1.
1, 2. (a) Kunnudenu yinukundomọ titobasinanu Jehovah tọn tẹwẹ hiẹ sọgan dlẹnalọdo? (b) Fie wẹ Jehovah nọ nọ̀?
BE HIẸ yise dọ Jehovah tindo titobasinanu de ya? Eyin mọwẹ, naegbọn hiẹ yí ì sè? Hiẹ sọgan na gblọndo dọ: ‘Eyọn, mí tindo Plitẹnhọ Ahọluduta tọn de. Mí tindo agun heyin titobasina ganji de po pipli mẹho lẹ tọn de po. Mí tindo nugopọntọ lẹdo tọn he yin dide lẹ he nọ dla mí pọ́n to gbesisọmẹ. Mí nọ yì plidopọ lẹdo po agbegbe tọn po heyin titobasina ganji lẹ. Mí tindo wekantẹn alahọ Ogbẹ́ Watch Tower tọn de to otò mítọn mẹ. Na jide tọn, ehe lẹpo po susu devo lẹ po dohia dọ Jehovah tindo titobasinanu he to azọ́nwa de.’
2 Adà enẹlẹ yin kunnudenu titobasinanu de tọn. Ṣigba eyin nuhe mí mọ bosọ yọnẹn lẹpo wẹ tin tofi to aigba ji, be mí ma ko tindo nukunnumọjẹnumẹ gigọ́ titobasinanu Jehovah tọn gba. Jehovah dọna Isaia dọ aigba lọ yin tokloafọligbe Etọn tọn poun, ṣigba olọn lẹ wẹ yin ofin Etọn. (Isaia 66:1) Hlan “olọn” detẹ wẹ Jehovah to alọdlẹndo? Hlan agahomẹ mítọn ya? Hlan dovlo mẹ ya? Kavi hlan obá gbẹninọ tọn devo lẹ ya? Isaia dọho dogbọn ‘aisintẹn walọwiwe po whanpẹ’ Jehovah tọn po dali, podọ psalmkantọ lọ basi zẹẹmẹ olọn ehelẹ tọn taidi “aisintẹn etọn.” Gbọnmọ dali, “olọn” he tin to Isaia 66:1 mẹ dlẹnalọdo agblò mayinukundomọ gbigbọmẹ tọn ehe mẹ Jehovah tindo otẹn nupojipetọ, kavi he klohugan lọ te.—Isaia 63:15; Psalm 33:13, 14.
3. Nawẹ mí sọgan dù to ayihaawe tintindo ji gbọn?
3 Enẹwutu, eyin mí jlo na mọnukunnujẹemẹ bosọ yọ́n pinpẹn titobasinanu Jehovah tọn, mí dona pọ́n hlan olọn lẹ. Podọ enẹ wẹ nọ yin nuhahun de na mẹdelẹ. To whenuena e yindọ titobasinanu olọn mẹ Jehovah tọn yin mayinukundomọ, nawẹ mí yọnẹn gbọn dọ e tin na nugbo tọn? Mẹdelẹ tlẹ sọgan jugbọn ojlẹ ayihaawe tintindo tọn mẹ, bo yin pipaṣa dọ, ‘Nawẹ mí sọgan tindo jide gbọn?’ Eyọn, nawẹ yise sọgan dù to ayihaawe tintindo ji gbọn? Aliho tangan awe lẹ wẹ oplọn vẹkuvẹku Ohó Jiwheyẹwhe tọn mẹdetiti tọn gọna yìyì po mahẹ gbesisọ tọn tintindo to opli Klistiani tọn lẹ mẹ po. Whenẹnu wẹ ayihaawe tintindo mítọn sọgan yin didesẹ gbọn hinhọ́n nugbo lọ tọn dali. Devizọnwatọ Jiwheyẹwhe tọn devo lẹ tin he ko tindo ayihaawe pọ́n. Mì gbọ̀ na mí ni gbadopọnna whẹho mẹmẹsi Eliṣa tọn to whenuena Islaeli tin to mẹgbeyinyan glọ gbọn ahọlu Silia tọn dali.—Yijlẹdo Johanu 20:24-29; Jakobu 1:5-8 go.
Omẹ lọ He Mọ Awhànpa Olọn mẹ Tọn Lẹ
4, 5. (a) Nuhahun tẹwẹ mẹmẹsi Eliṣa tọn tindo? (b) Nawẹ Jehovah yigbe hlan odẹ̀ Eliṣa tọn gbọn?
4 Ahọlu Silia tọn do awhànpa huhlọnnọ de hlan Dotani to zanmẹ nado wle Eliṣa. To whenuena mẹmẹsi Eliṣa tọn fọ́n to afọnnu fuu bo tọ́n jẹgbonu, vlavo nado yí jẹhọn fifá to ozà plẹsẹ ohọ̀ fininọ Ṣẹnṣẹn Whèzẹtẹn yetọn tọn ji, etẹ, nuhẹnmẹ jọsi nankọ die he ewọ mọ! Awhànpa blebu Silia tọn de po osọ́ lẹ po gọna kẹkẹ lẹ lẹdo otò lọ pé, tin to ote nado wle yẹwhegan Jiwheyẹwhe tọn. Mẹmẹsi lọ dawhá jẹgbonu hlan Eliṣa dọmọ: “Ṣó, mẹmẹnu ṣie! Na mí na wà do?” Kunnudenu dohia dọ, po whiwhẹ po gọna nujikudo, Eliṣa yigbe dọmọ: “A dibu blo: na yé he tin to mí dè yin susu hú yé he tin to yé dè.” Mẹmẹsi lọ dona ko yin pipaṣa dọ, ‘Fie wẹ yé tin te? Yẹn ma sọgan mọ yé nẹ!’ Enẹ sọgan yin nuhahun mítọn to whedelẹnu—awugbopo nado mọ po nukun nukunnumọjẹnumẹ tọn lẹ po, kavi nado yọ́n, awhànpa olọn mẹ tọn lẹ.—2 Ahọlu lẹ 6:8-16; Efesunu lẹ 1:18.
5 Eliṣa hodẹ̀ na nukun mẹmẹsi etọn tọn lẹ nido yin hùnhùn. Etẹwẹ jọ̀ to enẹgodo? “OKLUNỌ sọ hùn nukun yọpọ sunnu lọ tọn lẹ; ewọ sọ mọ: bo doayi e go, osó lọ tin gọ́ na osọ́ lẹ po kẹkẹ miyọ́n tọn lẹ po, lẹdo Eliṣa pé.” (2 Ahọlu lẹ 6:17) Mọwẹ, ewọ mọ awhànpa olọn mẹ tọn lẹ, yèdọ awhànpa angẹli lẹ tọn he tin to ote nado basi hihọ́ na devizọnwatọ Jiwheyẹwhe tọn. Todin ewọ sọgan mọnukunnujẹ jidide Eliṣa tọn mẹ.
6. Nawẹ mí sọgan tindo wuntuntun do titobasinanu olọn mẹ Jehovah tọn ji gbọn?
6 Be mí nọ tindo nuhahun nukunnumọjẹnumẹ tọn to whedelẹnu taidi dehe mẹmẹsi Eliṣa tọn tindo wẹ ya? Be mí nọ yin whinwhan nado mọ adà gbangba ninọmẹ he to míwlẹ kavi azọ́n Klistiani tọn ze do owù mẹ to aigba delẹ ji poun wẹ ya? Eyin mọwẹ, be mí sọgan donukun numimọ vonọtaun de nado na nukunnumọjẹnumẹ mí wẹ ya? Lala, na mí tindo nude he mẹmẹsi Eliṣa tọn ma tindo—owe blebu de he bẹ numimọ susu hẹn, yèdọ Biblu lọ, ehe sọgan na wuntuntun mí do titobasinanu olọn mẹ tọn ji. Ohó gbọdo enẹ sọ nọ na nunọwhinnusẹ́n anademẹ tọn lẹ nado jlọ linlẹn po aliho gbẹzan tọn mítọn lẹ po dote. Etomọṣo, mí dona dovivẹnu nado dín wuntuntun bosọ wleawuna pinpẹn-nutọn-yinyọnẹn na tito Jehovah tọn. Podọ enẹ wẹ mí sọgan wà gbọn oplọn mẹdetiti tọn, gọna odẹ̀ po ayihamẹlinlẹnpọn po dali.—Lomunu lẹ 12:12; Filippinu lẹ 4:6; 2 Timoti 3:15-17.
Nupinplọn Nado Mọnukunnujẹnumẹ
7. (a) Nuhahun tẹwẹ mẹdelẹ sọgan tindo po oplọn Biblu mẹdetiti tọn po? (b) Naegbọn oplọn mẹdetiti tọn do jẹ na vivẹnudido etọn?
7 Oplọn mẹdetiti tọn ma yin nukundido awuvivi tọn de na mẹsusu gba, taidi mẹhe ma nọ duvivi nupinplọn to wehọmẹ gbede lẹ kavi ma tindo dotẹnmẹ hundote lọ nado tindo mahẹ to e mẹ gbede pọ́n lẹ. Etomọṣo, eyin mí jlo nado tindo nukunnumọjẹnumẹ bo yọ́n pinpẹn titobasinanu Jehovah tọn po nukun nukunnumọjẹnumẹ tọn mítọn lẹ po, mí dona wleawuna ojlo nado plọnnu. Be hiẹ sọgan duvivi núdùdù dagbe de tọn matin awuwiwle ya? Dile núdùdù-datọ depope na dọna we do, azọ́n susu nọ yin wiwà to awuwiwlena núdùdù vivi de mẹ. Ṣogan, e sọgan yin dùdù vọ̀ to nukunwhiwhe ogbàn kavi whè humọ mẹ. To alọ devo mẹ, alemọyi oplọn mẹdetiti tọn lẹ sọgan dẹn na gbẹzan blebu. Oplọn mẹdetiti tọn sọgan lẹzun nude he mí nọ jẹ vivi etọn dù ji vudevude to whenuena mí mọ nukọnyiyi he mí to bibasi. Apọsteli Paulu gbọn gbesisọ dali dọ dọ mí dona payi míde go po nuplọnmẹ mítọn po bo to nukọnyi nado jó míde na wehihia gbangba tọn. Vivẹnudido gbesisọ tọn yin bibiọ, ṣigba alemọyi lẹ sọgan yin kakadoi tọn.—1 Timoti 4:13-16.
8. Walọyizan tẹwẹ Howhinwhẹn lẹ na ayinamẹ etọn?
8 Dawe nuyọnẹntọ hohowhenu tọn de dọmọ: “Ovi ṣie, eyin hiẹ na yí ohó ṣie lẹ, bosọ bẹ gbedide ṣie pli do dè we. Sọmọ bọ hiẹ lẹ́ otó towe hlan nuyọnẹn go, bosọ jlẹ ayiha towe hlan ayitunnugo. Nugbo eyin hiẹ to awhádo hodo nuyọnẹn, bosọ ze ogbè towe daga na ayitunnugo; eyin hiẹ dín in di fataka, bosọ dín in di adọkunnu he whlá. Whenẹnu wẹ hiẹ na tunwun osí OKLUNỌ tọn, bo nasọ mọ oyọnẹn Jiwheyẹwhe tọn.”—Howhinwhẹn lẹ 2:1-5.
9. (a) Nawẹ nuhọakuẹ sika tọn yin yiyijlẹdo “oyọnẹn Jiwheyẹwhe tọn” go gbọn? (b) Nuhudo azọ́nwanu tẹlẹ tọn wẹ mí tindo nado mọ oyọnẹn he pegan yí?
9 Be hiẹ yọ́n mẹhe ji azọngban lọ tin te ya? ‘Eyin hiẹ’ yin hodidọ lọ he yin dọvọdọ basina. Podọ doayi hodidọ lọ go, ‘Eyin hiẹ dín in di adọkunnu he whlá.’ Lẹnnupọndo mẹhe nọ kùn adọkunnu sọn aigba glọ lẹ ji he na owhe kanweko lẹ nọ to fataka po sika po kùn to Afrique du Sud, Bolivie, po Mexique po, gọna otò susu devo lẹ. Yé nọ wazọ́n sinsinyẹn, nọ yí dokunnu lẹ po fẹli lẹ po zan, nado kùn osé he mẹ yé na mọ nuyizan họakuẹ lọ lẹ te. Yé nọ yí nukun nuhọakuẹ tọn do pọ́n sika sọmọ bọ to dokunkun dopo mẹ to Californie, États-Unis, yé kùn odò aigba glọ tọn kilomẹtlu 591 lẹ, he siso diblayi kilomẹtlu 1.5 nkọtọn—nado dín sika poun. Ṣogan, be hiẹ sọgan dù sika wẹ ya? Nù sika ya? Be e na hẹn ogbẹ̀ towe dote to danfafa de ji eyin hiẹ to kukujei na huvẹ po sinnugbla po wẹ ya? Lala, nuhọakuẹ etọn yin nukunta po whanpẹ mẹdetiti tọn po poun, he nọ to didiọ egbesọegbesọ dile e yin didohia to ahi akọjọpli tọn mẹ do. Ṣogan, gbẹtọ lẹ ko kú na ẹn. Todin vivẹnu nẹmu wẹ dona yin dido nado mọ sika gbigbọmẹ tọn, yèdọ “oyọnẹn Jiwheyẹwhe tọn” lọ? Lẹnnupọn deji, yèdọ oyọnẹn taun Oklunọ Nupojipetọ wẹkẹ lọ tọn, titobasinanu etọn, po lẹndai etọn lẹ po! To whẹho ehe mẹ, mí sọgan yí dokunnu po fẹli gbigbọmẹ tọn lẹ po zan. Enẹlẹ wẹ owe sinai do Biblu ji lẹ he nọ gọalọna mí nado kùndò biọ Ohó Jehovah tọn mẹ bo yọ́n zẹẹmẹ etọn.—Job 28:12-19.
Wuntuntun Kùnkùn
10. Etẹwẹ Daniẹli mọ to numimọ de mẹ?
10 Mì gbọ na mí ni basi dokunkun gbigbọmẹ tọn delẹ nado jẹ oyọnẹn titobasinanu olọn mẹ tọn Jehovah tọn tindo ji. Na wuntuntun titengbe de, mì gbọ na mí ni lẹhlan numimọ Daniẹli tọn heyin Hohotọ Azán lẹ tọn to ofin etọn ji. Daniẹli wlan dọmọ: “Yẹn to pinpọn yè do ze ofin lẹ dlan ai, bọ mẹde heyin hohotọ azán lẹ tọn sinai: avọ̀ etọn yin wewe di osinago, podọ oda ota etọn tọn taidi lẹngbọfun wiwe; ozolọ miyọnnọ lẹ wẹ ofin etọn, podọ kẹkẹfọ etọn miyọ́n jiji. Asisa miyọnnọ de tọ́n jẹgbonu sọn ewọ nukọn wá: fọtọ́n fọtọ́n lẹ to devizọnwa hlan ẹn, podọ fọtọ́n ao donu fọtọ́n ao ṣite to ewọ nukọn: yè ze whẹdida lọ dai, yè sọ hùn owe lẹ.” (Daniẹli 7:9, 10) Mẹnu wẹ yin fọtọ́n susu ehelẹ he to devizọnwa hlan Jehovah? Alọdlẹndonu ṣẹnṣẹn tọn to Traduction du monde nouveau mẹ, yí “dokunnu lẹ” po “fẹli lẹ” po zan, he plan mí jẹ alọdlẹndonu mọnkọtọn lẹ kọ̀n taidi Psalm 68:17 po Heblu lẹ 1:14 po. Mọwẹ, mẹhe to devizọnwa ehelẹ wẹ angẹli olọn tọn lẹ!
11. Nawẹ numimọ Daniẹli tọn sọgan gọalọna mí nado mọnukunnujẹ hogbe Eliṣa tọn lẹ mẹ gbọn?
11 Linlin Daniẹli tọn ma dọ dọ ewọ mọ angẹli nugbonọ lẹpo he Jiwheyẹwhe tindo to gbedide etọn glọ lẹ gba. Livi susu devo lẹ sọgan sọ tin. Ṣigba po jide po mí sọgan mọnukunnujẹemẹ nuhewutu Eliṣa sọgan dọmọ: “Na yé he tin to mí dè yin susu hú yé he tin to yé dè.” Awhànpa ahọlu Silia tọn, dile yé tlẹ yin godonọna gbọn angẹli lalonọ lẹ, yèdọ aovi lẹ dali do, ma sù sọ awhànpa olọn mẹ Jehovah tọn lẹ gba!—Psalm 34:7; 91:11.
12. Nawẹ hiẹ sọgan yọ́n nususu dogọ gando angẹli lẹ go gbọn?
12 Vlavo hiẹ na jlo nado yọ́n onú susu dogọ gando angẹli ehelẹ go, taidi azọngban yetọn to Jehovah sinsẹ̀n mẹ. Sọn hogbe Glẹki tọn lọ na angẹli mẹ, mí sọgan mọdọ yé yin wẹnsagun lẹ na e sọ zẹẹmẹdo “wẹnsagun” ga. Etomọṣo, azọngban yetọn lẹ sù hugan mọ. Nalete, nado mọdona nuhe ehe yin, hiẹ dona kùndò. Eyin hiẹ tindo Insight on the Scriptures to aimẹ, hiẹ sọgan plọn hosọ lọ “Angẹli lẹ,” kavi hiẹ sọgan gbadopọnna hosọ he ko wayi lẹ to Atọ̀họ̀-Nuhihọ́ Lọ Tọn mẹ gando angẹli lẹ go. Hiẹ na yin pipaṣa lehe nuhe hiẹ na plọn dogbọn devizọnwatọ olọn mẹ Jiwheyẹwhe tọn ehelẹ dali sù sọ bo nasọ wá mọnukunnujẹ godonọnamẹ yetọn mẹ. (Osọhia 14:6, 7) Etomọṣo, to titobasinanu olọn mẹ Jiwheyẹwhe tọn mẹ, nudida gbẹ̀te gbigbọnọ delẹ tindo lẹndai vonọtaun delẹ.
Nuhe Isaia Mọ
13, 14. Etẹwẹ Isaia mọ to numimọ mẹ, podọ nawẹ ehe yinuwa do ewọ ji gbọn?
13 Todin mì gbọ̀ na mí ni basi dokunkun delẹ to numimọ Isaia tọn mẹ. To whenuena hiẹ hia weta 6, wefọ 1 jẹ 7, hiẹ dona yin nuyiwadeji. Isaia dọ dọ emi “mọ OKLUNỌ sinai to ofin he yiaga ji,” podọ “[selafu] lẹ nọte to aga etọn.” Yé to awhá gigo Jehovah tọn tọn dó, bo to gigopana wiwe-yinyin etọn. Hiẹ dona yin nuyiwadeji gbọn linlin ehe hihia dali. Etẹwẹ yin nuyiwa Isaia tọn? “Whenẹnu wẹ yẹn dọmọ, Dindọn wẹ yẹn na yẹn pota; na yẹn basi omẹ nùflo mawenọ, yẹn sọ tin to ṣẹnṣẹn nùflo mawenọ lẹ tọn: na nukun ṣie ko mọ ahọlu, OKLUNỌ awhànpa lẹ tọn.” Lehe ewọ yin nuyiwadeji gbọn numimọ enẹ dali do sọ! Be mọwẹ e yin na hiẹ lọsu ya?
14 Enẹwutu nawẹ Isaia penugo nado pehẹ numimọ gigonọ ehe gbọn? Ewọ basi zẹẹmẹ dọ Selafu de wá bo na alọgọ ẹ dọmọ: “Yè bẹ́ ylankan towe sẹ̀, yè sọ klọ ylando towe sẹ̀.” (Isaia 6:7) Isaia sọgan dejido lẹblanu Jiwheyẹwhe tọn go bo na ayidonugo ohó Jehovah tọn lẹ. Todin, be hiẹ ma na jlo nado yọ́n nususu dogọ dogbọn nudida gbẹ̀te he yiaga to gigo mẹ ehelẹ dali ya? To whelọnu lo etẹwẹ hiẹ dona wà? Kùn nudọnamẹ susu jẹgbonu dogọ. Azọ́nwanu dopo he yè na yizan wẹ Index des Publications de la Société Watch Tower, to hihodo alọdlẹndonu etọn lẹ hlan asisa susu he basi zẹẹmẹ nudọnamẹ lẹ tọn.
Etẹwẹ Ezekiẹli Mọ?
15. Etẹwẹ dohia dọ numimọ Ezekiẹli tọn yin dehe go yè sọgan deji do?
15 Todin mì gbọ̀ na mí ni lẹhlan nudida wunmẹ gbigbọnọ devo. Ezekiẹli yin nina lẹblanulọkẹyi lọ nado tindo numimọ mẹwhantọ de to whenuena ewọ gbẹ́ yin kanlinmọ to Babilọni. Hùn Biblu towe do Ezekiẹli weta 1, wefọ atọ̀n nukọn tọn lẹ. Nawẹ linlin lọ bẹjẹeji gbọn? Be e dọ dọ, ‘E jọ̀ pọ́n to ojlẹ de mẹ, to aigba dindẹn de ji . . . ’ wẹ ya? Lala, ehe mayin whenuho oklọ tọn de to tito-dopọ hodidọ otangblo tọn de mẹ poun gba. Wefọ 1 dọmọ: “Dinvie e sọ wá jọ̀ to owhe ogbàntọ mẹ, to osun ẹnẹtọ mẹ, to azán atọ́ntọ osun lọ tọn mẹ, le yẹn tin to mẹmẹglọ ṣẹnṣẹn to otọ̀ Kẹbali dali, wẹ yè hùn olọn lẹ, yẹn sọ mọ numimọ Jiwheyẹwhe tọn lẹ.” Etẹ go wẹ hiẹ doayi gando wefọ ehe go? E na azán taun de po nọtẹn tangan de po. Zẹẹmẹ gigọ́ ehelẹ dlẹnalọdo owhe atọ́ntọ kanlinmọgbenu Ahọlu Jehọiakimi tọn, to owhe 613 J.W.M.
16. Etẹwẹ Ezekiẹli mọ?
16 Alọ Jehovah tọn tin to Ezekiẹli ji, podọ e jẹ numimọ mẹhẹn-jọsi Jehovah tọn to ofin de ji to kẹkẹ daho olọn mẹ tọn de mẹ he tindo kẹkẹfọ kiklo lẹ po nukun lẹ po lẹdo kẹkẹfọ lọ tindo ji. Zẹẹmẹ gigọ́ he fọnjlodotena mí tofi wẹ yindọ nudida gbẹ̀te ẹnẹ wẹ tin, dopo ṣite to kẹkẹfọ dopodopo ji. “Ehe sọ wẹ awusọhia yetọn; yé tindo apajlẹ gbẹtọ de tọn. Podọ omẹ dopodopo tindo nukunmẹ ẹnẹ, omẹ dopodopo yetọn sọ tindo awà ẹnẹ. . . . Na apajlẹ nukunmẹ yetọn lẹ tọn, yé tindo nukunmẹ gbẹtọ de tọn; podọ yé omẹ ẹnẹ lẹ tindo nukunmẹ kinnikinni de tọn to adà adusi ji; podọ yé omẹ ẹnẹ lẹ sọ tindo nukunmẹ oyìn de tọn to adà amiyọn ji; yé omẹ ẹnẹ lẹ sọ tindo nukunmẹ akùn de tọn ga.”—Ezekiẹli 1:5, 6, 10.
17. Etẹwẹ nukunmẹ ẹnẹ kelubimi lẹ tọn nọtena?
17 Etẹwẹ nudida gbẹ̀te ẹnẹ ehelẹ yin? Ezekiẹli lọsu dọna mí dọ yé yin kelubimi lẹ. (Ezekiẹli 10:1-3, 14) Naegbọn yé do tindo nukunmẹ ẹnẹ lẹ? Nado nọtena jẹhẹnu vonọtaun ẹnẹ Oklunọ Nupojipetọ Jehovah tọn lẹ. Nukunmẹ akùn tọn lọ yin yẹhiadonu nuyọnẹn numọdohlan olá tọn. (Job 39:27-29) Etẹwẹ nukunmẹ oyìn tọn lọ nọtena? Na huhlọn daho okọ̀ po abọ́ etọn lẹ tọn po, oyìn he to avunho de ko yin yinyọnẹn nado dlan osọ́ de po hihẹtọ etọn po do jẹhọn mẹ. Po jide po, oyìn lọ yin yẹhiadonu huhlọn mado-dogbo Jehovah tọn. Kinnikinni lọ yin yiyizan taidi yẹhiadonu whẹdida dodo adọgbigbo tọn. To tadona mẹ, nukunmẹ gbẹtọ de tọn gbọn gbesisọ dali nọtena owanyi Jiwheyẹwhe tọn, to whenuena e yindọ gbẹtọ kẹdẹ wẹ yin nudida aigba ji tọn lọ he sọgan do jẹhẹnu ehe hia po nuyọnẹn po.—Matiu 22:37, 39; 1 Johanu 4:8.
18. Nawẹ apọsteli Johanu yidogọna nukunnumọjẹnumẹ mítọn na titobasinanu olọn mẹ tọn gbọn?
18 Numimọ devo lẹ sọ tin he sọgan gọalọna mí nado hẹn yẹdide lọ sọgbe. Ehe bẹ numimọ Johanu tọn lẹ heyin didọ to owe Biblu Osọhia tọn mẹ lẹ hẹn. Ewọ, taidi Ezekiẹli, mọ Jehovah to ofin gigonọ de ji heyin lilẹdo gbọn kelubimi lẹ dali. Etẹwẹ kelubimi lọ lẹ to wiwà? Yé nọ vọ́ nulila selafu lẹ tọn to Isaia weta 6 mẹ dọ, dọmọ: “Wiwe, wiwe, wiwe, Oklunọ Jiwheyẹwhe Ganhunupo; he ko tin, bosọ tin, bosọ ja.” (Osọhia 4:6-8) Johanu sọ mọ lẹngbọnvu de to ofin lọ kọ̀n. Mẹnu wẹ enẹ sọgan nọtena? Lẹngbọvu taun Jiwheyẹwhe tọn lọ, yèdọ Jesu Klisti.—Osọhia 5:13, 14.
19. Gbọn oplọn ehe dali, etẹwẹ hiẹ ko mọnukunnujẹemẹ gando titobasinanu Jehovah tọn go?
19 Enẹwutu gbọn numimọ ehelẹ dali, etẹwẹ míwlẹ ko yọnẹn? Dọ titobasinanu olọn mẹ tọn lọ to aga pete etọn tindo Jehovah Jiwheyẹwhe to ofin etọn ji bo yin awukọndopọ hẹ gbọn Lẹngbọvu lọ, Jesu Klisti, mẹhe yin Ohó lọ, kavi Logos lọ dali. Enẹgodo mí ko mọ awhànpa daho angẹli olọn mẹ tọn lẹ tọn, gọna selafu lẹ po kelubimi lẹ po. Yé yin apadewhe titobasinanu daho dopo, he tin to pọninọ mẹ to lẹndai Jehovah tọn lẹ hinhẹndi mẹ. Podọ dopo to lẹndai enẹlẹ mẹ wẹ yin yẹwhehodidọ wẹndagbe lọ tọn lẹdo aihọn pé to ojlẹ opodo tọn ehe mẹ.—Malku 13:10; Johanu 1:1-3; Osọhia 14:6, 7.
20. Kanbiọ tẹwẹ na yin gblọndo etọn na to hosọ he bọdego mẹ?
20 To tadona mẹ, mí tindo Kunnudetọ Jehovah tọn lẹ to aigba ji he nọ pli to Plitẹnhọ Ahọluduta tọn yetọn lẹ mẹ nado plọn lehe yé na wà ojlo Oklunọ Nupojipetọ lọ tọn gbọn. Po jide po, todin mí sọgan mọnukunnujẹemẹ dọ mẹsusu wẹ tin hẹ mí hugan mẹhe tin hẹ Satani po kẹntọ nugbo lọ tọn lẹ po. Kanbiọ lọ gbẹsọ yin, Etẹwẹ titobasinanu olọn mẹ tọn lọ tindo nado yiwà hẹ yẹwhehodidọ wẹndagbe Ahọluduta lọ tọn? Hosọ he bọdego na gbadopọnna enẹ po whẹho devo lẹ po.
Kanbiọ Dogbapọn Tọn Lẹ
● Nado yọ́n pinpẹn titobasinanu Jehovah tọn, etẹwẹ mí dona yọnẹn?
● Numimọ tẹwẹ mẹmẹsi Eliṣa tọn tindo, podọ nawẹ yẹwhegan lọ na tuli i gbọn?
● Nawẹ mí dona pọ́n oplọn mẹdetiti tọn hlan gbọn?
● Nawẹ Daniẹli, Isaia, po Ezekiẹli po basi zẹẹmẹ gigọ́ titobasinanu olọn mẹ tọn gbọn?
[Yẹdide to weda 13]
Alemọyi oplọn mẹdetiti tọn lẹ zẹ̀ núdùdù heyin awuwlena ganji de go
[Yẹdide to weda 15]
Numimọ awhànpa olọn mẹ tọn lẹ wẹ yin gblọndo Jehovah tọn hlan odẹ̀ Eliṣa tọn