Be Hiẹ Tindo Angẹli Mẹgopọntọ de Ya?

BE HIẸ yise dọ hiẹ tindo angẹli mẹgopọntọ de ya? Mẹsusu lẹndọ yé wàmọ. Gando whẹho enẹ go, yọnnu de to whèyihọ Canada tọn yin linlin etọn na nado mọ nunina vonọtaun de yí he bẹ angẹli lẹ hẹn. Eyin hiẹ dọ oyín towe na ẹn to gigọ́mẹ to pọmẹ po dọla 200 Canada tọn po, e sọalọakọ́n dọ emi na hẹn we yọ́n angẹli mẹgopọntọ towe. Jẹnukọn whẹ́, e nọ lẹnayihamẹpọn gbọn ayidonugo zize do miyọ́n vẹla de tọn ji dali. Enẹgodo, e nọ tindo numimọ de to ehe mẹ angẹli towe na na ẹn wẹndomẹ de nado do we. Taidi nunamẹ vọnu de, yọnnu lọ nọ wleawuna yẹdide nuhe angẹli towe taidi tọn.

Na mẹdelẹ, ehe sọgan taidi nudopolọ po whenuho de he gando Ahọlu Flanse tọn Louis IX go po. Ewọ yin didọ nado ko họ̀ awà-fún he ko flẹ sọn awa Angẹligán Mikaẹli tọn lẹ go lẹ. Dile ayihaawe tin gando otangblo enẹ go do sọ, mẹsusu ma nọ tindo ayihaawe depope gando alọsọakọ́n yọnnu Canadanu lọ tọn go gba.

Ojlofọndotenamẹnu Gando Angẹli lẹ Go

Ojlo susu ko tin to angẹli lẹ mẹ to owhe agọe tọn lẹ mẹ. To televiziọn po sinimoto lẹ po mẹ, owe lẹ, linlinnamẹwe lẹ, gọna wekinkan linlin tọn lẹ, mí nọ yin didọna dogbọn angẹli lẹ dali he nọ miọnhomẹna mẹhe to azọ̀n sinsinyẹn jẹ lẹ, nọ miọnhomẹna mẹhe tin to aluẹmẹ lẹ, nọ na nuyọnẹn omẹ, bo nọ whlẹn gbẹtọ lẹ sọn okú si. To États-Unis, nudi nupọntọ livi donu 20 lẹ wẹ nọ pọ́n nudohia debọdo-dego televiziọn tọn lẹ he nọ do didado whẹho gbẹzan gbẹtọvi lẹ tọn mẹ angẹli lẹ tọn hia. Owe-satẹn dopo slẹ owe hugan 400 lẹ he dọhodo angẹli lẹ ji.

Owe agọe tọn de na numimọ lẹ dogbọn lehe angẹli mẹgopọntọ lẹ ko whlẹn ogbẹ̀ awhànfuntọ lẹ tọn gán to awhànfunfun mẹ do dali. Owe kleun kleun he nọ yin titẹdo mọto go lẹ nọ dọ dọ hunkuntọ lọ yin hihọ́-basina gbọn angẹli mẹgopọntọ lẹ dali. Titobasinanu lẹ, pipli lẹ, po nuplọnmẹ weyọnẹntọ lẹ tọn po nọ ze nupinplọn dogbọn angẹli lẹ dali daga bosọ yin didọ nado nọ gọalọna gbẹtọ lẹ nado dọhodopọ hẹ yé.

Eileen Freeman yin kinkantọ owe atọ̀n tọn gando angẹli lẹ go po zinjẹgbonutọ linlinnamẹwe de heyin kinklandovo mlẹnmlẹn hlan yé po tọn. E dọmọ: “Yẹn yise dọ angẹli he tin to olọn mẹ lẹpo tindo angẹli mẹgopọntọ he sọgbe hẹ yé de to Aigba ji, yèdọ nudida de he azọngban etọn mayin nado nọ pagigona Jiwheyẹwhe to lẹdo olọn tọn lẹ mẹ kẹdẹ gba ṣigba na taun tọn nado nọ penukundo gbẹtọvi lẹ po wunmẹ ogbẹ̀ tọn devo lẹ po go to Aigba ji. Angẹli mẹgopọntọ de nọ yin azọ́ndena nado penukundo mí go to whenuena yè mọho mítọn bosọ nọ to mí go pọ́n dile mí to whinwhẹ́n to vidọ mẹ, kakajẹ jiji mítọn whenu, to gbẹzan mítọn mẹ to aihọn ehe mẹ, kakajẹ whenuena angẹli lọ na deanana mí sọn agblò aihọn ehe tọn mẹ biọ gigo olọn tọn mẹ.” Ehe basi zẹẹmẹ pọndohlan he gbayipe heyin angẹli mẹgopọntọ lẹ tọn ganji.

To ojlẹ sinsinyẹn po awusinyẹnnamẹ tọn ehelẹ po mẹ, homẹmiọnnamẹnu wẹ e yin nado yise dọ mí tindo angẹli mẹgopọntọ mítọn titi, he tindo azọngban lọ nado nọ basi-hihọ́na mí. Etẹwẹ Ohó Jiwheyẹwhe tọn, yèdọ Biblu lọ, dọ dogbọn ehe dali? Be mí dona tẹnpọn nado tindo kanṣiṣa hẹ angẹli lẹ wẹ ya? Be yé nọ yin ahunmẹduna dogbọn nujinọtedo walọyizan tọn po nuyise sinsẹ̀n tọn mítọn lẹ po dali wẹ ya? Alọgọ tẹwẹ mí sọgan donukun sọn yé dè? Kanbiọ ehelẹ na mọ gblọndo yí to hosọ he bọdego lọ mẹ.