Zọnlinzinzin hẹ Jiwheyẹwhe—Afọdide Whẹwhẹwhenu Tọn Lẹ
“Mì sẹpọ Jiwheyẹwhe, ewọ nasọ sẹpọ mì.”—JAKOBU 4:8.
1, 2. Naegbọn hiẹ na dọ dọ lẹblanulọkẹyi daho wẹ e yin nado sẹ̀n Jehovah?
DAWE lọ ko jiya to ganpamẹ na owhe susu lẹ. Enẹgodo ewọ yin yiylọ nado sọawuhia to ogán otò lọ tọn nukọn. Nujijọ lọ lẹ juwayi po awuyiya po. To ajiji mẹ, gantọ lọ mọ ede to sinsẹ̀nzọn ahọluigbagán huhlọnnọ daho hugan to aigba ji whenẹnu tọn mẹ. Gantọ dai tọn lọ yin zizedo otẹn azọngban daho tọn mẹ po gbégbigbò he sẹhundaga po. Josẹfu—dawe lọ he afọ etọn lẹ ko yin bibla po gẹdẹ po to ojlẹ de mẹ wayi—to zọnlinzin hẹ ahọlu todin!—Gẹnẹsisi 41:14, 39-43; Psalm 105:17, 18.
2 To egbehe, gbẹtọvi lẹ tindo dotẹnmẹ hundote lọ nado tindo mahẹ to devizọnwiwa na mẹhe klo taun hugan Falo Egipti tọn mẹ. Ganhunupotọ wẹkẹ tọn lọ basi oylọna mímẹpo nado basi sinsẹ̀n hlan ẹn. Lẹblanulọkẹyi jiawu nankọ die nado wàmọ podọ nado wleawuna haṣinṣan pẹkipẹki de hẹ Jehovah, yèdọ Jiwheyẹwhe ganhunupotọ lọ! To Owe-wiwe lẹ mẹ huhlọn mayọnjlẹ po yẹyi po gọna abọẹninọ, whanpẹ, po awuvivi po yin kinkọndopọ hẹ ewọ. (Ezekiẹli 1:26-28; Osọhia 4:1-3) Owanyi gbayipe to nuyiwa etọn lẹpo mẹ. (1 Johanu 4:8) Ewọ ma nọ dolalo pọ́n gbede. (Osọha lẹ 23:19) Podọ Jehovah ma nọ hẹn mẹhe yin nugbonọ hlan ẹn lẹ jẹflumẹ gbede. (Psalm 18:25) Gbọn gbesisọ hẹ nubiọtomẹsi dodo tọn etọn lẹ dali, mí sọgan duvivi gbẹzan ayajẹnọ, he tindo zẹẹmẹ lẹ todin, po pọndohlan ogbẹ̀ madopodo tọn po. (Johanu 17:3) Gandudu gbẹtọvi tọn depope ma sọgan ze nudepope donukọnnamẹ to nuyijlẹdonugo liho he na yiaga hugan dona po lẹblanulọkẹyi mọnkọtọn lẹ po gba.
3. To aliho tẹmẹ wẹ Noa ‘zinzọnlin hẹ Jiwheyẹwhe nugbo lọ’ te?
3 Sọn whenu dindẹn die wayi, tọgbo Noa magbè nado nọgbẹ̀ to kọndopọmẹ hẹ ojlo po lẹndai Jiwheyẹwhe tọn po. Gando ewọ go, Biblu dọmọ: “Noa yin dodonọ bo pé to whẹndo etọn lẹ mẹ: Noa sọ zinzọnlin hẹ Jiwheyẹwhe [nugbo] lọ.” (Gẹnẹsisi 6:9) Nugbo wẹ dọ, Noa ma zinzọnlin hẹ Jehovah to paa mẹ gba, to whenuena e yindọ mẹdepope ma ko “mọ Jiwheyẹwhe gbede.” (Johanu 1:18) Kakatimọ, Noa zinzọnlin hẹ Jiwheyẹwhe to enẹ mẹ dọ e wà nuhe Jiwheyẹwhe dọ na ẹn nado wà. Na Noa ze ogbẹ̀ etọn jo na ojlo Jehovah tọn wiwà wutu, e duvivi haṣinṣan zohunhun, pẹkipẹki tọn de hẹ Jiwheyẹwhe Ganhunupotọ lọ. Taidi Noa, gbẹtọ livi lẹ to egbehe to ‘zọnlinzin hẹ Jiwheyẹwhe’ gbọn gbẹninọ to kọndopọmẹ hẹ ayinamẹ po anademẹ Jehovah tọn po dali. Nawẹ mẹde nọ bẹ yanwle mọnkọtọn jẹeji gbọn?
Oyọnẹn He Pegan Yin Dandannu
4. Nawẹ Jehovah nọ plọn omẹ etọn lẹ gbọn?
4 Nado zinzọnlin hẹ Jehovah, jẹnukọn whẹ́ mí dona yọ́n ewọ. Yẹwhegan Isaia dọdai dọmọ: “To enẹgodo to azán podo gbè, yè na yí yonu owhé OKLUNỌ tọn hẹnai to aga osó daho lẹ tọn ji, yè nasọ ze e yì oji hú osó pẹvipẹvi lẹ; akọta lẹ nasọ lìn biọ e mẹ. Gbẹtọ susu wẹ na yì bo na dọmọ, mì wá na mí ni yì osó OKLUNỌ tọn ji, yì owhé Jiwheyẹwhe Jakobu tọn tọn gbè; ewọ nasọ plọn ali etọn mí, mí nasọ zinzọnlin to omọ́ etọn mẹ, na Ziọni wẹ osẹ́n na tọ́nsọn yì, ohó OKLUNỌ tọn sọn Jelusalẹm.” (Isaia 2:2, 3) Mọwẹ, mí sọgan tindo jidide dọ Jehovah na plọn mẹlẹpo he to díndín nado zinzọnlin to aliho etọn lẹ ji. Jehovah ko wleawuna Ohó etọn, Biblu lọ, podọ ewọ nọ gọalọna mí nado mọnukunnujẹemẹ. Aliho dopo he mẹ e nọ wà ehe te wẹ dogbọn “afanumẹ nugbonọ, nuyọnẹntọ” lọ dali. (Matiu 24:45-47) Jehovah nọ yí ‘afanumẹ nugbonọ lọ’ zan nado wleawuna anademẹ gbigbọmẹ tọn gbọn owe sinai do Biblu ji lẹ, opli Klistiani tọn lẹ, po tito plọnmẹ Biblu whégbè tọn vọnu lẹ po dali. Jiwheyẹwhe sọ nọ gọalọna omẹ etọn lẹ nado mọnukunnujẹ Ohó etọn mẹ gbọn gbigbọ wiwe etọn gblamẹ.—1 Kọlintinu lẹ 2:10-16.
5. Naegbọn nugbo Owe-wiwe lẹ tọn do yin nuhọakuẹ sọmọ?
5 Dile etlẹ yindọ mí ma nọ suahọ na nugbo Biblu tọn, e yin nuhọakuẹ. Dile mí to Ohó Jiwheyẹwhe tọn plọn, mí nọ plọn dogbọn Jiwheyẹwhe lọsu titi—oyín etọn, gbẹtọ-yinyin etọn, lẹndai etọn, po aliho he mẹ e nọ yinuwa hẹ gbẹtọvi lẹ te po dali. Mí sọ plọn gblọndo he nọ hẹn mẹ jẹ mẹdekannu lẹ hlan kanbiọ dodonu ogbẹ̀ tọn lẹ: Naegbọn mí do tin tofi? Naegbọn Jiwheyẹwhe jo dotẹnmẹ do na yajiji? Etẹwẹ sọgodo bẹhẹn? Naegbọn mí do nọ poyọnho bosọ nọ kú? Be ogbẹ̀ tin to okú godo ya? Humọ, mí plọn nuhe ojlo Jiwheyẹwhe tọn yin na mí, enẹ wẹ yindọ, lehe mí dona zinzọnlin gbọn nado sọgan hẹn homẹ etọn hùn to gigọ́mẹ. Mí plọn dọ nubiọtomẹsi etọn lẹ yin lẹnpọn dagbe tọn bo yin alemọyinu jiawu to whenuena mí to gbẹ̀nọ sọgbe hẹ yé. Matin anademẹ Jiwheyẹwhe tọn, mí ma sọgan mọnukunnujẹ onú mọnkọtọn lẹ mẹ pọ́n gbede gba.
6. Aliho tẹwẹ oyọnẹn he pegan Biblu tọn nọ hẹn mí penugo nado doafọna?
6 Nugbo Biblu tọn yin huhlọnnọ bosọ nọ whàn mí nado basi diọdo lẹ to gbẹzan mítọn lẹ mẹ. (Heblu lẹ 4:12) Jẹnukọnna alọkẹyi oyọnẹn Owe-wiwe lẹ tọn, mí sọgan to zọnlinzin “kẹdẹdi owalọ aihọn he tọn.” (Efesunu lẹ 2:2) Ṣigba oyọnẹn he pegan Ohó Jiwheyẹwhe tọn nọ wleawuna aliho he gbọnvo de na mí na mí nido sọgan “zinzọnlin dole e jẹ na Oklunọ to nukundagbe lẹpo mẹ.” (Kọlọsinu lẹ 1:10) Ayajẹ nankọ die nado ze afọdide whẹwhẹwhenu tọn mítọn lẹ to zọnlinzinzin hẹ Jehovah mẹ, yèdọ Omẹ lọ he klohugan to wẹkẹ lọ blebu mẹ!—Luku 11:28.
Afọdide Titengbe Awe —Klandowiwe po Baptẹm Po
7. Dile mí to Ohó Jiwheyẹwhe tọn plọn, nugbo dogbọn nukọntọ-yinyin gbẹtọvi lẹ tọn dali tẹwẹ nọ sọawuhia?
7 To whenuena mí whẹ́n to nukunnumọjẹnumẹ Biblu tọn mítọn mẹ, mí nọ jẹ dogbapọnna whẹho gbẹtọvi tọn lẹ po gbẹzan míde titi tọn lẹ po ji to hinhọ́n gbigbọmẹ Ohó Jiwheyẹwhe tọn tọn mẹ. Gbọnmọ dali nugbo nujọnu tọn de nọ sọawuhia. Nugbo enẹ ko yin didọ to ojlẹ dindẹn die wayi gbọn yẹwhegan Jẹlemia dali, mẹhe wlan dọmọ: “OKLUNỌ E, yẹn yọnẹn dọ aliho gbẹtọ tọn ma tin to ewlọsu mẹ gba: e ma tin to omẹ he to zọnlinzin mẹ nado do afọdide etọn lẹ gba.” (Jẹlemia 10:23) Gbẹtọvi lẹ—mímẹpo—tindo nuhudo anademẹ Jiwheyẹwhe tọn.
8. (a) Etẹwẹ nọ whàn gbẹtọ lẹ nado basi klandowiwe hlan Jiwheyẹwhe? (b) Etẹwẹ klandowiwe Klistiani tọn yin?
8 Nukunnumimọjẹ nugbo nujọnu tọn ehe mẹ nọ whàn mí nado dín anademẹ sọn Jehovah dè. Podọ owanyi na Jiwheyẹwhe nọ whàn mí nado klan gbẹzan mítọn do wiwe hlan ẹn. Nado basi klandowiwe hlan Jiwheyẹwhe zẹẹmẹdo nado dọnsẹpọ ẹ to odẹ̀ mẹ bo yí gbemima do dopagbe nado yí ogbẹ̀ mítọn zan nado sẹ̀n ẹn podọ nado zinzọnlin to aliho etọn lẹ ji po nugbonọ-yinyin po. To ehe wiwà mẹ, mí nọ hodo apajlẹ Jesu tọn, mẹhe ze ede jo na Jehovah po gbemima he lodo de po nado hẹn ojlo sọn olọn mẹ wá lọ di.—Heblu lẹ 10:7.
9. Naegbọn mẹdopodopo lẹ do nọ klan gbẹzan yetọn do wiwe hlan Jehovah?
9 Jehovah Jiwheyẹwhe ma nọ gbidikọnamẹ kavi hẹn mẹdepope gánnugánnu nado basi klandowiwe hlan ẹn pọ́n gbede gba. (Yijlẹdo 2 Kọlintinu lẹ 9:7 go.) Humọ, Jiwheyẹwhe ma nọ donukun mẹdepope nado klan gbẹzan etọn do wiwe hlan Ẹn na numọtolanmẹ ojlẹ gli tọn delẹ wutu gba. Jẹnukọnna baptẹm yíyí, mẹde dona yin devi de, podọ enẹ biọ vivẹnudido vẹkuvẹku nado tindo oyọnẹn lọ. (Matiu 28:19, 20) Paulu vẹ̀ mẹhe ko yí baptẹm lẹ nado ‘yí agbasa yetọn lẹ do basi avọ́sannu ogbẹ̀nọ, wiwe, alọkẹyi hlan Jiwheyẹwhe, he yin sinsẹ̀nzọn wiwe po huhlọn nulẹnpọn yetọn tọn po.’ (Lomunu lẹ 12:1) Gbọn nuyiwa huhlọn nulẹnpọn tọn mítọn dopolọ dali wẹ mí nọ basi klandowiwe hlan Jehovah Jiwheyẹwhe. To pinplọn nuhe e bẹhẹn po nulẹnpọn sọwhiwhe tọn po do whẹho lọ ji godo, mí yí ayajẹ do klan gbẹzan mítọn do wiwe hlan Jiwheyẹwhe sọn ojlo mẹ wá.—Psalm 110:3.
10. Nawẹ klandowiwe nọ gando baptẹm go gbọn?
10 To dindọnsẹpọ Jiwheyẹwhe to odẹ̀ mẹ to nuglọ nado do gbemima mítọn nado zinzọnlin to aliho etọn lẹ ji hia godo, mí nọ ze afọdide he bọdego lọ. Mí nọ hẹn klandowiwe mítọn zun yinyọnẹn to gbangba gbọn baptẹm mítọn to osin mẹ dali. Ehe wẹ ogbèyí gbangba tọn dọ mí ko dopà nado wà ojlo Jiwheyẹwhe tọn. To bẹjẹeji lizọnyizọn aigba ji tọn etọn whenu, Jesu yin bibaptizi gbọn Johanu dali, bo gbọnmọ dali ze apajlẹ de dai na mí. (Matiu 3:13-17) To godo mẹ, Jesu deazọ́nna hodotọ etọn lẹ nado basi devi lẹ bo baptizi yé. Enẹwutu, klandowiwe po baptẹm po yin afọdide titengbe lẹ na mẹdepope he jlo nado zinzọnlin hẹ Jehovah.
11, 12. (a) Nawẹ baptẹm sọgan yin yiyijlẹdo hunwhẹ alọwle tọn de go gbọn? (b) Dopolọ-yinyin tẹwẹ sọgan yin mimọ to haṣinṣan mítọn hẹ Jehovah po dehe tin to asu po asi po ṣẹnṣẹn mẹ?
11 Lilẹzun devi Jesu Klisti tọn he klan ede do wiwe, bo yí baptẹm yin nudopolọ po alọwiwle po. To aigba susu lẹ ji, afọdide voovo lẹ nọ jẹnukọnna azán hùnwhẹ alọwle tọn. Sunnu de po yọnnu de po nọ dukosọ, jẹakọhẹ ode awetọ, bo nọ yiwanna yede. Opagbe alọwle tọn nọ bọdego. Hùnwhẹ alọwle tọn nọ hẹn nuhe ko yin gbemima nuglọ tọn jẹ gbangba—yèdọ nado biọ gbemima alọwle tọn mẹ podọ to enẹgodo nọ kọndopọmẹ taidi asu po asi po. Hùnwhẹ alọwle tọn wẹ nọ dohiagona bẹjẹeji haṣinṣan vonọtaun enẹ tọn to mẹlẹpo nukọn. Azán enẹ dohiagona bẹjẹeji alọwle lọ tọn. To nuyijlẹdonugo liho, baptẹm nọ dohiagona bẹjẹeji gbẹzan mẹdezejo tọn de nado to zọnlinzin to haṣinṣan klandowiwe tọn de mẹ hẹ Jehovah.
12 Lẹnnupọndo dopolọ-yinyin devo ji. To azán hùnwhẹ alọwle tọn yetọn godo, owanyi he tin to asu po asi po lọ ṣẹnṣẹn dona siso bo whẹ́n. Nado sọgan dọnsẹpọ ode awetọ pẹkipẹki hugan gbede pọ́n tọn, alọwlemẹ awe lọ lẹ dona gbọn vivẹnudido matin ṣejannabi dali nado penukundo bo na huhlọn haṣinṣan alọwle yetọn tọn. Dile etlẹ yindọ mí ma nọ wlealọ po Jiwheyẹwhe po, to baptẹm mítọn godo mí dona wazọ́n nado hẹn haṣinṣan pẹkipẹki de go hẹ Jehovah. Ewọ nọ doayi e go bo nọ yọ́n pinpẹn vivẹnudido mítọn nado wà ojlo etọn tọn bo nọ dọnsẹpọ mí. “Mì sẹpọ Jiwheyẹwhe,” wẹ devi Jakobu wlan, “ewọ nasọ sẹpọ mì.”—Jakobu 4:8.
Zọnlinzinzin to Afọdomẹ Jesu Tọn Mẹ
13. To zọnlinzinzin hẹ Jiwheyẹwhe mẹ, apajlẹ mẹnu tọn wẹ mí dona hodo?
13 Nado zinzọnlin hẹ Jehovah, mí dona sọgbe hẹ apajlẹ heyin zizedai gbọn Jesu Klisti dali. Apọsteli Pita wlan dọmọ: “Na ehe mẹ yè ylọ mì do: na Klisti jiya na mí ga, bo yí ohia dai na mí, na míwlẹ nido nọ gbọn afọ etọn ji.” (1 Pita 2:21) To whenuena e yindọ Jesu yin mẹpipe bọ míwlẹ yin mapenọ, mí ma sọgan hodo apajlẹ he e zedai lọ matin oblọ gba. Etomọṣo, Jehovah nọ donukun sọn mí si nado wà nuhe go mí pé lẹpo. Mì gbọ mí ni gbadopọnna adà atọ́n gbẹzan po lizọnyizọn Jesu tọn lẹ po he Klistiani klandowiwe lẹ dona dovivẹnu nado hodo.
14. Etẹwẹ Ohó Jiwheyẹwhe tọn yinyọnẹn bẹhẹn?
14 Jesu tindo oyọnẹn he pegan mlẹnmlẹn Ohó Jiwheyẹwhe tọn tọn. To lizọnyizọn etọn whenu, Jesu nọ yihodọ sọn Owe-wiwe Heblu tọn lẹ mẹ gbọzangbọzan. (Luku 4:4, 8) Nugbo wẹ dọ, sinsẹ̀ngan ylankan azán enẹlẹ gbè tọn lẹ sọ nọ yihodọ sọn Owe-wiwe lẹ mẹ ga. (Matiu 22:23, 24) Vogbingbọn lọ wẹ yindọ Jesu mọnukunnujẹ nuhe dọ Owe-wiwe lẹ te mẹ, podọ ewọ nọ yí yé zan to gbẹzan etọn mẹ. E mayin dọ e yọ́n adà Osẹ́n lọ tọn kẹdẹ wẹ gba ṣigba lẹndai etọn. Dile mí to hihodo apajlẹ Klisti tọn, mí lọsu dona dovivẹnu nado mọnukunnujẹ Ohó Jiwheyẹwhe tọn mẹ, bo yọ́n linlẹn kavi lẹndai, etọn tọn. Gbọn mọwiwa dali, mí sọgan lẹzun azọ́nwatọ heyin alọkẹyi sọn olọn mẹ wá he penugo nado ‘penukundo ohó nugbo tọn lọ go dile e jẹ do kẹdẹ.’—2 Timoti 2:15.
15. Nawẹ Jesu ze apajlẹ de dai to hodidọ dogbọn Jiwheyẹwhe dali mẹ gbọn?
15 Klisti Jesu dọho na mẹdevo lẹ dogbọn Otọ́ olọn mẹ tọn etọn dali. Jesu ma hẹn oyọnẹn Jiwheyẹwhe tọn etọn do ede dè gba. Kẹntọ etọn lẹ tlẹ dlẹnalọdo e taidi “Mẹplọntọ,” na fidepope he ewọ yì e nọ dọho na mẹdevo lẹ dogbọn Jehovah po lẹndai Etọn lẹ po dali. (Matiu 12:38) Jesu dọyẹwheho to gbangba to lẹdo tẹmpli tọn mẹ, to sinagọgu mẹ, to tòdaho lẹ mẹ, podọ to gbetato lẹ mẹ. (Malku 1:39; Luku 8:1; Johanu 18:20) E nọ yí awuvẹmẹ po homẹdagbe po do plọnmẹ, bo nọ do owanyi hia hlan mẹhe e gọalọna lẹ. (Matiu 4:23) Mẹhe hodo apajlẹ Jesu tọn lẹ sọ mọ nọtẹn po aliho susu lẹ po nado plọn mẹdevo lẹ dogbọn Jehovah Jiwheyẹwhe po lẹndai jiawu etọn lẹ po dali.
16. Nawẹ haṣinṣan Jesu tọn hẹ sinsẹ̀ntọ Jehovah tọn hatọ lẹ yin pẹkipẹki sọ?
16 Jesu tindo kanṣiṣa pẹkipẹki hẹ mẹdevo lẹ he sẹ̀n Jehovah. To whenuena Jesu to hodọ hlan agundaho lẹ to nujijọ dopo whenu, onọ̀ etọn po nọvisunnu mayisenọ etọn lẹ po wá nado dọho hẹ ẹ. Kandai Biblu tọn lọ dọmọ: “Dawe de dọ hlan ẹn, dọ, Pọ́n, onọ̀ towe po mẹmẹsunnu towe lẹ po ṣite to gbonu, yé dindin ohó na dọ hẹ we. Ṣigba e gblọn bo dọ hlan mẹhe dọ na ẹn, dọmọ, Mẹnu wẹ onọ̀ ṣie? Mẹnu sọ wẹ mẹmẹsunnu ṣie lẹ? E sọ dlẹn alọ etọn jẹgbonu hlan nuplọntọ etọn lẹ, bo dọmọ, Mì pọ́n onọ̀ ṣie po mẹmẹsunnu ṣie lẹ po! Na mẹdepope he wà ojlo Otọ́ ṣie he tin to olọn mẹ tọn, ewọ wẹ mẹmẹsunnu ṣie, mẹmẹyọnnu ṣie, po onọ̀ ṣie po.” (Matiu 12:47-50) Ehe ma zẹẹmẹdo dọ Jesu gbẹ́ whẹndo etọn dai gba, na nujijọ he bọdego lẹ dohia dọ ewọ ma wàmọ gba. (Johanu 19:25-27) Etomọṣo, kandai ehe zinnudo owanyi he Jesu tindo na yisenọ hatọ lẹ ji. Mọdopolọ to egbehe, mẹhe to zọnlinzin hẹ Jiwheyẹwhe lẹ nọ dín nado dogbẹhẹ devizọnwatọ Jehovah tọn devo lẹ bo nọ zindonukọn nado yiwanna yé vivẹvivẹ.—1 Pita 4:8.
17. Numọtolanmẹ tẹwẹ Jesu tindo dogbọn ojlo Otọ́ olọn mẹ tọn etọn wiwà dali, podọ nawẹ enẹ dona gando mí go gbọn?
17 Gbọn ojlo sọn olọn mẹ wá wiwà dali, Jesu do owanyi hia Otọ́ olọn mẹ tọn etọn. Jesu setonu na Jehovah to nulẹpo mẹ. Ewọ dọmọ: “Núdùdù ṣie wẹ nado wà ojlo mẹhe do mi hlan tọn podọ nado dotana azọ́n etọn.” (Johanu 4:34) Klisti sọ dọmọ: “Yẹn to onú he yin homẹhun hlan [Jiwheyẹwhe] lẹ wà to whepoponu.” (Johanu 8:29) Jesu yiwanna Otọ́ olọn mẹ tọn etọn sọmọ bọ “e whiwhẹ ede, bosọ lẹzun tonusetọ kakajẹ okú, yèdọ okú [yatin] tọn.” (Filippinu lẹ 2:8) To alọ devo mẹ, Jehovah dona Jesu, bo ze ewọ daga jẹ otẹn aṣẹpipa po gbégbigbò tọn po mẹ bo yin omẹ awetọ na Jehovah lọsu titi. (Filippinu lẹ 2:9-11) Taidi Jesu, mí nọ do owanyi mítọn na Jiwheyẹwhe hia gbọn tonusisena gbedide etọn lẹ podọ gbọn ojlo etọn wiwà dali.—1 Johanu 5:3.
18. To aliho tẹmẹ wẹ Jesu ze apajlẹ de dai to whẹho odẹ̀ tọn mẹ te?
18 Jesu nọ hodẹ̀ to whepoponu. E hodẹ̀ to baptẹm etọn whenu. (Luku 3:21) Jẹnukọnna apọsteli 12 etọn lẹ dide, ewọ yí ozán lọ blebu do hodẹ̀. (Luku 6:12, 13) Jesu plọn devi etọn lẹ lehe yè na hodẹ̀ do. (Luku 11:1-4) To ozán lọ mẹ jẹnukọnna okú etọn, e hodẹ̀ na podọ hẹ devi etọn lẹ. (Johanu 17:1-26) Odẹ̀ yin adà titengbe gbẹzan Jesu tọn, yèdọ dile e dona yin do to gbẹzan mítọn lẹ mẹ, to whenuena e yindọ hodotọ etọn lẹ wẹ mí yin. Lẹblanulọkẹyi nankọ die nado dọho hlan Nupojipetọ Wẹkẹ tọn lọ to odẹ̀ mẹ! Yinukọn dogọ, Jehovah nọ na gblọndo odẹ̀ lẹ, na Johanu wlan dọmọ: “Ehe sọ wẹ tudido he mí tindo to ewọ mẹ, dọ, eyin mí biọ nudepope kẹdẹdi ojlo etọn, e sè mítọn: eyin mí yọnẹn dọ e sè mítọn, nudepope mí biọ, mí yọnẹn dọ mí tindo kanbiọ he mí to bibiọ to e dè.”—1 Johanu 5:14, 15.
19. (a) Jẹhẹnu Jesu tọn tẹlẹ wẹ mí dona hodo? (b) To aliho tẹlẹ mẹ wẹ mí nọ mọaleyi sọn gbẹzan po lizọnyizọn Jesu tọn pinplọn po mẹ te?
19 Onú susu tlala wẹ sọgan yin pinplọn sọn dogbapọn kitokito na gbẹzan aigba ji tọn po lizọnyizọn Jesu Klisti tọn po mẹ! Lẹnnupọn do jẹhẹnu he e dohia lẹ ji: owanyi, awuvẹmẹ, homẹdagbe, huhlọn, jlẹkajininọ, lẹnpọn dagbe tintindo, whiwhẹ, tugbigbo, po ṣejannabi matindo po. Lehe mí plọnnu dogbọn Jesu dali susọ, mọwẹ ojlo mítọn nado yin hodotọ nugbonọ etọn lẹ na jideji do niyẹn. Oyọnẹn Jesu tọn sọ nọ dọ̀n mí sẹpọ Jehovah. To popolẹpo mẹ, Jesu wẹ yin dohia pipé Otọ́ olọn mẹ tọn etọn. E dọnsẹpọ Jehovah sọmọ bọ e sọgan dọmọ: “Ewọ he ko mọ mi ko mọ Otọ́.”—Johanu 14:9.
Dejido Jiwheyẹwhe Go Nado Hẹn We Dote
20. Nawẹ mí sọgan mọ jidide to zọnlinzinzin hẹ Jehovah mẹ gbọn?
20 To whenuena ovi lẹ to zọnlinzinzin plọn, afọdide yetọn lẹ ma nọ hẹnai gba. Nawẹ yé nọ plọn zọnlinzinzin po jidide po gbọn? Gbọn pinplọn po linsinsinyẹn po kẹdẹ dali. Eyọn, mẹhe to zọnlinzin hẹ Jehovah lẹ nọ dovivẹnu nado zinzọnlin po jidide po, mawhango. Ehe lọsu nọ biọ whenu po linsinsinyẹn po. Paulu dlẹnalọdo nujọnu-yinyin linsinsinyẹn tọn to zọnlinzinzin hẹ Jiwheyẹwhe mẹ to whenuena e wlan dọmọ: “Humọ míwlẹ to mì vẹ̀, mẹmẹsunnu, bosọ to tudohomẹna mì to Jesu Oklunọ mẹ, dọ dile mì ko kẹalọyi to mí dè, le mì do nọ zinzọnlin do, podọ nado wà onú he jlo Jiwheyẹwhe, mọwẹ mì ni to susudeji gege.”—1 Tẹsalonikanu lẹ 4:1.
21. Dile mí to zọnlinzin hẹ Jehovah, dona tẹlẹ wẹ mí sọgan duvivi etọn?
21 Eyin mí ze míde jo mlẹnmlẹn hlan Jiwheyẹwhe, e na gọalọna mí nado to zọnlinzin hẹ ẹ zọnmii. (Isaia 40:29-31) Nudepope he aihọn ehe sọgan zedonukọnnamẹ ma sọgan yin yíyí jlẹdo dona lẹ he ewọ wleawu etọn dai na mẹhe to zọnlinzin to aliho etọn ji lẹ mẹ gba. Ewọ wẹ ‘Mẹhe to pinplọn mí na ale, he plan mí gbọn aliho he ji mí na gbọn. Podọ eyin mí dotoai hlan osẹ́n etọn, jijọho mítọn na taidi otọ̀, dodo mítọn na taidi agbowhẹn ohù tọn.’ (Isaia 48:17, 18) Gbọn alọkikẹyi oylọ-basinamẹ nado zinzọnlin hẹ Jiwheyẹwhe dali podọ gbọn mọwiwa po nugbonọ-yinyin po dali, mí sọgan duvivi jijọho tọn hẹ ẹ kakadoi.
Nawẹ Hiẹ Na Na Gblọndo Gbọn?
● Naegbọn e do yin lẹblanulọkẹyi nado zinzọnlin hẹ Jiwheyẹwhe nugbo lọ?
● Naegbọn oplọn, klandowiwe, po baptẹm po do yin afọdide whẹwhẹwhenu tọn lẹ to zọnlinzinzin hẹ Jehovah mẹ?
● Nawẹ mí sọgan hodo afọdomẹ Jesu tọn lẹ gbọn?
● Nawẹ mí yọnẹn gbọn dọ Jehovah na hẹn mí dote dile mí to zọnlinzin hẹ ẹ?
[Yẹdide to weda 13]
Oplọn, klandowiwe, po baptẹm po yin afọdide whẹwhẹwhenu tọn lẹ to zọnlinzinzin hẹ Jiwheyẹwhe mẹ