‘Mì Yì bo Hẹn Gbẹtọ lẹ Zun Devi, Bosọ Nọ Baptizi Yé’
“Enẹwutu mì yì, bo hẹn akọta lẹpo zun nuplọntọ, bosọ nọ baptizi yé . . . na mì nisọ nọ plọn yé nado nọ doayi onú lẹpo go, nudepope he yẹn degbena mì.”—Matiu 28:19, 20.
1. Nudide tẹwẹ akọta Islaeli tọn basi to Osó Sinai kọ̀n?
NUDI owhe 3 500 lẹ die wayi, akọta blebu de dopà de na Jiwheyẹwhe. Dile yé pli do Osó Sinai kọ̀n, Islaelivi lẹ lá to gbangba dọmọ: “Ehe OKLUNỌ ko dọ lẹpo wẹ mí na wà.” Sọn whenẹnu sọyi, Islaeli lẹzun akọta he klan ede do wiwe hlan Jiwheyẹwhe, yèdọ “adọkunnu vivẹ” etọn. (Eksọdusi 19:5, 8; 24:3) Yé to nukọnpọnhlan po jejejininọ po nado duvivi hihọ́-basinamẹ etọn tọn bo nọgbẹ̀ sọn whẹndo de mẹ jẹ devo mẹ to aigba he “yí anọ́sin po owín po do to sisà” de mẹ.—Levitiku 20:24.
2. Haṣinṣan nankọtọn wẹ gbẹtọ lẹ sọgan tindo hẹ Jiwheyẹwhe to egbehe?
2 Ṣigba, dile psalm-kàntọ lọ Asafi dọ do, Islaelivi lẹ “ma yìn alẹnu Jiwheyẹwhe tọn, yé sọ gbẹ́ zọnlinzin to osẹ́n etọn mẹ.” (Psalm 78:10) Yé gboawupo nado depà he tọgbo yetọn lẹ ko dó hlan Jehovah. To godo mẹ, akọta lọ hẹn haṣinṣan vonọtaun he e tindo hẹ Jiwheyẹwhe enẹ bu. (Yẹwhehodọtọ 5:4; Matiu 23:37, 38) Enẹwutu, Jiwheyẹwhe “dla Kosi lẹ pọ́n [kavi lilẹ́ ayidonugo etọn hlan yé] nado de gbẹtọ to yé mẹ na oyín etọn.” (Owalọ lẹ 15:14) Podọ to azán godo tọn ehelẹ mẹ, e to “gbẹtọ susugege [de bẹpli], he mẹdepope ma sọgan hia, sọn akọta lẹpo mẹ, sọn hẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ,” he yí ayajẹ do to lilá dọmọ: “Whlẹngán hlan Jiwheyẹwhe mítọn he sinai to ofìn lọ ji, podọ hlan Lẹngbọvu lọ.”—Osọhia 7:9, 10.
3. Afọdide tẹlẹ wẹ mẹde dona ze nado sọgan tindo haṣinṣan mẹdetiti tọn hẹ Jiwheyẹwhe?
3 Nado yin dopo to mẹhe tindo haṣinṣan họakuẹ enẹ hẹ Jiwheyẹwhe lẹ mẹ, mẹlọ dona klan ede do wiwe na Jehovah bo do e hia to gbangba gbọn baptẹm osin tọn dali. Afọdide ehe tin to kọndopọ mẹ hẹ gbedide tlọlọ he Jesu na devi etọn lẹ dọmọ: “Enẹwutu mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po [gbigbọ wiwe] tọn po mẹ: na mì nisọ nọ plọn yé nado nọ doayi onú lẹpo go, nudepope he yẹn degbena mì.” (Matiu 28:19, 20) Islaelivi lẹ dotoai dile “owe alẹnu lọ tọn” yin hihia na yé. (Eksọdusi 24:3, 7, 8) Gbọnmọ dali, yé mọnukunnujẹ nuhe Jehovah to bibiọ to yé si lẹ mẹ. Mọdopolọ to egbehe, whẹpo mẹde na basi dide nado yí baptẹm, e dona tindo oyọnẹn he pegan ojlo Jiwheyẹwhe tọn, dile e yin mimọ to Ohó etọn, Biblu mẹ do dandan.
4. Nawẹ mẹde sọgan pegan na baptẹm gbọn? (Pọ́n apotin he tin to aga.)
4 E họnwun dọ, Jesu jlo dọ dodonu yise devi etọn lẹ tọn ni lodo ganji whẹpo yé nado yin bibaptizi. Gbọnvona dọ e deanana hodotọ etọn lẹ nado yì bo hẹn gbẹtọ lẹ zun devi, e sọ biọ dọ yé ni plọn yé nado nọ ‘doayi nuhe e ko degbè etọn lẹpo go.’ (Matiu 7:24, 25; Efesunu lẹ 3:17-19) Enẹwutu, to suhugan whẹho lẹ tọn mẹ, mẹhe pegan na baptẹm lẹ ko nọ plọn Biblu na osun susu kavi etlẹ yin owhe dopo kavi awe, ma nado zọ̀n plaplaji do basi nudide he ma whèwhín. To baptẹm lọ lọsu whenu, baptẹm-yitọ lẹ nọ na gblọndo dọ mọwẹ hlan kanbiọ titengbe awe. To whenuena e yindọ Jesu ko zinnudeji dọ ‘hogbe mítọn Mọwẹ ni yin mọwẹ; Lala, lala,’ sọwhiwhe yíyí do gbadopọnna nujọnu-yinyin kanbiọ baptẹm tọn awe ehelẹ tọn na gọalọna mímẹpo tlala.—Matiu 5:37.
Lẹnvọjọ po Klandowiwe Po
5. Afọdide titengbe awe tẹlẹ ji wẹ kanbiọ baptẹm tọn tintan lọ zinnudo?
5 Kanbiọ baptẹm tọn tintan lọ kanse baptẹm-yitọ lọ eyin ewọ ko lẹnvọjọ sọn ylando etọn lẹ mẹ bo ko klan ede do wiwe hlan Jehovah nado wà ojlo etọn. Kanbiọ ehe zinnudo afọdide titengbe awe he dona yin zize dandan jẹnukọnna baptẹm ji, enẹ wẹ lẹnvọjọ po klandowiwe po.
6, 7. (a) Naegbọn baptẹm-yitọ lẹpo tin to dandannu glọ nado lẹnvọjọ? (b) Diọdo tẹlẹ wẹ dona yin bibasi to whenuena mẹde ko lẹnvọjọ godo?
6 Naegbọn mẹde dona lẹnvọjọ whẹpo do yin bibaptizi? Apọsteli Paulu basi zẹẹmẹ dọmọ: “Mímẹpo . . . ko do walọ mítọn to hohowhenu to wantuntun agbasalan mítọn tọn mẹ.” (Efesunu lẹ 2:3) Whẹpo mí do tindo oyọnẹn he pegan ojlo Jiwheyẹwhe tọn tọn, mí nọ zan walọ aihọn lọ tọn lẹ dai, bo nọ nọgbẹ̀ sọgbe hẹ nujinọtedo etọn lẹ. Gbẹzan mítọn tin to anademẹ Satani, he yin yẹwhe owhenu kavi aihọn ehe tọn glọ. (2 Kọlintinu lẹ 4:4) Ṣigba to ojlo Jiwheyẹwhe tọn yinyọnẹn godo, mí magbe nado nọgbẹ̀, e ma yin “hlan wantuntun gbẹtọ tọn, adavo hlan ojlo Jiwheyẹwhe tọn.”—1 Pita 4:2.
7 Aliho gbẹninọ tọn yọyọ ehe nọ hẹn dona susu wá. Tintan whẹ́, e nọ hẹn ẹn yọnbasi nado tindo haṣinṣan he họakuẹ de hẹ Jehovah, ehe Davidi yijlẹdo oylọ basinamẹ de nado biọ “gohọ̀” podọ “osó wiwe” Jiwheyẹwhe tọn mẹ go—yèdọ lẹblanulọkẹyi mayọnjlẹ de. (Psalm 15:1) Na nugbo tọn, Jehovah ma na basi oylọna mẹdepope poun gba adavo mẹhe nọ “zinzọnlin jlọjlọ, bo to azọ́n dodo tọn wà, bosọ to ohó nugbo dọ to ayiha [yetọn] mẹ” lẹ. (Psalm 15:2) Na ninọmẹ voovo he mẹ mí tin te dai whẹpo do plọn nugbo lọ wutu, e sọgan biọ dọ mí ni basi diọdo delẹ to walọyizan kavi gbẹtọ-yinyin mítọn mẹ nado sọgan jẹ nubiọtomẹsi ehelẹ kọ̀n. (1 Kọlintinu lẹ 6:9-11; Kọlọsinu lẹ 3:5-10) Lẹnvọjọ wẹ na whàn mí nado basi diọdo mọnkọtọn lẹ—yèdọ numọtolanmẹ de he na dohia dọ aliho gbẹninọ mítọn he wayi tọn vẹna mí taun bọ mí sọ magbe to ahun mítọn mẹ nado hẹn homẹ Jehovah tọn hùn. Ehe nọ dekọtọn do gbẹzan mẹtọn didiọ pete mẹ—enẹ wẹ aliho gbẹzan ṣejannabi aihọn tọn jijodo nado doafọna aliho gbẹninọ tọn de he nọ hùnhomẹ na Jiwheyẹwhe.—Owalọ lẹ 3:19.
8. Nawẹ klandowiwe nọ yin bibasi gbọn, podọ kanṣiṣa tẹwẹ e tindo hẹ baptẹm?
8 Adà awetọ kanbiọ baptẹm tọn tintan lọ tọn kanse baptẹm-yitọ lẹ eyin yé ko klan yede do wiwe hlan Jehovah nado wà ojlo etọn. Klandowiwe yin afọdide titengbe de he dona yin zize dandan jẹnukọnna baptẹm. E nọ yin bibasi to odẹ̀ mẹ, bọ mí nọ dọ ojlo mítọn nado ze gbẹzan mítọn jo na Jehovah gbọn Klisti gblamẹ. (Lomunu lẹ 14:7, 8; 2 Kọlintinu lẹ 5:15) To whenẹnu, Jehovah nọ lẹzun Klunọ mítọn, podọ taidi Jesu homẹ mítọn nọ hùn nado wà ojlo etọn. (Psalm 40:8; Efesunu lẹ 6:6) Whladopo gee wẹ opà klandowiwe tọn ehe nọ yin didó hlan Jehovah. Ṣigba, to whenuena e yindọ klandowiwe mítọn yin to míwlẹ po Jiwheyẹwhe po kẹdẹ ṣẹnṣẹn, gbeyiyi gbangba tọn to azán baptẹm tọn lọ gbè nọ hẹn ẹn zun yinyọnẹn na mẹlẹpo dọ mí ko klan mídelẹ do wiwe petepete hlan Otọ́ olọn mẹ tọn mítọn.—Lomunu lẹ 10:10.
9, 10. (a) Etẹwẹ ojlo Jiwheyẹwhe tọn wiwà bẹhẹn? (b) Nawẹ aṣẹpatọ Nazi tọn lẹ lọsu tlẹ mọnukunnujẹ klandowiwe mítọn mẹ gbọn?
9 Etẹwẹ apajlẹ Jesu tọn hihodo to ojlo Jiwheyẹwhe tọn wiwà mẹ bẹhẹn? Jesu dọna devi etọn lẹ dọmọ: “Eyin mẹdepope jlo na hodo mi, gbọ e ni mọ́n ede, bosọ ze [yatin etọn bo nọ hodo mi to whepoponu, NW].” (Matiu 16:24) Tofi, e dọ onú dopodopo atọ̀n he mí dona wà. Tintan whẹ́, mí dona “mọ́n” mídelẹ. To hogbe devo mẹ, mí na gbẹ́ ayilinlẹn ṣejannabi, mapenọ tọn mítọn lẹ dai bo yigbe nado setonuna ayinamẹ po anademẹ Jiwheyẹwhe tọn po. Awetọ, mí nọ ‘ze yatin mítọn.’ To azán Jesu tọn gbè, yatin yin ohia winyan po yajiji po tọn. Taidi Klistiani lẹ, mí yọnẹn dọ mí sọgan jiya to whedelẹnu na wẹndagbe lọ tọn wutu. (2 Timoti 1:8) Dile etlẹ yindọ aihọn sọgan ṣàn mí kò kavi gblewhẹdo mí, taidi Klisti mí ‘ma hò winyan pọ́n,’ podọ mí jaya na mí yọnẹn dọ mí to homẹ Jiwheyẹwhe tọn hẹn hùn. (Heblu lẹ 12:2) Podọ atọ̀ntọ, mí nọ hodo Jesu “to whepoponu.”—Psalm 73:26; 119:44; 145:2.
10 E jẹna ayidego dọ agọjẹdomẹtọ delẹ tlẹ mọnukunnujẹ nujọnu-yinyin klandowiwe he Kunnudetọ Jehovah tọn lẹ ko basi nado sẹ̀n Jiwheyẹwhe po ahun lẹpo po tọn mẹ. Di apajlẹ, to osla yasanamẹ Buchenwald Nazi Allemagne tọn mẹ, Kunnudetọ he gbẹ́ nado jogbe lẹ yin didọna nado doalọ wekinkan he bọdego ehe mẹ: “Yẹn gbẹ́ yin Biblu Plọntọ zohunhunnọ de bo ma na hẹn opà he yẹn ko dó hlan Jehovah gble gbede gba.” Matin ayihaawe, ehe do pọndohlan devizọnwatọ nugbonọ Jiwheyẹwhe tọn he ko klan yede do wiwe lẹpo tọn hia hezeheze!—Owalọ lẹ 5:32.
Yin Didohia Taidi Dopo to Kunnudetọ Jehovah Tọn lẹ Mẹ
11. Lẹblanulọkẹyi tẹwẹ mẹhe yin bibaptizi tindo?
11 Adà tintan kanbiọ awetọ lọ tọn kanse baptẹm-yitọ lọ eyin ewọ mọnukunnujẹemẹ dọ baptẹm etọn do e hia taidi dopo to Kunnudetọ Jehovah tọn lẹ mẹ. To baptẹm etọn godo, ewọ lẹzun lizọnyizọnwatọ dide de he tindo yinkọ Jehovah tọn to ota. Ehe yin lẹblanulọkẹyi daho de bosọ yin azọngban sinsinyẹn de. E sọ nọ ze todido whlẹngán mavọmavọ tọn donukọnna mẹhe yin bibaptizi lọ, eyin ewọ gbọṣi nugbonọ-yinyin mẹ dohlan Jehovah.—Matiu 24:13.
12. Azọngban tẹwẹ zọnpọ hẹ gbégbò lọ nado tindo oyín Jehovah tọn to ota?
12 Na nugbo tọn, gbégbò vonọtaun de wẹ e yin nado tindo oyín Jiwheyẹwhe ganhunupotọ lọ, Jehovah tọn to ota. Yẹwhegán Mika dọmọ: “Gbẹtọ lẹpo wẹ zọnlinzin omẹ dopodopo to oyín yẹwhe etọn tọn mẹ, míwlẹ bo nasọ nọ zinzọnlin to oyín [Jehovah] Jiwheyẹwhe mítọn tọn mẹ kakadoi podọ doidoi.” (Mika 4:5) Etomọṣo, azọngban de zọnpọ hẹ gbégbò ehe. Mí dona vánkan nado zan gbẹzan mítọn to aliho de mẹ he na hẹn gbégbò wá yinkọ he mí tindo to ota lọ ji. Dile Paulu flin Klistiani he tin to Lomu lẹ do, eyin mẹde ma nọ yí nuhe plọnmẹ e te lẹ do yizan mẹ, oyín Jiwheyẹwhe tọn na lẹzun “nùzandogona,” kavi yin masin-kọndego.—Lomunu lẹ 2:21-24.
13. Naegbọn devizọnwatọ klandowiwe Jehovah tọn lẹ tindo azọngban lọ nado dekunnuna Jiwheyẹwhe?
13 To whenuena mẹde lẹzun dopo to Kunnudetọ Jehovah tọn lẹ mẹ, e sọ nọ kẹalọyi azọngban lọ nado dekunnuna Jiwheyẹwhe. Jehovah basi oylọna akọta klandowiwe Islaeli tọn nado yin kunnudetọ etọn nado sọgan dekunnu dọ ewọ yin Jiwheyẹwhe madopodo de. (Isaia 43:10-12, 21) Ṣigba, akọta lọ gboawupo nado hẹn azọngban ehe di podọ yé hẹn nukundagbe Jehovah tọn bu mlẹnmlẹn to godo mẹ. To egbehe, Klistiani nugbo lẹ nọ doawagun na lẹblanulọkẹyi he yé tindo nado dekunnuna Jehovah. Mí nọ wàmọ na mí yiwanna ẹn bosọ jlo vẹkuvẹku dọ oyín etọn ni yin kinklandowiwe wutu. Naegbọn mí na bọnùdo to whenuena e yindọ mí yọ́n nugbo lọ gando Otọ́ olọn mẹ tọn mítọn po lẹndai etọn po go? Numọtolanmẹ dopolọ wẹ mí tindo hẹ apọsteli Paulu to whenuena e dọmọ: “Mananọmawà tin to oji e; na, dindọn tin hlan mi, eyin yẹn ma dọyẹwheho wẹndagbe tọn!”—1 Kọlintinu lẹ 9:16.
14, 15. (a) Nawẹ titobasinanu Jehovah tọn nọ gọalọna mí nado yinukọn to gbigbọ-liho gbọn? (b) Awuwledainanu tẹlẹ wẹ tin-to-aimẹ nado gọalọna mí to gbigbọ-liho?
14 Kanbiọ awetọ lọ sọ flinnu baptẹm-yitọ lọ gando azọngban etọn go nado kọngbedopọ hẹ titobasinanu he Jehovah nọ yí gbigbọ etọn do deanana lọ. E ma yin míwlẹ ṣokẹdẹ wẹ to Jiwheyẹwhe sẹ̀n gba, podọ mí tindo nuhudo alọgọ, godonọnamẹ, po tulinamẹ “mẹmẹsunnu” mítọn lẹ tọn po. (1 Pita 2:17; 1 Kọlintinu lẹ 12:12, 13) Titobasinanu Jiwheyẹwhe tọn nọ yí adà tangan de wà to nukọnyiyi gbigbọmẹ tọn mítọn mẹ. E nọ wleawuna owe sinai do Biblu ji susugege he nọ gọalọna mí nado jideji to oyọnẹn he pegan mẹ, nado yinuwa po nuyọnẹn po to whenuena mí pannukọn nuhahun lẹ, podọ nado wleawuna haṣinṣan pẹkipẹki de hẹ Jiwheyẹwhe. Taidi onọ̀ he nọ hẹn ẹn diun dọ ovi etọn yin núdùdù na ganji bo yin nukunpedego, “afanumẹ nugbonọ, nuyọnẹntọ” lọ nọ wleawuna núdùdù gbigbọmẹ tọn he wá do ganmẹ susugege, na mí nido sọgan yinukọn to gbigbọ-liho.—Matiu 24:45-47; 1 Tẹsalonikanu lẹ 2:7, 8.
15 To opli sẹmẹsẹmẹ tọn lẹ ji, omẹ Jehovah tọn lẹ nọ mọ azọ́nplọnmẹ po tulinamẹ he jẹ po yí nado yin Kunnudetọ Jehovah tọn nugbonọ lẹ. (Heblu lẹ 10:24, 25) Wehọmẹ Lizọnyizọn Yẹwhehọluduta tọn nọ plọn mí nado dọho to gbangba, podọ Opli Sinsẹ̀nzọn tọn nọ plọnazọ́n mí nado ze owẹ̀n mítọn donukọnnamẹ po kọdetọn dagbe po. To opli mítọn lẹ ji podọ to whenuena mí to owe sinai do Biblu ji lẹ plọn na míde, mí sọgan mọ dọ gbigbọ Jehovah tọn to azọ́nwa bo to anadena titobasinanu etọn. Gbọn awuwledainanu gbesisọ tọn ehelẹ gblamẹ, Jiwheyẹwhe nọ do owù lẹ hia mí, nọ plọnazọ́n mí nado yin lizọnyizọnwatọ kọdetọn dagbenọ lẹ, bosọ nọ gọalọna mí nado gbọṣi nukle to gbigbọ-liho.—Psalm 19:7, 8, 11; 1 Tẹsalonikanu lẹ 5:6, 11; 1 Timoti 4:13.
Nuhe Nọ Whànmẹ Nado Yí Baptẹm
16. Etẹwẹ nọ whàn mí nado ze míde jo mlẹnmlẹn na Jehovah?
16 Gbọnmọ dali, kanbiọ baptẹm tọn awe lọ lẹ flin baptẹm-yitọ lẹ nujọnu-yinyin baptẹm osin mẹ tọn po azọngban he nọ zọnpọ hẹ ẹ lẹ po. Ṣigba, etẹwẹ dona whàn yé nado basi nudide lọ nado yí baptẹm? Mí nọ lẹzun devi he yí baptẹm lẹ, e ma yin na mẹde hẹn mí gánnugánnu wutu wẹ gba, ṣigba na Jehovah “dọ̀n” mí wutu. (Johanu 6:44) Jehovah jlo dọ nudida lẹpo ni setonuna ẹn na yé yiwanna ẹn wutu e ma yin na yé yin hinhẹn gánnugánnu wutu gba. (1 Johanu 4:8) Jẹhẹnu dagbe Jehovah tọn lẹ podọ aliho he mẹ e nọ yinuwa hẹ mí te wẹ nọ whàn mí nado dọnsẹpọ ẹ. Jehovah na mí Ovi dopo akàn etọn bosọ ze sọgodo dagbe hugan lọ donukọnna mí. (Johanu 3:16) Taidi kọdetọn de, mí nọ yin whinwhàn nado ze míde jo na ẹn bo klan gbẹzan mítọn do wiwe hlan ẹn.—Howhinwhẹn lẹ 3:9; 2 Kọlintinu lẹ 5:14, 15.
17. Etẹwẹ mí ma klan mídelẹ do wiwe hlan?
17 Mí ko klan mídelẹ do wiwe mlẹnmlẹn hlan Jehovah kakati nido yin hlan linlẹn de kavi azọ́n tangan de. Azọ́n he Jiwheyẹwhe dena omẹ etọn lẹ sọgan diọ, ṣigba klandowiwe yetọn hlan ẹn ma nọ diọ gbede gba. Di apajlẹ, nuhe e dọna Ablaham nado wà gbọnvo taun na dehe e dọna Jẹlemia nado wà. (Gẹnẹsisi 13:17, 18; Jẹlemia 1:6, 7) Ṣogan, yé omẹ awe lẹ hẹn azọ́ndenamẹ tangan he Jiwheyẹwhe dena yé di na yé yiwanna Jehovah bo jlo na wà ojlo etọn po nugbonọ-yinyin po wutu. To ojlẹ opodo tọn ehe mẹ, hodotọ Klisti tọn he ko yí baptẹm lẹpo wẹ to vivẹnudo nado hẹn gbedide Klisti tọn nado dọyẹwheho wẹndagbe Ahọluduta lọ tọn bo hẹn gbẹtọ lẹ zun devi di. (Matiu 24:14; 28:19, 20) Azọ́n enẹ wiwà po ahun lẹpo po yin aliho dagbe de nado dohia dọ mí yiwanna Otọ́ olọn mẹ tọn mítọn podọ dọ mí ko klan míde do wiwe hlan ẹn nugbonugbo.—1 Johanu 5:3.
18, 19. (a) Etẹ dọ wẹ mí te to gbangba to whenuena mí yí baptẹm? (b) Etẹwẹ na yin dogbapọnna to hosọ he bọdego mẹ?
18 Matin ayihaawe, baptẹm nọ hẹn dona susu wá, ṣigba e ma yin afọdide he dona yin pinpọn po nukun vlẹkẹsẹ de po gba. (Luku 14:26-33) E nọ do gbemima he dona yíta to onú lẹpo ji hia. (Luku 9:62) To whenuena mí yí baptẹm, mí to didọ to gbangba dọ: “Jiwheyẹwhe he wẹ Jiwheyẹwhe mítọn kakadoi: ewọ wẹ na yin alihiamẹtọ mítọn yèdọ kakajẹ okú.”—Psalm 48:14.
19 Hosọ he bọdego na gbadopọnna kanbiọ devo lẹ he sọgan fọndote gando baptẹm osin mẹ tọn go. Be mẹde sọgan tindo whẹwhinwhẹ́n dagbe lẹ nado dọ̀n yonu dogodo sọn baptẹm yíyí mẹ ya? Be owhe dona yin aliglọnnamẹnu de ya? Nawẹ mẹlẹpo sọgan yidogọna yẹyi nujijọ baptẹm tọn gbọn?
Be Hiẹ Sọgan Basi Zẹẹmẹ Ya?
• Naegbọn Klistiani dopodopo dona lẹnvọjọ whẹpo do yí baptẹm?
• Etẹwẹ mẹde kinklandowiwe hlan Jiwheyẹwhe bẹhẹn?
• Azọngban tẹlẹ wẹ nọ zọnpọ hẹ gbégbò lọ nado tindo oyín Jehovah tọn to ota?
• Etẹwẹ dona whàn mí nado basi nudide lọ nado yí baptẹm?
[Apotin to weda 22]
Kanbiọ Baptẹm Tọn Awe Lẹ
To dodonu avọ́sinsan Jesu Klisti tọn ji, be hiẹ ko lẹnvọjọ sọn ylando towe lẹ mẹ bo ko klan dewe do wiwe hlan Jehovah nado wà ojlo etọn ya?
Be hiẹ mọnukunnujẹemẹ dọ klandowiwe po baptẹm towe po do we hia taidi dopo to Kunnudetọ Jehovah tọn lẹ mẹ to kọndopọ mẹ hẹ titobasinanu he Jiwheyẹwhe nọ yí gbigbọ etọn do deanana lọ ya?
[Yẹdide to weda 23]
Klandowiwe yin opà titengbe de he nọ yin didó na Jehovah to odẹ̀ mẹ
[Yẹdide to weda 25]
Azọ́n yẹwhehodidọ tọn mítọn nọ do klandowiwe mítọn hlan Jiwheyẹwhe hia