Nujijọ Ayajẹ Tọn de—Gbedewema-Yíyí Klasi 104tọ Giliadi Tọn — WESẸDOTẸN INTẸNẸT JI TỌN Watchtower Tọn

Nujijọ Ayajẹ Tọn de—Gbedewema-Yíyí Klasi 104tọ Giliadi Tọn

“EHE yin azán ayajẹ tọn de, bọ mímẹpo sọ to aglinjẹ.” Po hogbe enẹlẹ po Carey Barber, dopo to Hagbẹ Anademẹtọ Kunnudetọ Jehovah tọn lẹ tọn mẹ, hùn hùnwhẹ gbedewema-yíyí klasi 104tọ heyin Wehọmẹ Biblu Pinplọn Watchtower Giliadi tọn to 14 mars 1998. Mẹplidopọ 4 945 wẹ yin oylọ-basina nado bẹ nujijọ lọ jẹeji gbọn ohàn Ahọluduta tọn sọha 208 jiji dali, he hosọ etọn yin “Un chant d’allégresse.”

Ayinamẹ Yọn-na-yizan Nado Gbọṣi Ayajẹ Mẹ

Adà bẹjẹeji tito-to-whinnu lọ tọn, yèdọ hodidọ kleun sinai do Biblu ji debọdo-dego atọ́n tọn de, wleawuna ayinamẹ yọn-na-yizan delẹ do lehe yè sọgan hẹn gbigbọ ayajẹ tọn he gbayipe to azán gbedewema-yíyí tọn lọ gbè go gbọn.

Hodidọ tintan yin zizedonukọnnamẹ gbọn Joseph Eames dali he nọ wazọ́n to Azọ́nwatẹn Wekinkan tọn mẹ. E dọho do hosọ lọ ji “Mì Hodo Apajlẹ Omẹ Nugbonọ lẹ Tọn,” heyin zize sinai do kandai he tin to 2 Samuẹli weta 15 po 17 po mẹ ji, to fie Absalọmi, yèdọ visunnu Davidi tọn, blase nado hò ahọluduta heyin nina otọ́ etọn gbọn Jiwheyẹwhe dali yí gbọn atẹṣiṣi de finfọndote dali. Etomọṣo, mẹdelẹ he gbọṣi nugbonọ-yinyin hlan mẹyiamisisadode Jehovah tọn, yèdọ hlan Ahọlu Davidi gbẹ́ tin. Nupinplọn tẹwẹ mẹdehlan yọyọ lọ lẹ sọgan plọn sọn ehe mẹ? “Fidepope he mì na yì to azọ́ndenamẹ mẹdehlan tọn mìtọn mẹ, mì gbọn nugbonọ-yinyin dali ze gbigbọ gbekọndopọ po sisi nina aṣẹpipa yẹwhehọluduta tọn po daga. Mì gọalọna mẹdevo lẹ nado wà onú dopolọ,” wẹ Mẹmẹsunnu Eames dọ.

Mẹhe hodo e to tito-to-whinnu lọ ji wẹ David Sinclair, he basi todohukanji nubiọtomẹsi ao lẹ tọn, heyin nudego to Psalm 15 mẹ, na jonọ yinyin to ‘gohọ Jehovah tọn mẹ.’ Hodidọ etọn, he hosọ etọn yin “To Nukọnzindo Taidi Jonọ lẹ to Gohọ Mẹdehlan Tọn Towe Mẹ,” na tuli wehọmẹvi he to gbedewema yí lẹ nado yí psalm ehe do yizan mẹ to azọ́ndenamẹ mẹdehlan tọn yetọn lẹ mẹ, yèdọ to fie yé na yin jonọ te lẹ. Mẹmẹsunnu Sinclair zinnudo nujọnu-yinyin gbẹninọ sọgbe hẹ nujinọtedo jijọ-di-Jiwheyẹwhe tọn lẹ ji to whepoponu. Kọdetọn etọn? Psalm 15:5 dọmọ: “Ewọ he wà onú helẹ yè ma na diọtẹn na ẹn gbede.”

John Barr, dopo to Hagbẹ Anademẹtọ lẹ mẹ, bọdego bo dọ̀n ayidonugo wá nugandomẹgo huhlọnnamẹ tọn he ohàn jiji to opli Klistiani tọn lẹ ji nọ tindo. Ṣigba etẹwẹ yin ohàn ayajẹ tọn hugan lọ he to yinyin jiji lẹdo aihọn pé to egbehe? Wẹndagbe Ahọluduta Mẹssia Jiwheyẹwhe tọn tọn wẹ. Etẹwẹ to kọdetọn sọn ohàn jiji ehe lẹpo mẹ, kavi yẹwhehodidọ dogbọn Ahọluduta lọ dali mẹ? Hukan awetọ ohàn sọha 208 tọn dọ ẹ họnwun dọmọ: “Gbọn yẹwhehodidọ po mẹpinplọn Klistiani tọn po dali, mẹsusu to yinyin hinhẹnwa adà Jehovah tọn mẹ. Ehelẹ ga, to ohàn ayajẹ tọn lẹ ji, to yé ji jẹgbonu, O jẹ fidindẹn bo gbloada lẹ!” Mọwẹ, to gbedopo nudi devi yọyọ 1 000 lẹ wẹ to yinyin bibaptizi. Mẹmẹsunnu Barr dotana dọmọ: “Mẹmẹsunnu lẹ emi, be e mayin nujiawu nado lẹn dọ mì to yinyin didohlan aigba-denamẹ lẹ ji nado yì mọ gbẹtọ wunmẹ he na tin to ote nado sè ohàn pipà tọn mìtọn lẹ ya?”

“Dotoai Hlan Ogbè Numimọ Tọn Lẹ” wẹ yin hosọ hodidọ he bọdego lọ tọn he James Mantz he nọ wazọ́n to Azọ́nwatẹn Wekinkan tọn mẹ zedonukọnnamẹ. E zinnudeji dọ onú delẹ sọgan yin pinplọn gbọn numimọ mẹdetiti tọn kẹdẹ dali. (Heblu lẹ 5:8) Etomọṣo, Howhinwhẹn lẹ 22:17 na tuli mí nado ‘tùn otó mítọn ai, bo sè ohó nuyọnẹntọ lẹ tọn,’ kavi mẹhe ko tindo numimọ lẹ tọn. Wehọmẹvi he to gbedewema yí lẹ sọgan plọn nususu sọn mẹhe ko yì jẹnukọnna yé lẹ dè. “Yé yọ́n lehe yè nọ deahi na onú lẹ hẹ nusàtọ-nusatẹn kọmẹ tọn lẹ do. Yé yọ́n adà todaho lọ tọn lẹ he yè dona dapana na owù agbasa po walọyizan tọn lẹ po wutu. Yé yọ́n numọtolanmẹ gbẹtọ lẹdo lọ mẹ tọn lẹ tọn. Mẹdehlan whenu-gaa tọn lẹ yọ́n nuhudo nuhe tọn mìwlẹ tindo nado yin homẹhunnọ po kọdetọn dagbenọ po to azọ́ndenamẹ mìtọn mẹ,” wẹ Mẹmẹsunnu Mantz dọ.

To hodidọ do hosọ lọ “Yọ́n Pinpẹn Azọ́ndenamẹ Yẹwhehọluduta Tọn Towe” ji mẹ, Wallace Liverance, mẹhe nọ penukundo kandai Wehọmẹ Giliadi tọn go, basi zẹẹmẹ dọ dile mẹdehlan delẹ, taidi apọsteli Paulu, Timoti, po Balnaba po, mọ azọ́ndenamẹ yetọn lẹ yí sọn Jiwheyẹwhe dè gbọn gbigbọ wiwe kavi dohia azọ́njiawu tọn delẹ dali do, mẹdehlan heyin azọ́nplọn to Giliadi lẹ nọ yin azọ́ndena yì otò de mẹ to ogle aihọn lọ tọn ji gbọn “afanumẹ nugbonọ nuyọnẹntọ” lọ dali. (Matiu 24:45-47) E yí azọ́ndenamẹ mẹdehlan lẹ tọn jlẹdo otò he mẹ Gideoni deazọnna sunnu etọn he na fùnawhàn hẹ Midianinu lẹ go. (Whẹdatọ 7:16-21) “Mì yọ́n pinpẹn azọ́ndenamẹ mẹdehlan yẹwhehọluduta tọn mìtọn. Kẹdẹdile awhànfuntọ Gideoni tọn lẹ ‘ṣite omẹ dopodopo to otẹn etọn mẹ do,’ mì pọ́n azọ́ndenamẹ mìtọn hlan taidi otẹn he mẹ mì dona nọ̀. Mì tindo yise dọ Jehovah sọgan yí mì zan kẹdẹdile e yí sunnu fọde kanweko Gideoni tọn lẹ zan do,” wẹ Mẹmẹsunnu Liverance dotuhomẹnamẹ dọ.

Yinyin Mẹhe Tindo Ojlo to Gbẹtọ lẹ Mẹ Nọ Dekọtọn do Ayajẹ Mẹ

Atọ̀họ̀-Nuhihọ́ Lọ Tọn to ojlẹ de mẹ wayi basi zẹẹmẹ dọmọ: “Kakati nado ze ojlonu po gbẹzan mítọn lẹ po sinai do nuhe yin bibasi lẹ po zomọ titonu ehe tọn lẹ po ji, yèdọ nuhe ma tindo nujikudo nukọnzinzindo tọn lẹ, lehe e yin nuhe yọ́n hugan bo gọna nuyọnẹn do sọ nado yí gbẹtọ lẹ do basi ojlonu nujọnu tọn mítọn lẹ bosọ plọn nado mọ ayajẹ nujọnu tọn yí sọn onú lẹ wiwà na mẹdevo lẹ mẹ.” To kọndopọmẹ hẹ enẹ, Mẹmẹsunnu Mark Noumair, dopo to nuplọnmẹtọ Wehọmẹ Giliadi tọn lẹ mẹ, dọhodopọ hẹ pipli wehọmẹvi lẹ tọn de do numimọ sinsẹ̀nzọn kunnudegbe tọn yetọn lẹ ji bo basi zẹẹmẹ dọmọ: “Ojlo mẹdetiti tọn didohia to mẹdevo lẹ mẹ wẹ yin nuhe na hẹn mì zun mẹdehlan dagbe lẹ.”

Họ̀nhungan lẹ Hlan Ayajẹ to Jonọto Mẹ

Etẹwẹ yin họ̀nhungan delẹ hlan kọdetọn dagbe po ayajẹ po to azọ́n mẹdehlan tọn mẹ? Mẹmẹsunnu Charles Woody he nọ wazọ́n to Azọ́nwatẹn Sinsẹ̀nzọn tọn po Harold Jackson po, yèdọ mẹdehlan dai tọn de to Amérique Latine he sọ yin alọgọtọ de na Wedegbẹ́ Mẹpinplọn tọn, kanhose hagbẹ voovo Wedegbẹ́ Alahọ tọn he wá klasi ṣinẹnẹtọ wehọmẹ wedegbẹ́ alahọ tọn lẹ. Delẹ die to wunmẹ avase he yé tindo nado na mẹ:

Albert Musonda sọn Zambie doayi e go dọmọ: “To whenuena mẹdehlan lọ ze afọdide tintan nado yì dọnudo mẹmẹsunnu lẹ, e nọ fọ́n gbigbọ dagbe de dote, na mẹmẹsunnu lẹ na dọnsẹpọ mẹdehlan lọ, podọ mẹdehlan lọ na dọnsẹpọ yé.”

Rolando Morales sọn Guatemala na linlẹn dọ to whenuena mẹdehlan yọyọ lẹ yin nina nude dogbọn gbẹtọ họntọnjihẹmẹtọ lẹ dali nado nù, yé sọgan yí dẹẹdẹ po zinzin po do gblọn dọ: ‘Yẹn yin mẹyọyọ to otò ehe mẹ. E jlo mi nado yí ì, ṣigba agbasa ṣie ma tindo avunhonu jọwamọ tọn lẹ he agbasa mìwlẹ tọn tindo gba. Yẹn tindo jide dọ to gbedopo yẹn sọgan kẹalọyi i, podọ yẹn nasọ yin homẹhunnọ nado wàmọ.” Etẹwẹ yin alemọyi gblọndo mọnkọtọn tọn? “Gbẹtọ lẹ ma na yin homẹhẹngblena gba, podọ mẹdehlan lẹ nasọ yin mẹhe jọmẹ hlan mẹdevo lẹ.”

Etẹwẹ sọgan gọalọna mẹdehlan lẹ nado doakọnnanu to azọ́ndenamẹ yetọn lẹ mẹ? Mẹmẹsunnu Paul Crudass, mẹhe yí gbedewema klasi 79tọ Giliadi tọn, he ko to sinsẹ̀nzọnwà to Libéria hugan owhe 12, basi ayidonugo ehe: “Yẹn yọnẹn dọ nugbo wẹ mẹjitọ lẹ nọ jẹdò ovi yetọn lẹ tọn. Ojlẹ delẹ nọ tin to whenuena mẹdehlan lọ nọ to tintẹnpọn nado jẹakọhẹ otò lọ, lẹdo lọ, aṣa lọ, po gbẹtọ lẹ po. E sọgan tindo numọtolanmẹ azọ́ndenamẹ lọ jijodo tọn. Eyin e mọ wekanhlanmẹ de yí sọn owhé he dọ, ‘Mí jẹdò towe taun; mí ma yọ́n nuhe mí sọgan wà matin hiẹ gba,’ enẹ sọgan yin nuhudo nuhe tọn e tindo lẹpo nado bẹ agbàn bo yì owhé. Nujọnu taun wẹ e yin na hẹnnumẹ he tin tofi to egbehe lẹ nado flin enẹ.”

To hokansemẹ lọ lẹ godo, hodidọ tadona tọn to tito-to-whinnu lọ ji yin zizedonukọnnamẹ gbọn Theodore Jaracz dali, yèdọ dopo to Hagbẹ Anademẹtọ lẹ mẹ. Hosọ etọn wẹ: “Yí Ahọluduta lọ do Basi Onú Tintan to Gbẹzan Towe Mẹ.” Nawẹ mẹdehlan lọ lẹ sọgan ze ayidonugo yetọn lẹpo do azọ́n yetọn ji bo mayin ayihafẹsẹna gbọn? E na yé tuli nado tindo todohukanji de na oplọn Biblu mẹdetiti tọn, ehe na gọalọna yé nado ze dagbenu Ahọluduta lọ tọn lẹ do otẹn tintan mẹ to gbẹzan mẹ. Podọ nuflinmẹ he wá do ganmẹ de die: “Mẹdehlan delẹ ko gbẹkọ oplọn mẹdetiti tọn go na yé ko yin wiwle mlẹnmlẹn gbọn zomọ hanjiji tọn lẹ, wekanhlanmẹ gbọn zomọ nudọnamẹ-sẹdo tọn, po zomọ nudọnamẹ-sẹdo tọn lẹ lọsu po dali. Mí dona tindo linlẹn dagbe jlẹkajininọ tọn to azọ́nwanu depope yiyizan mẹ bo ma yí whenu he sù hugan zan do nude he sọgan glọnalina oplọn mẹdetiti tọn to Ohó Jiwheyẹwhe tọn mítọn mẹ ji blo.”

Bọdo hodidọ Mẹmẹsunnu Jaracz tọn go wẹ gbedewema lẹ ninamẹ po hihia wekanhlanmẹ pinpẹn-nutọn-yinyọnẹn tọn de po sọn klasi lọ dè wá aimẹ. Nukunmọnu klasi lọ tọn do numọtolanmẹ mẹlẹpo tọn hia to aliho ehe mẹ dọmọ: “Mí mọ kunnudenu yinukundomọ owanyi he Jesu dọ e na tin to devi etọn lẹ ṣẹnṣẹn tọn, podọ ehe ko vọ́ jide na mí dọ mahopọnna fidepope he mí tin te, titobasinanu zohunhunnọ, owanyinọ, taidi onọ̀ de tin to godo na mí. Po godonọnamẹ mọnkọtọn po, mí ko wleawufo nado jẹ opodo aigba tọn.” Tadona mẹwhantọ de wẹ e yin na azán ayajẹnọ gbedewema klasi 104tọ Giliadi tọn.

[Apotin to weda 24]

Sọha Nulinlẹn Klasi lọ Tọn

Sọha otò he mẹ yé wá sọn lẹ: 9

Sọha otò he mẹ yè do yé hlan lẹ: 16

Sọha wehọmẹvi lẹ tọn: 48

Sọha asu po asi po lẹ tọn: 24

Madozẹnzẹn owhe mẹhodido tọn: 33

Madozẹnzẹn owhe to nugbo mẹ tọn: 16

Madozẹnzẹn owhe lizọnyizọn whenu-gigọ́ tọn: 12

[Yẹdide to weda 25]

Gbedewema-Yíyí Klasi 104tọ Wehọmẹ Biblu Pinplọn Watchtower Giliadi Tọn

To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọ́nwhé yì adusiwhé to hukan dopodopo ji

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Yẹdide to weda 26]

Mẹmẹsunnu he tindo mahẹ to nupinplọn klasi 104tọ lọ mẹ lẹ: (sọn amiyọ́nwhé) W. Liverance, U. Glass, K. Adams, M. Noumair