Ohó Dọdai Jiwheyẹwhe tọn Nọ Namẹ Todido Na Sọgodo

Po alọgọ Ohó Jiwheyẹwhe tọn, yèdọ Biblu Wiwe lọ tọn po, Klistiani nugbo lẹ nọ pọ́n sọgodo hlan to yise, todido, po pọndohlan dagbe po mẹ. Na yé tindo haṣinṣan dagbe de hẹ Jehovah Jiwheyẹwhe wutu, yé to nukọnpọnhlan na sọgodo. Dile hodidọ bẹjẹeji tọn to Plidopọ Agbegbe “Ohó Dọdai Jiwheyẹwhe Tọn” ji basi zẹẹmẹ etọn do, Kunnudetọ Jehovah tọn lẹ ko yin nuplọntọ sọwhiwhenọ dọdai Biblu tọn lẹ tọn na owhe susu. Enẹwutu, etẹwẹ Jehovah tindo to sẹdotẹnmẹ na omẹ etọn lẹ to plidopọ ehelẹ ji? Po Biblu po to alọ mẹ, mẹplidopọ lẹpo tin to jejeji nado dindona. Hosọ azán dopodopo plidopọ lọ tọn yin didohia taidi hóvila voovo lẹ.

AZÁN TINTAN: Zọnlinzinzin to Hinhọ́n Ohó Jiwheyẹwhe Tọn Mẹ

Hodidọ lọ “Ohó Jiwheyẹwhe Tọn Ko Doali Hia Mí” basi zẹẹmẹ dọ omẹ Jehovah tọn lẹ tin taidi dawe de he bẹ gbejizọnlin de jẹeji to zinvlu ozán mẹ tọn mẹ. Dile owhè jẹ zizẹ ji, e nọ mọ oyẹ̀ lẹ, ṣigba to whenuena owhè hùn ṣadada, e mọnu họnwun gblegede. Dile e yin dọdai etọn dọ to Howhinwhẹn lẹ 4:18 mẹ do, omẹ Jehovah tọn lẹ ko wá mọ aliho yetọn hezeheze to owhè nugbo lọ tọn he to sisẹ́ sọn ohó dọdai Jiwheyẹwhe tọn tọn mẹ. Yé mayin jijodo nado klẹnafọ to zinvlu gbigbọmẹ tọn mẹ gba.

Hodidọ ayidego tọn, “Payi Ohó Dọdai Jiwheyẹwhe Tọn Go,” flin hosetọ lẹ dọ mẹhe nọ ganjẹ Jehovah go lẹ nọ yin hihọ́-basina sọn flumẹjijẹ po winyandomẹ po mẹ he nọ yin numimọ etọn tindo gbọn mẹhe to hihodo mẹssia lalo tọn lẹ po yẹwhegán lalo tọn lẹ po dali lẹ. To vogbingbọn mlẹnmlẹn mẹ, jẹhẹnu Mẹssia nugbo lọ, yèdọ Jesu Klisti tọn lẹ, sẹhundaga taun! Di apajlẹ, wunmẹdidiọ jiawu Jesu tọn wleawuna awusọhia jẹnukọn etọn taidi Ahọlu zedo ofin ji Ahọluduta Jiwheyẹwhe tọn tọn. Sọn whenuena e ko wá huhlọn Ahọluduta tọn mẹ sọn 1914 gbọ́n, Jesu sọ yin “sunwhlẹvu okle tọn” heyin nudego to 2 Pita 1:19, NW mẹ. “Taidi Mẹssia Sunwhlẹvu Okle tọn, e basi nulila bẹjẹeji azán yọyọ, kavi ojlẹ de tọn, he bẹjẹeji na gbẹtọvi tonusetọ lẹpo,” wẹ hodọtọ lọ dọ.

To bẹjẹeji tito-to-whinnu whèmẹ tọn, hodidọ lọ “To Sisẹ́ Taidi Wùnhọ́ntọ Lẹ” basi zẹẹmẹ do Efesunu lẹ 5:8 ji, to fie apọsteli Paulu na ayinamẹ mí te nado “nọ zinzọnlin kẹdẹdi ovi hinhọ́n tọn lẹ.” Klistiani lẹ yin wùnhọ́ntọ lẹ, e mayin gbọn Ohó Jiwheyẹwhe tọn mimá hẹ mẹdevo lẹ dali kẹdẹ wẹ gba ṣigba gbọn yíyí Biblu do yizan mẹ to gbẹzan yetọn lẹ mẹ to apajlẹ Jesu tọn hihodo mẹ dali ga.

Nado yin wùnhọ́ntọ mọnkọtọn de, mí dona nọ “Tindo Homẹhunhun to Ohó Jiwheyẹwhe Tọn Hihia Mẹ.” Hosọ ehe yin hodọdeji to hómadọ adà-atọ̀n tọn de mẹ. To whenuena e ko yihodọ sọn Abraham Lincoln dè, he ylọ Biblu dọ “nunina dagbe hugan lọ he Jiwheyẹwhe na gbẹtọ” godo, hodọtọ tintan kanse mẹplidopọ lẹ nuhe aṣa wehihia tọn yetọn dohia gando lehe pinpẹn-nutọn-yinyọnẹn yetọn na Ohó Jiwheyẹwhe tọn siso sọ go. Todoaitọ lẹ yin tulina nado nọ yí sọwhiwhe do hia Biblu, yí whenu zan nado lẹnayihamẹpọn do kandai Owe-wiwe tọn lẹ ji podọ nado nọ blá nuagokun yọyọ lẹ dopọ hẹ nuhe ko yin pinplọn wayi lẹ.

Adà hómadọ lọ tọn he bọdego zinnudo nuhudo nupinplọn tọn ji, e mayin wehihia vlavo tọn de gba, eyin mí jlo nado dù “núdùdù sinsinyẹn.” (Heblu lẹ 5:13, 14) Nupinplọn nọ jlọmẹdote taun, wẹ hodọtọ lọ dọ, eyin mí ‘wleawuna ahun mítọn lẹ’ jẹnukọn, kẹdẹdile yẹwhenọ Ẹzla Islaelivi lọ basi do. (Ẹzla 7:10) Ṣigba naegbọn nupinplọn do yin nujọnu sọmọ? Na e nọ tindo kọndopọ tlọlọ hẹ haṣinṣan mítọn hẹ Jehovah wutu. Enẹwutu, Biblu pinplọn dona yin nuhọakuẹ, awuvivinu, po kọfanamẹnu po, dile etlẹ yindọ e nọ bẹ mẹplọnlọdomẹgo apọ̀nmẹ tọn po vivẹnudido tọn po hẹn do. Nawẹ mí nọ mọ whenu gbọn na nupinplọn he tindo zẹẹmẹ? Gbọn ‘ojlẹ he sọgbe lọ fifli’ sọn nuwiwa he mayin nujọnu sọmọ lẹ mẹ dali, wẹ hodọtọ godo tọn to hómadọ lọ mẹ dọ. (Efesunu lẹ 5:16) Mọwẹ, họ̀nhungàn lọ na whenu tintindo wẹ nado basi yizan dagbe hugan ojlẹ he mí tindo tọn.

Hodidọ lọ “Jiwheyẹwhe Nọ Na Huhlọn Mẹhe Nuṣikọna Lẹ” dohia dọ mẹsusu lẹ wẹ onú ko ṣikọna to egbehe. Na mí nido sọgan tindo ‘huhlọn hugan jọwamọ tọn’ na lizọnyizọn Klistiani tọn, mí dona ganjẹ Jehovah, mẹhe to ‘huhlọn na mẹhe nuṣikọna lẹ’ go. (2 Kọlintinu lẹ 4:7; Isaia 40:29) Alọgọnamẹnu mẹhẹnlodo tọn lẹ bẹ Ohó Jiwheyẹwhe tọn, odẹ̀, agun Klistiani tọn, mahẹ gbesisọ tọn tintindo to lizọnyizọn lọ mẹ, nugopọntọ Klistiani tọn lẹ, po apajlẹ nugbonọ mẹdevo lẹ tọn po hẹn. Hosọ lọ “Mì Yin Mẹplọntọ lẹ to Pọndohlan Mẹ na Ojlẹ Lọ” zinnudo nuhudo lọ ji na Klistiani lẹ nado yin mẹplọntọ lẹ po yẹwhehodọtọ lẹ po podọ nado wazọ́n sinsinyẹn to awuwiwlena ‘azọ́nyinyọnẹn mẹpinplọn tọn’ mẹ.—2 Timoti 4:2.

Hodidọ godo tọn na azán lọ, “Mẹhe Nọ Diọnukunsọ Jiwheyẹwhe lẹ Ma na Gbawhàn,” donu e go dọ to agọe vivẹnudido ovọ́ lẹ ko yin bibasi to aigba delẹ ji nado do Kunnudetọ Jehovah tọn lẹ hia taidi hagbẹ sinsẹ̀n klandovo owùnọ lẹ. Ṣigba mí ma dona dibu gba, na Isaia 54:17 dọmọ: “Avùnhonu depope he yè jlẹ do ogo we ma na wà nude; odẹ́ he fọ́n do oji we to whẹdida mẹ lẹpo wẹ hiẹ na gblewhẹdo: ehe wẹ ogú devi OKLUNỌ tọn lẹ tọn, dè we dodo yetọn sọn, wẹ OKLUNỌ dọ.”

AZÁN AWETỌ: Nuhe Yin Hinhẹn Zun Yinyọnẹn Gbọn Wefọ Dọdai Tọn lẹ Dali

To hodidọ do wefọ Biblu tọn na azán lọ ji godo, mẹplidopọ lẹ duvivi hómadọ awetọ plidopọ lọ tọn, he hosọ etọn yin “Gigopipana Jehovah Taidi Hinhọ́n Hẹntọ Lẹ.” Hodidọ tintan dohia dọ yanwle Klistiani de tọn wẹ nado pagigona Jehovah gbọn yẹwhehodidọ to filẹpo dali. Adà he bọdego donu nuhudo lọ go nado deanana mẹhe dotoai lẹ hlan titobasinanu Jiwheyẹwhe tọn mẹ. Gbọnna? Gbọn yíyí nukunwhiwhe atọ́n kavi ao zan jẹnukọn kavi bọdo plọnmẹ Biblu whégbè tọn dopodopo go nado do lehe titobasinanu Jiwheyẹwhe tọn nọ yinuwado hia dali. Hodidọ atọ̀ntọ to hómadọ ehe mẹ zinnudo nuhudo lọ nado pagigona Jiwheyẹwhe gbọn azọ́n dagbe lẹ dali ji.

Hodidọ lọ “Yiwanna Nuflinmẹ Jehovah Tọn lẹ Sisosiso” dọho do wefọ ṣinṣinyan lẹ ji sọn Psalm 119 mẹ. Na nugbo tọn, mí nọ tindo nuhudo nuflinmẹ lẹ tọn, na mímẹpo wẹ nọ wọnnú wutu. To whelọnu lo, lehe e yin nujọnu do sọ dọ mí ni wleawuna owanyi na nuflinmẹ Jehovah tọn lẹ, kẹdẹdile psalm-kàntọ lọ basi do!

Enẹgodo wẹ hodidọ titengbe de wá aimẹ—yèdọ hodidọ baptẹm tọn he hosọ etọn yin “Ayipipa Ohó Dọdai Tọn lọ Go Nọ Planmẹ Jẹ Baptẹm Kọ̀n.” Mẹhe ze yinkọ dai na baptẹm lẹ yin nuflin dọ yé to hihodo apajlẹ Klisti tọn e mayin gbọn yinyin bibaptizi dali kẹdẹ wẹ gba ṣigba gbọn hihodo afọdòmẹ etọn pẹkipẹki dali ga. (1 Pita 2:21) Lẹblanulọkẹyi nankọtọn die mẹyọyọ ehelẹ tindo nado tindo mahẹ to hẹndi Johanu 10:16 tọn mẹ, to fie Jesu dọ dọdai te dọ emi na bẹ “lẹngbọ devo lẹ” pli nado wadevizọn to pọmẹ hẹ devi etọn heyin dide gbọn gbigbọ dali lẹ!

Hodidọ he bẹ tito-to-whinnu whèmẹ tọn jẹeji lọ, yèdọ “Sè Nuhe Gbigbọ Jlo na Dọ” basi zẹẹmẹ dọ gbigbọ Jehovah tọn to hodọ na mí gbọn Biblu, “afanumẹ nugbonọ, nuyọnẹntọ,” po ayihadawhẹnamẹnu heyin pinplọn gbọn Biblu dali mítọn po gblamẹ. (Matiu 24:45) Enẹwutu, Klistiani lẹ ma tindo nuhudo nado sè ogbè paa de sọn olọn mẹ nado sọgan yọ́n lehe yè na hẹn homẹ Jiwheyẹwhe tọn hùn do gba. Hodidọ he bọdego lọ, “Tẹdo Nuplọnmẹ He Tin to Kọndopọmẹ hẹ Mẹdezejo Jijọ-di-Jiwheyẹwhe Tọn Go,” dotuhomẹna Klistiani lẹ ma nado nọ to dodinna linlẹn mẹhẹngbọjọ tọn he nọ yin hinhẹn gbayipe gbọn aihọn ehe dali lẹ gba. Na nugbo tọn, tlintlindo dindin zẹjlẹgo sọgan hùn mí do nùvo hlan nudọnamẹ awugblenamẹ tọn lẹ he nọ yin hinhẹn gbayipe gbọn atẹṣitọ lẹ po nuyizan Satani tọn devo lẹ po dali. Lehe e pọnte hugan do sọ nado nọ hia Biblu gọna hosọ he tin to Atọ̀họ̀-Nuhihọ́ Lọ Tọn po Réveillez-vous! po mẹ lẹpo to gbesisọmẹ!

Hodidọ he bọdego he tindo hosọ lọ “To Ohia Ohó He Pegan Tọn lẹ Go Hẹn Zọnmii” zinnudo nujọnu-yinyin lọ ji nado jẹakọhẹ “ohia” kavi bladopọ nugbo Owe-wiwe lẹ tọn mlẹnmlẹn. (2 Timoti 1:13) E mayin dọ nukunnumimọjẹ ohia ehe mẹ yin họ̀nhungàn na mẹdezejo jijọ-di-Jiwheyẹwhe tọn tintindo kẹdẹ wẹ gba ṣigba na yinyọ́n nuhe ma tin to kọndopọ hẹ nugbo lọ ga.

Yí nukun homẹ tọn do pọ́n yinyin pinpọnhlan gbọn Jehovah dali taidi onú tindo ojlona. Gbégbònamẹ nankọtọn die! Sinai do dọdai Hagai tọn ji, hodidọ lọ “ ‘Nutindo Ojlona lẹ’ to Ohọ̀ Jehovah Tọn Mẹ Gọ́” yin tulinamẹnu taun na e na jide hosetọ lẹ dọ hagbẹ dopodopo “gbẹtọ susugege” lọ tọn lẹ yin mẹhe Jehovah tindo ojlona na nugbo tọn. (Osọhia 7:9) Enẹwutu, Jehovah na whlẹn yé sọn ‘whinwhàn’ godo tọn akọta lẹ tọn etọn mẹ to “nukunbibia daho” he ja lọ whenu. (Hagai 2:7, 21, 22; Matiu 24:21) Ṣigba, todin omẹ Jehovah tọn lẹ dona to alihọ́ to gbigbọ-liho, dile e yin zẹẹmẹ basina to adà “Wefọ Dọdai Tọn lẹ Nọ Hẹn Mí Tin to Aṣeji Nado Nọ Họ́ali” mẹ do. Hodọtọ lọ yihodọ sọn ohó Jesu tọn lẹ mẹ dọmọ: “Enẹwutu mì nọ [to alihọ́]: na mì ma yọ́n azán he gbè Oklunọ mìtọn ja.” (Matiu 24:42) Nawẹ mí nọ hẹn aṣejininọ gbigbọmẹ tọn go gbọn? Gbọn alọnu hinhẹn ján to sinsẹ̀nzọn Jehovah tọn mẹ, dẹ̀hiho to whepoponu, po gbigbọṣi nukundido mẹ na azán daho Jehovah tọn po dali.

Hodidọ godo tọn na azán lọ tindo hosọ lọ “Ohó Dọdai Tọn to Ojlẹ Opodo lọ Tọn Mẹ.” E na yin finflin na owhe susu he ja lẹ. Etẹwutu? Na hodọtọ lọ lá didetọn owe yọyọ de tọn—Payi Dọdai Daniẹli Tọn Go! wutu. “Owe weda 320 tọn he tindo yẹdide whanpẹnọ ehe dọho do adà owe Daniẹli tọn lẹpo ji,” wẹ hodọtọ lọ dọ. Kunnudenu yise-hẹnlodo tọn nankọtọn die dọ Jehovah to hinhọ́n tá do Ohó dọdai tọn etọn ji!

AZÁN ATỌ̀NTỌ: Ohó Dọdai Jiwheyẹwhe Tọn Ma Nọ Gbọ̀vọ́ Gbede

Azán godo tọn plidopọ lọ tọn bẹjẹeji po hómadọ “Ohó Dọdai Tọn lẹ na Ojlẹ Dide Lọ” po. Adà atọ̀n lẹ gbadopọnna nulila whẹdida hinhẹnṣẹ atọ̀n Jehovah tọn lẹ gbọn yẹwhegán Habbakuk dali. Tintan yin sọta Juda tasinyẹntọ podọ awetọ yin sọta Babilọni kọgbidinamẹtọ. Dehe yin godo tọn, he gbẹ́ pò nado wá yin hinhẹndi, gando vasudo gbẹtọvi ylankan lẹ tọn he tin to yakẹ go. To hodidọ gando Amagẹdọni go mẹ, mẹmẹsunnu godo tọn to hómadọ lọ mẹ fọ́n obu jijọ-di-Jiwheyẹwhe tọn dote jẹ obá de mẹ to hosetọ etọn lẹ mẹ to whenuena e dọmọ: “Na nugbo tọn, budonamẹnu wẹ e na yin to whenuena Jehovah na túntún huhlọn daho etọn jẹgbonu to gigọ́mẹ.”

“Yinyọ́n Pinpẹn Ogú Gbigbọmẹ Tọn Mítọn” wẹ yin hosọ nupinpọn-do-plọnnu mẹwhantọ Biblu tọn plidopọ lọ tọn. Nuzedonukọnnamẹ ahun mẹ kikejepọn tọn ehe do vogbingbọn hia to walọyizan Jakobu po Esau tọn lẹ po ṣẹnṣẹn dohlan onú gbigbọmẹ tọn lẹ. Esau dovọ́na ogú gbigbọmẹ tọn etọn, bọ e sọ yin yiyina Jakobu, mẹhe wlebòna ẹn. “[Ogú gbigbọmẹ tọn] tẹwẹ Jehovah ko na mí?” wẹ plidopọ-watọ lẹ yin kinkanse. “Nugbo Ohó etọn, Biblu tọn; todido ogbẹ̀ madopodo tọn; po gbégbigbò lọ po nado yin nukunmọnu etọn taidi lilatọ wẹndagbe lọ tọn lẹ,” wẹ hodọtọ lọ gblọn dọ.

Adà he bọdego tindo hosọ lọ “Etẹwẹ Ogú Họakuẹ Mítọn Zẹẹmẹdo na We?” Mí nọ do walọyizan he sọgbe lọ hia hlan ogú gbigbọmẹ tọn mítọn gbọn zize sinsẹ̀nzọn Jehovah tọn po lẹblanulọkẹyi gbigbọmẹ tọn lẹ po do nukọnna ojlo mẹdetiti tọn kavi agbasanu tọn lẹ dali. To aliho ehe mẹ mí nọ jlọ gbẹzan mítọn dote lẹdo haṣinṣan mítọn hẹ Jehovah, to vogbingbọn mlẹnmlẹn mẹ na Adam, Esau, po Islaelivi he mayin nugbonọ lẹ po.

Hodidọ na mẹlẹpo lọ, “Hinhẹn Onú Lẹpo Zun Yọyọ—Dile E Yin Dọdai Etọn Dọ Do,” kọ̀n dọdai titengbe ẹnẹ dopọ gando “olọn yọyọ lẹ” po “aigba yọyọ” po go. (Isaia 65:17-25; 66:22-24; 2 Pita 3:13; Osọhia 21:1, 3-5) E họnwun dọ, Jehovah tindo hẹndi daho dọdai ehelẹ tọn to ayiha mẹ hugan enẹ he wá omẹ etọn heyin hinhẹngọwa to 537 J.W.M. lẹ ji. Mọwẹ, e tindo gandudu Ahọluduta etọn tọn to ayiha mẹ (“olọn yọyọ lẹ”) po mẹjidugando aigba ji tọn etọn lẹ (“aigba yọyọ”) lọ po, heyin mẹhe na nọ̀ paladisi gigonọ lẹdo globu pé tọn de mẹ.

Nado hẹn plidopọ lọ wá tadona awuvivi po mẹwhinwhan tọn de po kọ̀n wẹ hodidọ lọ “Nukundido Mítọn lẹ Dile Ohó Jiwheyẹwhe Tọn Nọ Deanana Mí Do” wá aimẹ. E flin mẹlẹpo dọ “ojlẹ he pò lọ whègli” na hinhẹn azọ́n Ahọluduta lọ lilá tọn wá tadona mlẹnmlẹn kọ̀n. (1 Kọlintinu lẹ 7:29) Mọwẹ, mí tin to bẹbẹnu na hẹndi gbedide Jehovah tọn sọta Satani po titonu ylankan blebu etọn po tọn. Na numọtolanmẹ mítọn lẹ ni yin enẹ heyin psalm-kàntọ lọ tọn he jihàn dọmọ: “Ayiha mítọn ko nọtepọn OKLUNỌ: ewọ wẹ alọgọ mítọn po awọ̀yinu mítọn po.” (Psalm 33:20) Todido gigonọ nankọtọn die tin to nukọn na mẹhe nukundido yetọn lẹ yin zize sinai do ohó dọdai Jiwheyẹwhe tọn ji lẹ!

[Yẹdide lẹ to weda 7]

Nupinpọn-do-plọnnu mẹwhantọ de hẹn pinpẹn-nutọn-yinyọnẹn na ogú gbigbọmẹ tọn devizọnwatọ Jehovah tọn lẹ tọn yiaga deji

Susu mẹhe setonuna ohó dọdai Jiwheyẹwhe tọn lẹ tọn yin bibaptizi