“Lilatọ Zohunhunnọ Ahọluduta lọ Tọn lẹ” Pli Dopọ po Ayajẹ Po
Nuhahun walọyizan, akuẹzinzan, po tonudidọ tọn lẹ po to bẹwlu hẹnwa aihọn mẹ. Ṣigba, to magbọjẹ ehe lẹpo ṣẹnṣẹn, Kunnudetọ Jehovah tọn lẹ pli na Plidopọ Agbegbe azán atọ̀n “Lilatọ Zohunhunnọ Ahọluduta lọ Tọn Lẹ” tọn. Plidopọ ehelẹ yin bibasi lẹdo aihọn pé bẹsọn mai 2002.
Plidopọ lọ lẹ yin ojlẹ ayajẹ tọn na nugbo tọn. Mì gbọ mí ni gbadopọnna tito-to-whinnu sinai do Biblu ji he jlọmẹdote lọ to kleun mẹ.
Azán Tintan Zinnudo Zohunhun Jesu Tọn Ji
Hosọ azán tintan plidopọ lọ tọn wẹ “Hodo Apajlẹ Zohunhun Jesu, Oklunọ Mítọn Tọn.” (Johanu 2:17) Hodidọ lọ “Mì Jaya to Pipli Dopọ Taidi Lilatọ Ahọluduta lọ Tọn lẹ Mẹ” basi oylọ zohunhun tọn na mẹplidopọ lẹ nado tindo mahẹ to ayajẹ he ko nọ saba yin apadewhe plidopọ omẹ Jiwheyẹwhe tọn lẹ tọn mẹ. (Deutelonomi 16:15) Hokinkanse yẹwhehodọtọ zohunhunnọ wẹndagbe lọ tọn lẹ bọdo hodidọ ehe go.
Hosọ lọ “Tindo Homẹhunhun Susu to Jehovah Mẹ” dọhodo wefọ debọdo-dego Psalm 37:1-11 tọn ji. Mí yin tulina ma nado “fiẹ” do nuhe taidi kọdetọn dagbe tintindo mẹylankan lẹ tọn go. Nugbo wẹ dọ mẹylankan lẹ sọgan nọ dolalo do mí go, ṣigba Jehovah na do mẹhe yin devizọnwatọ nugbonọ etọn lẹ hia to ojlẹ sisọ mẹ. Hodidọ lọ “Mì Nọ Dopẹ́” do lehe mí sọgan nọ dopẹ́ na Jiwheyẹwhe do hia. Klistiani lẹpo dona nọ “sanvọ́ pipà tọn” hlan Jehovah. (Heblu lẹ 13:15) Na nugbo tọn, ojlẹ he mí nọ yizan na sinsẹ̀nzọn Jehovah tọn nọ sinai do pinpẹn-nutọn-yinyọnẹn po ninọmẹ mítọn lẹ po ji.
Hosọ hodidọ Ayidego lọ tọn wẹ “Lilatọ Ahọluduta Tọn lẹ Yin Zodolanmẹna.” E dlẹnalọdo Jesu Klisti taidi apajlẹ dagbe hugan zohunhun mítọn tọn. To Ahọluduta lọ didoai to olọn mẹ to 1914 godo, Klistiani nugbo lẹ tindo nuhudo zohunhun tọn nado lá wẹndagbe enẹ. Hodọtọ lọ dlẹnalọdo plidopọ Cedar Point, Ohio, États-Unis tọn, to 1922 bo flin mí oylọ basinamẹ ayidego tọn lọ he dọmọ: “Mì lá Ahọlu lọ po Ahọluduta etọn po”! Dile ojlẹ to yìyì, zohunhun devizọnwatọ nugbonọ Jiwheyẹwhe tọn lẹ tọn whàn yé nado lá nugbo jiawu Ahọluduta lọ tọn lẹ na akọta lẹpo.
“Mì Dibu Blo Na Jehovah Tin hẹ Mí Wutu,” he yin didọ to whèmẹ azán tintan tọn dohia dọ omẹ Jiwheyẹwhe tọn lẹ yin yanwle tangan Satani tọn. Ṣigba, mahopọnna nukundiọsọmẹ he mí nọ pannukọn lẹ, nulinlẹnpọndo apajlẹ yise tọn susu he tin to Biblu mẹ po egbezangbe tọn lẹ po ji nọ na mí adọgbigbo nado pehẹ whlepọn po mẹtẹnpọn lẹ po madibu.—Isaia 41:10.
Hómadọ adà-atọ̀n tọn he hosọ etọn yin “Dọdai Mika Tọn Na Mí Huhlọn Nado to Zọnlinzin to Oyín Jehovah Tọn Mẹ” wẹ bọdego to tito-to-whinnu lọ ji. Hodọtọ tintan yí doyiyi walọdagbe tọn, atẹṣiṣi sinsẹ̀n tọn, po ojlo agbasanu lẹ tọn po he tin to azán Mika tọn gbè jlẹdo ojlẹ mítọn tọn go. E dọmọ: “Todido mítọn na sọgodo na lodo taun eyin mí wleawuna ahun tonusise tọn de bo hẹn ẹn diun dọ walọ mítọn wé bọ mí sọ yí nuyiwa jijọ-di-Jiwheyẹwhe tọn lẹ do gọ́ gbẹzan mítọn—podọ eyin mí ma wọnji gbede dọ azán Jehovah tọn na wá.”—2 Pita 3:11, 12.
Hodọtọ awetọ zinnudo lehe Mika gblewhẹdo nukọntọ Juda tọn lẹ do ji. Yé ylanhùn do wamọnọ lẹ, yèdọ agbátọnọ lẹ go. Ṣigba Mika sọ dọ dọdai dọ sinsẹ̀n-bibasi nugbo na tọ́nta. (Mika 4:1-5) Na gbigbọ wiwe Jehovah tọn nọ na mí huhlọn wutu, mí magbe nado lá owẹ̀n homẹmiọnnamẹ todido tọn ehe. Ṣigba etẹwẹ lo eyin awutu kavi madogán devo lẹ glọnalina mí to aliho devo lẹ mẹ? Hodọtọ atọ̀ntọ dọmọ: “Nubiọtomẹsi Jehovah tọn lẹ to jlẹkaji bọ mí sọgan sọ jẹ yé kọ̀n.” E zindonukọn nado dọhodo adà voovo Mika 6:8 tọn lẹ ji, to fie mí hia te dọ: ‘Etẹwẹ Jehovah to kinkanbiọ sọn dè we, adavo nado yí whẹdida dodo zan bo yiwanna homẹdagbe bo nọ jlẹkaji to zọnlinzinzin hẹ Jiwheyẹwhe towe mẹ?’
Na walọ gblezọn aihọn lọ tọn sọgan bẹpla Klistiani lẹ wutu, mímẹpo wẹ mọaleyi sọn hodidọ he hosọ etọn yin “Gbọṣi Wiweji Gbọn Hihọ́ Bibasina Ahun Towe Dali” mẹ. Di apajlẹ, gbigbọṣi wiweji mítọn na gọalọna mí nado tindo alọwle ayajẹnọ. Taidi Klistiani lẹ, mí ma tlẹ dona lẹnnupọndo mahẹ tintindo to mawé fẹnnuwiwa tọn mẹ ji pọ́n gbede.—1 Kọlintinu lẹ 6:18.
Hodidọ lọ “Họ́ Dewe Sọta Nuyiwa Oklọ Tọn” dohia dọ nuyọnẹnnu wẹ e yin dọ mí ni nọ yinuwa hẹ mẹkiklọ, nugbo-daa, po lalo he nọ yin hinhẹn gbayipe gbọn atẹṣitọ lẹ dali po lẹ taidi osùnú. (Kọlọsinu lẹ 2:8) Mọdopolọ, mí ma dona klọ míde nado lẹndọ mí sọgan hẹn pekọwana ojlo ylando tọn mítọn lẹ matin kọdetọn ylankan lẹ gba.
“Sẹ̀n Jiwheyẹwhe Nugbo Dopokẹdẹ Lọ” wẹ yin hosọ hodidọ tadona tọn na azán tintan. Dile ninọmẹ aihọn tọn lẹ to yinylan deji, lehe e nọ namẹ jide sọ nado yọnẹn dọ Jehovah na hẹn aihọn yọyọ dodo tọn etọn wá to madẹnmẹ! Mẹnu lẹ wẹ na nọ̀ e mẹ? Mẹhe sẹ̀n Jehovah lẹ kẹdẹ wẹ. Nado gọalọna míwlẹ, ovi mítọn lẹ, po Biblu plọntọ mítọn lẹ po nado jẹ yanwle ehe kọ̀n, hodọtọ lọ de owe nupinplọn tọn yọyọ lọ tọ́n heyin Sẹ̀n Jiwheyẹwhe Nugbo Dopokẹdẹ Lọ. Lehe homẹ mítọn hùn sọ nado mọ ẹn yí!
Azán Awetọ Zinnudo Zohunhun na Onú Dagbe lẹ Ji
Hosọ azán awetọ plidopọ lọ tọn wẹ “Hunzo to Onú Dagbe Mẹ.” (1 Pita 3:13) Hodọtọ tintan dọho do wefọ Biblu tọn na azán lọ ji. E zinnudeji dọ dogbapọnna wefọ egbesọ tọn to gbesisọ mẹ, to aliho he gọ́ na zẹẹmẹ de mẹ nọ hẹn zohunhun mítọn jideji.
Enẹgodo, hómadọ he hosọ etọn yin “Lilatọ Ahọluduta Tọn He Pagigona Lizọnyizọn Yetọn Lẹ” bọdego. Adà tintan zinnudo nuhudo Ohó Jiwheyẹwhe tọn yiyizan dile e jẹ do ji. (2 Timoti 2:15) Eyin mí yi Biblu zan ganji, e nọ hùn aliho dote nado ‘yinuwado’ gbẹzan gbẹtọ lẹ tọn ji. (Heblu lẹ 4:12) Mí dona nọ dọ̀n ayidonugo wá Biblu ji bo lẹnayihamẹpọn deji po nujikudo po. Adà awetọ hómadọ lọ tọn dotuhomẹna mí nado dla mẹhe do ojlo hia lẹ pọ́n pludopludo. (1 Kọlintinu lẹ 3:6) Awuwiwle po adọgbigbo po yin dandan nado doafọna ojlo heyin didohia lẹpo to niyaniya mẹ. Adà atọ̀ntọ na ayinamẹ dọ mí ni nọ pọ́n omẹ dopodopo he mí dukosọ hẹ hlan taidi devi sọgodo tọn bosọ dohia dọ plọnmẹ Biblu zizedonukọnnamẹ to dlapọn tintan whenu sọgan dekọtọn do ayajẹ alọgigọna gbẹtọ lẹ nado lẹzun devi tọn mẹ.
“Nuhewutu E Do Sọgbe Nado ‘Hodẹ̀ Magbọjẹ’ ” wẹ yin hosọ hodidọ he bọdego tọn. Biblu dotuhomẹna Klistiani lẹ nado nọ pọ́n Jiwheyẹwhe hlan na anademẹ to adà gbẹzan tọn lẹpo mẹ. Mí dona dín whenu na odẹ̀ mẹdetiti tọn. Humọ, mí dona sinyẹnlin to odẹ̀ mẹ, na Jehovah sọgan dike mí ni hodẹ̀ na ojlẹ de whẹpo do na gblọndo.—Jakobu 4:8.
Hodidọ lọ “Hodọdopọ do Gbigbọnu lẹ ji Nọ Hẹnmẹ Lodo” na mí tuli nado yí nunina hodidọ tọn mítọn zan nado hẹn ale wá na míde po mẹdevo lẹ po. (Filippinu lẹ 4:8) Alọwlemẹ lẹ po ovi lẹ po dona nọ dọhodo gbigbọnu lẹ ji egbesọegbesọ. Nado sọgan wà enẹ, whẹndo lẹ dona tẹnpọn nado nọ dù núdùdù dopọ e whè gbau whladopo to gbèdopo, bo gbọnmọ dali hùn dotẹnmẹ dotena hodọdopọ mẹjlọdote tọn.
Tito-to-whinnu afọnnu tọn wá vivọnu po hodidọ he whànmẹ lọ po heyin “Lehe Klandowiwe po Baptẹm po Nọ Planmẹ Yì Whlẹngán Kọ̀n Gbọn.” Mẹhe yí baptẹm lẹ ko tindo oyọnẹn, do yise hia, lẹnvọjọ, gbẹ́ ylanwiwa dai, bo ko klan yede do wiwe hlan Jiwheyẹwhe. Hodọtọ lọ dọ dọ to yinyin bibaptizi godo, yé dona zindonukọn nado to whinwhẹ́n to gbigbọmẹ bo hẹn zohunhun po walọ dagbe yetọn po go.—Filippinu lẹ 2:15, 16.
To whèmẹ enẹ, nuagokun awe yin nùzindeji to hodidọ lọ “Nọ Jlẹkaji, bo Hẹn Nukun Towe Yin Dopo” mẹ. Jlẹkajininọ zẹẹmẹdo pọndohlan he sọgbe tintindo gando nugopipe po otẹn mítọn po go to Jiwheyẹwhe nukọn. Jlẹkajininọ nọ gọalọna mí nado hẹn nukun mítọn yin “dopo”—yèdọ ze e do Ahọluduta Jiwheyẹwhe tọn ji, kakati ni yin do agbasanu lẹ ji. Eyin mí wà ehe, mí ma dona to nuhà, na Jehovah na penukundo nuhudo mítọn lẹ go.—Matiu 6:22-24, 33, 34.
Hodọtọ he bọdego do nuhewutu mí dona “Dejido Jehovah Go Mlẹnmlẹn to Ojlẹ Ayimajai Tọn lẹ Mẹ” hia. Nawẹ mí sọgan pehẹ madogán gọna nuhahun akuẹzinzan kavi agbasalilo tọn lẹ po kọdetọn dagbe po gbọn? Mì gbọ mí ni nọ biọ nuyọnẹn sọn Jehovah dè bo dín alọgọ mẹdevo lẹ tọn. Kakati nado joawuna obu kavi ayimajai, mí dona hẹn jidide do Jiwheyẹwhe go mítọn lodo deji gbọn Ohó etọn hihia dali.—Lomunu lẹ 8:35-39.
Hosọ hómadọ godo tọn plidopọ lọ tọn wẹ “Whlepọn Voovo lẹ Nọ Whlé Nujọnu-Yinyin Yise Mítọn Tọn Pọ́n.” Adà tintan flin mí dọ Klistiani nugbo lẹpo wẹ nọ pehẹ homẹkẹn. E nọ yinuwa taidi okunnu, nọ hẹn yise mítọn lodo, bo nọ na mí dotẹnmẹ nado do nugbonọ-yinyin hlan Jiwheyẹwhe mítọn hia. Dile etlẹ yindọ mí ma nọ ze ogbẹ̀ mítọn do owù mẹ to aliho he ma sọgbe mẹ, mí ma na yí aliho he ma sọgbe hẹ Owe-wiwe lẹ zan nado dapana homẹkẹn gba.—1 Pita 3:16.
Hodọtọ awetọ hómadọ ehe tọn dọhodo kanbiọ he gando kadaninọ go lẹ ji. Klistiani fliflimẹ tọn lẹ ma nọ dibu na awhàn gba, ṣigba yé yọnẹn dọ mẹdezejo yetọn tintan yin hlan Jiwheyẹwhe. Mọdopolọ to egbehe, Kunnudetọ Jehovah tọn lẹ nọ tẹdo nunọwhinnusẹ́n lọ go gligli he dọmọ: “Mì ma yin aihọn tọn.” (Johanu 15:19) Na whlepọn kadaninọ tọn mítọn sọgan fọ́n to niyaniya mẹ wutu, whẹndo lẹ dona dín whenu nado gbadopọnna anademẹ Biblu tọn lẹ do whẹho ehe ji. Dile hodidọ atọ̀ntọ hómadọ ehe tọn dohia do, yanwle Satani tọn mayin nado hù mí dandan gba, ṣigba nado gbidikọna mí nado lẹzun lalonọ. Mí nọ hẹn pipà wá na Jehovah eyin mí gbọn nugbonọ-yinyin dali doakọnna vlẹko, kọgbidinamẹ mawé tọn lẹ, awufiẹsa numọtolanmẹ tọn, po awutu lẹ po.
Oylọ zohunhunnọ lọ dọ “Dọnsẹpọ Jehovah” wẹ yin hosọ hodidọ godo tọn na azán lọ. Nukunnumimọjẹ jẹhẹnu tangan Jehovah tọn lẹ mẹ nọ dọ̀n mí sẹpọ ewọ. E nọ yí huhlọn mado-dogbó etọn zan nado basi hihọ́na omẹ etọn lẹ, titengbe to gbigbọ-liho. Whẹdida dodo etọn ma fiẹ gba, ṣigba nọ sisẹ ẹ nado hẹn ogbẹ̀ mavọmavọ tin-to-aimẹ na mẹhe wà dodo lẹpo. Nuyọnẹn Jiwheyẹwhe tọn sọawuhia to aliho he mẹ e yí gbẹtọvi mapenọ lẹ zan nado wlan Biblu te mẹ. Dehe dọnmẹdogo hugan lọ wẹ owanyi etọn, he sisẹ ẹ nado wleawuna whlẹngán na gbẹtọvi gbọn Jesu Klisti gblamẹ. (Johanu 3:16) Hodọtọ lọ dotana po owe yọyọ homẹmiọnnamẹ tọn lọ heyin Dọnsẹpọ Jehovah didetọn po.
Azán Atọ̀ntọ Zinnudo Zohunhun na Azọ́n Dagbe lẹ Ji
Hosọ azán atọ̀ntọ plidopọ lọ tọn wẹ “Gbẹtọ He Hunzo na Azọ́n Dagbe Lẹ.” (Titu 2:14) Tito-to-whinnu afọnnu tọn bẹjẹeji po hodọdopọ whẹndo tọn do wefọ azán lọ tọn po ji. Hodidọ lọ “Be Hiẹ Dejido Jehovah Go Ya?” bọdego. Akọta lẹ ko ze jidide yetọn do asisa agọ̀ mẹ gbọn ginganjẹ nuyọnẹn po huhlọn yede tọn po go dali. Ṣigba, to vogbingbọn mẹ, devizọnwatọ Jehovah tọn lẹ nọ yí adọgbigbo po ayajẹ po do ganjẹ ewọ go mahopọnna nugbajẹmẹji lẹ.—Psalm 46:1-3, 7-11.
Adà he hosọ etọn yin “Jọja lẹ Emi—Mì Wleawuna Sọgodo to Kọndopọmẹ hẹ Titobasinanu Jehovah Tọn” dọhodo kanbiọ ehe ji: Nawẹ jọja de sọgan mọ dagbe hugan lọ yí to gbẹzan mẹ gbọn? Afọdidona akuẹ, nutindo lẹ, po yindidi po ma sọgan hẹn ehe yọnbasi gba. Mẹdatọ mítọn gbọn owanyi dali dotuhomẹna jọja lẹ nado flin ewọ to ovu whenu yetọn. Hodọtọ lọ kanhose mẹdelẹ he ko yí yede zan to sinsẹ̀nzọn Klistiani tọn mẹ to jọja whenu, podọ mí sọgan mọ ayajẹ yetọn. Podọ lehe e yin alenu sọ nado mọ alọnuwe pẹvi yọyọ lọ yí heyin, Jeunes gens—Qu’allez-vous faire de votre vie? E yin awuwlena nado gọalọna jọja Kunnudetọ lẹ nado ze dodonu dai na sọgodo tẹgbẹ̀ tọn hẹ titobasinanu Jehovah tọn!
Enẹgodo wẹ nupinpọn-do-plọnnu he whànmẹ Biblu tọn lọ bọdego he hosọ etọn yin “Nọte Gligli to Ojlẹ Tukla Tọn lẹ Mẹ.” E basi zẹẹmẹ sinsẹ̀nzọn ojlẹ gaa Jẹlemia tọn sọn jọja whenu etọn jẹ vasudo Jelusalẹm tọn, he e yí zohunhun do dọ dọdai etọn whenu. Jẹlemia lẹndọ emi ma pegan na azọ́ndenamẹ lọ, ṣigba e hẹn ẹn di mahopọnna homẹkẹn, bọ Jehovah sọ whlẹn ẹn.—Jẹlemia 1:8, 18, 19.
Hodidọ lọ “Yinuwa Di Jẹlemia—Bo Lá Ohó Jiwheyẹwhe Tọn po Adọgbigbo Po” wẹ bọdo nupinpọn-do-plọnnu lọ go. Lilatọ Ahọluduta tọn egbezangbe tọn lẹ nọ saba yin yanwle tangan nudọnamẹ lalo po nujijla mẹhẹngble tọn lẹ tọn po. (Psalm 109:1-3) Ṣigba, taidi Jẹlemia, mí sọgan yinuwa hẹ gbigbọjọ gbọn homẹhunhun tintindo to Ohó Jehovah tọn mẹ dali. Podọ mí deji dọ mẹhe to avùnho hẹ mí lẹ ma na gbawhàn gba.
Hodidọ na mẹlẹpo lọ wá do ganmẹ taun. Hosọ etọn wẹ “Ninọmẹ Aihọn Tọn to Didiọ.” Diọdo ayidego tọn lẹ ko dohiagona ojlẹ mítọn. Biblu dọ dọdai dọ ninọmẹ mọnkọtọn lẹ, gọna awhádido “jijọho po gingán” po tọn, na planmẹ jẹ azán whẹdida dobu Jiwheyẹwhe tọn mẹ. (1 Tẹsalonikanu lẹ 5:3) E na hẹn diọdo jiawu lẹ wá—taidi opodo awhàn, sẹ́nhẹngba, danuwiwa, po awutu lẹpo po tọn. Kakati nado dejido titonu ehe go, ojlẹ lọ die nado doafọna mẹdezejo hlan Jiwheyẹwhe bo hẹn walọ dagbe go.
Hodidọ godo tọn he hosọ etọn yin “Mì Sudeji to Azọ́n Dagbe lẹ mẹ Taidi Lilatọ Zohunhunnọ Ahọluduta lọ Tọn Lẹ” wẹ bọdo bladopọ nupinplọn Atọ̀họ̀-Nuhihọ́ Lọ Tọn osẹ lọ tọn go. Hodọtọ lọ do lehe tito-to-whinnu lọ ko dozolanmẹna mí to gbigbọ-liho bo na mí tuli nado ganjẹ Jehovah go do hia. To tadona mẹ, mí yin tulina nado yin lilatọ zohunhunnọ Ahọluduta Jiwheyẹwhe tọn he mẹ́n, bo tindo owanyi lẹ.—1 Pita 2:12.
Po gbigbọ he taidi devizọnwatọ Jehovah tọn azán Nẹhemia gbè tọn lẹ tọn po, mí lẹkọyi whé bo to ayajẹ do dona gbigbọmẹ tọn he mí mọyi to Plidopọ Agbegbe “Lilatọ Zohunhunnọ Ahọluduta lọ Tọn Lẹ” tọn ji. (Nẹhemia 8:12) Be plidopọ he whànmẹ ehe ma ko hẹn we yin ayajẹnọ bo magbe nado zindonukọn taidi lilatọ zohunhunnọ Ahọluduta lọ tọn de ya?
[Apotin/Yẹdide to weda 23]
Owe Nupinplọn Tọn Yọyọ De!
To vivọnu azán tintan plidopọ lọ tọn, homẹ mẹplidopọ lẹ tọn hùn nado mọ didetọn owe yọyọ lọ tọn heyin Sẹ̀n Jiwheyẹwhe Nugbo Dopokẹdẹ Lọ. E yin awuwlena nado yin pinplọn hẹ mẹhe ko plọn owe Oyọnẹn He Nọ Planmẹ Sọyi Ogbẹ̀ Madopodo Mẹ fó lẹ. Na jide tọn, e na hẹn yise ‘mẹhe tindo ahun dagbe na ogbẹ̀ madopodo’ lẹ tọn lodo.—Owalọ lẹ 13:8.
[Asisa Yẹdide tọn]
Yẹdide he tin to wepa ji: U.S. Navy photo
[Apotin/Yẹdide to weda 24]
Alọgọ Nado Dọnsẹpọ Jiwheyẹwhe
Hodọtọ he gbọngodo to azán awetọ plidopọ lọ tọn gbe lá didetọn owe yọyọ de tọn heyin Dọnsẹpọ Jehovah. E bẹ adà tangan ẹnẹ hẹn, dopodopo na jẹhẹnu titengbe Jehovah tọn lẹ heyin huhlọn, whẹdida dodo, nuyọnẹn, po owanyi po. Adà owe lọ tọn dopodopo tindo weta de he do lehe Jesu Klisti do apajlẹ jẹhẹnu Jiwheyẹwhe tọn lẹ hia hezeheze to nuyiwa etọn lẹ mẹ do. Lẹndai tangan owe yọyọ ehe tọn wẹ nado gọalọna míwlẹ po Biblu plọntọ mítọn lẹ po nado wleawuna haṣinṣan pẹkipẹki he lodo de hẹ Jehovah Jiwheyẹwhe.
[Apotin/Yẹdide to weda 26]
Anademẹ Gbigbọmẹ Tọn na Jọja Lẹ
Azán atọ̀ntọ plidopọ lọ tọn yin hiadogona gbọn didetọn alọnuwe pẹvi vonọtaun de tọn dali he hosọ etọn yin Jeunes gens—Qu’allez-vous faire de votre vie? E yin awuwlena nado gọalọna Kunnudetọ jọja lẹ nado basi nudide he sọgbe lẹ gando sọgodo yetọn go. Alọnuwe pẹvi ehe na ayinamẹ sinai do Owe-wiwe ji lẹ do awuwiwlena yanwle tẹgbẹ̀ tọn de to sinsẹ̀nzọn Jehovah tọn mẹ ji.