Mì Dín Jehovah Whẹpo Azán Homẹgble Etọn Tọn Nido Wá
“Mì dín [ Jehovah] . . . mì dín dodo, mì dín homẹmiọn: e sọgan yin mì na yin whiwhla to azán [homẹgble Jehovah] tọn tọn gbè.”—ZẸFANIA 2:3.
1. Etẹwẹ yin ninọmẹ gbigbọmẹ tọn Juda tọn to whenuena Zẹfania jẹ azọ́n dọdai didọ etọn tọn ji?
ZẸFANIA jẹ azọ́n dọdai didọ etọn tọn ji to ojlẹ sinsinyẹn de mẹ to whenuho Juda tọn mẹ. Ninọmẹ gbigbọmẹ tọn akọta lọ tọn yido taun. Kakati nado ze jidide yetọn do Jehovah mẹ, gbẹtọ lọ lẹ ganjẹ yẹwhenọ kosi tọn lẹ po sunwhlẹvu-plọntọ lẹ po go na anademẹ. Sinsẹ̀n-bibasi Baali tọn, to pọmẹ hẹ hùnwhẹ nugopipe vijiji etọn tọn, gbayipe taun to aigba lọ ji. Nukọntọ tonudidọ tọn lẹ—yèdọ ahọvi lẹ, omẹ gbóogbó lẹ, po whẹdatọ lẹ po—to kọgbidina omẹ taun he yé yin nukundo nado basi hihọ́na lẹ. (Zẹfania 1:9; 3:3) Abajọ Jehovah basi dide nado ‘dlẹn alọ etọn jẹgbonu’ sọta Juda po Jelusalẹm po nado và yé sudo!—Zẹfania 1:4.
2. Todido tẹwẹ devizọnwatọ nugbonọ Jiwheyẹwhe tọn he tin to Juda lẹ tindo?
2 Ṣigba, dile ninọmẹ lọ tlẹ ylan sọ, todido vude gbẹ́ tin. Josia, visunnu Amọni tọn wẹ tin to ofìn ji todin. Dile ewọ tlẹ yin jọja poun de do, Josia tindo owanyi nujọnu tọn na Jehovah. Eyin ahọlu yọyọ lọ hẹn sinsẹ̀n-bibasi wiwe-ṣeke gọwá Juda, lehe enẹ na yin tulinamẹnu do sọ na omẹ vude he to Jiwheyẹwhe sẹ̀n po nugbonọ-yinyin po lẹ! Mẹdevo lẹ sọgan yin whinwhàn nado kọnawudopọ hẹ yé bo nasọ yin whiwhla to azán homẹgble Jehovah tọn tọn gbè ga.
Nubiọtomẹsi lẹ Nado Yin Whiwhla
3, 4. Nubiọtomẹsi atọ̀n tẹlẹ kọ̀n wẹ yè dona jẹ na mẹde nido sọgan yin whinwhlẹngán to ‘azán homẹgble Jehovah tọn gbè’?
3 Be mẹdelẹ sọgan yin whiwhla to azán homẹgble Jehovah tọn tọn gbè nugbonugbo ya? Mọwẹ, eyin yé jẹ nubiọtomẹsi atọ̀n heyin titodohukanji to Zẹfania 2:2, 3 mẹ lẹ kọ̀n. Dile mí to wefọ ehelẹ hia, mì gbọ mí ni na ayidonugo titengbe hlan nubiọtomẹsi ehelẹ. Zẹfania wlan dọmọ: “Whẹpo aṣẹ hẹn jẹgbonu wá, azán juyi di núyọ, whẹpo adi zògbe OKLUNỌ tọn wá mì ji, whẹpo azán [homẹgble] OKLUNỌ tọn tọn wá mì ji. Mì dín OKLUNỌ, mì homẹmiọnnọ aigba lọ tọn lẹ, he ko basi whẹdida [Etọn]; mì dín dodo, mì dín homẹmiọn: e sọgan yin mì na yin whiwhla to azán adi OKLUNỌ tọn tọn gbè.”
4 To whelọnu lo, nado yin whiwhla, omẹ lọ dona (1) dín Jehovah, (2) dín dodowiwa, bosọ (3) dín homẹmimiọn. Nubiọtomẹsi ehelẹ yin nuhe mẹ mí dona tindo ojlo nujọnu tọn te to egbehe. Etẹwutu? Na kẹdẹdile Juda po Jelusalẹm po pannukọn azán nulẹnjo tọn de to owhe kanweko ṣinawetọ J.W.M. do, akọta Mẹylọhodotọklisti tọn lẹ—na taun tọn, mẹylankan lẹpo—pannukọn whẹgbigbọ tlọlọ de hẹ Jehovah Jiwheyẹwhe to “nukunbibia daho” he ja lọ mẹ. (Matiu 24:21) Mẹdepope he jlo nado yin whiwhla to ojlẹ enẹ mẹ dona ze afọdide nujikudo tọn todin. Gbọnna? Gbọn Jehovah dindin, dodowiwa dindin, po homẹmimiọn dindin po dali whẹpo e nido dẹn hugan!
5. Etẹwẹ ‘Jehovah dindin’ bẹhẹn to egbehe?
5 Hiẹ sọgan dọ dọ: ‘Yẹn yin devizọnwatọ, klandowiwe Jiwheyẹwhe tọn he ko yí baptẹm de, yèdọ dopo to Kunnudetọ Jehovah tọn lẹ mẹ. Be yẹn ma ko jẹ nubiọtomẹsi enẹlẹ kọ̀n wẹ ya?’ Na taun tọn, e bẹ nususu hẹn hugan kinklan mídelẹ do wiwe hlan Jehovah. Islaeli yin akọta klandowiwe de, ṣigba to azán Zẹfania tọn gbè omẹ Juda tọn lẹ ma to gbẹnọ sọgbe hẹ klandowiwe enẹ gba. Taidi kọdetọn de, akọta lọ yin gbigbẹdai to godo mẹ. To egbehe ‘Jehovah dindin’ bẹ awuwiwlena po hinhẹn haṣinṣan mẹdetiti tọn, zohunhunnọ de po go hẹ ewọ to gbẹdido mẹ hẹ titobasinanu aigba ji tọn etọn hẹn. E zẹẹmẹdo nado yọ́n lehe Jiwheyẹwhe nọ pọ́n whẹho lẹ hlan gbọn podọ nado nọ doayi numọtolanmẹ etọn lẹ go. Mí nọ dín Jehovah to whenuena mí yí sọwhiwhe do plọn Ohó etọn, lẹnayihamẹpọn deji, bo yí ayinamẹ etọn lẹ do yizan mẹ to gbẹzan mítọn mẹ. Dile mí sọ to anademẹ Jehovah tọn dín to odẹ̀ vẹkuvẹku mẹ bosọ hodo anademẹ gbigbọ wiwe etọn tọn, haṣinṣan mítọn hẹ ẹ nọ siso deji bọ mí nọ yin whinwhàn nado yí ‘ahun, alindọn, po huhlọn, mítọn lẹpo po’ do sẹ̀n ẹn.—Deutelonomi 6:5; Galatianu lẹ 5:22-25; Filippinu lẹ 4:6, 7; Osọhia 4:11.
6. Nawẹ mí nọ ‘dín dodowiwa’ gbọn, podọ naegbọn ehe yọnbasi etlẹ yin to aihọn ehe mẹ?
6 Nubiọtomẹsi awetọ heyin nùdego to Zẹfania 2:3 mẹ wẹ nado ‘dín dodowiwa.’ Suhugan mítọn wẹ basi diọdo titengbe lẹ na mí nido sọgan pegan na baptẹm Klistiani tọn, ṣigba, mí dona zindonukọn nado tẹdo nujinọtedo dodo Jiwheyẹwhe tọn lẹ go to gbẹzan mítọn lẹpo mẹ. Mẹhe bẹjẹeji ganji to ninọmẹ ehe mẹ delẹ ko na dotẹnmẹ yedelẹ nado yin hinhẹn kudiho gbọn aihọn dali. E ma nọ bọawu gba nado dín dodowiwa, na mí yin lilẹdo pé gbọn mẹhe nọ pọ́n fẹnnuwiwa zanhẹmẹ tọn, lalodido, po ylando devo lẹ po hlan taidi nuhe sọgbe lẹ dali wutu. Etomọṣo, ojlo sinsinyẹn nado hẹn homẹ Jehovah tọn hùn sọgan dù to ayilinlẹn depope nado dín alọkẹyi aihọn tọn ji gbọn tintẹnpọn nado diọada sọgbe hẹ aihọn lọ dali. Juda hẹn nukundagbe Jiwheyẹwhe tọn bú na tintẹnpọn nado hodo apajlẹ akọta kọmẹnu jijọ-madi-Jiwheyẹwhe tọn etọn lẹ wutu. To whelọnu lo, kakati nado hodo apajlẹ aihọn lọ tọn, mì gbọ mí ni yin “mẹhodotọ Jiwheyẹwhe tọn,” bo to awuwlena ‘gbẹtọ-yinyin yọyọ heyin didá sọgbe hẹ ojlo Jiwheyẹwhe tọn to dodowiwa nugbo tọn po nugbonọ-yinyin po mẹ.’—Efesunu lẹ 4:24; 5:1.
7. Nawẹ mí nọ ‘dín homẹmimiọn’ gbọn?
7 Nuagokun atọ̀ntọ heyin nùdego to Zẹfania 2:3 mẹ wẹ yindọ eyin mí jlo nado yin whiwhla to azán homẹgble Jehovah tọn gbè, mí dona “dín homẹmiọn.” Egbesọegbesọ, mí nọ dukosọ hẹ sunnu, yọnnu, po jọja he ma nọ yin homẹmiọnnọ lẹ po. Na yewlẹ, nado yin walọ-mimiọnnọ yin oblọ́ de. Taliai nọ yin pinpọnhlan taidi madogán nujọnu tọn de. Yé nọ donukun nususu sọn mẹsi, yin ṣejannabinọ, po goyitọ po, bo nọ yise dọ “jlọjẹ” po nujlomẹ mẹdetiti tọn yetọn lẹ po dona yin alọkẹyi mahopọnna nuhe enẹ na biọ. Lehe e na blawu do sọ eyin delẹ to walọyizan enẹlẹ mẹ na yinuwado mí ji! Ojlẹ lọ die nado “dín homẹmiọn.” Gbọnna? Gbọn yinyin taliaitọ hlan Jiwheyẹwhe dali, bo gbọn whiwhẹ dali kẹalọyi mẹplọnlọ-domẹgo etọn bosọ sọgbe hẹ ojlo etọn.
Naegbọn E do Yin “E Sọgan” Wẹ Yè na Yin Whiwhla?
8. Etẹwẹ yizan hogbe lọ “e sọgan yin” to Zẹfania 2:3 mẹ dohia?
8 Doayi e go dọ Zẹfania 2:3 dọmọ: “E sọgan yin mì na yin whiwhla to azán [homẹgble] OKLUNỌ tọn tọn gbè.” Naegbọn hogbe lọ “e sọgan” yin yiyizan to whenuena e yindọ “homẹmiọnnọ aigba lọ tọn lẹ” wẹ yè to hodọ hlan? Eyọn, homẹmimiọnnọ enẹlẹ ko ze afọdide nujikudo tọn lẹ, ṣigba dotẹnmẹ depope matin na jidedo-mẹdetiti go gba. Yé ma ko wá opodo gbẹzan yetọn tọn po nugbonọ-yinyin po gba. E yin linlẹn dọ delẹ to yé mẹ sọgan jai biọ ylando mẹ. Onú dopolọ yin nugbo gando mí go. Dile Jesu dọ do: “Mẹhe doakọnna kakajẹ opodo, mẹdopolọ wẹ yè na whlẹn gán.” (Matiu 24:13) Mọwẹ, whlẹngán to azán homẹgble Jehovah tọn gbè sinai do nuhe sọgbe to nukun etọn lẹ mẹ wiwà zọnmii mítọn ji. Be enẹ wẹ yin gbemima dolido towe ya?
9. Afọdide he sọgbe tẹlẹ wẹ yin zize gbọn Ahọlu jọja Josia dali?
9 E họnwun dọ to gbeyiyi mẹ na hogbe Zẹfania tọn lẹ, Ahọlu Josia yin whinwhàn nado ‘dín Jehovah.’ Owe-wiwe dọmọ: “To owhe ṣinatọ̀ntọ ahọludu [Josia] tọn mẹ, whenuena e gbẹsọ tin to ovu [nudi owhe 16 mẹvi], wẹ e ṣẹ̀ nado to Jiwheyẹwhe Davidi otọ́ etọn tọn dín.” (2 Otannugbo lẹ 34:3) Josia sọ to ‘dodowiwa dín’ zọnmii ga, na mí hia dọmọ: “To owhe wiawetọ mẹ [to whenuena Josia yin nudi owhe 20-mẹvi] e ṣẹ̀ nado klọ́ Juda po Jelusalẹm po wé sọn otẹn yiji lẹ mẹ, po Aṣelimi lọ po, po boṣiọ pipà lẹ lọ po, podo boṣiọ kinkọ̀n lẹ lọ. Yé sọ gbà agbà [Baali] tọn lẹ lọ liai to e nukọn.” (2 Otannugbo lẹ 34:3, 4) Josia sọ ‘dín homẹmimiọn’ ga, bo gbọn whiwhẹ dali yinuwa nado hẹn homẹ Jehovah tọn hùn gbọn aigba lọ kiklọwé sọn boṣiọ-sinsẹ̀n po nuyiwa sinsẹ̀n lalo tọn devo lẹ po mẹ dali. Lehe homẹmimiọnnọ devo lẹ na ko jaya to nujijọ ehelẹ mimọ mẹ do sọ!
10. Etẹwẹ jọ to Juda to owhe 607 J.W.M., ṣigba mẹnu lẹ wẹ yin whinwhlẹngán?
10 Ju susu lẹkọ do Jehovah dè to gandudu Josia tọn whenu. Ṣigba, to okú ahọlu lọ tọn godo, suhugan lẹkọ do aliho hoho yetọn lẹ ji—yèdọ yì nuwiwa he mayin alọkẹyi hlan Jiwheyẹwhe mlẹnmlẹn lẹ kọ̀n. Dile Jehovah ko degbè do, Babilọninu lẹ gbawhàn Juda tọn bosọ và tòdaho tatọ́-tònọ etọn, Jelusalẹm sudo to owhe 607 J.W.M. Ṣogan, todido lẹpo ma busẹ gba. Yẹwhegán Jẹlemia, Etiopianu Ebẹdi-mẹlẹki, kúnkàn Jonadabi tọn lẹ, po mẹdevo heyin nugbonọ hlan Jiwheyẹwhe lẹ po yin whiwhla to azán homẹgble Jehovah tọn enẹ gbè.—Jẹlemia 35:18, 19; 39:11, 12, 16-18.
Kẹntọ Jiwheyẹwhe Tọn lẹ Emi—Mì Payi!
11. Naegbọn e do yin avùnnukundiọsọmẹnu de nado gbọṣi nugbonọ-yinyin mẹ hlan Jiwheyẹwhe to egbehe, ṣigba etẹwẹ mẹhe yin kẹntọ omẹ Jehovah tọn lẹ tọn na wà dagbe nado gbadopọnna?
11 Dile mí to tenọpọn azán homẹgble Jehovah tọn do titonu ylankan ehe ji, mí nọ ‘pehẹ whlepọn hunkọhunkọ lẹ.’ (Jakobu 1:2) To aigba he sọalọakọ́n nado yọ́n nuhọakuẹ mẹdekannujẹ sinsẹ̀n-bibasi tọn delẹ ji, sinsẹ̀ngán ayiha wintinwintinnọ lẹ ko yí nuyiwadomẹji yetọn zan do aṣẹpipa tonudidọ tọn lẹ ji nado sọgan hẹn homẹkẹn vẹadi wá omẹ Jiwheyẹwhe tọn lẹ ji. Mẹhe tin to jlòkòkò lẹ nọ dọ mẹnudidọ mẹhẹngble tọn sọta Kunnudetọ Jehovah tọn lẹ, bo nọ do yé hia taidi “hagbẹ sinsẹ̀n tọn he nọ gbleawunamẹ de.” Jiwheyẹwhe yọ́n nuwiwa yetọn lẹ ganji—podọ ehelẹ ma na yì mayin yasana gba. Kẹntọ etọn lẹ na wà dagbe nado gbadopọnna nuhe jọ do kẹntọ hohowhenu omẹ etọn lẹ tọn mọnkọtọn lẹ go taidi Filistininu lẹ. Yẹwhegán lọ dọmọ: “Na Gaza na yin gbigbẹdai, podọ Aṣkelọni ovọ́jẹ de: yé na yàn Aṣdọdi jẹgbonu to oklekle, podọ Ẹklọni nisọ yin adọ̀họ̀nna.” Tòdaho Filistininu tọn lẹ heyin Gaza, Aṣkelọni, Aṣdọdi, po Ẹklọni po na yin vivasudo.—Zẹfania 2:4-7.
12. Etẹwẹ jọ do Filistini, Moabi, po Amọni po go?
12 Dọdai lọ zindonukọn dọmọ: “Yẹn ko sè ovlẹ Moabi tọn, po avlẹda ovi Amọni tọn lẹ tọn lẹ po, he yé ko do to omẹ ṣie lẹ vlẹ, bosọ hẹn yede klo do agbóji yetọn go.” (Zẹfania 2:8) Nugbo wẹ dọ, Egipti po Etiopia po jiya to alọ mẹgbeyantọ Babilọninu lẹ tọn mẹ. Ṣigba etẹwẹ yin whẹdida Jiwheyẹwhe tọn sọta Moabi po Amọni po, yèdọ akọta he wá sọn tavẹ-ylọvi Ablaham tọn Lọti mẹ lẹ tọn? Jehovah dọ dọdai dọmọ: “Nugbonugbo Moabi na tin di Sọdọmi, podọ ovi Amọni tọn lẹ di Gọmọla.” To ma taidi mẹhe mẹ yé jọ sọn lẹ—yèdọ viyọnnu awe Lọti tọn, he lùn vasudo Sọdọmi po Gọmọla po tọn tọ́n lẹ—Moabi po Amọni goyitọ po ma na yin whiwhla sọn whẹdida Jiwheyẹwhe tọn lẹ mẹ gba. (Zẹfania 2:9-12; Gẹnẹsisi 19:16, 23-26, 36-38) To egbehe, fie wẹ Filistini tin te podọ fie wẹ tòdaho etọn lẹ tin te? Etẹwẹ dogbọn Moabi po Amọni goyitọ ojlẹ de mẹ wayi tọn po dali? Dile hiẹ sọgan dín sọ, hiẹ ma na mọ yé gba.
13. Nudinmọ whenuho-kinkàn dòkunkun tọn tẹwẹ yin bibasi to Nineve?
13 To azán Zẹfania tọn gbè, Ahọluigba Assilianu lẹ tọn tin to agayiyi pete huhlọn etọn tọn mẹ. To zẹẹmẹ adà họ̀nmẹ gandudu lọ tọn dopo he ewọ ko dín mọ to tatọ́-tònọ Assilianu lẹ tọn heyin Nineve tọn bibasi mẹ, whenuho-kàntọ dòkuntọ Austen Layard wlan dọmọ: “Ozà lọ lẹ . . . yin mimá do adà he sọzẹn lẹ mẹ, bo tindo yẹdide vounvoun lẹ tọn, kavi yẹdide kanlin lẹ tọn. Delẹ yin aṣọdona po adú ajinnakú tọn po, bọ adà dopodopo nọ yin lilẹdo pé gbọn dogbó po nuyizan okò tọn whanpẹnọ lẹ po dali. Dòtin lẹ, gọna adà abò lọ lẹ tọn lẹ, sọgan ko yin aṣọdona, kavi tlẹ yin titlẹ́, po sika po gọna fataka; podọ atin he ma nọ yawu yọ́n mọ lẹ, to ehe mẹ kedali diyin hugan te, yin yiyizan na anàzọnwiwa owhlẹ tọn lọ.” Nalete, dile e yin dọdai etọn dọ to dọdai Zẹfania tọn mẹ do, Asilia na yin vivasudo podọ tòdaho tatọ́-tònọ etọn, Nineve, na lẹzun ‘ovọ́jẹ de.’—Zẹfania 2:13.
14. Nawẹ dọdai Zẹfania tọn yin hinhẹndi do Nineve ji gbọn?
14 To owhe 15 poun godo he Zẹfania dọ dọdai enẹ, Nineve gángánsu yin vivasudo, họ̀nmẹ gandudu etọn tọn yin gbigbà hanyan. Mọwẹ, tòdaho goyitọ enẹ yin vivasudo mlẹnmlẹn. Lehe gbakija lọ gbloada sọ yin dọdai etọn dọ hezeheze to hogbe ehelẹ mẹ dọmọ: “Apófo po ajinján po na nọ nọ̀ opòtin etọn [he ko jai] lẹ mẹ: ogbè yetọn na to hànji to vẹsẹ́nuvo lẹ mẹ; [gbakija] na tin to họntonu lẹ mẹ.” (Zẹfania 2:14, 15) Ohọ̀ whanpẹnọ Nineve tọn lẹ na jẹ na fininọ ajinján po apófo lẹ tọn po poun. Yè ma nasọ sè ogbè ajọwatọ lẹ tọn, awhágbe awhànfuntọ lẹ tọn, hàngbe yẹwhenọ lẹ tọn to tòhomẹ-liho etọn lẹ ji ba. To aligbọntẹn he nọ ján to ojlẹ de mẹ wayi enẹlẹ ji, ogbè he to ohàn he dazì ji to vẹsẹnu kẹdẹ wẹ na yin sisè, vlavo ohàn awubla ohẹ de tọn kavi awhágbe jẹhọn tọn. To aliho mọnkọtọn de mẹ, na kẹntọ Jiwheyẹwhe tọn lẹpo ni wá opodo yetọn!
15. Etẹwẹ sọgan yin pinplọn sọn nuhe jọ do Filistini, Moabi, Amọni, po Asilia po go mẹ?
15 Etẹwẹ mí sọgan plọn sọn nuhe jọ do Filistini, Moabi, Amọni, po Assilia po go mẹ? Ehe dọ: Taidi devizọnwatọ Jehovah tọn lẹ, nudepope matin he mí dona dibusi sọn kẹntọ mítọn lẹ dè gba. Jiwheyẹwhe nọ mọ nuhe to yinyin wiwà gbọn mẹhe jẹagọdo omẹ etọn lẹ dali lẹ. Jehovah yinuwa sọta kẹntọ etọn lẹ to ojlẹ he wayi lẹ mẹ, podọ whẹdida etọn na yin hinhẹnwa aigba fininọ lẹpo ji to egbehe. Ṣogan, luntọ́ntọ lẹ na tin—yèdọ ‘gbẹtọ susugege de sọn akọta lẹpo mẹ.’ (Osọhia 7:9) Hiẹ sọgan tin to yé mẹ—ṣigba eyin hiẹ zindonukọn nado to Jehovah dín, dodowiwa dín, bosọ to homẹmimiọn dín kẹdẹ.
Dindọ̀n Hlan Ylanwatọ Goyitọ Lẹ!
16. Etẹwẹ dọdai Zẹfania tọn dọ gando ahọvi po nukọntọ sinsẹ̀n tọn Juda tọn lẹ po go, podọ naegbọn hogbe ehelẹ sọgbe pẹpẹ hẹ Mẹylọhodotọklisti?
16 Whladopo dogọ dọdai Zẹfania tọn sọ ze ayidonugo do Juda po Jelusalẹm po ji. Zẹfania 3:1, 2 dọmọ: “Dindọ̀n hlan ewọ heyin atẹnọ podọ gbigbletọ, hlan tòdaho nukunbianọ lọ! Ewọ ma setonuna ogbè lọ gba; ewọ ma yí oplọn lọ gba, ewọ ma dotu to OKLUNỌ mẹ gba; ewọ ma dọ̀n sẹpọ jẹ Jiwheyẹwhe etọn dè gba.” Lehe e blawu sọ dọ vivẹnudido Jehovah tọn lẹ nado do mẹplọnlọ omẹ etọn lẹ go mayin tonusena gba! Na nugbo tọn, kanyinylan ahọvi lẹ, omẹ gbóogbó lẹ, po whẹdatọ lẹ tọn po blawu taun. Zẹfania gblewhẹdo winyan-matindo sinsẹ̀ngán lẹ tọn dọmọ: “Gbẹtọ [goyitọ] danunọ wẹ yẹwhegán etọn lẹ: yẹwhenọ etọn lẹ ko flu fiwiwe lọ, yé ko wà [danu] hlan osẹ́n lọ.” (Zẹfania 3:3, 4) Lehe hogbe nẹlẹ sọgbe hẹ ninọmẹ yẹwhegán po yẹwhenọ Mẹylọhodotọklisti egbehe tọn lẹ tọn po do sọ! Po goyiyi po, yé ko de oyín sọn olọn mẹ wá lọ sẹ̀ sọn lẹdogbedevomẹ Biblu tọn yetọn lẹ mẹ bo ko sọ plọn sinsẹ̀n-nuplọnmẹ he do Omẹ lọ he yé sọalọakọ́n nado to sinsẹ̀n-basi hlan hia to aliho agọ̀ lẹ mẹ.
17. Eyin gbẹtọ lẹ dotoai kavi lala, naegbọn mí dona to wẹndagbe lọ lá zọnmii?
17 Jehovah gbọn mẹtọnhopọn dali na avase gbẹtọ hohowhenu tọn etọn lẹ gando afọdide he e jlo na ze go. E do devizọnwatọ etọn yẹwhegán lẹ—Zẹfania po Jẹlemia po, gọna mẹdevo lẹ hlan—nado dotuhomẹna gbẹtọ lọ lẹ nado lẹnvọjọ. Mọwẹ, “OKLUNỌ . . . ma na wà oylanwa gba; afọnnu afọnnu wẹ ewọ nọ hẹn whẹdida etọn wá jẹ hinhọ́n mẹ, ewọ ma gbòpò gba.” Etẹwẹ yin nuyiwa yetọn? “Ṣigba [mawadodonọ] ma yọ́n winyan de gba,” wẹ Zẹfania dọ. (Zẹfania 3:5) Avase mọnkọtọn de to yinyin lilá to ojlẹ ehe mẹ. Eyin hiẹ yin wẹnlatọ wẹndagbe lọ tọn de, hiẹ to mahẹ tindo to azọ́n avase ninamẹ tọn ehe mẹ. Zindonukọn to wẹndagbe lọ lilá mẹ matin nuṣikọ! Vlavo gbẹtọ lẹ dotoai kavi lala, lizọnyizọn towe yin kọdetọn dagbenọ sọn pọndohlan Jiwheyẹwhe tọn mẹ dile e na dẹnsọ bọ hiẹ na to hinhẹn ẹn di po nugbonọ-yinyin po; winyan ma dona hù we gba dile hiẹ to ojlo Jiwheyẹwhe tọn wà po zohunhun po.
18. Nawẹ Zẹfania 3:6 na yin hinhẹndi gbọn?
18 Whẹdida hinhẹnṣẹ Jiwheyẹwhe tọn ma na yin alọhẹndotena do hinhẹn jẹvọ́ Mẹylọhodotọklisti tọn ji gba. Jehovah hẹn whẹgbledomẹ etọn gblodeji nado bẹ akọta lẹpo hẹn dọmọ: “Yẹn ko sán akọta lẹ sẹ̀, atọ̀họ̀ lọnglọnẹnmẹ yetọn lẹ sọ yin ovọ́jẹ: yẹn ko hẹn alihogbó yetọn lẹ gbọ̀gbé, bọ mẹde ma sọ jugbọn e mẹ: yè và tòdaho yetọn lẹ sudo.” (Zẹfania 3:6) Ohó ehelẹ yin dehe go yè sọgan deji do sọmọ bọ Jehovah dọho gando vasudo lọ go taidi dọ e ko jọ nkọtọn. Etẹwẹ jọ do tòdaho Filistini, Moabi, po Amọni tọn lẹ po go? Podọ etẹwẹ dogbọn tatọ́-tònọ Assilianu lẹ tọn, Nineve dali? Vasudo yetọn yinuwa taidi apajlẹ avase tọn de na akọta lẹ to egbehe. Jiwheyẹwhe ma dona yin vivlẹ gba.
Mì to Jehovah Dín Zọnmii
19. Kanbiọ mẹhẹn-lẹnnupọn tọn tẹlẹ wẹ mí sọgan kanse?
19 To azán Zẹfania tọn gbè, homẹgble Jiwheyẹwhe tọn yin túntún jẹgbonu do mẹhe gbọn kanyinylan dali to ‘nuyiwa yetọn lẹpo hẹn ylan deji lẹ’ ji. (Zẹfania 3:7) Onú dopolọ na jọ to ojlẹ mítọn mẹ. Be hiẹ mọ kunnudenu lẹ dọ azán homẹgble Jehovah tọn ko sẹpọ ya? Be hiẹ to ‘Jehovah dín’ zọnmii gbọn Ohó etọn hihia to gbesisọmẹ—yèdọ egbesọegbesọ dali ya? Be hiẹ to ‘dodowiwa dín’ gbọn gbẹzan he wé to walọyizan-liho he tin to kọndopọmẹ hẹ nujinọtedo Jiwheyẹwhe tọn lẹ de zinzan dali ya? Podọ be hiẹ to ‘homẹmimiọn dín’ gbọn jijọ walọmimiọn, taliai tọn de didohia hlan Jiwheyẹwhe po tito etọn lẹ na whlẹngán po dali ya?
20. Kanbiọ tẹlẹ wẹ na yin dogbapọnna to hosọ godo tọn debọdo-dego tọn ehe do dọdai Zẹfania tọn ji mẹ?
20 Eyin mí to Jehovah, dodowiwa, po walọmimiọn po dín zọnmii po nugbonọ-yinyin po, mí sọgan donukun nado duvivi dona susu tọn todin—mọwẹ, etlẹ yin to ‘azán godo tọn’ yise-whlepọn tọn ehelẹ mẹ. (2 Timoti 3:1-5; Howhinwhẹn lẹ 10:22) Ṣigba mí sọgan jlo na kanse mídelẹ dọ, ‘To aliho tẹlẹ mẹ wẹ mí to yinyin didona te taidi devizọnwatọ egbezangbe tọn Jehovah tọn lẹ, podọ dona sọgodo tọn tẹlẹ wẹ dọdai Zẹfania tọn zedonukọnna mẹhe na yin whiwhla to azán homẹgble Jehovah tọn he to sisẹpọ po awuyiya po lọ gbè?’
Nawẹ Hiẹ Na Na Gblọndo Gbọn?
• Nawẹ gbẹtọ lẹ nọ ‘dín Jehovah’ gbọn?
• Etẹwẹ ‘dodowiwa dindin’ bẹhẹn?
• Nawẹ mí sọgan ‘dín homẹmimiọn’ gbọn?
• Naegbọn mí dona to Jehovah, dodowiwa, po homẹmimiọn po dín zọnmii?
[Yẹdide to weda 18]
Be hiẹ to Jehovah dín gbọn Biblu pinplọn po odẹ̀ vẹkuvẹku po gblamẹ ya?
[Yẹdide to weda 21]
Na yé zindonukọn nado to Jehovah dín wutu, gbẹtọ susugege de na lùn azán homẹgble etọn tọ́n