Nọ Hodo Apajlẹ Yẹwhegán lẹ Tọn—Zẹfania
1. Ninọmẹ tẹ mẹ wẹ Zẹfania sẹ̀n taidi yẹwhegán te, podọ nawẹ ewọ yin apajlẹ dagbe de na mí to egbehe gbọn?
1 To owhe kanweko ṣinawetọ J.W.M, sinsẹ̀n-bibasi hlan Baali masọ yin winyannu to Juda ba. Ahọlu ylankan Amọni ṣẹṣẹ yin hùhù bọ Ahọlu jọja Josia jẹ gandu ji. (2 Otàn. 33:21–34:1) To ojlẹ enẹ mẹ, Jehovah yí Zẹfania zan nado lá owẹ̀n whẹdida tọn de. Mahopọnna dọ Zẹfania na ko wá sọn whédo ahọlu Juda tọn mẹ, e lá owẹ̀n whẹgbledomẹ Jehovah tọn sọta gandudu Juda tọn madoadúdẹji. (Zẹf. 1:1; 3:1-4) Mọdopolọ, mí nọ dovivẹnu nado hodo apajlẹ adọgbigbo tọn Zẹfania tọn bo ma nọ dike haṣinṣan mítọn hẹ hẹnnumẹ lẹ ni glọnalina mí nado tẹdo osẹ́n Jehovah tọn lẹ go. (Mat. 10:34-37) Owẹ̀n tẹwẹ Zẹfania lá, podọ etẹwẹ yin kọdetọn lọ?
2. Etẹwẹ mí dona wà nado yin whinwhlẹngán to azán homẹgble Jehovah tọn gbè?
2 Mì Dín Jehovah: Jehovah kẹdẹ wẹ sọgan whlẹn mí to azán homẹgble etọn tọn gbè. Abajọ Zẹfania na tuli akọta Juda tọn nado dín Jehovah, dín dodowiwa, bosọ dín homẹmiọn whẹpo whenu nido fẹ́. (Zẹf. 2:2, 3) Nudopolọ wẹ mí nọ wà to egbehe. Taidi Zẹfania, mí nọ na tuli mẹdevo lẹ nado dín Jehovah, ṣigba mílọsu dona yinuwa bo magbe sinsinyẹn ma nado ‘lẹkọ sọn OKLUNỌ hihodo mẹ.’ (Zẹf. 1:6) Enẹwutu, mí nọ dín Jehovah gbọn sọwhiwhe yíyí do plọn Ohó etọn po dẹ̀hiho na anademẹ etọn po dali. Mí nọ dín dodowiwa gbọn gbẹzan wiwe de zinzan dali. Mí nọ dín homẹmiọn gbọn awuwiwlena gbigbọ taliai tọn dali bosọ nọ yí ahun lẹpo do setonuna anademẹ he titobasinanu Jehovah tọn nọ na lẹ.
3. Naegbọn mí dona hẹn pọndohlan dagbe go to lizọnyizọn lọ mẹ?
3 Kọdetọn Dagbe Lẹ: Owẹ̀n whẹdida tọn he Zẹfania lá whàn mẹdelẹ to akọta Juda tọn mẹ, ṣigba mẹhe ji e na ko yinuwado hugan wẹ Josia, na mahopọnna dọ jọja de wẹ e yin, e jẹ Jehovah dín ji sọn ovu whenu etọn. To godo mẹ, Josia ze afọdide sinsinyẹn lẹ bo doalọtena boṣiọ-sinsẹ̀n gbọn otò lọ blebu mẹ. (2 Otan. 34:2-5) To egbehe, okún Ahọluduta lọ tọn delẹ nọ flẹ jẹ aliho tó, osé-yigba ji, kavi owùn lẹ ṣẹnṣẹn, amọ́ devo lẹ sọ nọ flẹ jẹ aigba dagbe ji bo nọ de sinsẹ́n tọ́n. (Mat. 13:18-23) Mí deji dọ Jehovah na dona vivẹnudido mítọn lẹ zọnmii dile mí na zindonukọn nado to okún Ahọluduta lọ tọn vúnvún pé.—Ps. 126:6.
4. Naegbọn mí dona ‘nọtepọn Jehovah’?
4 To akọta Juda tọn mẹ, mẹdelẹ lẹndọ Jehovah ma na hẹn whẹdida etọn ṣẹ gbede. Ṣigba, Jehovah dohia to aliho he họnwun mẹ dọ azán daho emitọn ko sẹpọ. (Zẹf. 1:12, 14) Mẹhe dín fibẹtado to ewọ mẹ lẹ kẹdẹ wẹ na yin whinwhlẹngán. (Zẹf. 3:12, 17) Enẹwutu, dile mí to ‘tenọpọn Jehovah,’ mì gbọ mí ni yí homẹhunhun do to Jiwheyẹwhe huhlọnnọ mítọn sẹ̀n to kọndopọ mẹ hẹ sinsẹ̀n-basitọ hatọ mítọn lẹ!—Zẹf. 3:8, 9.