Yin Hinhẹnlodo Gbọn Jehovah Dali to Gbẹzan Ṣie Lẹpo Mẹ — WESẸDOTẸN INTẸNẸT JI TỌN Watchtower Tọn

Otàn Gbẹzan Tọn

Yin Hinhẹnlodo Gbọn Jehovah Dali to Gbẹzan Ṣie Lẹpo Mẹ

DILE EYIN DIDỌ GBỌN FORREST LEE DALI

E ma ko dẹn bọ ponọ lẹ yí glamafonu po owe Biblu tọn mítọn lẹ po. Wẹkẹ-Whàn II ko wleawuna whẹwhinwhẹ́n na agọjẹdomẹtọ lẹ nado diọlinlẹn na ayimatẹn-gán yọyọ Canada tọn de nado lá nuwiwa Kunnudetọ Jehovah tọn lẹ tọn taidi nuhe ma sọgbe hẹ osẹ́n. Ehe jọ to 4 juillet 1940.

TO OBU matindo gando nuhe jọ go mẹ, mí yí owe lẹ dogọ sọn fie e yin sisẹdo bosọ zindonukọn to yẹwhehodidọ mítọn mẹ. Yẹn na nọ flin ohó Papa tọn he e dọ to nujijọ enẹ whenu lẹ to whepoponu dọmọ: “Mí ma nọ doalọtena enẹ po awubibọ po gba. Jehovah ko degbena mí nado dọyẹwheho.” To ojlẹ lọ mẹ, yẹn yin owhe-ao-mẹvi huhlọnnọ de. Ṣigba etlẹ yin to egbehe, gbemima Papa tọn po zohunhun etọn na lizọnyizọn lọ po gbẹsọ yin nuflinmẹ gbọzangbọzan de do lehe Jiwheyẹwhe mítọn, Jehovah, nọ hẹn nugbonọ etọn lẹ dote gbọn.

Whedevonu he ponọ lẹ do mí te, e mayin owe mítọn lẹ kẹdẹ wẹ yé yí gba ṣigba yé sọ ze Papa do gànpamẹ, bo jo ovi ẹnẹ do na Mama kẹdẹ. Enẹ jọ to septembre 1940 to Saskatchewan. Ojlẹ vude to enẹgodo yẹn yin yinyan sọn wehọmẹ na hihodo ayihadawhẹnamẹnu heyin pinplọn gbọn Biblu dali ṣie podọ pipà ma na asía kavi ohàn akọta tọn jiji wutu. Nukọnzinzindo to wehọmẹ yìyì ṣie mẹ gbọn wehọmẹ wekanhlanmẹ tọn dali hẹn todohukanji ṣie bọawu, bọ yẹn tindo mahẹ gigọ́ to azọ́n yẹwhehodidọ tọn mẹ.

To 1948 oylọ yin bibasina gbehosọnalitọ lẹ, yèdọ lizọnyizọnwatọ whenu-gigọ́ tọn heyin Kunnudetọ Jehovah tọn lẹ, nado sẹtẹn yì huto whèzẹtẹn Canada tọn. Enẹwutu yẹn yì nado basi gbehosọnalitọ to Halifax, Nova Scotia, podọ to Cape Wolfe, yèdọ lopo Prince Edward tọn. To owhe he bọdego mẹ, yẹn kẹalọyi oylọ-basinamẹ de nado wazọ́n na osẹ awe to wekantẹn alahọ tọn heyin Kunnudetọ Jehovah tọn lẹ tọn to Toronto. Osẹ awe enẹlẹ dlẹnkan yì nuhe hugan owhe sinsẹ̀nzọn alemọyi tọn ṣidopo. To godo mẹ, yẹn dukosọhẹ Myrna, he tindo mahẹ to owanyi ṣie na Jehovah mẹ, podọ mí wlealọ to décembre 1955. Mí nọ nọ̀ Milton, Ontario, podọ to madẹnmẹ agun yọyọ de yin zizedai to finẹ. Odò owhé mítọn tọn wá lẹzun Plitẹnhọ Ahọluduta tọn.

Ojlo Nado Hẹn Lizọnyizọn Mítọn Gblodeji

To owhe he bọdego lẹ mẹ, mí lẹzun mẹjitọ ovi ṣidopo tọn po awuyiya po to aliho debọdo-dego tọn mẹ. Viyọnnu mítọn Miriam wẹ yin tintan. Enẹgodo Charmaine, Mark, Annette, Grant, podọ to godo mẹ Glen. Whlasusu wẹ yẹn nọ gọ̀ sọn azọ́nmẹ nado mọ ovi-flinflin lẹ sinai to aigba lẹdo adò miyọ́n tọn, bọ Myrna nọ to Biblu hia na yé, bo nọ to zẹẹmẹ linlin Biblu tọn lẹ basi bo nọ to owanyi nujọnu tọn na Jehovah zín do ahun yetọn lẹ mẹ. Pẹdido wẹ na godonọnamẹ owanyinọ etọn, ovi mítọn lẹpo wẹ tindo oyọnẹn he pegan Biblu tọn sọn vuwhenu gbọ́n.

Zohunhun otọ́ ṣie tọn na lizọnyizọn lọ ko tindo nuyiwadomẹji sinsinyẹn de do ayiha po ahun ṣie po ji. (Howhinwhẹn lẹ 22:6) Gbọnmọ dali, to 1968, to whenuena whẹndo Kunnudetọ Jehovah tọn lẹ tọn yin oylọ-basina nado sẹtẹn wá Ṣẹnṣẹn po Hùwaji Amelika tọn po nado gọalọ to azọ́n yẹwhehodidọ tọn mẹ, whẹndo mítọn jlo nado yigbe na oylọ-basinamẹ lọ. To ojlẹ enẹ mẹ ovi mítọn lẹ tin to owhe 5 jẹ 13 gblamẹ, podọ depope to mí mẹ ma sè Espagne-gbè gba. To anademẹ heyin nina hihodo mẹ, yẹn zìn gbejizọnlin yì otò voovo lẹ mẹ nado dindona ninọmẹ gbẹninọ tọn lẹ. To kọlilẹ ṣie godo, mí gbọn odẹ̀ dali gbadopọnna nudide mítọn lẹ taidi whẹndo de bosọ magbe nado sẹtẹn yì Nicaragua.

Sinsẹ̀nzọnwiwa to Nicaragua

Mí tin to owhé yọyọ mítọn gbè to octobre 1970, podọ to osẹ atọ̀n gblamẹ adà pẹvi de yin didena mi to tito-to-whinnu opli agun tọn de ji. Yẹn jẹtukla to nukunpipedo adà lọ go mẹ to Espagne-gbè he yẹn ma ko sè ganji lọ mẹ bo dotana gbọn oylọ-bibasina agun lọ blebu nado wá owhé mítọn gbè na cerveza to samedi to ogàn 9:30 afọnnu tọn mẹ dali. Nuhe yẹn jlo na dọ wẹ servicio, hogbe lọ na sinsẹ̀nzọn kunnudegbe tọn, ṣigba na nugbo tọn, oylọ wẹ yẹn to bibasi na mẹlẹpo nado wá nù bia. Ogbè lọ pinplọn yin avùnnukundiọsọmẹnu de na nugbo tọn!

Jẹnukọn, yẹn nọ wlan nuzedonukọnnamẹ de do alọ ṣie mẹ bo nọ basi dọvọdọ etọn to whenuena yẹn jei ohọ̀n de kọ̀n. Yẹn nọ dọmọ: “Po owe lọ po wẹ plọnmẹ Biblu whégbè tọn vọnu.” Omẹ dopo he kẹalọyi nuzedonukọnnamẹ lọ dọ to enẹgodo dọ emi dona wá opli mítọn lẹ ji nado yọ́n nuhe yẹn to tintẹnpọn nado dọ na emi. Dawe ehe lẹzun dopo to Kunnudetọ Jehovah tọn lẹ mẹ. Lehe e họnwun do sọ dọ Jiwheyẹwhe wẹ yin mẹhe nọ hẹn okún nugbo tọn whẹ́n to ahun whiwhẹnọ lẹ tọn mẹ, yèdọ dile apọsteli Paulu yigbe etọn do!—1 Kọlintinu lẹ 3:7.

To nudi owhe awe to tòdaho tatọ́-tònọ Managua tọn mẹ godo, mí yin didọna nado sẹtẹn yì hùwaji Nicaragua tọn. To finẹ mí wazọ́n hẹ agun he tin to Rivas podọ hẹ pipli kándo jlodotọ lẹdo lọ mẹ tọn lẹ. Pedro Peña, Kunnudetọ nugbonọ mẹhomẹ de, nọ zọnhẹ mi to whenuena mí dla pipli ehelẹ pọ́n. Dopo tin to lopo osó miyọnnọ tọn de ji to Tándò Nicaragua tọn mẹ, fie whẹndo Kunnudetọ Jehovah tọn lẹ tọn dopo kẹdẹ wẹ tin te.

Dile etlẹ yindọ agbasanu vude poun wẹ whẹndo ehe tindo, yé dovivẹnu tlala nado do pinpẹn-nutọn-yinyọnẹn hia na dlapọn mítọn. To whèjai he mí wá, núdùdù ko yin awuwlena dai na mí. Mí nọ na osẹ dopo, podọ susu to mẹyiwanna he tin to finẹ he yiwanna Biblu lẹ mẹ má núdùdù yetọn hẹ mí. Mí jẹaglin nado tindo omẹ 101 he wá hodidọ gbangba Biblu tọn to dimanche.

Yẹn tindo numọtolanmẹ dọ huhlọn mẹhẹndote Jehovah tọn sọawuhia to whenuena, to nujijọ devo whenu, mí dona dla pipli jlodotọ lẹ tọn de pọ́n to osó lẹ ji sẹpọ dogbó Costa Rica tọn. To azán he gbè mí dona yì, Pedro wá nado ze mi, ṣigba azọ̀n ovà tọn ko zìn mi dai. “Pedro, yẹn ma sọgan yì,” wẹ yẹn dọ. To whenuena e do alọ nukọn otà ṣie tọn pọ́n, e gblọn dọmọ: “Hiẹ ko to ovà sinsinyẹn jẹ, ṣigba hiẹ dona wá! Mẹmẹsunnu lẹ to tenọpọn we.” Enẹgodo e hodẹ̀ ahundoponọ hugan tọn de he yẹn ko sè pọ́n.

Enẹgodo, yẹn dọmọ: “Yì bo dín fresco (osin atin sinsẹ́n tọn) de bo nù. Yẹn na ko wleawufó to nudi nukunwhiwhe ao gblamẹ.” Whẹndo Kunnudetọ lẹ tọn awe wẹ nọ nọ̀ lẹdo he mí dlapọn lọ mẹ, podọ yé penukundo mí go ganji. Dile etlẹ yindọ ovà gbẹpo to tuklado mi, mí yì dọ yẹwheho hẹ yé to wunkẹngbe. Lehe e hẹnmẹ-lodo do sọ nado mọ mẹplidopọ he hugan kanweko na opli dimanche tọn mítọn!

Tẹnsisẹ Whladopo Dogọ

To 1975 ovi ṣinawetọ mítọn, Vaughn, yin jiji. To owhe he bọdego mẹ, mí dona lẹkọwa Canada na whẹwhinwhẹ́n akuẹzinzan tọn lẹ wutu. Tintọ́n sọn Nicaragua ma bọawu gba na mí ko tindo numimọ huhlọn mẹhẹndote Jehovah tọn na nugbo tọn to finẹ ninọ mítọn whenu. To ojlẹ he mẹ mí tọ́nsọn finẹ, hugan gbẹtọ 500 to aigba-denamẹ agun mítọn tọn ji wẹ ko to opli lẹ yì.

To tintan whenu, to whenuena viyọnnu mítọn Miriam po yẹn po yin dide taidi gbehosọnalitọ titengbe lẹ to Nicaragua, Miriam kanse mi dọmọ: “Papa, eyin e wá jọ bọ mì jlo na lẹkọyi Canada, be mì na dike bọ yẹn na gbọṣi file ya?” Yẹn ma tindo linlẹn nado lẹkọ pọ́n gbede, enẹwutu yẹn dọmọ: “Mọwẹ, na nugbo tọn!” Enẹwutu to whenuena mí tọ́nsọn finẹ, Miriam gbọṣi finẹ nado zindonukọn to lizọnyizọn whenu-gigọ́ tọn etọn mẹ. To godo mẹ, e wlealọ hẹ Andrew Reed. To 1984 yé yì klasi 77tọ Giliadi tọn, yèdọ wehọmẹ mẹdehlan tọn heyin Kunnudetọ Jehovah tọn lẹ tọn, he tin to Brooklyn, New York to whenẹnu. Todin Miriam to sinsẹ̀nzọnwà hẹ asu etọn to République Dominicaine, bo to ojlo heyin zinzindo ahun mẹ na ẹn gbọn mẹdehlan azọ́nyọnẹntọ he tin to Nicaragua lẹ dali hẹndi.

To ojlẹ dopolọ mẹ, ohó Papa tọn lẹ, “mí ma nọ doalọtena enẹ po awubibọ po gba,” gbẹpo to zoji to ahun ṣie mẹ. Enẹwutu to 1981 to whenuena mí ko sẹ̀ akuẹ he pé nado lẹkọwa Ṣẹnṣẹn Amérique tọn do, mí sẹtẹn whladopo dogọ, to ojlẹ ehe mẹ yì Costa Rica. To whenuena mí to sinsẹ̀nzọnwà to finẹ, mí yin oylọ-basina nado gọalọ to owhé alahọ tọn yọyọ yetọn tọn gbigbá mẹ. Ṣigba, to 1985 visunnu mítọn Grant tindo nuhudo nukunpedomẹgo dotowhé tọn, enẹwutu mí lẹkọwa Canada. Glen gbọṣi Costa Rica nado to azọ́nwa to azọ́nwatẹn alahọ gbigbá tọn mẹ, to whenuena Annette po Charmaine po wà sinsẹ̀nzọn taidi gbehosọnalitọ titengbe lẹ. Mí mẹhe tọ́nsọn Costa Rica lẹ ma lẹn pọ́n gbede dọ mí ma na lẹkọyi gba.

Pipehẹ Nujijọ Ylankan

To 17 septembre 1993, aimẹ họ́n podọ owhè hùn tlala. Visunnu mítọn mẹho, Mark, po yẹn po to ozà-sú. Mí nọ wazọ́n to adà mẹ na mídelẹ bo nọ dọho gando whẹho gbigbọmẹ tọn lẹ go, dile e yin aṣa mítọn do. To mayọnẹn mẹ yẹn dídí bosọ jai sọn ozà ji. To whenuena yẹn gọ̀ biọ dee mẹ, nuhe yẹn sọgan mọ lẹpo wẹ hinhọ́n he sẹ́ po gbẹtọ he dó avọ̀ wewe lẹ po. Abò fie yè nọ penukundo nujijọ ajiji lẹ go te to dotowhé wẹ.

Na nuhe Biblu dọ wutu, nuyiwa ṣie tintan wẹ: “Ma jlo ohùn, ma jlo ohùn!” (Owalọ lẹ 15:28, 29) Lehe e yin jidevọnamẹ do nado sè bọ Charmaine dọ: “E ko pé, Papa. Mímẹpo wẹ tin tofi.” Yẹn yọnẹn to godo mẹ dọ doto lẹ ko mọ nudọnamẹ dotowhé tọn ṣie, podọ yizan ohùn tọn mayin nuhahun de gba. Yẹn ko wẹ́n-kọ̀ bosọ yin awukunọ mlẹnmlẹn, bo ma tlẹ penugo nado gbọ̀yi-agbọji na dee gba.

Na yẹn tin to otẹn dopo mẹ wutu, yẹn tindo nuhudo hugan gbede pọ́n tọn nado yin hinhẹnlodo gbọn Jehovah dali. Mẹzizẹ afuje tọn, heyin bibasi nado ze gbigbọ-kàn de do e mẹ, sán fie jẹhọn nọ gbọn biọ aṣọ̀kan ṣie mẹ lẹ. Yẹn ma sọgan dọho. Gbẹtọ lẹ dona nọ doayi nùflo ṣie lẹ go nado mọnukunnujẹ nuhe yẹn to tintẹnpọn nado dọ go.

Akuẹzinzan lẹ yiaga po awuyiya po. Po asi ṣie po gọna suhugan ovi ṣie lẹ tọn to lizọnyizọn whenu-gigọ́ tọn mẹ, yẹn lẹnnupọn dọ vlavo yé na jo sinsẹ̀nzọn ehe do nado penukundo azọngban akuẹzinzan tọn ehelẹ go. Ṣigba, Mark penugo nado mọ azọ́n he to osun atọ̀n poun gblamẹ gọalọ nado suahọ suhugan akuẹzinzan ehe tọn. Taidi kọdetọn de, mẹlẹpo penugo nado gbọṣi lizọnyizọn whenu-gigọ́ tọn mẹ adavo asi ṣie po yẹn po.

Kalti nudọdomẹ tọn po wekanhlanmẹ lẹ kanweko susu po sọn otò voovo ṣidopo mẹ gọ́ adó abò dotowhé tọn ṣie go. Jehovah to hinhẹn mi lodo na nugbo tọn. Agun lọ lọsu gọalọna whẹndo ṣie gbọn awuwiwlena núdùdù na yé to ojlẹ osun atọ́n daa tọn he yẹn tin to nukunpedomẹgo sinsinyẹn glọ delẹ mẹ tọn dali. To azán lẹpo ji, Klistiani mẹho de nọ yí whèmẹ zan hẹ mi, bo nọ hia Biblu po owe Biblu tọn lẹ po na mi, gọna numimọ tulinamẹ tọn lẹ didọna mi. Hagbẹ whẹndo tọn awe nọ wleawuna opli agun tọn dopodopo hẹ mi, enẹwutu núdùdù gbigbọmẹ tọn titengbe lẹ ma gbọ̀ go e gba.

To whenuena yẹn gbẹpo to dotowhé, tito yin bibasi na mi nado yì tito-to-whinnu plidopọ vonọtaun tọn de. Azọ́nwatọ dotowhé tọn lẹ basi titona doto mẹgopọntọ de gọna azọ́nyọnẹntọ gbọfufu tọn de nado yì hẹ mi na azán lọ blebu. Homẹhunnu nankọtọn die e yin nado tin hẹ mẹmẹsunnu po mẹmẹyọnnu Klistiani tọn ṣie lẹ po whladopo dogọ! Yẹn ma sọgan wọnji mimọ gbẹtọ kanweko susu he todohukanji lẹ, bo to tenọpọn ojlẹ yetọn nado dọnudo mi.

Gbigbọnọ-Yinyin Go Hinhẹn

To nudi owhe dopo to owùnú jijọ lọ godo, yẹn penugo nado yì whégbè po whẹndo ṣie po, dile etlẹ yindọ yẹn gbẹsọ tindo nuhudo nukunpedomẹgo ganhiho-24-tọn-to-gbèdopo. Agbànhun vonọtaun heyin awuwlena ganji de nọ hẹn mi penugo nado yì opli lẹ, ehe yẹn ma nọ saba gbọ̀ e go. Nalete, yẹn dona yigbe dọ e nọ biọ gbemima nado yì. Sọn whenue gbọ́n yẹn wá whégbè, yẹn ko penugo nado yì plidopọ agbegbe tọn lẹpo.

To godo mẹ, to février 1997, yẹn gọ̀ nugopipe ṣie nado dọho yí jẹ obá de mẹ. Delẹ to doto mẹgopọntọ ṣie lẹ mẹ dotoai po pinpẹn-nutọn-yinyọnẹn po dile yẹn to todido sinai do Biblu ji ṣie má hẹ yé. Doto mẹgopọntọ dopo ko hia owe lọ (Les Témoins de Jéhovah: Prédicateurs du Royaume de Dieu) blebu na mi gọna owe Watch Tower tọn devo lẹ. Yẹn nọ wlanwe hlan gbẹtọ lẹ gbọn opò de yiyizan nado deanana zomọ nudọnamẹ-sẹdo tọn de dali. Dile etlẹ yindọ wekinkan to aliho ehe mẹ yin apọṣimẹnu taun, alemọyinu de wẹ eyin nado penugo bo gbọṣi mahẹ tintindo mẹ to lizọnyizọn lọ mẹ.

Yẹn jiya sinsinyẹn awufiẹsa okàn agbasamẹ tọn tọn. Ṣigba e taidi dọ whenuena yẹn to nugbo Biblu tọn má hẹ mẹdevo lẹ kavi to sisè bọ ehelẹ yin hihia hlan mi, yẹn nọ mọ kọgbọ delẹ yí. Sọn ojlẹ de mẹ jẹ devo mẹ, yẹn nọ basi kunnudide tòhomẹ-liho ji tọn hẹ asi godonọnamẹtọ ṣie, he nọ basi zẹẹmẹ lẹ na mi to whenuena yẹn tindo nuhudo alọgọ tọn. To ojlẹ voovo lẹ mẹ, yẹn ko penugo nado wà sinsẹ̀nzọn taidi gbehosọnalitọ alọgọtọ tọn de. Devizọnwiwa taidi mẹho Klistiani de nọ hẹn mi tindo numọtolanmẹ ayajẹ tọn, titengbe to whenuena mẹmẹsunnu lẹ wá dè e to opli lẹ ji kavi dla mi pọ́n to owhé ṣie gbè bọ yẹn penugo nado gọalọ bosọ na tuli yé.

Yẹn dona yigbe dọ e bọawu nado yin hinhẹn apọṣi. Enẹwutu whedepopenu he yẹn tindo numọtolanmẹ gbigbọjọ tọn, yẹn nọ hodẹ̀ to afọdopolọji dọ yẹn dona tindo ayajẹ. To ozán po keze po yẹn nọ hodẹ̀ dọ Jehovah ni zindonukọn nado to hinhẹn mi lodo. Wekanhlanmẹ kavi dlapọn de sọn mẹde dè nọ saba dozolanmẹna mi. Atọ̀họ̀-Nuhihọ́ Lọ Tọn kavi Réveillez-vous! de hihia nọ hẹn ayiha ṣie gọ́ po linlẹn mẹjlọdote tọn lẹ po. Doto mẹgopọntọ voovo lẹ to whedelẹnu nọ hia linlinnamẹwe ehelẹ na mi. Sọn owùnú-jijọ ṣie whenu gbọ́n, yẹn ko dotoai hlan Biblu lọ blebu hihia whla ṣinawe to kasẹti ji. Ehelẹ tin to aliho voovo he mẹ Jehovah ko hẹn mi lodo lẹ mẹ.—Psalm 41:3.

Diọdo lẹ to ninọmẹ ṣie lẹ mẹ ko hẹn mi tindo whenu susu nado lẹnayihamẹpọn do lehe Nuplọnmẹtọ Daho mítọn, Jehovah, nọ plọn mí nado nọgbẹ̀ gbọn ji. E nọ na mí oyọnẹn he pegan ojlo po lẹndai etọn po, lizọnyizọn he tindo zẹẹmẹ, ayinamẹ do aṣli ayajẹ whẹndo tọn ji, gọna wuntuntun nado yọ́n nuhe dona yin wiwà to yajiji whenu. Jehovah ko yí asi nugbonọ po jiawu de po do dona mi. Ovi ṣie lẹ lọsu ko nọgodona mi po nugbonọ-yinyin po, podọ ayajẹ wẹ e yin na mi dọ yemẹpo ko tindo mahẹ to lizọnyizọn whenu-gigọ́ tọn mẹ. Na nugbo tọn, to 11 mars 2000, visunnu mítọn Mark po asi etọn, Allyson po, mọ gbedewema yí sọn klasi 108tọ Wehọmẹ Giliadi tọn bosọ yin azọ́ndena yì Nicaragua. Asi ṣie po yẹn po penugo nado yì gbedewema yíyí yetọn tẹnmẹ. Yẹn sọgan dọ po nugbonọ-yinyin po dọ yajiji ko diọ gbẹzan ṣie ṣigba e mayin ahun ṣie gba.—Psalm 127:3, 4.

Yẹn dopẹ́ na Jehovah na nuyọnẹn he e ko wleawu etọn nado hẹn mi penugo nado na ogú gbigbọmẹ tọn he yẹn mọyi whẹndo ṣie. Yẹn yin hinhẹnlodo bosọ yin tulina nado mọ ovi ṣie lẹ to Mẹdatọ yetọn sẹ̀n po walọ he taidi otọ́ ṣie tọn po, mẹhe dọmọ, “Mí ma nọ doalọtena enẹ po awubibọ po gba. Jehovah degbena mí nado dọyẹwheho.” Na nugbo tọn, Jehovah ko hẹn yẹn po whẹndo ṣie po lodo to azán mítọn lẹpo mẹ.

[Yẹdide to weda 24]

Hẹ Papa, nọvisunnu ṣie lẹ, po nọviyọnnu ṣie po, bọdo ohọ̀ mọto tọn mítọn, he nọ yin yiyizan to azán gbehosọnalitọ bibasi tọn lẹ whenu. Yẹn tin to adusi mẹ

[Yẹdide to weda 26]

Hẹ asi ṣie, Myrna

[Yẹdide to weda 26]

Fọto agọe tọn heyin whẹndo mítọn tọn

[Yẹdide to weda 27]

Yẹn gbẹsọ nọ dekunnu gbọn wekanhlanmẹ lẹ dali