Sinsẹ̀n Klistiani Nugbo Tọn Gbayipe!
“Ohó Jiwheyẹwhe tọn to whinwhẹ́n deji, bosọ to [gbigbayipe].”—OWALỌ LẸ 19:20.
1. Basi zẹẹmẹ nukọnyiyi he sinsẹ̀n Klistiani tọn tindo to owhe kanweko tintan whenu tọn.
NA KLISTIANI fliflimẹ tọn lẹ yin zodolanmẹna gbọn huhlọn gbigbọ wiwe tọn dali wutu, yé lá ohó Jiwheyẹwhe tọn po zohunhun he ma sọgan yin kandepòna de po. Whenuho-kantọ dopo wlan dọmọ: “Sinsẹ̀n Klistiani tọn ko gbayipe po awuyiya ayidego tọn de po to aihọn Lomu tọn mẹ. To owhe 100 gblamẹ e taidi dọ ayimatẹn he má dogbó hẹ Méditerranée lẹpo wẹ ko tindo pipli Klistiani tọn de to e mẹ.”
2. Nawẹ Satani dovivẹnu nado glọnalina wẹndagbe lọ gbọn, podọ nawẹ ehe ko yin didọdai gbọn?
2 Satani Lẹgba ma sọgan hẹnalọdotena Klistiani fliflimẹ tọn lẹ gba. Kakatimọ, e glọnalina kọdetọn wẹndagbe lọ tọn gbọn aliho devo gblamẹ—yèdọ atẹṣiṣi. Jesu ko dọ dọdai diọdo ehe tọn to oló likun po ogbé lẹ po tọn etọn mẹ. (Matiu 13:24-30, 36-43) Apọsteli Pita ko sọ na avase dọ mẹplọntọ lalonọ lẹ na fọ́n to agun lọ mẹ, bo na hẹn kinklan mẹvasudo tọn lẹ wá. (2 Pita 2:1-3) Mọdopolọ, apọsteli Paulu ko na avase tlọlọ dọ atẹṣiṣi na fọ́n jẹnukọnna azán Jehovah tọn.—2 Tẹsalonikanu lẹ 2:1-3.
3. Etẹwẹ jọ bọdo okú apọsteli lẹ tọn go?
3 Bọdo okú apọsteli lẹ tọn go, wẹndagbe lọ wá yin zínzíndo odò gbọn nuplọnmẹ po tamẹnuplọnmẹ kosi tọn lẹ po dali. Dile e yin didọdai do, mẹplọntọ lalonọ lẹ slokọna bo hẹn wẹndomẹ wiwe-ṣeke nugbo tọn flú. Vudevude, sinsẹ̀n Klistiani nugbo tọn yin zínzíndo odò gbọn oklọ tọn heyin yiylọdọ Mẹylọhodotọklisti dali. Hagbẹ sinsẹ̀ngán tọn de fọ́nṣite he tẹnpọn nado dike Biblu ni ma jẹ alọ gbẹtọ paa lẹ tọn mẹ. Dile etlẹ yindọ sọha mẹhe ylọ yedelẹ dọ Klistiani lẹ tọn jideji, sinsẹ̀n-bibasi yetọn ma yin wiwe-ṣeke gba. Mẹylọhodotọklisti whẹ́n deji to awà lẹpo ji bo lẹzun nuzedai huhlọnnọ de po huhlọn gángánsu de po to aṣa Whèyihọ-waji tọn mẹ, ṣigba e ma tindo dona kavi gbigbọ Jiwheyẹwhe tọn.
4. Naegbọn ayiha wintinwintin Satani tọn nado glọnalina lẹndai Jiwheyẹwhe tọn ma tindo kọdetọn dagbe?
4 Ṣigba, ayiha wintinwintin Satani tọn nado glọnalina lẹndai Jehovah tọn na gboawupo dandan. Etlẹ yin to ojlẹ atẹṣiṣi he ylan hugan lẹ tọn mẹ, sinsẹ̀n Klistiani nugbo tọn gbẹ́ pò to ogbẹ̀ to mẹdelẹ mẹ. Sunnu he basi vọkan Biblu tọn lẹ dovivẹnu nado wàmọ po gbesisọ po. Gbọnmọ dali, Biblu lọsu gbẹ́ sọgbe, dile etlẹ yindọ wẹndomẹ etọn ko yin hinhẹnflu gbọn mẹsusu he sọalọakọ́n nado tindo aṣẹpipa lọ nado plọn ẹn mẹ dali. To owhe kanweko lẹ gblamẹ weyọnẹntọ lẹ taidi Jérôme po Tyndale po yí adọgbigbo do basi lẹdogbedevomẹ Ohó Jiwheyẹwhe tọn bosọ má ẹn. Gbẹtọ livi livi lẹ wẹ yin hunhundonuvo hlan Biblu podọ hlan wunmẹ sinsẹ̀n Klistiani tọn de, dile etlẹ yin oklọ tọn do.
5. Dọdai tẹwẹ yẹwhegán Daniẹli dọ gando ‘oyọnẹn nugbo’ go?
5 To godo mẹ, dile e yin didọdai to owe Daniẹli tọn mẹ do, ‘oyọnẹn nugbo lẹzun nuhe sudeji.’ Ehe jọ to “ojlẹ opodo lọ tọn” mẹ—yèdọ ojlẹ he mẹ mí to gbẹ̀nọ te todin. (Daniẹli 12:4) Gbigbọ wiwe ko deanana owanyina nugbo tọ́ lẹ lẹdo aihọn pé hlan oyọnẹn he pegan Jiwheyẹwhe nugbo lọ tọn po lẹndai etọn po kọ̀n. Etlẹ yin to owhe kanweko susu nuplọnmẹ atẹṣiṣi tọn lẹ godo, ohó Jiwheyẹwhe tọn gbayipe! To egbehe, wẹndagbe lọ to yinyin lilá to filẹpo, bo to anadena gbẹtọ lẹ hlan todido aihọn yọyọ awuvivi tọn lọ kọ̀n. (Psalm 37:11) Todin mì gbọ mí ni gbadopọnna whinwhẹ́n deji egbezangbe ohó Jiwheyẹwhe tọn.
Whinwhẹ́n Deji Ohó lọ Tọn to Egbehe
6. Nugbo tẹlẹ wẹ Biblu Plọntọ lẹ mọnukunnujẹemẹ to owhe 1914 tọn mẹ?
6 To vivọnu owhe kanweko 19tọ tọn, nugbo Biblu tọn fọ́n pipli pẹvi Biblu Plọntọ lẹ tọn de dote, heyin yinyọnẹn to egbehe taidi Kunnudetọ Jehovah tọn lẹ. To 1914, yé ko mọnukunnujẹ Biblu mẹ ganji. Yé mọnukunnujẹ nugbo jiawu lẹ mẹ gando lẹndai Jiwheyẹwhe tọn go. Yé yin whinwhàn sisosiso gbọn owanyi Jehovah tọn to Visunnu etọn didohlan aigba ji dali, bo gbọnmọ dali hùn aliho ogbẹ̀ madopodo tọn dote. Yé ko sọ wá yọ́n oyín Jiwheyẹwhe tọn bosọ mọnukunnujẹ gbẹtọ-yinyin etọn mẹ. Humọ, yé yọnẹn dọ “ojlẹ Kosi lẹ tọn” ko wá vivọnu, bo to didohia dọ ojlẹ lọ ko sẹpọ na gandudu Ahọluduta Jiwheyẹwhe tọn nado hẹn dona lẹ wá na gbẹtọvi lẹ. (Luku 21:24) Wẹndagbe gigonọ nankọ die! Nugbo huhlọnnọ ehelẹ wẹ dona yin lilá na mẹlẹpo, to filẹpo. Ogbẹ̀ lẹ tin to owù mẹ!
7. Nawẹ nugbo Biblu tọn ko gbayipe to ojlẹ egbezangbe tọn lẹ mẹ gbọn?
7 Jehovah dona sọha vude Klistiani heyin dide gbọn gbigbọ dali enẹlẹ tọn. To egbehe, sọha mẹhe kẹalọyi sinsẹ̀n Klistiani nugbo tọn lẹ ko zẹ̀ livi donu ṣidopo go. Ohó Jiwheyẹwhe tọn ko sọ dlẹnkan to sọha aigba-denamẹ tọn mẹ, na aigba 235 ji wẹ Kunnudetọ Jehovah tọn lẹ tin te. Humọ, nugbo Biblu tọn ko yí huhlọn zan, bo ko gbayipe to aliglọnnamẹnu lẹpo ji, sinsẹ̀n tọn po devo lẹ po ji. Azọ́n yẹwhehodidọ lẹdo globu pé tọn ehe yidogọna kunnudenu tlọlọ lẹ dọ Jesu ko tin tofi to huhlọn Ahọluduta tọn mẹ.—Matiu 24:3, 14.
8. Etẹwẹ mẹdelẹ ko dọ dogbọn jideji Kunnudetọ Jehovah tọn lẹ tọn dali?
8 Kẹdẹdile whenuho-kantọ lẹ dọho gando nukọnyiyi sẹhundaga sinsẹ̀n Klistiani tọn go to owhe kanweko tintan whenu do, weyọnẹntọ susu ko dọho do jideji omẹ Jehovah tọn lẹ tọn ji to ojlẹ egbezangbe tọn lẹ mẹ. To États-Unis, weyọnẹntọ awe nọpọ́ bo wlan dọmọ: “To owhe 75 he wayi lẹ gblamẹ Kunnudetọ Jehovah tọn lẹ ko tindo jideji sẹhundaga tọn de . . . podọ yé wàmọ lẹdo globu pé.” Linlinwe Whèzẹtẹn Aflika tọn de dlẹnalọdo Kunnudetọ Jehovah tọn lẹ taidi “dopo to sinsẹ̀n aihọn tọn he yawu jideji bo nọ yin sisina bosọ yin yinyọnẹn to otò lẹpo mẹ na titẹdo nuplọnmẹ Biblu tọn lẹ go pẹkipẹki etọn wutu.” Podọ linlinwe Katoliki tọn he diyin de, heyin zinzinjẹgbonu to Europe, dlẹnalọdo “jideji sẹhundaga Kunnudetọ Jehovah tọn lẹ tọn.” Etẹwẹ hẹn jideji ehe wá?
Gbigbọ Wiwe to Azọ́nwa to Egbehe
9. (a) Etẹwẹ yin whẹwhinwhẹ́n titengbe he wutu ohó Jiwheyẹwhe tọn do gbayipe to egbehe? (b) Nawẹ Jehovah nọ dọ̀n gbẹtọ lẹ wá ede dè gbọn?
9 Whẹwhinwhẹ́n titengbe he wutu ohó Jiwheyẹwhe tọn do gbayipe to egbehe wẹ yindọ gbigbọ Jehovah tọn to azọ́nwa po huhlọn po, kẹdẹdile e wà do to owhe kanweko tintan whenu. Jesu dọmọ: “Mẹdepope ma sọgan wá dè e, adavo Otọ́ he do mi hlan dọ̀n ẹn.” (Johanu 6:44) Ohó helẹ dohia dọ Jiwheyẹwhe nọ dọ̀n mẹhe hùn ahun yetọn do nùvo lẹ dẹẹdẹ, bo nọ yinuwado ahun yetọn ji. Gbọn azọ́n yẹwhehodidọ Kunnudetọ etọn lẹ tọn gblamẹ, Jehovah to ‘ojlonu akọta lẹpo tọn’—yèdọ homẹmiọnnọ lẹ, omẹ taidi lẹngbọ aigba ji tọn lẹ dọ̀n nado wá sẹ̀n ẹn.—Hagai 2:6, 7.
10. Gbẹtọ wunmẹ tẹlẹ wẹ ko kẹalọyi ohó Jiwheyẹwhe tọn?
10 E ma yindọ gbigbọ wiwe ko na huhlọn omẹ Jiwheyẹwhe tọn lẹ nado hẹn ohó Jiwheyẹwhe tọn yì adà dindẹn hugan aigba tọn lẹ ji kẹdẹ wẹ gba; e ko sọ whàn gbẹtọ wunmẹ lẹpo nado kẹalọyi wẹndagbe lọ. Na nugbo tọn, mẹhe kẹalọyi ohó Jiwheyẹwhe tọn lẹ wá sọn “akọta lẹpo mẹ, sọn ogbè lẹpo mẹ, sọn gbẹtọ lẹpo mẹ, podọ sọn aigba lẹpo ji.” (Osọhia 5:9; 7:9, 10) Adọkunnọ po wamọnọ lẹ po, wésetọ akonka lẹ po wunvinọ lẹ po na tin to yé mẹ. Mẹdelẹ ko kẹalọyi ohó lọ to ninọmẹ awhàn po homẹkẹn sinsinyẹn tọn lẹ po glọ, to whenuena mẹdevo lẹ wàmọ to ojlẹ jijọho po adọkun tọn po mẹ. To gandudu wunmẹ lẹpo glọ, to aṣa lẹpo mẹ, sọn oslá yasanamẹ tọn lẹ mẹ kakajẹ họ̀nmẹ lẹ ji, sunnu po yọnnu lẹ po ko yigbe dagbe hlan wẹndagbe lọ.
11. Nawẹ gbigbọ wiwe nọ wazọ́n to gbẹzan omẹ Jiwheyẹwhe tọn lẹ tọn mẹ gbọn, podọ vogbingbọn tẹwẹ sọawuhia?
11 Mahopọnna vogbingbọn sẹhundaga omẹ Jiwheyẹwhe tọn lẹ tọn, yé nọ nọpọ́ to jijọho mẹ hẹ ode awetọ yetọn. (Psalm 133:1-3) Ehe yidogọna kunnudenu lọ dọ gbigbọ wiwe to azọ́nwa to gbẹzan mẹhe to Jiwheyẹwhe sẹ̀n lẹ tọn mẹ. Gbigbọ etọn yin huhlọn de he nọ yinuwadomẹji na dagbe he nọ hẹn devizọnwatọ etọn lẹ penugo nado do owanyi, ayajẹ, jijọho, homẹdagbe, po jẹhẹnu devo he nọ dọnmẹdogo lẹ po hia. (Galatianu lẹ 5:22, 23) To egbehe, mí to nuhe yẹwhegán Malaki ko dọdai sọn ojlẹ dindẹn die lẹ mọ hezeheze dọmọ: “Mìwlẹ na . . . yọ́n vogbingbọn to dodonọ po mẹylankan po ṣẹnṣẹn, to ewọ he to Jiwheyẹwhe sẹ̀n po ewọ he ma to sinsẹ̀n ẹn po ṣẹnṣẹn.”—Malaki 3:18.
Ohó Jiwheyẹwhe Tọn Gbayipe to Azọ́nwatọ Zohunhunnọ lẹ Mẹ
12. Etẹwẹ yin numọtolanmẹ Kunnudetọ Jehovah tọn lẹ tọn gando azọ́n wẹndagbe-jijlá tọn go, podọ gbeyiyi tẹwẹ yé nọ donukun gando azọ́n yẹwhehodidọ tọn yetọn go?
12 Kunnudetọ Jehovah tọn lẹ ma yin ṣọṣi-yìtọ mọmọ tọn lẹ to egbehe gba. Yé nọ tindo mahẹ zohunhunnọ to azọ́n wẹndagbe-jijlá tọn mẹ. Taidi Klistiani fliflimẹ tọn lẹ, yé nọ ze yedelẹ jo sọn ojlo mẹ wá nado wà ojlo Jiwheyẹwhe tọn, bo nọ dín nado gọalọna mẹdevo lẹ nado plọnnu dogbọn opagbe Ahọluduta Jehovah tọn lẹ dali. Yé yin azọ́nwahẹmẹtọ-gbẹ́ Jiwheyẹwhe tọn lẹ he, nọ bẹ mẹdevo lẹ pli na sinsẹ̀nzọn Jehovah tọn, to gbesisọmẹ hẹ gbigbọ wiwe etọn. To mọwiwà mẹ, yé nọ do lẹblanu po owanyi Jehovah tọn po hia hlan gbẹtọvi mayisenọ lẹ. Podọ yé nọ wàmọ mahopọnna ojlo matindo, mẹṣanko, po homẹkẹn po. Jesu wleawuna hodotọ etọn lẹ na nuyiwa voovo lẹ hlan wẹndagbe lọ. E dọmọ: “Afanumẹ ma klohú oklunọ etọn. Eyin yé dohomẹkẹn mi, yé nasọ dohomẹkẹn mìwlẹ ga; eyin yé ko yí ohó ṣie hẹn, yé na yí mìtọn hẹn ga.”—Johanu 15:20.
13. Jẹhẹnu he ma tin to Mẹylọhodotọklisti mẹ tẹlẹ wẹ gọfla to Kunnudetọ Jehovah tọn lẹ ṣẹnṣẹn?
13 Mí ma sọgan gọ̀n ma yin nuyiwadeji gbọn nudopolọ-yinyin he tin to Kunnudetọ Jehovah tọn egbehe tọn lẹ po mẹhe kẹalọyi sinsẹ̀n Klistiani nugbo tọn to owhe kanweko tintan whenu lẹ po ṣẹnṣẹn dali gba. Onú ayidego tọn devo wẹ yin vogbingbọn he tin to Kunnudetọ Jehovah tọn lẹ po Mẹylọhodotọklisti egbehe tọn lẹ po ṣẹnṣẹn. To wekinkan dogbọn zohunhun wẹndagbe-jijlá Klistiani fliflimẹ tọn lẹ dali godo, weyọnẹntọ dopo doavigbe dọmọ: “Adavo diọdo wá aimẹ to gbẹzan ṣọṣi egbehe tọn mẹ bọ azọngban wẹndagbe-jijlá tọn sọ lẹzun nude heyin mimọ taidi dandannu de na Klistiani he ko yin bibaptizi lẹpo whladopo dogọ, bosọ yin godonọna gbọn jẹhẹnu gbẹte he yọnhugan ehe mayisenọ lẹ sọgan detọn lẹ dali, yin e ma yinmọ mí ma sọgan tindo nukọnyiyi depope gba.” Jẹhẹnu tangan he ma tin to Mẹylọhodotọklisti mẹ lẹ gbayipe to Kunnudetọ Jehovah tọn lẹ ṣẹnṣẹn! Yé tindo yise he to ogbẹ̀, yise nujọnu tọn, po yise heyin zize sinai do nugbo Biblu tọn ji po bọ yé nọ yin whinwhàn nado má ẹn hẹ mẹlẹpo he na dotoai.—1 Timoti 2:3, 4.
14. Nukun tẹwẹ Jesu yí do pọ́n lizọnyizọn etọn, podọ walọyizan tẹwẹ devi etọn lẹ nọ dohia to egbehe?
14 Jesu ylọ lizọnyizọn etọn dọ nujọnu taun, bo hẹn ẹn zun ahunmẹdunamẹnu etọn tintan. E dọna Pilati dọmọ: “[Ehe wutu] wẹ yè ko do jì mi, podọ [ehe wutu] wẹ yẹn do wá aihọn mẹ, na yẹn nido dekunnu hlan nugbo lọ.” (Johanu 18:37) Omẹ Jiwheyẹwhe tọn lẹ tindo numọtolanmẹ he Jesu tindo. Yé nọ dovivẹnu nado dín aliho lẹ nado má nugbo Biblu tọn he tin to ahun yetọn mẹ hẹ mẹsusu lẹ dile e sọgan yọnbasi do. Delẹ to aliho ehe lẹ mẹ nọ do zìnzìn ayidego tọn hia.
15. Nawẹ mẹdelẹ ko do zìnzìn hia to yẹwhehodidọ wẹndagbe tọn mẹ gbọn?
15 To otò Hùwaji Amelika tọn dopo mẹ, Kunnudetọ lẹ nọ basi gbejizọnlin gbọn otọ̀whin Tọ̀sisa Amazone tọn ji nado hẹn nugbo lọ yì gbẹtọ lẹ dè. Ṣigba, to whenuena tòwhan fọ́n to 1995, gbejizọnlin omẹ paa lẹ tọn to tọ̀sisa lọ ji yin alọhẹndotena. Na gbemima nado to owe Biblu tọn lẹ hẹn yì na jlodotọ lẹ, Kunnudetọ lẹ basi dide nado hẹn wẹndomẹ lọ nado yin zize sọyi gbọn asisa dali to osin-nukunmẹ jẹ awà awetọ ji. Yé nọ kàn wekanhlanmẹ lẹ bo nọ bẹ yé dopọ hẹ vọkan linlinnamẹwe Atọ̀họ̀-Nuhihọ́ Lọ Tọn po Réveillez-vous! tọn lẹ po do ogò lọba tata tọn lẹ mẹ. Enẹgodo yé nọ dlan ogò lọ lẹ do tọ̀sisa lọ mẹ. Ehe zindonukọn na owhe ẹnẹ po odaa po kakajẹ whenue tọ̀sisa lọ yin hùnhùn na gbẹtọ paa lẹ whladopo dogọ. To ageklo tọ̀sisa lọ tọn lẹ ji, gbẹtọ lẹ nọ dopẹna Kunnudetọ lẹ na owe lọ lẹ. Yọnnu dopo he ko yin Biblu plọntọ de dai gbò yé fán po dasin po bo dọmọ: “Yẹn lẹndọ yẹn ma nasọ mọ mì gbede ba. Ṣigba, whenuena yẹn jẹ owe lẹ mọyi to ogò lọ lẹ mẹ ji, yẹn yọnẹn dọ mì ma ko wọnji go e gba!” Mẹdevo lẹ he nọ nọ̀ tọ̀sisa lọ tó dọ dọ emi ko hia linlinnamẹwe lẹ whlasusu. Gbétatò lọ lẹ susu tindo “posu”—yèdọ fie asisa awe pé te to fie nuhe fò to osin-nukunmẹ lẹ nọ hòpli do na ojlẹ de. Finẹ wẹ jlodotọ lẹ nọ yì pọ́n gbọzangbọzan nado mọ “wekanhlanmẹ” yí sọn awà awetọ ji.
16. Nawẹ hinhẹn mídelẹ tin-to-aimẹ nọ hùn aliho lọ do nùvo to whedelẹnu na gbẹtọ lẹ hinhẹnzun devi gbọn?
16 Yẹwhehodidọ wẹndagbe lọ tọn nọ yin anadena bo nọ yin godonọna gbọn Jehovah Jiwheyẹwhe po angẹli huhlọnnọ etọn lẹ po dali. (Osọhia 14:6) Gbọn mídelẹ hinhẹn tin-to-aimẹ poun dali, dotẹnmẹ hundote madonukun lẹ nado hẹn gbẹtọ lẹ zun devi nọ hùndonuvo to whedelẹnu. To Nairobi, Kenya, yọnnu Klistiani awe he tin to sinsẹ̀nzọn kunnudegbe tọn mẹ ko fó owhé he yin didena yé lẹ. Jọja yọnnu de dọnsẹpọ yé to ajijimẹ bo dọ po awuvivi po dọmọ: “Yẹn ko to dẹ̀ho nado mọ mẹde taidi mìwlẹ nkọtọn.” E vẹ̀ Kunnudetọ lọ lẹ nado wá owhé etọn gbè to afọdopolọji na hodọdopọ de, podọ plọnmẹ Biblu de yin bibẹjẹeji hẹ ẹ to azán dopolọ gbè. Naegbọn yọnnu lọ do dọnsẹpọ Klistiani awe lọ lẹ po awuyiya mọnkọtọn po? To nudi osẹ awe die wayi, e ko hẹn viyẹyẹ etọn bu to okú mẹ. Enẹwutu whenuena e mọ jọja de hẹn alọnuwe pẹvi lọ “Todido Tẹwẹ Tin na Mẹyiwanna He Kú Lẹ?” e jlo e susu bọ e biọ to dẹpẹ lọ si nado na ẹn. Dẹpẹ lọ gbẹ́, ṣigba bo dlẹnalọdo Kunnudetọ lẹ he na ẹn alọnuwe pẹvi lọ. To madẹnmẹ yọnnu lọ jẹ nukọnyiyi gbigbọmẹ tọn dagbe de basi ji bo penugo ganji nado pehẹ awufiẹsa ovi etọn hinhẹnbú tọn.
Owanyi Jiwheyẹwhe Tọn Dona Gbayipe
17-19. Owanyi tẹwẹ Jehovah dohia gbẹtọvi lẹ gbọn ofligọ lọ gblamẹ?
17 Whinwhẹ́n deji ohó Jiwheyẹwhe tọn to aigba lẹpo ji tindo kanṣiṣa pẹkipẹki hẹ avọ́sinsan ofligọ Klisti Jesu tọn. Azọ́n yẹwhehodidọ tọn lọ yin dohia owanyi Jehovah tọn na gbẹtọ lẹ to filẹpo, dile ofligọ lọ yin do. Apọsteli Johanu yin gbigbọdo nado wlan dọmọ: “Jiwheyẹwhe yiwanna aihọn [gbẹtọvi tọn] sọmọ bọ e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.”—Johanu 3:16.
18 Lẹnnupọndo owanyi he Jehovah dohia to awú ofligọ lọ tọn wiwle namẹ ji. Na owhe madosọha lẹ, Jiwheyẹwhe ko duvivi haṣinṣan alọmayiemẹ de hẹ Visunnu yiwanna, dopo akàn etọn, heyin “omẹ tintan to nudida Jiwheyẹwhe tọn lẹ mẹ.” (Osọhia 3:14) Jesu yiwanna Otọ́ etọn sisosiso, podọ Jehovah yiwanna Visunnu etọn “jẹnukọnna jijọ aihọn tọn.” (Johanu 14:31; 17:24) Jehovah dike na Visunnu yiwanna ehe ni kú na gbẹtọvi lẹ nido sọgan mọ ogbẹ̀ madopodo yí. Dohia owanyi matin awetọ na gbẹtọvi lẹ nankọtọn die!
19 Johanu 3:17 dọmọ: “Jiwheyẹwhe ma do Ovi etọn hlan aihọn mẹ nado dawhẹna aihọn gba; ṣigba na yè nido gbọn ewọ mẹ whlẹn aihọn gán.” Enẹwutu, Jehovah do Visunnu etọn hlan na azọ́ndenamẹ owanyinọ de, yèdọ whlẹngán, e mayin na whẹdida kavi whẹgbledomẹ tọn gba. Ehe sọgbe hẹ ohó Pita tọn lẹ dọmọ: “[Jehovah] ma jlo dọ mẹdepope ni dọ̀n, adavo dọ omẹ popo ni wá lẹnvọjọ kọ̀n.”—2 Pita 3:9.
20. Aliho tẹ mẹ wẹ whlẹngán gando yẹwhehodidọ wẹndagbe lọ tọn go te?
20 Whenue e ko yí nuhe vẹna ẹn hugan lọ do sanvọ́ nado wleawuna dodonu he sọgbe na whlẹngán, Jehovah jlo dọ mẹsusu ni yí dotẹnmẹ hundote ehe zan dile e sọgan yọnbasi do. Apọsteli Paulu wlan dọmọ: “Yè na whlẹn mẹdepope he na ylọ oyín [Jehovah, NW ] tọn gán. Nawẹ yé na ylọ oyín mẹhe yé ma yise tọn do? Podọ nawẹ yé na yí mẹhe yé ma ko sehó etọn gbede sè do? Podọ nawẹ yé na sè do matin yẹwhehodọtọ?”—Lomunu lẹ 10:13, 14.
21. Etẹwẹ dona yin numọtolanmẹ mítọn gando dotẹnmẹ hundote lọ nado tindo mahẹ to azọ́n yẹwhehodidọ tọn lọ mẹ go?
21 Lẹblanulọkẹyi jiawu nankọtọn die nado tindo mahẹ to azọ́n yẹwhehodidọ po mẹpinplọn lẹdo globu pé tọn po ehe mẹ! E mayin azọ́n vlẹ́kẹsẹ́ de gba, ṣogan lehe homẹ Jehovah tọn nọ hùn do sọ to whenuena e mọ omẹ etọn lẹ to gbẹ̀nọ sọgbe hẹ nugbo lọ bo to wẹndagbe lọ lá na mẹdevo lẹ! Enẹwutu ninọmẹ depope he mẹ hiẹ te, gbọ na gbigbọ Jiwheyẹwhe tọn po owanyi he to ahun towe mẹ po ni whàn we nado tindo mahẹ to azọ́n ehe mẹ. Podọ flindọ nuhe mí mọ bọ e to yinyin wiwadotana lẹdo aihọn pé lẹ na kunnudenu he dutomẹji dọ to madẹnmẹ Jehovah Jiwheyẹwhe na hẹn opagbe etọn di nado hẹn “olọn yọyọ lẹ, po aigba yọyọ [gigonọ] de po” wá, ehe mẹ “dodo nọ nọ̀.”—2 Pita 3:13.
Be Hiẹ Flin Ya?
• Naegbọn atẹṣiṣi ma sọgan hẹnalọdotena lilatọ wẹndagbe lọ tọn lẹ?
• Nawẹ ohó Jiwheyẹwhe tọn gbayipe to azán mítọn gbè gbọn?
• Aliho tẹlẹ mẹ wẹ gbigbọ Jiwheyẹwhe tọn to azọ́nwa te to egbehe?
• Nawẹ ofligọ lọ gando yẹwhehodidọ wẹndagbe lọ tọn go gbọn?
[Apotin/Yẹdide to weda 16]
(Nado mọ yẹdide lọ ganji, pọ́n zinjẹgbonu lọ mẹ)
6,0
5,5
5,0
4,5
4,0
3,5
3,0
2,5
2,0
1,5
1,0
0,5
1900 1910 1920 1930 1940 1950 1960 1970 1980 1990 2000
[Yẹdide to weda 15]
JÉRÔME
TYNDALE
GUTENBERG
HUS
[Asisa Yẹdide Tọn 15]
Gutenberg po Hus po: Sọn owe The Story of Liberty mẹ, 1878
[Yẹdide to weda 15]
Biblu Plọntọ lẹ to wẹndagbe lọ lá to owhe 1920 tọn lẹ mẹ
[Yẹdide to weda 16, 17]
Jideji to sọha lilátọ Ahọluduta tọn lẹ mẹ to owhe kanweko 20tọ mẹ
Madozẹnzẹn Wẹnlatọ lẹ tọn (to livi lẹ mẹ)
Gbẹtọ lẹ to gbeyina wẹndagbe lọ lẹdo aihọn pé
[Yẹdide to weda 18]
Taidi avọsinsán ofligọ Jesu Klisti tọn, azọ́n yẹwhehodidọ tọn nọ hẹn owanyi Jiwheyẹwhe tọn klo deji