Mì Jaya to Todido Ahọluduta Tọn Mẹ!
NUJIJỌ ayajẹnọ de wẹ e yin he kọ̀n gbẹtọ 5 784 dopọ nado pli to 10 mars 2001, to nọtẹn atọ̀n he nọ yin yiyizan gbọn whẹndo daho Bẹtẹli tọn dali to Ayimatẹn New York tọn mẹ. Nujijọ lọ wẹ gbedewema yíyí klasi 110tọ wehọmẹ mẹdehlan Giliadi tọn.
Carey Barber, heyin dopo to Hagbẹ Anademẹtọ Kunnudetọ Jehovah tọn lẹ tọn mẹ, dokuavọna mẹlẹpo bosọ hùn tito-to-whinnu lọ po hogbe helẹ po: “E hẹn homẹ mítọn hùn nado yọnẹn dọ klasi 110 wehọmẹvi Giliadi tọn lẹ wẹ ko yin azọ́nplọn todin taidi mẹdehlan lẹ bo ko yin azọ́ndena yì aigba-denamẹ voovo lẹ ji lẹdo aihọn pé.”
Lehe Yè Sọgan Gbọṣi Ayajẹ mẹ Do
Bọdo hodidọ bẹjẹeji Mẹmẹsunnu Barber tọn go, Don Adams dọho na mẹplidopọ lẹ, he bẹ wehọmẹvi 48 he to gbedewema yí lẹ hẹn do hosọ lọ “Dona Jehovah Tọn Nọ Hẹn Mí Wadọkun” ji. To hodidọ etọn zize sinai do Howhinwhẹn lẹ 10:22 ji mẹ, e flinnu mẹplidopọ lẹ dọ Jehovah nọ penukundo bo nọ dona devizọnwatọ etọn lẹ eyin yé ze dagbenu Ahọluduta tọn lẹ do otẹn tintan mẹ to gbẹzan yetọn mẹ. E dotuhomẹna wehọmẹvi lọ lẹ nado yí gbigbọ ojlo tintindo tọn dopolọ he apọsteli Paulu dohia to whenuena eyin oylọ basina nado ‘deafọ jẹ Makedonia nado gọalọ’ do kẹalọyi azọ́ndenamẹ yetọn. (Owalọ lẹ 16:9) Dile etlẹ yindọ awusinyẹnnamẹnu lẹ tin he ji e dona dù te, ojlo tintindo Paulu tọn nado dọyẹwheho to fie yè deanana ẹn yì dekọtọn do dona ayajẹnọ lẹ mẹ.
Hagbẹ klasi he to gbedewema yí tọn lẹ ko dotana Biblu pinplọn po azọ́nplọnmẹ osun atọ́n tọn yetọn po to awuwiwle mẹ na azọ́n mẹdehlan tọn. Etomọṣo, Daniel Sydlik, heyin dopo to Hagbẹ Anademẹtọ Kunnudetọ Jehovah tọn lẹ tọn mẹ, sọ na tuli yé nado to nuplọntọ lẹ yin zọnmii. To hodidọ do hosọ lọ “Mì Yin Devi Nugbo Lẹ” ji mẹ, e dọmọ: “Devi-yinyin zẹẹmẹdo tonusisena ohó Jesu tọn lẹ to whepoponu. E bẹ ojlonọ-yinyin mítọn nado nọ dotoaina ohó etọn, nudọnamẹ etọn, po nuplọnmẹ etọn lẹ po to whepoponu hẹn.” E dlẹnalọdo dọ devi Klisti tọn lẹ ma nọ basi nudide lẹ matin todidoai na ogbè Ogán lọ tọn gba; na gbẹzan Klisti tọn bẹ nuyọnẹn Jiwheyẹwhe tọn hẹn wutu. (Kọlọsinu lẹ 2:3) Depope mítọn ma sọgan sèhó Jesu tọn lẹ whladopo poun bo na wá tadona lọ kọ̀n dọ mí ko yọ́n nulẹpo gando ewọ go gba, enẹwutu Mẹmẹsunnu Sydlik na tuli gbedewema-yitọ lẹ nado to nugbo Klistiani tọn he nọ hẹnmẹ jẹ mẹdekannu plọn, bo to yíyí í do yizan mẹ, bosọ to pinplọn mẹdevo lẹ zọnmii.—Johanu 8:31, 32.
Nado to ayajẹ tindo zọnmii to sinsẹ̀nzọn Jiwheyẹwhe tọn mẹ, yè dona nọ jlo nado kẹalọyi mẹplọnlọ po vọjlado po. “Be Ayi Towe lẹ Na Nọ Basi Vọjlado Na We Ya?” wẹ yin kanbiọ heyin finfọndote gbọn Lawrence Bowen heyin mẹplọntọ Giliadi tọn dali. E dohia dọ to Biblu mẹ ayi yẹhiadonu tọn lẹ yin kinkọndopọ hẹ linlẹn po numọtolanmẹ sisosiso mẹtọn lẹ po. Yé sọgan yinuwa nado basi vọjlado namẹ eyin ayinamẹ gbọdo he wá sọn Ohó Jiwheyẹwhe tọn mẹ lẹ ko biọ adà sisosiso hugan gbẹtọ-yinyin omẹ lọ tọn mẹ. (Psalm 16:7; Jẹlemia 17:10) Nuyiwa nugbonọ-yinyin mẹde tọn tlẹ sọgan whàn Jehovah to aliho vonọtaun tọn mẹ. To Howhinwhẹn lẹ 23:15, 16 hihia godo, hodọtọ lọ kanse dọmọ: “Be ayi towe lẹ na basi vọjlado na we ya?” E yidogọ dọmọ: “Mí to dẹ̀ho dọ yé ni wàmọ, podọ gbọnmọ dali hiẹ na hẹn Jehovah nado tindo homẹhunhun sisosiso hugan to ede mẹ. Hiẹ na fọ́n numọtolanmẹ sisosiso etọn lẹ dote. Mọwẹ, hiẹ na hẹn ayi Jiwheyẹwhe tọn lẹ jaya dile hiẹ gbọn nugbonọ-yinyin dali tẹdo azọ́ndenamẹ towe go.”
Hodidọ godo tọn to adà tito-to-whinnu ehe tọn ji yin didọ gbọn Mark Noumair, he sẹ̀n taidi mẹdehlan de to Kenya whẹpo do lẹzun mẹplọntọ Giliadi tọn dali. Hodidọ etọn he hosọ etọn yin “E Pọnte Hugan Nado Mọ po Nukun Po” zinnudo nujọnu-yinyin pekọ tintindo tọn ji. To kọndopọmẹ hẹ Yẹwhehodọtọ 6:9, Mẹmẹsunnu Noumair na ayinamẹ dọmọ: “Mì kẹalọyi ninọmẹ lẹ dile mì mọ yé do. Nuhe e zẹẹmẹdo nado ‘mọ po nukun po niyẹn.’ Kakati nado to dlọku gando nude he hiẹ jlo nado wà ṣigba ma to wiwà go, ze ayiha do lehe hiẹ sọgan yí ninọmẹ dinwhenu tọn towe zan po kọdetọn dagbe po ji. Nado nọ to dlọku, yèdọ nado tindo nukundido he ma sọgbe hẹ lẹnpọn dagbe lẹ, kavi nado to ayihamẹlẹnpọn do ninọmẹ agọ̀ azọ́ndenamẹ towe tọn lẹ ji na hẹn we jẹflumẹ bo ma na tindo pekọ.” Mọwẹ, mahopọnna fie hiẹ sọgan tin te kavi nudepope he ninọmẹ towe lẹ yin, awuwiwlena pekọ jijọ-di-Jiwheyẹwhe tọn to ninọmẹ mítọn lẹ mẹ nọ wleawuna gbigbọ ayajẹ tọn to Mẹdatọ Daho mítọn sinsẹ̀n mẹ.
Numimọ Ayajẹnọ lẹ to Sinsẹ̀nzọn Ahọluduta Tọn mẹ Podọ to Giliadi
To ayinamẹ yọn-na-yizan mọnkọtọn lẹ mimọyi sọn hodidọ enẹlẹ mẹ godo, wehọmẹvi lọ lẹ dọ numimọ delẹ he yé ko duvivi etọn dile yé to mahẹ tindo to lizọnyizọn gbangba tọn mẹ to osun atọ́n nupinplọn yetọn tọn whenu. To anademẹ Wallace Liverance, heyin kandai-hẹntọ Wehọmẹ Giliadi tọn glọ, wehọmẹvi he to gbedewema yí lẹ dọ lehe yé ko suwhẹna yedelẹ taidi lizọnyizọnwatọ Jiwheyẹwhe tọn lẹ do. (2 Kọlintinu lẹ 4:2) Yé ko penugo nado fọ́n ayihadawhẹnamẹnu heyin ninamẹ gbọn Jiwheyẹwhe dali mẹdelẹ tọn dote. Numimọ wehọmẹvi lọ lẹ tọn do lehe plọnmẹ Biblu lẹ yin bibẹjẹeji hẹ omẹ ahundoponọ he yé dukosọ hẹ to tòhomẹ-liho lẹ ji lẹ, to lizọnyizọn whédegbè-jẹ-whédegbè tọn mẹ, podọ to ninọmẹ devo lẹ mẹ gbọn hia. To ojlẹ voovo lẹ mẹ, jlodotọ lẹ dọ dọ owe sinai do Biblu ji titobasinanu Jehovah tọn lẹ tọn tindo nudidọ nugbo tọn. Whétọ dopo yigbe to aliho dagbe mẹ hlan wefọ Biblu tọn dopo. E to Biblu plọn hẹ Kunnudetọ Jehovah tọn lẹ todin.
Enẹgodo, Joel Adams kanhose mẹhe ko mọ gbedewema yí sọn Giliadi to owhe susu die wayi lẹ. Hosọ etọn wẹ “Mì Doalọtena Nupinplọn Pọ́n Gbede Blo, Mì Doalọtena Jehovah Sinsẹ̀n Pọ́n Gbede Blo.” Mẹhe yin hokanse lẹ na ayinamẹ he wá do ganmẹ mẹdehlan yọyọ lẹ. To azán etọn lẹ taidi hagbẹ klasi 26tọ Giliadi tọn finflin mẹ, Harry Johnson dọmọ: “Mí yin pinplọn dọ Jehovah ko nọ saba deanana omẹ etọn lẹ podọ e nasọ deanana omẹ etọn lẹ. Jidide enẹ ko yin tuli de to owhe lẹ gblamẹ.” William Nonkes, heyin hagbẹ klasi 53tọ Giliadi tọn de, na ayinamẹ mẹhe to gbedewema yí lẹ dọmọ: “Hú popolẹpo, mì hẹn nunọwhinnusẹ́n Biblu tọn lẹ do ayiha mẹ, bosọ nọ yí yé zan na nudide he mì dona basi to gbẹ̀mẹ todin podọ kakadoi lẹpo. Taidi kọdetọn de, mì na penugo nado tẹdo azọ́ndenamẹ mìtọn go, bọ dona họakuẹ Jehovah tọn lẹ nasọ tin hẹ mì.”
“Yin Huhlọnna Nado Wà Ojlo Jiwheyẹwhe Tọn” wẹ yin hosọ he Richard Rian ko de na adà etọn to tito-to-whinnu lọ ji. Dopo to mẹhe e kanhose lẹ mẹ wẹ John Kurtz, he mọ gbedewema yí to klasi 30tọ, mẹhe ko yí hugan owhe 41 zan to Espagne taidi mẹdehlan de. To whenuena yè kanhose e gando todohukanji nuplọnmẹ Giliadi tọn go, Mẹmẹsunnu Kurtz dọmọ: “Nuplọnmẹwe tangan lọ wẹ Biblu. Enẹgodo mí tindo owe he nọ gọalọna mí nado mọnukunnujẹ Biblu mẹ lẹ. E tin-to-aimẹ na mẹlẹpo. Nudọnamẹ aṣli tọn depope ma nọ yin pinplọnmẹ to Giliadi gba. Yẹn ma nọ gọ̀n ma zinnudo ehe ji gba dọ mẹlẹpo wẹ tindo nudọnamẹ he nọ yin awuwlena to Giliadi lẹ to nukọn yetọn tlọlọ.”
Mẹmẹsunnu Gerrit Lösch, heyin dopo to Hagbẹ Anademẹtọ Kunnudetọ Jehovah tọn lẹ tọn mẹ, dotana tito-to-whinnu gbigbọmẹ tọn lọ gbọn hodidọ do hosọ lọ “Zindonukọn Podọ to Awà Jehovah Tọn lẹ Glọ” ji dali. E basi zẹẹmẹ lehe hihọ́ po godonọnamẹ Jiwheyẹwhe tọn po do devizọnwatọ etọn lẹ ji yin didohia to Biblu mẹ gbọn awà akùn tọn lẹ dali do. (Deutelonomi 32:11, 12; Psalm 91:4) To whedelẹnu akùn nọ dlẹn awà etọn lẹ na ganhiho susu nado basi hihọ́na ovi etọn lẹ. To whedelẹnu, akùn asi de tlẹ sọgan sọ lẹ́ awà etọn lẹ do ovi etọn lẹ nado basi hihọ́na yé to whenuena aimẹ fá. To aliho mọnkọtọn de mẹ podọ to kọndopọmẹ hẹ lẹndai etọn, Jehovah sọgan gọalọna devizọnwatọ nugbonọ etọn lẹ, na taun tọn to whenuena yé pannukọn whlepọn to gbigbọ-liho. Jehovah ma nọ jo devizọnwatọ etọn lẹ do nado yin whiwhlepọn zẹ̀ nuhe yé sọgan doakọnna go gba ṣigba nọ de aliho na yé nado sọgan doakọnna ẹn. (1 Kọlintinu lẹ 10:13) Mẹmẹsunnu Lösch dotana gbọn didọ dali dọmọ: “Nado sọgan gbọṣi hihọ́ gbigbọmẹ tọn glọ, mí dona gbọṣi awà Jehovah tọn lẹ glọ. Ehe zẹẹmẹdo dọ mí ma dona wleawuna gbigbọ mẹdekannujẹ tọn. Mì gbọ mí ni tẹdo Jehovah po titobasinanu taidi onọ̀ nkọtọn etọn po go, bo ma klán mídelẹ sọn anademẹ po ayinamẹ owanyinọ yetọn po kọ̀n blo.”
Azinponọ lọ hia wekanhlanmẹ nudọdomẹ tọn he wá sọn ojlo-dagbenọ lẹ dè sọn adà voovo aihọn lọ tọn mẹ lẹ. Enẹgodo wẹ gbedewema lẹ mimá wá aimẹ. To whenuena wehọmẹ Giliadi tọn yin didoai, e yin po pọndohlan lọ po nado deanana klasi vude to owhe atọ́n poun gblamẹ. Ṣigba na owhe 58 Jehovah ko hẹn wehọmẹ lọ nado to nuyiwa zọnmii. Dile Mẹmẹsunnu Barber dọ do to hodidọ bẹjẹeji tọn etọn mẹ dọmọ: “Kandai dagbe jiawu nankọtọn die mẹhe mọ gbedewema yí sọn Giliadi lẹ ko wleawuna sọn 1943 gbọ́n he Giliadi yin didoai! Vivẹnudido pọmẹ tọn yetọn ko dekọtọn do yíyí homẹmimiọnnọ aigba tọn fọtọ́n kanweko lẹ dogọ na mẹhe tin to titobasinanu gigonọ Jehovah tọn mẹ lẹ.” Mọwẹ, wehọmẹ mẹdehlan tọn ehe ko hẹn gbẹtọ livi susu lẹ nado tindo ayajẹ to todido Ahọluduta tọn mẹ.
[Apotin to weda 24]
SỌHA NULINLẸN KLASI TỌN
Sọha otò he mẹ yé wá sọn: 8
Sọha otò he mẹ yè do yé hlan: 18
Sọha wehọmẹvi lẹ tọn: 48
Madozẹnzẹn owhe mẹhodido tọn: 34
Madozẹnzẹn owhe to nugbo mẹ tọn: 18
Madozẹnzẹn owhe lizọnyizọn whenu-gigọ́ tọn: 13
[Yẹdide to weda 25]
Gbedewema-Yíyí Klasi 110tọ Wehọmẹ Biblu Pinplọn Watchtower Giliadi Tọn
To yinkọ he to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.
(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.