Gbedewema-Yitọ Giliadi Tọn lẹ Yin Tulina Nado Dọ Ohó “Azọ́n Huhlọnnọ” Tọn Lẹ — WESẸDOTẸN INTẸNẸT JI TỌN Watchtower Tọn

Gbedewema-Yitọ Giliadi Tọn lẹ Yin Tulina Nado Dọ Ohó “Azọ́n Huhlọnnọ” Tọn Lẹ

GBẸTỌGUN 6 635 he awusọhia yetọn yọnwhanpẹ he wá sọn aigba voovo 52 ji wẹ wá na tito-to-whinnu gbedewema-yíyí klasi 115tọ Wehọmẹ Biblu Pinplọn Watchtower Giliadi tọn tọn to azán 13 septembre 2003.

Yé sè tudohomẹnamẹ sinai do Biblu ji he yin nina wehọmẹvi 48 klasi lọ tọn lẹ nado hẹn ohó “azọ́n huhlọnnọ Jiwheyẹwhe tọn” lẹ yì gbẹtọ lẹ dè to aigba 17 ji. (Owalọ lẹ 2:11) Otò enẹlẹ mẹ wẹ gbedewema-yitọ lọ lẹ na to azọ́n mẹdehlan tọn yetọn wà te todin.

To hodidọ bẹjẹeji tọn etọn mẹ, Stephen Lett, heyin dopo to Hagbẹ Anademẹtọ Kunnudetọ Jehovah tọn lẹ tọn mẹ bosọ yin azinponọ na gbedewema-yíyí lọ, flinnu wehọmẹvi lẹ dọmọ: “To whenuena mì yì azọ́ndenamẹ mìtọn lẹ mẹ, mahopọnna fie mì yin didohlan kavi ninọmẹ depope he mì pannukọn, mì flindọ yé he to mì dè lẹ sù hugan yé he jẹagọdo mì lẹ.” To zẹẹmẹ bibasi do Ahọlu lẹ Awetọ weta 6 ji mẹ, Mẹmẹsunnu Lett flinnu wehọmẹvi lẹ dọ yé sọgan ganjẹ alọgọ Jehovah Jiwheyẹwhe tọn po angẹli fọtọ́n susu etọn lẹ tọn po go dile yé to “azọ́n huhlọnnọ Jiwheyẹwhe tọn” lẹ lá. (2 Ahọlu lẹ 6:15, 16) Klistiani owhe kanweko tintan whenu tọn lẹ pehẹ nukundiọsọmẹ po ojlo matindo po to azọ́n yẹwhehodidọ po mẹpinplọn tọn yetọn po mẹ, podọ Klistiani mẹdehlan lẹ nọ pehẹ ninọmẹ dopolọ to egbehe ga. Ṣigba, yé sọgan ganjẹ alọgọ sọn olọn mẹ wá po titobasinanu aigba ji tọn Jehovah tọn po go.—Psalm 34:7; Matiu 24:45.

Mì Dọ Ohó “Azọ́n Huhlọnnọ Jiwheyẹwhe Tọn” Lẹ

Bọdo hodidọ bẹjẹeji azinponọ tọn go, Harold Corkern, hagbẹ Wedegbẹ́ Alahọ États-Unis tọn dọho do hosọ lọ ji “Nukundido He Sọgbe Lẹ—Họ̀nhungàn lọ Na Ayajẹ po Sinsẹ̀nzọn Kọdetọn Dagbenọ Po.” Mẹmẹsunnu Corkern zinnudeji dọ todido ovọ́ lẹ sọgan hẹnmẹ jẹflumẹ, dile Howhinwhẹn lẹ 13:12 dohia do. Ṣigba, flumẹjijẹ nọ saba wá sọn todido he ma sọgbe hẹ lẹnpọn dagbe lẹ tintindo mẹ. Gbedewema-yitọ lẹ dona tindo pọndohlan jlẹkaji tọn, he sọgbe de gando yedelẹ po mẹdevo lẹ po go. Yé dona donukun dọ emilẹ na ṣinuwa, ṣigba ehelẹ ma dona hẹn yé blawu zẹjlẹgo gba dile yé to vivẹnudo nado gọalọna mẹdevo lẹ nado mọnukunnujẹ “azọ́n huhlọnnọ Jiwheyẹwhe tọn” lẹ mẹ. Mẹmẹsunnu Corkern na tuli mẹdehlan yọyọ lọ lẹ nado ganjẹ Jehovah go, “ahọsutọ yé he whesọ do dín in lẹ tọn.”—Heblu lẹ 11:6.

Daniel Sydlik, he yin dopo to Hagbẹ Anademẹtọ tọn mẹ wẹ penukundo adà he bọdego to tito-to-whinnu lọ mẹ go, bo dọhodo hosọ lọ ji “Todido Klistiani Tọn—Etẹwẹ E Yin?” E dọmọ: “Todido yin jẹhẹnu dagbe de he Klistiani lẹ dona tindo. Nujinọtedo jijlọ de wẹ he nọ hẹnmẹ biọ haṣinṣan dagbe de mẹ hẹ Jiwheyẹwhe. E glo mẹhe ma yin Klistiani de nado tindo todido he mí tindo.” Mẹmẹsunnu Sydlik zindonukọn nado basi zẹẹmẹ adà voovo todido Klistiani tọn lẹ he nọ gọalọnamẹ nado tindo pọndohlan dagbe mahopọnna nuhahun gbẹ̀mẹ tọn lẹ. “Eyin mí tindo todido mí sọgan yí sọwhiwhe po gbigbọ awhàngbigba tọn de po do pehẹ gbẹzan egbesọ tọn.” Todido Klistiani tọn nọ gọalọna ẹn nado mọ Jehovah taidi Jiwheyẹwhe lẹndai tọn podọ nado sẹ̀n ẹn po ayajẹ po.—Lomunu lẹ 12:12.

Wallace Liverance, he yin kandai-hẹntọ Wehọmẹ Giliadi tọn, na tuli wehọmẹvi lẹ nado “Nọ Zinzọnlin to Gbigbọ Mẹ.” (Galatianu lẹ 5:16) E do lehe Baluki, wekantọ Jẹlemia tọn, ko dibla jai sọn zọnlinzinzin to gbigbọ mẹ do hia. To ojlẹ de mẹ, Baluki gbọjọ bo jẹ onú dahodaho lẹ dín na ede ji. (Jẹlemia 45:3, 5) Enẹgodo, mẹmẹsunnu Liverance dohia dọ mẹdelẹ lẹkọ sọn Jesu godo bosọ gbẹ́ nugbo gbigbọmẹ tọn, he yin dandannu nado mọ whlẹngán. Yé wàmọ na yé ma mọnukunnujẹ nuhe e to pinplọnmẹ lẹ mẹ wutu, podọ yé jẹflumẹ na nukundido yetọn lẹ ma mọ hẹndi to whenẹnu wutu. (Johanu 6:26, 27, 51, 66) Etẹwẹ mẹdehlan lẹ, he azọ́n yetọn yin nado dọ̀n ayidonugo gbẹtọ lẹ tọn wá Mẹdatọ lọ po lẹndai etọn lẹ po ji, sọgan plọn sọn kandai ehelẹ mẹ? Wehọmẹvi lọ lẹ yin tulina ma nado dín otẹn he yiaga de, nado diyin to gbẹtọ lẹ dè, kavi yí azọ́ndenamẹ yẹwhehọluduta tọn zan nado dín ale mẹdetiti tọn.

“Be Hiẹ Na Yin Nunamẹtọ Kavi Numọyitọ De?” wẹ yin kanbiọ he nuplọnmẹtọ Giliadi tọn Mark Noumair kanse. E ze zẹẹmẹ etọn sinai do Whẹdatọ 5:2 ji, fie Islaelivi dopodopo yin pipà te na yede zizejo nado sẹ̀n to awhànpa Balaki tọn mẹ. Wehọmẹvi Giliadi tọn lẹ yin pipà na gbigbọ dagbe he yé dohia gbọn alọkikẹyi oylọ Balaki Daho lọ, Jesu Klisti tọn, nado tindo mahẹ dogọ to awhànfunfun gbigbọmẹ tọn lọ mẹ dali. Awhànfuntọ Klisti tọn lẹ dona jlo nado hẹn homẹ mẹhe ylọ yé tọn hùn. Mẹmẹsunnu Noumair flinnu wehọmẹvi lẹ dọmọ: “To whenuena mí jẹ tintẹnpọn ji nado hẹn homẹ míde titi tọn hùn, mí nọ doalọtena avùnhiho hẹ kẹntọ lọ. . . . Sinsẹ̀nzọn mẹdehlan tọn ma yin na dewe titi gba. Jehovah, nupojipetọ-yinyin etọn, po ojlo etọn hinhẹndi po go wẹ e gando. Mí ma nọ wà sinsẹ̀nzọn di mẹdehlan na mí jlo dọ Jehovah ni hẹn mí jaya wutu gba, ṣigba mí nọ sẹ̀n ẹn na mí yiwanna ẹn wutu.”—2 Timoti 2:4.

Nuplọnmẹtọ Giliadi tọn Lawrence Bowen penukundo adà hodọdopọ tọn he bọdego he hosọ etọn yin “Lẹ̀ Yé Wé to Nugbo Towe Mẹ” go. (Johanu 17:17) E dohia dọ wehọmẹvi klasi 115tọ tọn lẹ yin lizọnyizọnwatọ klandowiwe Jiwheyẹwhe tọn lẹ. To wehọmẹ lọ whenu, yé sọ tindo mahẹ to lizọnyizọn kunnudegbe tọn mẹ, bo dín wanyina nugbo tọ́ ahundoponọ lẹ. Dile Jesu po devi dowhenu tọn etọn lẹ po basi do, wehọmẹvi lọ lẹ ma dọ ohó ‘yede titi tọn’ gba. (Johanu 12:49, 50) Yé yí zohunhun do ze ohó nugbo gbọdo, ogbẹ̀-namẹ tọn lọ donukọnnamẹ. Numimọ he wehọmẹvi lọ lẹ na po wadohia yetọn vivọ́-basi po do nuyiwadomẹji huhlọnnọ he Biblu tindo do mẹhe yé dọyẹwheho na lẹ ji hia.

Ayinamẹ po Numimọ Tulinamẹ Tọn lẹ Po

Anthony Perez po Anthony Griffin po, heyin hagbẹ Azọ́nwatẹn Sinsẹ̀nzọn tọn, kanhose hagbẹ Wedegbẹ́ Alahọ tọn lẹ he wá sọn otò voovo mẹ lẹdo aihọn pé. Mẹmẹsunnu ehelẹ dọhodo avùnnukundiọsọmẹnu he mẹdehlan yọyọ lẹ nọ pehẹ lẹ ji bo na ayinamẹ yọn-na-yizan lẹ sọn numimọ yetọn titi lẹ mẹ. Delẹ to avùnnukundiọsọmẹnu lọ lẹ mẹ bẹ vogbingbọn aṣa tọn, ninọmẹ aimẹ tọn lẹ to owhe lọ gblamẹ, kavi ninọmẹ sinsẹ̀n po tonudidọ tọn po he gbọnvona dehe wehọmẹvi lẹ ko jẹakọ hẹ dai lẹ hẹn. Etẹwẹ sọgan gọalọna mẹdehlan yọyọ lẹ nado doakọnna lẹdo yọyọ yetọn lẹ? Owanyi na Jehovah, owanyi na gbẹtọ lẹ, jiwinwọn godo go, podọ nuyiwa po sọwhiwhe po. Hagbẹ wedegbẹ́ alahọ tọn dopo dọmọ: “Gbẹtọ lẹ ko nọ̀ otò he mí yin didohlan lọ mẹ na owhe kanweko susu whẹpo mí do yì. Na jide tọn mílọsu sọgan nọ̀ e mẹ bo basi diọdo lẹ. Whedepopenu he mí pehẹ nuhahun lẹ, mí nọ pọ́n yé taidi dotẹnmẹ de nado vọ́ jẹhẹnu mítọn hẹn pọnte. Eyin mì ganjẹ odẹ̀ po gbigbọ Jehovah tọn po go, mì na mọ nugbonọ-yinyin hogbe Jesu tọn lẹ tọn dọ, ‘yẹn tin to mì dè.’ ”—Matiu 28:20.

Samuel Herd, dopo to Hagbẹ Anademẹtọ tọn mẹ, hẹn tito-to-whinnu lọ wá vivọnu po hodidọ lọ po, “Mì to Ohó Azọ́n Huhlọnnọ Jiwheyẹwhe Tọn lẹ Dọ Zọnmii.” Kinkọ̀n jẹgbonu gbigbọ wiwe tọn to Pẹntikọsti 33 W.M. dozolanmẹ na devi Jesu tọn lẹ nado dọ ohó “azọ́n huhlọnnọ Jiwheyẹwhe tọn” lẹ tọn. Etẹwẹ sọgan gọalọna mẹdehlan yọyọ lẹ to egbehe nado dọ ohó Ahọluduta Jiwheyẹwhe tọn po zohunhun mọnkọtọn po? Gbigbọ wiwe dopolọ wẹ. Mẹmẹsunnu Herd na tuli wehọmẹvi he to gbedewema yí lẹ nado “hunzo to gbigbọ mẹ,” nado tindo ayajẹ to azọ́ndenamẹ yetọn mẹ, bo ma wọnji azọ́nplọnmẹ he ko yin nina yé go gbede blo. (Lomunu lẹ 12:11) “Biblu yin azọ́n huhlọnnọ Jiwheyẹwhe tọn de,” wẹ Mẹmẹsunnu Herd dọ. “Mì yí nukunpẹvi do pọ́n ẹn gbede blo. Wẹndomẹ etọn tin to ogbẹ̀. E nọ biọ ahun mẹ sisosiso. Mì yí ì zan nado deanana onú lẹ to gbẹzan mìtọn mẹ. Mì gbọ ni diọ aliho he mẹ mì nọ lẹnnupọn te. Mì basi hihọ́na huhlọn nulẹnpọn tọn mìtọn gbọn nupinplọn, wehihia, po ayihamẹlinlẹnpọn do Owe-wiwe lẹ ji po dali . . . Mì hẹn ẹn zun yanwle mìtọn po gbemima mìtọn po nado yí azọ́nplọnmẹ Giliadi tọn mìtọn zan nado to ohó ‘azọ́n huhlọnnọ Jiwheyẹwhe tọn lẹ’ dọ zọnmii.”

To nudọdomẹ he wá sọn adà aihọn tọn lẹpo mẹ lẹ hihia godo podọ to gbedewema yetọn nina yé godo, gbedewema-yitọ dopo hia wekanhlanmẹ klasi lọ tọn he do pinpẹn-nutọn hia na azọ́nplọnmẹ he yé mọyi. Enẹgodo Mẹmẹsunnu Lett hẹn nuwiwa ayajẹnọ lọ wá vivọnu gbọn alọdindlẹndo 2 Otannugbo lẹ 32:7 po Deutelonomi 20:1, 4 po dali. To tadonahó etọn biblá dopọ hẹ hodidọ bẹjẹeji tọn etọn mẹ, e dotana dọmọ: “Enẹwutu gbedewema-yitọ vivẹ lẹ emi, mì hẹn do ayiha mẹ dile mì jei, yèdọ dile mì to awhànfọ dè biọ awhànfunfun gbigbọmẹ tọn mẹ to azọ́ndenamẹ yọyọ mìtọn lẹ mẹ, dọ Jehovah lọsu na to awhànfọ dè hẹ mì. Mì wọnji gbede blo dọ yé he to mì dè lẹ sù hugan yé he jẹagọdo mì lẹ.”

[Apotin to weda 25]

SỌHA NULINLẸN KLASI TỌN

Sọha otò he mẹ yé wá sọn tọn: 7

Sọha otò he mẹ yé yin didohlan tọn: 17

Sọha wehọmẹvi lẹ tọn: 48

Madozẹnzẹn owhe mẹhodido tọn: 33,7

Madozẹnzẹn owhe to nugbo mẹ tọn: 17,8

Madozẹnzẹn owhe lizọnyizọn whenu-gigọ́ tọn: 13,5

[Yẹdide to weda 26]

Gbedewema-Yíyí Klasi 115tọ Wehọmẹ Biblu Pinplọn Watchtower Giliadi Tọn

To yinkọ he to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.