Kanbiọ lẹ sọn Wehiatọ lẹ Dè

Fie wẹ Daniẹli tin te to whenuena Heblunu atọ̀n lẹ yin whiwhlepọn to boṣiọ blibata he Nẹbukadnẹzali zedai to danfafa Dula tọn ji whenu?

Biblu ma dọ gba, enẹwutu mẹdepope ma sọgan dọ to egbehe fie Daniẹli tin te to whlepọn enẹ whenu.

Mẹdelẹ ko dọ dọ ogántẹn Daniẹli tọn kavi teninọ etọn to Nẹbukadnẹzali nukọn yiaga hugan Ṣadlaki, Mẹṣaki, po Abẹdnego tọn po, podọ enẹwutu, e mayin dandan na Daniẹli nado yì danfafa Dula tọn ji gba. Daniẹli 2:49 dohia dọ e tindo otẹn he yiaga hugan hagbẹ etọn atọ̀n lẹ tọn na ojlẹ de. Ṣigba mí ma sọgan dọ po nujikudo po dọ ehe hẹn ẹn vò ma nado pli hẹ mẹhe pò lẹ to boṣiọ lọ nukọn gba.

To tintẹnpọn nado basi zẹẹmẹ nuhewutu Daniẹli matin to finẹ tọn mẹ, mẹdevo lẹ ko dọ dọ vlavo e ko yì na azọ́ndenamẹ titengbe de kavi dọ e to awutu jẹ podọ enẹwutu ma penugo nado wá. Ṣigba, Biblu ma dọmọ gba. Depope he whẹho lọ yin, nuyiwa Daniẹli tọn ma na ko fọ́n homọdọdomẹgo dote gba, na eyin e wàmọ wẹ, ahọluzọnwatọ awuwhàntọ Babilọni tọn lẹ na ko yí ì zan nado sawhẹdokọna ẹn. (Daniẹli 3:8) Jẹnukọn podọ bọdo nujijọ ehe go, Daniẹli do ede hia taidi tenọgligo-hẹntọ de, bo yin nugbonọ hlan Jiwheyẹwhe mahopọnna whlepọn depope he e pannukọn. (Daniẹli 1:8; 5:​17; 6:​4, 10, 11) Enẹwutu, dile etlẹ yindọ Biblu ma dọ nuhewutu Daniẹli ma do tin to danfafa Dula tọn ji do sọ, mí sọgan deji dọ e yin nugbonọ hlan Jehovah Jiwheyẹwhe mlẹnmlẹn.—Ezekiẹli 14:14; Heblu lẹ 11:33.