Be Hiẹ Flin Ya?

Be hiẹ ko yọ́n pinpẹn zinjẹgbonu agọe Atọ̀họ̀-nuhihọ lọ Tọn lẹ hihia tọn ya? Eyọn, pọ́n vlavo eyin hiẹ sọgan na gblọndo na kanbiọ he bọdego helẹ:

• Naegbọn kanbiọ heyin finfọndote to Job weta 38 mẹ lẹ do jẹna dogbapọnna to egbehe?

Susu to azọ́njiawu he ji Jiwheyẹwhe dọ̀n ayidonugo mẹtọn wá lẹ ma sọgan yin nukunnumọjẹemẹ to gigọ́mẹ etlẹ yin gbọn lẹnunnuyọnẹntọ egbezangbe tọn lẹ dali gba. Ehelẹ bẹ lehe huhlọn nudọnwa odò tọn hẹn aigba do otẹn etọn mẹ do, nuhe hinhọ́n yin na taun tọn, nuhewutu osin-agó wunmẹ susu sọmọ do tin, lehe jikun nọ wleawu do, gọna huhlọn abì tọn hẹn.​​—15/4, weda 4-​11.

• Apajlẹ Biblu tọn tẹlẹ wẹ sọgan gọalọna mí nado duto numọtolanmẹ agọ̀ lẹ ji?

Asafu, Baluki, po Naomi po pannukọn ojlẹ mẹhẹngbọjọ kavi numọtolanmẹ agọ̀ tintindo tọn devo lẹ, podọ kandai Owe-wiwe tọn he dohia dọ yé pehẹ ninọmẹ mọnkọtọn lẹ po kọdetọn dagbe po sọgan gọalọna mí.​​—15/4, weda 22-4.

• Aliho yọn-na-yizan tẹlẹ mẹ wẹ Klistiani asuṣiọsi lẹ sọgan yin alọgọna te?

Họntọn lẹ sọgan gbọn homẹdagbe dali biọ nado gọalọ to aliho he họnwun mẹ. Eyin nuhudo nujọnu tọn tin, hagbẹ whẹndo tọn lẹ kavi mẹdevo lẹ sọgan gọalọ to akuẹzinzan kavi to agbasanu lẹ mẹ. Klistiani hatọ lẹ sọgan sọ gọalọ gbọn họntọnjihẹmẹ owanyinọ de didohia, bo wleawuna godonọnamẹ gbigbọmẹ tọn po homẹmiọnnamẹ po dali.​​—1/5, weda 5-7.

• Naegbọn e do yin onú titengbe nado wlealọ “to Oklunọ mẹ kẹdẹ,” dile 1 Kọlintinu lẹ 7:39 na ayinamẹ etọn do?

Alọwle hẹ mayisenọ lẹ ko nọ saba hẹn nugbajẹmẹji wá. Humọ, ayinamẹ sọn olọn mẹ wá ehe hihodo yin whẹho nugbonọ-yinyin hlan Jehovah Jiwheyẹwhe tọn. To whenuena mí setonuna Ohó Jiwheyẹwhe tọn, ahun mítọn ma nọ gblewhẹdo mí. (1 Johanu 3:​21, 22)​​—15/5, weda 20-1.

• To whenuena e yindọ Jehovah wẹ sọgan jó ylando mítọn lẹ na mí, naegbọn Klistiani lẹ nọ yigbe ylando sinsinyẹn lẹ tọn na mẹho agun tọn lẹ?

Mọwẹ, nuhe Klistiani de dona dín hugan wẹ yindọ Jehovah ni jona ylando sinsinyẹn etọn lẹ. (2 Samuẹli 12:13) Ṣigba kẹdẹdile yẹwhegán Natani gọalọna Davidi do, sunnu mẹho lẹ to agun mẹ sọgan gọalọna ylandonọ he lẹnvọjọ lẹ. Mẹho lẹ dè yìyì tin to kọndopọmẹ hẹ anademẹ heyin nina to Jakobu 5:​14, 15 mẹ.​​—1/6, weda 31.

• Kunnudenu tẹwẹ tin to finẹ dọ mí dona penukundo tọṣiọvi po asuṣiọsi he tin to nuhudo mẹ lẹ po go?

Kandai whenuho tọn dohia dọ awuwiwlena nukunpedomẹgo mọnkọtọn nọ do sinsẹ̀n-bibasi nugbo hia to Heblunu hohowhenu tọn lẹ po Klistiani fliflimẹ tọn lẹ po ṣẹnṣẹn. (Eksọdusi 22:​22, 23; Galatianu lẹ 2:​9, 10; Jakobu 1:27) Apọsteli Paulu yí ayinamẹ he họnwun lẹ do Owe-wiwe mẹ na Klistiani lẹ nado penukundo asuṣiọsi he to nuhudo mẹ lẹ go. (1 Timoti 5:​3-16)​​—15/6, weda 9-​11.

• Etẹwẹ yin họ̀nhungàn lọ na gbẹzan ayajẹ tọn he tindo zẹẹmẹ?

Mí dona wleawuna bosọ hẹn haṣinṣan dagbe de go hẹ Jehovah, Otọ́ mítọn olọn mẹ tọn. Biblu pinplọn yin alọgọ nujọnu tọn de to mọwiwà mítọn mẹ.​​—1/7, weda 4-5.

• Be mẹdopodopo tindo gbigbọ jọmaku de he nọ lùn okú tọ́n wẹ ya?

Dile etlẹ yindọ mẹdelẹ yise dọ gbigbọ wẹ yin jọmaku, bọ e mayin alindọn, Biblu ma nọgodona linlẹn ehe gba. E dohia dọ whenuena gbẹtọ kú, e nọ lẹkọyi kọ́gudu mẹ bo nọ lẹzun matintọ. Ṣigba Jiwheyẹwhe tindo nugopipe lọ nado hẹn ẹn gọwá ogbẹ̀, enẹwutu todido depope na gbẹninọ sọgodo tọn pò to Jiwheyẹwhe si. (Yẹwhehodọtọ 12:7)​​—15/7, weda 3-6.

• Fie wẹ Daniẹli tin te to whenuena Heblunu atọ̀n lẹ yin whiwhlepọn to danfafa Dula tọn ji?

Biblu ma dọ gba. E sọgan yindọ e mayin dandan na Daniẹli nado tin to finẹ na ogántẹn etọn wutu, kavi dọ e sọgan ko yì na azọ́ndenamẹ de. Ṣigba mí sọgan tindo nujikudo dọ ewọ ma gbẹ́ nugbonọ-yinyin etọn hlan Jehovah dai gba.​​—1/8, weda 31.